Kolasib | July 6, 2019: Kolasib a mi harsa zawk te tanpuinan Hranghlui inkhelthiam rual Aizawl G-90's leh Kolasib Football Club ten vawiin khan Kolasib Sports Stadium ah Charity Match an khel.
Inkhelh hma a hun tawi hmannaah Khuallian Pu K Lalrinliana, FCS&CA Minister chuan mi harsa zawk te tanpui nana inkhel thiam rual an rawn pen chhuak chu fakawm a tih thu sawiin midangte tana malsawmna ni tura thil tha tih hi in tih hmuh chi tak niin thil chhunzawm tlak tak ani a ti a. Charity Match hian midangte rilru ah inpekna leh inphalna a pek ngei a beisei thu a tarlang bawk.
Kolasib Football Club Manager Pu Lalfamkima chuan midangte tana malsawmna ni tura inkhelhna hmanga hun remchang a awm chu thil lawmawm tak a ni a, taksa hriselna a tana pawimawh em em mai infiamna chu thalai ten ngai pawimawh se midangte tanpui duh a inkhelthiam rual ke pen chhuak te chuan midangte nun ah chona a pek ngei a beisei thu a sawi bawk.
Charity Match ah hian G-90s tan hranghlui inkhel thiam rual bakah football a mizoram lo ti hmingtha thin tu S Malsawmtluanga, Jerry Zirsanga leh Robert Lalthlamuana te an inlan a, Charity a tan hian G-90s in cheng 10,000/- an hlan a, Kolasib bialtu MLA leh FCS&CA Minister ni bawk Pu K. Lalrinliana chuan cheng 10,000/- hlan bawk in, heng sum hi mipuite sum thawhkhawm nen mi harsa tak tak te tanpui nana hman tur a ni.
- DIPR
Post a Comment
He post chungchanga i ngaihdan lo sawi ve rawh: