Khawthlang tuipui lian vangin chhungkaw 300 chuangin in chhuahsan; Leimin vangin Tlabung khua tlawhpawh theih loh

Aizawl | July 13, 2019: Khawthlangtuipui lian mekin vawiin lamah pawh kam lam a pan loh avangin, tuilian avanga chenna in chhuahsan chhungkua an pung zel.

Tlabung hi tun dinhmun ah chuan eng lirthei mahin a kal pawh thei lo a, lei min nasat avangin ke pawn a kal hleih theih loh a, lei min mai bakah kawng bo hlawk khawp a kawng tlabal te a awm a, kawng thar sial mai ngaihna lai awmte hmun thenkhatah chuan a awm a, hengte avang hian engtia rei nge heng harsatna sukiang tur hian hun a duh ang tih ngaihtuah thiam a har hrih hle a ni.

  

Khawtlang tuipui kama awm, Tlabung leh a chhehvel ah chhungkaw 300 chuang chuan mahniin lum chhuahsanin thawmhnaw hak tur tha pawh nei lovin hmun him an pan tawh niin kan thu dawnna chuan a sawi.

Vawiin tlai thleng khan Tlabung khaw chhungah ringawt tuilian vangin chhungkaw 150 chu hmun him zawkah an insawn chhuak tawh niin an sawi. Hetih lai hian Khawthlangtuipui lian tuar nasa ber thin khaw pahnih - Serhuan leh Tippereghat chu tuilianin a khaw pum deuh thaw a chim tawh a, Tuichawngah chenna in 8 tuilian hian chim tawhin, Nunsury-I leh Silkur-ah pawh chenna in 10 vel ve ve a chim tawh.

Tun thlengin la biak leh kalpawh theih ni lo mah se, Lamthai pawh an khaw awmna a hniam avangin tuilianin chenna in a chim nual tawha rin a ni a, Malsury khuaa Presbyterian Kohhran Biak-In pawh tuiin a chim bawk.

Tlabung leh Sihphirtlang inkarah, Tlabung leh a chhehvel chak lakna kawngpui NH 302 chu hmun 80 chuangah leiminin a hnawh ping nia hriat a ni a, hmun thenkhatah leimin hian kawlphetha lakluhna hrui chu a ban chawpa a hnawl avangin, Tlabung leh a chhehvel khuaa Kawlphetha pe chhuak leh tur chuan ni eng emaw zat nghah a ngai dawn nia thu dawn a ni.


Hetih lai hian Tlabung SDO (C) Pu Henry C Lalrawnkima chuan, Sorkar department hrang hrang bakah, inbiakpawhna signal pe chhuaktu company leh kawng siamtu company-te chu mipuiten harsatna lian tham zawk an tawh loh nan, kawng hrang hranga  an tih tur theuh ti turin a ngen a, dawrkaite chu tuilian leh leimin denchhena thil man tisang lo tura a hriattir bakah, zirna in hrang hrangte pawh tuilian tuarte invawm luhna atana an school theuh hmantir turin a ngen bawk.

Tuilian hian kiam lam aiin zual lam a pan zel avangin chhungkaw engzat nge thiarchhuah la ngai dawn tih hi hriatthiam a har tawh hle a. hetiang reng chuan Mihring himna leh chenna ringawt chu thuhran nise, lirthei tlawhpawh harsa taka an awm avangin ei leh bar lamah pawh harsatna an tawk thuai dawn niin a lang.

Hetih lai hian Power supply chawhluhna line pui hmun engemawzatah a chhe bawk a, Lungsen leh Sihphir inkar ringawtah powet line hi hruai chat bakah thing lianin a vuak hmun engemawzatah a awm a, Sihphir thlanglam ah ban tlu engemawzat awm bawk nia thu dawn a ni bawk a, power supply restore tur pawh inkalpawhna a pin vek avang hian engtia rei nge a duh dawn tun dinhmunah chuan hriat a har hle a ni.

Power Supply a awmloh avangin Mobile tower ten hna a thawk tha lo tan a, mipuiin mobile charge naah harsatna an tawh avangin biak pawh hleih theih an  ni meuh tawh lo a, chanchin thar zel pawh hriat a har ta hle a ni. 

Report dawnna in a sawi dan chuan ruah hi a la  sur reng si avangin tui lian hian zual lam a la pan zel a, hmun him lamah chhungkaw engemawzat thiarchhuah an nih tawh laiin thiarchhuah mai tur chhungkaw engmawzat an awm bawk a ni.