SAIRANG/SIHHMUI VAL RUAL

- ℳapeka ℛalte

Khawvela infiam mite kut ropui ber, Olympic-ah chuan American tlangval tui hleuh chak hmingthang leh ropui chungchuang, Michael Phelps chuan gold 23, silver 3 leh bronze 2, a zavaiin medal 28 zet lain, khawvela infiam mi ropui berte zinga mi a nihzia a pholang a. Sawi nep tum eng ang mah ila, bronze medal 1 lek pawh lak a harsatzia i hriat duh chuan India infiam mi leh sawrkar laipui thuneitute zawt mai rawh. Chutiang chuan record khum rual tawh lova lang siamin, a ram mipuite mai bakah khawvel mipui leh media fak rawn a ni a, a thihtih ropui tak hi khawvel a awm chhung chuan chhinchhiah a ni tawh ang a, tui hleuh intihsiak a awm apiangin he rangkachak tlangval hi hriat chhuah a ni fo tawh dawn a ni.

Kan pu Chuanga khan a boral hmain Sairanga a tuteho kha a fiam țhin a, "Sairangho lah hi, mit sen rumin Tlawng in hleuh a, Olympic-ah te hian vawi khat pawh in chhuak pha ve mang si lo," tiin a nuih țhin.

Tichuan, Michael Phelps leh Sairangho tui hleuh chhan hi ka ngaihtuah dun ta a. Sawi tak ang khan Phelps a chuan intihsiak nan, lawmman lak nan a hleuh a, a hlawhtling a, fak pawh a phu hle a ni. Sairangho ve hi le...

Tu emaw Tlawnga a kal chu a che sual hlauh mai a, tuiah a tla a. A chanchin an hriat veleh, Sairang/Sihhmui mipaho chu a ranga rangin lui lamah an liam nghal sung sung a. An chhungte emaw, an țhiante emaw chu sawi loh, vawi khat pawh an la hmuh ngai loh ruang zawngin, Tlawng tui lian so bulh bulhah chuan, lawmman emaw, hmingțhat emaw sum leh pai emaw, a let lehlam pakhat mah beisei hauh lovin, eng emaw vanga vanduai palh thei an ni tih inhre rengin, mahni nunna thap tak meuh meuhin 'Mizo tlawmngaihna' hmachhuanin tui an hleuh țhin a nih chu mawle!

Hun tiam a awm lo va, thlen chin tur tuk a ni lo va, rangkachak parțhiin a hmuak ve hek lo. Lar leh ropuina turin an thiltihah khawvel mit a fu lo va, thi ve mah se lukhawng a nei dawn hek lo. Mahse, an mitthlaah mitthi chhungte a lang a, an thinlungah țhian chhan thih ngam tih rilru, rangkachak leh lunghlu aia duhawm zawk kha a inphum tlat a, Tlawng lian nu so bulh bulh te chu hlauh a hnekin, chak zawk ang maiin mi ruang zawngin an hleuh ta țhin a.

Khawvel mit ațang chuan atthlak a ni a, Sairang/Sihhmuiho thiltih leh Olympic medal chu buk dawn ta ila, khawvel patla ațang chuan a inbuk rih hleihzia chu mi ang lo tan pawh hriat sa a ni. Mahse, tui tla chhungte lam ațangin thlir ve ta ila, Tlawng nu so bulh bulha an hmangaihte ruang zawnga Sairangho tui hleuh aia hmuhnawm leh ropui chu a awm chuang dawn bik em ni? Olympic medal 100 chuang aiin a hlut loh bikna ka hre pha hek lo.

Olympic-a tui hleuh vanga lawmman la te chuan lawmman leh chawimawina ropui tak dawngin, khawvel mipui fak rawn leh media te titi tui ber ni mah se, helai India hmarchhak kil tawp, Tlawng lui nu so bulh bulh kianga khaw pakhat, Sairang/Sihhmui khaw mipaho tui hleuh chhan hi an phu tawkin fak hlawh ngai lo mah se, kei zawng ka la chhuang ber fo dawn a ni. Fak hlawh lo val rualho hian khawvel mipui leh media te fak hlawh duh vangin an thil țha tih hi an ti si lo va. Tui hleuh chhanah, hei aia tui hleuh chhan ropui leh hlu hi a awm a nih ngai chuan, chu hun chu Tlawng lui a leh luan hun a ni ngei ang....