SEKS HMAN KA HLAU TAWH

- Suzzane Sailo

Hmanni deuh khan ICTC-ah Dr pakhat nen inbiak lawk kan ngaih avangin ka kal a. Biak laklawh a neih avangin ka lo nghak a. Pawn lam ṭhutthlengah chuan ngawi rengin a awmho thusawi ka lo ngaithla a.

Hmeichhe hmel ṭha leh duhawm deuh mai hi a nu nen an lo kal a. A fanu chu HIV positive a ni. Fa a nei a, a fa chu a nuin a enkawl sâk râwt a. Chutiang natna nei ve an hmelhriat nen ka bula an titina aṭanga ka hriat a ni.

Hmeichhe pakhat a lo kal leh a, nu naupai lai mêk, nau nei lek lek tawh tan damdawi a rawn lak sak a. Naupai pasal leh a chhungte chuan a natna an hriatpui lo va. Doctor-in, naute a neih dawnah hrilh vat turin a chah mawlh mawlh a. 

Tlangval tlawntlai ṭha tak leh tleirawl tetê lo kal te pawh an awm. Thinlung a khawih takzet a ni. Khami hmuna ka ṭhutlai khan, ka natpuina kha lang thei ta se, sahrang kan chan ang hian, ka taksa hi chan thla hlawk hlawk se, chûng nen chuan a natdan ka tehkhin.

Chûng ṭhalai duhawm tak takte chuan an natna thupin tuemaw nen lo inkawp ta se..tihte ka ngaihtuah a.  Social media-ah lah inhrechiang tak tak mang lovin, kan inbia in, kan inngaihzawng a. Ralkhata inchhai inchhai ta chu, inthlakhlelhte a lo na a. Inphal mai pawh hi thil awlsam a ni ang. Chutiang ka ngaihtuah phei chuan, kan ram hi heng natna vei kan tam tâk êm avang hian a tu-a-te pawh hi kan insum a ngai dawn hle a ni.

Nupui/ pasal neih pawh a huaisenthlak ta riau. Khing ka vei zawngte khi WhatsApp group pakhatah ka sawi a. Ka hriat aia tam, mak tak tak, rawngbawltu leh khawtlang hruaitute zîngah pawh heng natna hian bu a lo khuar ṭeuh tihte an sawi a. Tin, tleirawl tê tê  kum 14 aṭanga 18-te zîngah bu a khuar nasatzia te, an chhungte leh ṭhianten damdawi an laksak ṭhin dan te... sawisen rual a ni lo.

Hmelah hian kan natna veite hi a lang mai si lo va. Mihring pangngai chuan inngaihzawnna te, tisa châkna te thlakhlelh châng kan nei a. Kan kawpte hi kan hrechiang kilh kelh tawh si lo. Tunlai a kan fashion sâng ta lutuk te, mi neih ang neih ve duh leh awt ve ṭhin ṭhalaite zîngah inzuar an tamziate min hrilh nia. Ka ṭhian pakhat pawhin, an nau kum 15 mi lek a lo positive ve a. "A chhungte a hrilh ngam si lo va. Ka hrilh sak mai chu, a nu mak ti leh rilru na lutuk hmuh kha lainatawm tak a ni,"a ti. Kum 15 chauh!!!

Drugs a inchiu avanga kai aiin seks aṭanga kai an filawr lak a, drugs-a inchiu ṭhinte kaina pawh seks a tam zawk zel. Doctor pakhatin," Mizoramah hian hri angin a lêng mêk a ni," a ti bawk.

Heng hi Social media kan hman thiam tawk loh avang te, hmeh chhuah mai theiha naupangte leh ṭhalaite hmuh tura seks video leh story chhiar tur tam lutuk in a nghawng te pawh a ni thei ang.

A hmel ṭha ṭhate hi an hlauhawm zâwk ta emaw tih turte pawh a awm. Engpawhnise, a kai tawh chu, kai tawh nise, keini lam tal hi him tum hrâm teh ang u.

Ruihtheihthil kan ti lo a nih pawhin, seks lamah kan fihlim miau loh chuan, he natna hian min rûn zel dawn a ang khawp mai. Insûm a va ngai dawn êm!!

(He thuziak a -S-E-X-  chu, server lamin an pawm loh vangin inthiam lo tak chungin seks tia thlak a ni.)

*** I Hun awlah website a fakna hi lo click ve rawh le. ***