Heavy rainfall creates havoc in Serchhip, Thenzawl and mamit

Aizawl | July 13, 2019: Serchhip-ah Leimin leh Leitawlh avanga Chenna In chhuahsan pung zelin, hriat theih chinah chhungkaw 10 in an in luahlai an rauhsan tawh a ni.

Serchhip  Tuikhuah Veng a Leitawlh thin chu, ruahsur nasa avang hian che lehin, National Highway 54 a hnawhping a, JCB in  a khat tawkin  thianfai thin mah se  a chhaklam  atanga  leitawlhin a rawn hnawh leh zel avangin khual zin phur leh lirthei veivak engemawzat  an tangkhanga; Kum hmasa lam atanga Serchhip Tuikhuah Venga leitlahniam pawh che leh in lei tlakhniamna intanna laiah hian lei khi thar awmin, lei hi a tlahniam chak hle a ni.

Serchhip Bialtu MLA Pu Lalduhoma chuan vawiin khan chhiatna thlen dan enpuiin, tihtur tul leh pawimawhte a theih ang ang a ngaihtuahsak nghal a ni.

Ruahsur nasa avang hian, National Highway 44A kawng, Mamit Dist., Dapchhuah khaw thlen dawn a leitan chu a min avangin lirthei kal theih lohin a ping.

PWD Highway division I te chuan Mamit lam atanga kala Dapchhuah lui thlen hma kawng chu a hnuaia kawng thar tur laih anih avangin a tlahniam a, a helna tura kawng an siam thar, leitan chu tunlai khaw cheng avangin kawng pang minin a hnawh phui vek a, ruah ala sur reng avangin leh lei ala chet reng avangin an la thian fai thei lo a; hemi helna tur kawng hlui chu a nal bakah kawng chho lai anih avangin lirthei te chu leilaihna khawl hmanga hnuhchhuah thin a nih thu an sawi.

PWD Highway div I hotute chuan National Highway 44A ah leimin awm dang te chu lirthei kal theih turin an thenfai nghal vek thu leh hmun hran hranah khawl an inchhawp tir thu an sawi.


Thenzawl ah pawh, ruahsur nasa avang hian, mipui nunphung nghawng buaiin, chhun lamah inhlawhfa ṭhin tam zawk te hnathawkin an chhuak thei lova, hna kal lai engemawzat thawh theih lohin a awm mek a ni.

Thenzawlah hian Bazar Building an neih loh avangin Inrinni zingkar apiangin Loṭhazawl khelmual sirah mipui an Bazar ṭhin a. Tukinah pawh ruah a sur reng vangin mipui pawnchhuah a harsa a, tuk dang aiin Bazar an tlem a, chawhmeh leh bungrua, thawmhnaw pho ṭhin tam tak te chu ruah a sur avangin an inpho thei lo a ni. Thenzawl in Bazar Building mumal an nei lo hi mipui ten hrehawm an ti a, Sorkarin a rang lamin Bazar hi sak sak se an duh hle a ni. Hetihlai hian, Kum danga tuilian ṭhin, Thenzawla Lau lui chu kuminah hian a la lian em em lova, tui chim chin erawh a sang sawt hle bawk.

- DD News


*** I Hun awlah website a fakna hi lo click ve rawh le. ***

Post a Comment

0 Comments