Jeremy Lalrinnunga’n record pathum a siam

Aizawl | July 13, 2019: Jeremy Lalrinnunga chuan Commonwealth Weightlifting Championship-ah record thar pathum a siam a; mahse, Nilaithawhtan khan clean and jerk-ah a lang phak ta lo thung.

Pic: IG

Apia, Samoa-ah Commonwealth Weightlifting Championship an nei mek a, Mizo rawlthar Jeremy Lalrinnunga chu 67 kg category-ah India ram aiawh hian a tel a, Youth World record, Asian record leh Commonwealth record awm sa chu a khum hlawm a. Record thar siam tur hian Jeremy hian snatch category-ah kg 136 zet a chawi thei a ni.

Youth Olympics gold medallist Jeremy Lalrinnunga hian a hmain Youth World record leh Asian record a lo siam tawh a, a record siam tawh chu amah bawk hian a khum leh ta a. Kumin April thlaah khan Ningbo, China a Asian Championship an neih tumin snatch category-ah kg 124 a chawi a, clean and jerk category-ah kg 150 a chawi bawk a, record thar hi a siam a. Tun tumah kg 136 chawiin, a record siam sa chu a khum chiang hle.

Mizo rawlthar Jeremy hi clean and jerk-ah a che fuh ta lo a, beisei a pha ta chiah lo a, gold medal a la thei ta lo a. A point hmuhte chu an khawl ang a, Tokyo 2020 qualifying-ah an chhiar tel dawn a ni.

India aiawh rit chawi chakte chu an che chhe hran lo viau a, nimin thleng khan medal paruk an la tawh a, heng zinga pali hi gold medal niin, silver medal leh bronze medal an la tel bawk a ni.

Achinta Sheuli chuan a vaiin kg 305 a chawi thei a, kg 73 category-ah senior leh junior men’s gold a la a. Hetiang bawk hian hmeichhe lampangah kg 76 category-ah Manpreet Kaur chuan kg 207 (91 kg + 116 kg) a chawi a, gold medal a la bawk.

Men:

Elite and junior: 73kg: Achinta Sheuli snatch 136kg, clean and jerk 169kg, total 305kg (gold, gold)

Junior: 67kg: Gulam Navi 116kg, 159kg, 275kg (gold)

Junior and Youth: 73kg: L. Sadananda Singh 124kg, 151kg, 275kg (bronze, gold)

Women:

Elite: 76kg: Manpreet Kaur 91kg, 116kg, 207kg (silver)

Junior: 76kg: R. Arockiya Alish 79kg, 109kg, 188kg (silver)

Source: - Inkhel