THLARAU THIANGHLIM (THLAMUANTU)

“Nangnin mi hmangaih chuan ka thupêkte chu in zâwm ang. Tin, Pa ka dîl ang a, ani chuan Thlamuantu dang a pe ang che u, chatuana in hnêna awm tûrin; chu chu Thlarau dik tak a ni; khawvêlin chumi chu an nei thei lo, amah an hmuh lohva an hriat hek loh avângin; nangnin ani chu in hria e, in hnênah a awm reng si a, nangmahniah chuan a awm dâwn a ni.

-  Johana 14:15‭-‬17.

 “Nimahsela, thu dik tak ka hrilh a che u; ka kal in tân a ṭha e; ka kal loh chuan Thlamuantu chu in hnênah a lo kal dâwn si lo; ka kal erawh chuan in hnênah ka rawn tîr ang. Ani chu a lo thlen chuan sual thu-ah te, fel thu-ah te, rorêl thu-ah te khawvêl an thiam loh a hriattîr ang: sual thu-ah te thiam loh an chang ang, kei mi rin loh avâng hian; fel thu-ah te thiam loh an chang ang, Pa hnênah ka kal dâwna, nangnin mi hmuh leh dâwn tawh loh avâng hian; rorêl thu-ah te thiam loh an chang ang, he khawvêl lal hi thiam lohva a tlûk tawh avâng hian. Johana 16:7‭-‬11.

Mi hringte hi hlauhawm lakah thlamuan kan ngai ṭhin. Isua zirtirte pawh kha mi dang ang bawka thlamuan ngai an nih bâkah, Isuan a kalsan huna an awm dân turte a hre lawk vek a, khawvelah a chanchin hril tura a ruatte an nih avangin, thih thlenga atân rinawm tak an awm theih nân hlauhawm chi hrang hrang karah pawh thlamuang taka an awm theih nan Thlamuantu Thlarau dik tak a rawn pĕk tur thu Lal Isuan a hrilh a ni.

Chu thlamuantu neih theihna Isuan sawi chu - "Nangnin min hmangaih chuan ka thupĕkte in zâwm ang," a ti a. A thupĕk chu chang hmasa lama a sawi tawh, "Keiin ka hmangaih ang che u hian inhmangaih ula," tih a ni. He thupek zawmtute  hnenah Thlamuantu dang Pathian hnenah Lal Isuan a dil ang a, a nin a rawn pe dawn a ni. Mi dang hmangaih hleithei lo tan Thlamuantu beiseiin awmzia a nei lem lo vang.

Thlamuantu kan mamawh:

Mihringte hi suala tlu chhe tawh kan nih avangin kan thlarau chan ve chu hlauhna thlarau a ni. Hlauh ngah mihring kan ni ber e. Rual ban loh te, mi neih ang neih loh te, mi hriat ang hriat ve loh chenin kan hlau a ni ber mai.

Zirtirte pawh kha thlamuantu an neih loh chuan khawvelah chanchin ṭha an hril ngam dawn lo tih Isuan a hria a, thih thlenga amah ṭan ngam tur chuan thlamuantu an ngai ang khan, keini pawh hian Thlamuantu Thlarau dik tak kan mamawh a ni.

Thlamuantu Thlarau Thianghlim min pe:

Lal Isua ring a, a thupĕk zâwmtute chu Thlamuantu Thlarau Thianghlim pĕkin kan awm a ni.

Mi hmuhsit leh nuihzat nih te, ring lo mite hmaa Lal Isua ṭantu nih te hi a  ngamawm loh fo ṭhin. Kristian tihduhdahna lo thlen te hi kan hlau em ni aw a tih theih awm e, BJP sawrkar rĕng kan huphurh mai!

Thih hlauhawmah pawh awm ila, tihduhdahleh hmuhsit te, ṭâm leh saruak pawhin awm mah ila, Lal Isua thupĕk zawmtute tân chuan hlauh tur a awm lo ve, Thlamuantu Thlarau Thianghlim pekin kan awm tawh alawm.

Thlarau Thianghlim chuan Thutakah min hruai lut:

Ni tina kan thu hriat zawngzawngte hi thutak tling lo ava tam em! Thu dik apiang hi a ṭha vek kher lo va, thu hlimawm tam tak hi thu ṭha a tling lo.

WhatsApp Group, Kohhran lam group tam tak pawh hi thutak ai chuan thu ho tĕ tĕ kan hlimpui zawkin alang.

Tun lai hian mobile phone-ah hman lai thil, ramhuai hnathawh ni awm taka an lo ngaih ṭhin an sawi ngaihnawm tia ngaithla ṭhin ṭhalai tam tak kan awm. Heng hi thu tak a tling lo. Setana hi dâwt pa a nih avangin bum hmang a ni.

Tlarau Thianghlim chuan Thutakah min hruai lut ṭhin. Lal Isuan, "Kei hi Kawng leh Thutak leh Nunna chu ka ni," a ti a. Thutak Lal Isuaah mi a hruai lut a, Thlarau Thianghlim hruaite chuan thu ho mai mai leh mi dang tâna ṭhatna tling lo thu chu an khûkpui chiam ngai lo.

Lal Isua leh a Chanchin Ṭha hi thu tak chu a ni a, a thupek zawmtute chu chu Thutakah chuan hruai luhin an awm ṭhin a ni. A hruaitu chu Thlamuantu Thlarau, Paa chhuak dik tak a nih avangin engmahin a tihlau tawh lo va, chatuana a awmchilh dawn avangin chatuanin an thlamuang tawh dawn a ni.

Thlamuanna ka hnutchhiah a che u,

Keima hlamuanna ka pe a che u;

Khawvelin a pĕk angin ka pĕk loh che u hi,

In thinlung mangang suh se,

Hlauh pawh hlau suh se. Joh. 14:27.

- K. Zalawma