Kanghmun South in Serchhip district a awm an duh

Aizawl | June 26, 2019: Kanghmun South khawtlangin Serchhip District a beh an duh thu resolution siamin an passed. Serchhip District a an beh ngei theih nan a tawp thlenga hmalak an tum. Tunkar Inrinni Ni 29.6.2019 zanah Kohhran tinin hemi pual hian ṭawngṭai rualna neih ni se an ti.

    -- Liantluanga Renthlei, Editor, Vantawng Newspaper & DDK Stringer, Thenzawl

         Thawhṭan zan khan Kanghmun South khuaa VC, YMA, MUP, MHIP, Political Party hrang hrang leh Kohhran hrang hrang aiawh te chuan Joint Meeting Kanghmun South Branch YMA President Pu Lalramnghakmawia kaihhruaiin Kanghmun Community Hall ah an nei a. Kanghmun South khawtlang Joint  Meeting chuan - Mizoram Sorkar chak takin District thar a siam chu lawmawm an tih thu sawiin, Kanghmun South chu kawng hrang hranga thlirin, Serchhip District ah awm ngei an duh thu leh, khawtlang mipui, pawl hrang hrang leh Kohhranho duhdan ang ngeia an khua chu Serchhip District ah dah, awmtir turin Mizoram Sorkar an ngen tak meuh a, Kanghmun South khawtlang mipui duh ang ngeia, Serchhip District ah an awm ngei theih nan a tul anga, a tawp thlenga hmalak an tum thu resolution siamin an passed.

         _Joint Meeting chuan, hemi chungchang a ṭul anga bawhzui a, hmala zui zel tur hian Joint Action Committee an din nghal a, Mizoram Chief Minister leh sorkar mi pawimawhte hnenah an ngenna hi thlen a, sawipui nghal ni se an ti a. An hmalakna hmasa atan, tunkar inrinni ni 29.6.2019 zan inkhawmah Serchhip District a an beh theih nan an duhnate Pathian hnena thlen a, Kohhran hrang hrang Biak In tinah ṭawngtairualna neih ni se an ti bawk._

        Kanghmun South khua hi Thenzawl atanga Kilometer 15 a hla, Serchhip aṭanga km 45 vel a hla a awm niin, Sorkar Department 6 - Education, Supply, Health and Family Welfare, Forest, Social Welfare (ICDS) leh Potal services ah te Thenzawl (Serchhip District) hnuaiah an awm mek a, Pawl hrang hrang - YMA, MHIP, MUP leh Football Association ah pawh Thenzawl hnuaiah vek awmin, Kohhran lamah pawh Thenzawl Pastor hnuaiah an awm vek a. Mizoram buaia khaw hrang hrang sawikhawm anih pawh khan, Thenzawlah sawikhawm an ni bawk. An tan hmun hla taka awm District khawpui dawr chu, thingtlang lo nei, khawsak harsa ve tak tak an ni a,  phurrit lian tak a tlin avangin, hun rei tawh tak aṭang khan Serchhip District a beh an duh thu hi an lo auchhuahpui tawh a, Vantawng Group YMA Conference ah pawh tum engemawzat Serchhip District a an awm theih nan hmalak ni se tiin passed a lo ni tawh ṭhin a ni.

        Kanghmun south khawtlang hian tun thlatir Ni. 7.6.2019 khan Thenzawl tlawhtu Chief Minister Pu Zoramthanga hnenah Serchhip District a dah tura ngenna hi ziakin an lo thlen tawh bawk.

         Kanghmun South khawtlang hruaitute chuan, Mizoram Sorkar in mipui duhna leh mamawhna te zah sak a, a tihhlawhtlin sak ngei an ngen thu leh an beisei tlat thu Thenzawla kan palai an hrilh.