Building Regulation siam ṭha turin High Court-in AMC a hriattir

Gauhati High Court (GHC), Aizawl Bench chuan Aizawl Municipal Corporation (AMC) chu AMC Building Regulations, 2012 siam ṭha turin a hriattir.

Mizoram Bar Association (MBA) chuan High Court-ah hian PIL thehlutin, vantlang hmun damdawi-in, sikul leh office tana parking place leh regulation a mumal loh thu an tarlang a ni. 

Hemi chungchangah hian AMC chuan chhanna a pe lo a, AMC ukil-te chu ni 9/7/2019 aṭang hian meeting an neih tur thu leh Aizawl khawpui chhunga on-street leh off-street parking place chungchang an ngaihtuah tur thu an tarlang thung.

High Court chuan state sorkar leh AMC chu damdawi-in leh sikul hawn thar leh tih len turah damdawi-in leh sikul din turten an staff, damlote leh anmahni tlawhtute tana parking place an ram chhungah emaw building huam chhungah an neih leh neih loh finfiah hmasa loa pawmpuina pe lo turin a hriattir a ni.

AMC-te chu AMC Building Regulations, 2012 siamṭha turin Court chuan a hriattir a, hetah hian damdawi-in leh sikulte'n parking place an mamawh an tichiang tur a ni. Parking hmun tur zat hi tihchian a nih hma chuan sikul leh damdawi-in din tura pawmpuina an pek a khap.

Court thupek ang chuan sorkar leh AMC chuan vantlang kawng nekna engmah awm lo turin hma an la tur a ni. Hemi atan hian thuneitu, dan loa insak leh vantlang ram nek 

ṭhiah sak theihna thlenga siamin,  Bawngkawn – Kulikawn main road chauh ni lo, veng chhung kawng tê zawkahte pawh dan lo anga motor parking chungchang hi hre rengin hunbi nei leh regular taka enfiahtu tur squad din chungchangah pawh hma a la tel tur a ni.

MBA hian lirthei intlan chhawk dan thar chungchanga PIL an thehluh rualin he PIL hi an thehlut tel a ni. Tarlan tawh angin, lirthei intlan chhawk bikah chuan High Court chuan intlan chhawk dan thar hi hman a phal a ni.

- Vanglaini