Thla 13 chhungin Vairengte ILP Cell aṭangin ILP 1,15,443 pek chhuah a ni

Aizawl | June 26, 2019: Mizoram Merchant Association (MIMA) chuan, thla 12 chuang hret, nikum May aṭanga kumin June 24 (thla 13 tling lo deuh) chhungin Vairengte-a ILP Cell aṭangin Inner Line Permit (ILP) 1,15,443 pek chhuah a nih thu an tarlang.

MIMA hruaitute chuan Mizoramah hnam dang ILP nei lo hmuh tur an awm reng avangin nimin khan Vairengte-a Police ILP Cell an tlawh. Vairengte ILP Cell aṭang hian May 2018 aṭanga June 24, 2019 thlengin ILP 1,15,443 pek chhuah a nih thu tarlangin, "Vairengte aṭang chauhin thla khat chhungin mi 8,900 vel hnenah ILP an pe ṭhin tihna a ni," an ti.

Vairengte bakah hian, Kânhmun, Bairabi, New Kawnpui, Saiphai, New Delhi, Guwahati, Mumbai, Shillong, Silchar leh Kolkata-ahte ILP pek chhuah a ni 

ṭhin tih sawiin MIMA chuan, "Thla khata ILP pek chhuah a tam dan tur chu nasa tak a ni. Vairengteah deuh chauh hian ILP pek dan computerise a nia hriat a ni a, hei hi eirûkna kawng zau taka hawnna a ni," an ti a; ILP pek chhuah dan chu computer-ah thun luh a, kut ziaka form fill-up mai mai loh ni se an duh thu an sawi.

MIMA tarlan danin, Vairengte ILP Cell tih loh ILP pek chhuahna hmun dangah chuan kut ziakin form fill-up a ni a, sponsor-tu pawh a hming ringawt ziah lan a ni.

MIMA hruaitute chuan, Vairengte-a Taxation department Data Collection Center an tlawh a, "Tun hnaiah Bagha, Lailapur leh a chhehvela sumdawngte'n way bill siam loa Mizoram an lo lut ṭhin hi ṭha kan ti lo. He mi avang hian Mizoramin sum tam tak a hmuh tur chu hmu loin, sum a chán nasa hle a ni," an ti a; dan loin Mizoramah bungrua a lut nasa hlea an hriat thu an tarlang.

- Vanglaini