MZP Sub - Headquarters Thenzawl Zirlai tiṭha chawimawi; Bialtu MLA Pu Lalduhoma'n hmanpui

Aizawl | May 31, 2019: Mizo Zirlai Pawl Sub - Headquarters Thenzawl chuan vawiin khan Joint YMA Hall, Thenzawl-ah Zirlai hlawhtlinna changte chawimawina hun an hmang a, Serchhip bialtu MLA Laduhoma chuan khuallian niin a hmanpui.

He hun hi MZP Sub - Headquarters Thenzawl vice president Lalhmingmawia'n kaihruuaiin,  Zirlai 41; pawl 10 ah mi 11, Pawl 12 ah zirlai 30 an chawimawi a. Hemi bakah hian zirtirtu, an subject laka zirlaite letter mark hmu thei khawpa an taimakna leh thawhrimna chawimawinan zirtirtu 15 hnenah chawimawina hlan a ni.

He huna Khuallian Sechhip bialtu MLA Lalduhoma chuan thusawiin, "Pathianin zirlai thiamtheihna talent a pek, ṭha taka hmangchhuaktute a lawmpui thu a sawi a. Kan nunkawngah hian mi puitling ni tur chuan Talent neih ṭhat mai a tawk lova, taihmakna nen a ṭangkawp ngei ngei tur a ni. Mi thatchhia leh nun uluk lo mi chu Talent nei ṭha mah se, mi hlawhtling an ni ngai lo a ni. Khawvela mi ropui tam tak, Rabindranath Tagore, Bill Gates, Lionel Messi, Sachin Tendulkar, Shakespear leh midang tam tak sawi tur an awm ang. Heng mi te hi mi lehkhathiam tia sawitur an awm hauh lo, an talent neih kawng hrang hrang kha taimakna nen an ti puitling mai zawk a ni. Chuvangin, vawiina zirna a hlawhtling, nakin lawka kan ram rohlu la ni turte in ni a, in zirthiamna talent leh kawng hrang hranga talent in neih te kha in nuna mi hlawhtling ni turin Taimakna nen kalpui tlat thin ang che u", tiin a sawi a ni.

Bialtu MLA chuan, kalkhawm mipuite hnenah hun rei lo te, kum chanve chhung leka Bial chhung tan a hmalakna hrang hrang a tarlang a, Bial tana a hmachhawp hmabak hrang hrangah mipuite ṭawiawmna a ngen a, engtik lai pawha neitu rilru pu zel turin Bial mipuite a ngen bawk a ni.

He hun hi MZP General Headquarters aṭangin general secretary Lalnunmawia Pautu leh finance secretary Andrew F Lalramnghaka bakah MZP Headquarters Serchhip leh MZP hruaitu dangte an hmanpui a. He huna thusawitu Lalnunmawia Pautu chuan, "In thiam zawng, talent leh in tuina in hrechiang tur a ni a, chumi kawng chu thlang ula zawh bawk rawh u. Chumi mahni thiamna haichhuak thiam apiang chu an dingchang ṭhin." tiin a sawi a.

"Ram leh hnam hmangaihna thinlung pu chungin lehkha in zir ṭhin tur a ni. I tan mai ni lovin kan khawtlang, kan ram leh hnam tan ti ṭhin rawh." tia sawiin, "Mizote hi kan dawihzep tur a ni lo. Zirna kawngah pawh nise, huaisen takin lehkha in zir ang. Aizawl ah college i kal a nih pawhin huaisen takin bei la, Mizoram Chief minister Pu Zoramthanga pawh Aizawl khawchhuak a ni bik lo. Mahse, Mizoram pum a awp thei. Huaisen takin bei la, i la ding chhuak ngei ang.

Tin, Ngaihsan tur dik kan hriat a ṭul a, ropuina lem mai mai ah in buai tur a ni lo. Zirlaite hi nakina ram hruaitu turte kan ni a chuvangin Politics hi kan ngaihven tur a ni." a ti bawk.

Thusawitu dang MZP Sub - Hqrs Thenzawl president Lalramliana chuan, Zirlaite hi kan ram nghahfak kan ni a. Kan vanneihna, remchanna Social Media leh ruihtheihthilah te hian kan intichhe tur a ni lova.  Kan hlawhchham thiang lo, Pathian hre chungin taimakna nen hlawhtlinna chang ngei tura bei turin a chah bawk.