SUCCESS STORY: MCS 2019 Topper Laldinsangi

 

Mizoram Public Service Commission in a buatsaih Mizoram Civil Services (Combined Competitive Examination) result may 2, 2019 a a tihchhuah taka Topper Laldinsangi leh exploremizoram.com Founder/editor H Zate inkawmna chu kan lo tichhuak thei ta e.

Exploremizoram.com tana a hun hlu tak hlantu Laldinsangi chungah lawmthu kan sawi a, Mizoram leh Mizo hnam tana fa hrin manhla lo ni zel turin duhsakna kan hlan e.

Dini tia koh thin Laldinsangi hi  C Lalzarzovi leh C Laldina IPS te fa pali zinga a upa ber a ni a. Mission vengthlang, Aizawl-ah an cheng.

 

An unau hi unau chhuanawm, hlawhtling leh entawn tlak tak mai an ni a, Dini chhang chiah C Lalmalsawma MPS hi tunah Kolasib SDPO a ni mek a, chumi nau leh Laldinfeli MCS hi Champhai ah SDC a ni a, anni pahnih hi MPSC exam 2015 khan an tling rual a. An naupang ber pawh tunah hian MZU ah MA History a zir mek bawk.
Dini hian University of Hyderabad atangin Animal Biology -ah Ph.D a zo a. MZU ah Guest Lecturer a ni mek bawk.

Tin, Dini hian Ph.D a ztih lai hian 2016 June ni 23,  khan 8th Congress of Asia and Oceania Society for Comparative Endocrinology (AOSCE) 2016, Korea University College of Medicine, Seoul, South Korea a neih ah a research work "Expression analysis of the c-kit receptor during germ cell development, maturation, recrudescence and after in vivo siRNA silencing in the catfish Clarias gariepinus" chu presentation a nei a. a presentation  han neihna AOSCE 2016 ah hian "Best Presentation Award" a dawng bawk a ni.


Hobby: Hobby han tih deuh bik tur chu ka nei loa, mahse news satire shows leh Crime documentaries en lam hi ka tui khawp mai.


Duhzawng leh ngainat zawng hrang hrangte?
Lehkhabu duh: duh bik sawi tur ka nei lo, ka ngaihnawm tih zawng a inang lo thluah.
Actor/Actress: Robert Downey Jr.
Zaithiam: ka ngaithla kual duah mai
Chawhmeh: tui tih bik ka nei hranlo
Hla : ngainat leh duh bik ka nei lo a tih theih ang, ka ngah a, kan hun tawn zirin a danglam.
Hmun: kan in
Ziaktu: JRR Tolkien
Mizia: min hre chiang tu ten an sawi thiam zawk ang


Thuvawn/Quote: "Lalpa tih hi finna bul a ni" 


 

MPSC MCS topper nih hi i inring reng em? Nih tumin i inbuatsaih em?
- Topper nih em chu inring lo mah ila a inbuatsaih na lam hrim hrim hi chu ka theihpatawp ka chhuah ve.

MPSC exam atana i inbuatsaih dan?
- MZU ah Guest lecturer hna ka thawh kawp avangin time management kha ka tan chuan a pawimawh ber a. class tana inbuatsaih leh exam atana lehkha zir kha a kalkawp a ngai sia, ka zir inchhawk zak zak reng mai. 

-
MCS i ni a, Mizoram tan engtiang a thawh nge i tum a? Tum leh beiseina emaw hmachhawp te i neih chuan.?
- Ka phak ang tawkah rinawm tak leh taima taka thawh ka tum ang.

Zirna, Khawtlang leh Kohhran hi?
- Hei hi chu a mihring a zir ka ti lo thei lo. Inhmang tak chunga tha taka zir thei an awm laiin chutiang a inhmang pah thiam lo chi te pawh awm theih a ni a. Mahni inhriatchian a chumi atanga in siamrem thiam a tulin ka hria.

Kohhran, Khawtlang leh nangmah?
- Hmun dangah lehkha zira ka awmbo rei avangin inhmang tho mahila, nasa taka inhman hi ka la nei mumal lo. Tin, ka exam dawn kha chuan hun a tam lo a, thil ti kawp thiam chi ka nih loh bawk avangin inkhawm pangngai tih loh ah chuan ka inkhung chawt.

Social media leh nangmah?
- Social media hi chu a hman loh tak tak theih loh a, tin, hman thiam chuan thil tangkai tak a ni a. A tangkai leh a hlawk zawnga hman hi ka la inzir nasa khawp mai.

Mizo hnam ṭhanmawh bawk nia i hriat?
- Tam tak sawi tur a awma, mahse a langsar ni a ka hriat pakhat chu mahni hna theuh a tih tak tak na leh rinawmna hi mi tam takin kan tlachham in ka hria. 
  

  

Mizo hnam damna atana  kawng awm nia i hriatte?
- Mahni hna theuh eng pawh ni se, inpekna tak tak leh rinawm taka thawh a tul khawp mai. 

Hnam chhan nana Hmeichhiate ṭangkaina leh mawhphurna?
- Hnam chhan nan hian a hmei a pa in kan pawimawh tlang vekin ka hria a. Tin, kan ngaihhlut leh ngaihsan zawng te a tangkai leh awmze nei zawnga kan thlak a tulin ka hria.

Zofate inpumkhatna  hi a thlen theih i ring em? Thleng thei turin engnge pawimawh nia i hriat?
- Ring e. Inpumkhat tur hian Mizo hnahthlak hnam tin hian inzawmkhawm pawimawh zia hi kan hriatchian a ngaia. Tin, kan danglamna (ethnic identity) te dah tha a inpawm tawn turin kan rilru sukthlek kan her rem a ngai in ka hria.

MZP in ZOFEST a buatsaih ṭhin hian Zofate inunauna kawngah a thawhhlawkin i hria em?
- Kan in unauna leh inpumkhatna kawnga hmasawnna rahbi pawimawh tak niin ka hria.

I thalaipuite tan--- 
- Mizo te hi thil intihhmuh uar tak hnam kan ni a, chuti a nih rau rau chuan thil tha lam hi intih hmuh ila. Entirnan, hnam dang culture te kan ngaisang a, an inchei dan leh zaithiam te, hetiangah hian a pawnlang chauh ni lo, an taimakna leh an thiamna te, an tih tak tak na nun te hi entawn thiam ila. Keimahni chanvo theuh, zirlai kan ni emaw, hna kan thawk emaw, kan tih tur theuh ah inpe tak leh tihtakzet a kan mawhphurhna kan hlenchhuah hi a tul a. Tin, zu leh ruihtheihthil, kan taksa leh rilru ti chhia a kan ram hmasawnna nasa taka dal tu hi nasa lehzuala kan do ngam a tul khawp mai. 

www.exploremizoram.com i hmuh dan: 
- exploremizoram.com hi hi site tangkai leh bengvarthlak tak a ni.


 


_________________

TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt pawh cheng 600 in lei tur a awm bawk e.


Call/ WhatsApp +919615332721







(A hnuaia fakna hi lo hmet ve rawh.)

1 Comments

He post chungchanga i ngaihdan lo sawi ve rawh:

  1. Ka beisei a phalo. Zing dar 2:30 ah hei a link ka dawng hlauh a whatsapp ah, phur lutukin ka lut a. Mahse question set fuhlo nge mawni..ka lo beisei ang a phalo. Ka chhiar chhuak talo mai. Engpawh nise a tha lutuk tho ania, tang zel teh u.

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post