Hla phuah thiam Rev H Lengluta

byAdmin — 4



Mizo rohlu, Pastor leh Hla phuahthiam, Rev H Lengluta hi Kum 1945 May 21 khan Lungleng South-ah a lo piang a. Unau Paruk zinga a naupang ber dawttu niin,  H Vawmkiauva leh B Hniarchuaii te fapa a ni.

 

Rev H Lengluta hi a  nuin a pai laiin Hemphunga Bualpui [Bualpui(H)] atangin Lungleng South ah an pem a. Lungleng khuaa an pem kumah a piang a, Lungleng khuaa an pem kuma piang a nih vangin, Lengluta tih chu a hmingah an phuah ta a ni. Lengluta hian a rawl thar chhoh chuan a hming hi mawi a ti bik lova, len loh lai pawha lenga nih reng mai chu a ti ve thin a ni.

 

A chhang chiah a pian ve chauh tih ah an khaw hlui, Bualpui (H) ah bawk an kir leh avangin Lungleng khaw hming pua a hming an sak ber pawhin lunglenga an awm lai a hre hman bik lova. mahse, Lungleng khua an luh kum hriatreng nan a tha hle a ni.

   
Kum 1953 ah sikul kal tanin, A pawl a zir a, 1954 ah B pawl, 1955 ah Pawl khat, chutiang zelin, Pawl li hi kum 1958-ah a zir bawk.


Kum 1964 khan  V labour-ah a tang a, a hlawh tlemte chu khawlin zirlaibu leh ziak loh bu te a lei a, ME School-ah a in admit ve leh ta a.   pawl ruk, private in a pass a.
 

Lengluta hi naupang te atanga Pathian leh kohhran bel, zai leh lam nuam ti a ni a. Thingsai High School a a kal laiin Pathian pawlna changin a piangthar a. Pawl hnih a nih laiin Bible inchhiar  siak-ah Pawl 2 leh pawl thum zirlaite zingah pakhatna a lo ni tawh. 

 

Kum 1968 khan Bualpui (H) chu Thingsai khuaah sawikhawm an ni a. Hetah hian Thingsai khuaa kohhran chu an fin a, Bualpui (H) ah khan Zaipawl Conductor a lo nih tawh avangin Thingsai ah pawh hian a nihna chu thiam takin an chhawm tir ta zel a ni. 

Rambuai lai a ni a. Thingsai leh Bualpui (H) infin kohhran chu member sang hnih lai an ni a. Mahse, Curfew leh rambuai boruak vangin zan inkhawm chu mi sawmhnih sawm thum lek an nih chang a tam a, chutih hunlai pawh chuan an biak in hla mahse, a inkhawm talh talh thin a ni.


A hnu chuan Bialpui (H) kohhran chu Thingsai kohhran nena infin reng lovin, biak in a hlat em vangin an indang ve ta a.

1968 May thla-ah Thingsai khuaah chuan nupui a nei a, Nula F Lawmthangi nen an innei a. Chhungkua a din ve ta a ni.


1971 January chuan Lengluta chu Kohhran rawngbawltu atan ruat a ni a. 1971 february thla-ah vote 282/286 hmuin Kohhran Upa atan thlan tlin a ni. 

 

1973 June 23 ah a nupui F Lawmthangi'n  a boral san a. A ni nen hian fa pahnih Lalthakimi leh Lalhnehzovi an nei a, a naupang zawk Lalhnehzovi hi hetihlai hian hnute hne lai a ni.
 

A Zaipawl hruaitu a ni a, a nupuiin a boral san tawh a, Kohhran upa a ni bawk. A nupuiin a thihsanin an fa a la sen si a. Thingsai bial inkhawmpui-ah a hovin zaipawl an kal a. Zai turin an kova, nautein a puak loh a duh si lo, mi dangin lak an tumin a duh bawk si lo, chuti chuan, Nau pawh chung chuan zaipawl a hruai ta a. Pu Lengluta chuan, "Nau paw chunga zaipawl hruai awm chhun ka la ni awm e," a ti.
 

Kum 1976 a Lunglawn kohhran in Baptist Church of Mizoram (BCM) Assembly an thlen tumin Assembly palai a ni ve a. chutah chuan, tuna Rev H Lianngaia hian Pathian thu zir  a dil a. Chu chu Assembly in an pawm a.  Chutihlai chuan Mizoram hi UT a hlankai hlim a nih vangin Sawrkar hna a tam a, Mi thiam apiang sawrkarah an lut a, Mizoram UT a nih hnua Bible zir tura inpe hmasa ber a ni.


Chutihlai chuan, Lengluta hian Lunglawn Biak In hnung bera thu chungin a rilruin, "Lalpa, he hna hi kei chuan ka duh ber a ni, Matric chu pass ve ila ka dil ve tur, mahse a ngaihna a awm si lo va," tiin a sawi  mial mial a.

1958 - IV Pass, 1964 ah VI pass. Kum tam tak a chawlh hnu cuan remchang a siamin Kum 1978 ah Matric (pawl 10) private- bawkin a exam a. Pawl sawm a pass ve ta a.

Kum 1980 kumin Eastern Theological College ah bible (B.Th) zir turin a lut a. 1984 April-ah B.Th a zova, May thla in Pro Pastor niin, Paithar Pastor bial a bial nghal a ni. Pro pastor ni siin, bial a vawng a, Serh leh sang a khawih a, pastor hnuaiah a awm lo a ni.

1987 Assembly- Serkawn Biak In-ah Pastor atan nemngheh a ni a.
 

Kum 1988 May 11 khan BCM Lamthuamthum Biak In, Haulawng ah Haulawng nula hmeltha leh hleitling Nula Lalsangzuali nen an innei. 

Pi Lalsangzuali nen hian Fa pathum Gospel chanchinmawii, Rebecca Lalroluahpuii leh Samuel Vanmalsawma te an nei a ni.

 

kum 12 Pastor a nih hnuin BD a zir leh a, Kum 53 a nih kumin BD a zo a ni. 1996 June thla in BD a zir tan a, 1998-ah BD a zo leh bawk a ni. kan sawi tawh angin B.Th leh B.D hi  ETC ah ve ve a zo.

Rev Lengluta hian Pastor hna hi kum 1984 atang khan Paithar Bial atanga tanin, Bial hrang hrangah a awm hnuin Kum 2004 ah Aizawl-ah awmin, Kum 2005 khan a pension a. Mahse, Kohhranin a la duh avangin a rawngbawlna chu kum nga dang pawhseisak a ni a, kum 2010 April 1 thleng khan Pastor hna hi a la thawk a. Dan anga a pension hnuin kum nga chhung a la thawk leh tihna a nih chu.

 

Rev Lengluta hi Pathian tih mi, Thu leh hlaa tui a ni a. Hla pawh a phuah nual a. Chung zingah chuan, a. Ka chhandamtu he khawvela a len laiin, b. Ka han thlir a Vanram ropui, c. Thlir teh kalvari tlang, kan sual thawina hmunsaw, d. Rinin ka han thlir a, Kalvari tlangpui saw, e. Van ropuina kalsanin, f. Nangni thawkrim leh phurrit phute u, g. Pe rawh u, tichua, pekin in awm ang, h. Aw ka nunna, engah nge i kun reng? tih te hi an ni.



Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Tha leh zung leh hun senga website a thu kan dah te hi awlsam taka copy mai lovin, min ngaihhlutsak a, a link min share-sak zawk thin turin kan ngen che u a ni. 
Tags:

4 Comments

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post