LALTHANPARI

(A SHORT STORY OF HARMACHIS ARMAN)

Kawlkulh atanga Ngopa panna kawngpui a chhuak chho chiah chu a hah hle a, a bag ah lian vak lo chu leiah nghatin, a thutna tur chu a bal nge bal lo tih pawh a ngaihtuah peih tawh lo, a thu nghal tawp a. Thlifim a lo thaw heuh heuh a, a pianna khua Aiduzawl lam chu a thlir vang vang a. Chu khua leh a ram vel chu a nun nen inzawm tlatin a hria a, a ngai em a, chuvangin chawlh la meuhvin a pan vang vang a, ni li a cham a, a duh ang zan chuan a fang hman lo na a, a lung erawh chu a awi thaw khat a ni.

A rawmawlin a hmai leh nghawng velte a hru a, chumi pah chuan nunhlui zamual liam hnute chu a ngaihtuah kir a. Minute 20 vel a thut hnuah chuan a tho va, a mawng te a beng fai a, Kawlkulh lam panin zawi muangin a kal a. Kawlkulh lam pan motor chuan a rawn tlan pel leh zauh thin a, mahse motora chuan a tum lo. Hun liam tawha kea a lo kal fona thin kawng chu ke ngeia zawh leh a duh a, tluang taka a kal chuan tlai dar 4 velah Kawlkulh chu a thlen hman a ring a ni.

Chawhnu dar 1 ah chuan chaw fak a tumna hmun chu a thleng ta a, kawngsir ah chuan khiangbuk lian ang reng tak hi a awm a, chumi hnuaiah chuan thuthmun a rem a,a thianpa nupuiin chaw a fun sak chu a phawrh a, a tui pai nen chuan tui ti takin a ei a. Chu laia khiang thing lian ang reng tak ding chu mihring ni sela chuan, kum engemaw zat liam tawha chu lai hmuna thil thleng chu a sawipui tur a ni a, mahse sawipui theih a ni si lo.

Krismas dawnah Aizawl atangin a haw chho va, Kawlkulh chu chawhnu dar 1 velah a thleng chhova, tumah kalpui tur an awm loh avangin kein an khaw lam chu a pan a. Motor lah chu a vang a, mi kal vel pawh an awm hek lo. Chak theih tawp pawhin kal se, an khua chu zanlai ah pawh a thleng hman dawnlo tih a hria a. A tum dan chuan an khaw penna bulah chuan in tlemte a awm a, chutah chuan riah a dil ang a, an remtih chuan zing khawvar veleh kal chhunzawm mai a tum a ni. Tuna chaw a fak mekna hmun a thlen dawn hian kawngsira jeep ding hi a hmu a, a rilru chuan chuan ve dil a rilruk a, chuvang chuan a kal chak sauh va. Chuta a thil hmuh leh a chunga thil lo thlengte chu a ni tunah pawh a ngaihtuah mek a, a mitthla pawha chiang taka ala hmuh chu ni. Chutih lai tak chuan Santro car hi Kawlkulh lam panin a rawn tlan a, a awmna zawn an rawn thlen hma chuan hmana jeep lo dinna hmunah tak chuan a rawn ding a. Lalthanmawia chuan a ngaihtuahna kal lai mek rawn tibuaitu a nih avangin a haw lek lek hman a.A chhung atang chuan nu valai leh pian nalh tak hi a lo chhuak a, kawngpui leh a vel te chu engemaw zawng ni awm tak hian a rawn en kual a. A lam a rawn hawi hma atang pawhin chu hmeichhia chu tunge a nih a hai lo. A chaw ei lai chu a tawp chawt a, makti takin a en ta ringawt a.

“Parte...Lalthanpari ngei i ni si maw......”

Mawia’n Parte a tih chu kawngsir ah a ding a, Saitual lam chu a thlir vang vang a. Chutah a mittui a hru zauh zauh va. Chutih lai tak chuan motor atang chuan a rualpui awm vel nu valai tak, hmeltha tak bawk hi a lo chhuak a, “Thiannu, engnge thil awmzia ni ta?” a rawn ti a.

“A, nunhlui liam hnu, chhungrila liam thei silo....a ni.”

“Engnge a awmzia?”

Partei han in her leh deuh hlek chuan Mawia chu a rawn hmu a, a phu deuh zawk a. Lukhum parh dum a khum a, kawr dum ban tlawn a ha a, jean kekawr a ha bawk a. A hmuihmul leh khabe hmul a zuah buk hle a, a lukhum chuan a chal te chu a hliah vek a, a mit a lang thei che che chauhva. A hmel chu hmuh tur alawi a awm lo.

“Chaw i fak i ni maw? Khawi lama kal tur nge i nih?” a rawn ti a.

“Kawlkulh lama kal tur ka ni.”

“Nangmah chauhvin em ni?”

“Aw ni e.”

“A va khawhar thlak duh awm ve.”

“Nia...”

Motor ah an lut a, engzahnge chuang Mawia chuan a hre lo. An tinung a, an tlan tan a, mahse thui pawh an tlan hmain a rawn hnung tawlh leh a, Mawia zawnah chuan a rawn ding a. Tukverh darthlalang chu a inhawng a.

“Lo chuang ve ta che, Kawlkulh lam pan tur kan nia,” Partei chuan a rawn ti a. Mawia chuan, “A...ka lawm e, mahse ka dip palh ang che u,” a lo ti thuai a. A chaw ei bang chu a fun tha sawk sawk a. An inberawn a nih a ring a, eng emaw an sawiri chu a hria a, mahse engnge an sawi a hre lo.

“Lo chuang ve rawh. Kan nghak che a nia.”

“Min kalsan rawh u. Ti hian kein zawi muanga lokal ka duh zawk a.”

An kal mai dawn emaw a ti a, an kal mai ta si lo va. Partei lo zawk chuan, “ Kan nghak reng che a nia,” a rawn ti a. Chutah zawng a bag a la a, a chawei bang a fun chu a paih a, motor lam chu a pan a. An pahnih chauhvin an lo ni a, mak a ti hle a. A seat hnungah chuan amahin a thu ta a.

“Ka bawlhhlawh bawk si a...” inthlahrung deuhvin a ti a.

“I bawlhhlawh loh kha. Engemaw tawh palh pawha min chhantu tur mipa kan mamawh a lawm,” Partei chuan a ti a. A thiannu chuan ngun zetin a lo en a, dik tak chuan a landan a bumro bawk si a, misual a ni nge ni lo hriat a tum niin a hria a.

“Tun laiah kawng laka lo phartu te pawh hi phurh mai mai loh a him zawk asin. Misual pawh an lo ni thei a, chuvang chuan a nia min tlansan mai ula ka duh a. In rilru ka tinuamlo palh ang tih ka hlau a ni,” Mawia chuan a ti a.

Partei chuan, “Misual i ni lo tih ka thinlung hian a hria alawm. Ih....i aw hi ka hriat hnu a ang a, tuemaw min ngaih zual tir lehnghal. Chuvangin inthlahrung lovin ti khan chuang la, i duh leh muhil la, i duh leh kan titi i ngaithla dawn nia,” a ti a. Tichuan, Partei chuan motor chu a khalh a, an tlan ta nghal a.

Hnunglam enna darthlalang atang chuan Partei chuan a rawn en leh zawk thin a ni tih a mitsirin a hmu a, chu mitmeng chuan a chhungril a fan chhuak vek a. Hit chuaih chuaih hian a in hria a. A hmangaih hmasak ber, chhungkaw dinhmun an inthlauh em avanga a ngawih luih san tak Lalthanpari mitmeng chu a tan a mawi dan ala danglam miahlo a ni tih a hria a ni.

“ Saw laia kan din chhan kha Parte, han sawi teh.”

“A...thawnthu sei tak ang a ni, i ngaithla peih dawn em ni?”

Mawia chu awn deuhvin a thu a, a lukhumin a hmai a hliah tir a, Partei mitmeng leh hmel hmai chu a en nawn ngam rih lo, a ngam mawlh lo a ni. Muhil awm takin a awm ta a.

“Ngaithla peih tehreng mai, han sawi teh.”

“Kan khua Hliappui ( hman deuhah chuan N E Bualpui an ti ) ah dawr kan kai ve a. Krismas dawnah kan jeep in ka pa nen Aizawl ah kalin dawr bungrua kan la a. Kan haw lamah chuan Kawlkulh Hotel ah chaw kan ei a, kan thil ei chu ka pain a ngeih ta lo nge ni, Kawlkulh atanga km 2 vel kan thlen atangin a pum a na ta a, kawthalo pawh a ni bawk si lo va. Kan tlan zel a, mahse ka pa pum na chu a zual zel a, nichina kan dinna ah khan kan ding ta ringawt mai a. Mi lokal vel leh motor kal lah chu a awm reng renglo mai a. Ka thla a phangin ka mang a ang hle mai a. Khua lah chu a thim lek lek tawh bawk si a.”

“Chutia mangang taka kan pafa chauhva kan awm lai chuan tlangval pakhat, Aiduzawl khuaa haw tur hi amah chauhvin a lokal a, ka hmel atangin thil awmzia chu a hre thiam nghal niin ka hria a. Nachhawkna Novalgin a ti niin ka hria, a lo pai hlauh mai a, chu chu mum hnihin ka pa chu a ei tir a. Kan bungraw phurh chu a siam rem a, ka pa chu a mut tir ta a. Rei vak lovah ka pa chu a muhil ta a. Chu tlangval chuan motor khalh a lo thiam leh zel a. Tichuan, kan khaw lam panin min tlanpui ta a.”

“Hming leh chanchin te kan inzawt a, tlangval cher lam lek lek, fit 5 leh inchis 7 vela sang, hnar ngul sang deuh vah, mit veilam tlema zim deuh, hmel pa hrak mai, hmai tung lam deuh, hmeltha tia han sawi tur ni si lo hi a ni a, a hming chu Lalthanmawia a ni. Dik tak chuan kei chu kan khuaa nula hmeltha pawla an sawi ka ni ve a, bakah a khawsa thei pawl kan ni a, Aizawlah lehkha zirin ka awm a, Krismas a nih dawn avangin kan chawl a, ka haw lai a ni a. Kan khuaah chuan tleirawl ngaihzawng an tih ang hi chu ka nei ve tawh a, hmangaih tak tak erawhchu ka nei lo. A ruk tak chuan ka induh ve ang reng a.”

“ Chutia kan khaw lam pana kan tlan mek lai chuan ka pa chu ka en leh zawk thin a, mahse tui takin a muhil niin ka hria a. Mawia lah chu a tawng tlem hle mai a, keimah zawk chu ka tawng bawrh bawrh a. Reilote emaw ka tih laiin kan khaw kawtchhuah kan thleng ta der mai a. A muhil emaw ka tih ka pa chuan, ‘E..kan thleng dawn ta reng mai a, a van lawmawm em,’ a rawn ti a. Khua kan lut zui chu a ni ta der mai a. Ka pa kha a tirah chuan a muhil ngei a, mahse a lo harh leh thuai a lo ni a, Mawia motor khalhah chuan a thla a muang bawk a, a lo muhil der zui a lo ni tih a hnuah min hrilh leh a. Zanah chuan Mawia chu kan inah a riak a, a tukah chuan an khua Aiduzawl ah chuan a haw ta a. Mumal pawhin kan thlah liam ta lo a.”

“Mawia hawn zanah chuan ka pa chuan, ‘Kha, Mawia kha kan tan chuan vantirhkoh a ni ringawt alawm. A haw tur te kha mumal tak pawhin kan thlah ta lo lehnghal a, ka inthiam theilo a ni. Mami nen induh phei sela chuan, man dang pawh phut lovin ka remti nghal mai ang,’ tia fiamthu thawhin kan awmdan vel chu a sawi zui a. Ka nu leh ka unaute chuan mak an ti hle a, Mawia chu an ngaisang hnuhnawh hle bawk a.

“Zana ka mu chu ka khua hi a harin ka lung hi a leng ta em em mai a. Ka muhil theilo a, khum atangin ka tho va, kawmchar luhkapuiah ka va ding a. Thla lah chu a lo eng em em mai lehnghal a. Thla eng hnuaiah chuan Aiduzawl chu ka thlir a, Mawia chu ka ngai ta em em mai a. ‘Kha pa kha mihring a ni lo a niang te ka ti a, a chang leh hmanlaia zawlaidi an tih kha a nei anga, min tat a ni ang te ka ti a. A hmel chu ka mitthla ah a lo lang a, zahzum hmel deuh taka min en paha a nui dak sak lai te chu.....mak tak a ni mak tak. A hmel a thatloh nen engvanga ngai ta viau nge ka nih, kan mangan lai taka min puitu a nih vang a ni ang te ka ti a. Chumi zan chu ka muhil tlem khawp mai.”

EPISODE II

“Chuan, engtinnge ni zel?”

“Krismas dawn tepah ka thiannu nen Kawlkulh lam kawtchhuah ah thing kan phur a. Kan haw lam chuan kan dawr thlen hma dawr pakhat kawtah hian Mawia chu tleirawl pakhat nen hian an lo ding dun ka hmu a. Ani chuan hmuh pawh min hmu ve lo niin ka hria. An thlang lawkah chuan ngawi rengin ka ding a, an inbiakna chu ka ngaithla a. A dinpui tleirawl chu a nau a ni tih ka hre thei a. Buhfai an rawn zuar a, an hralhna pawisa chuan eng eng emaw an lei a ni ngei ang. Ka khawngaih lutuk a, biak ka duh a, ka ngam si lo va, ka thiannu nen chuan kan kal ta zel a. Ka thing phurh ka keuh sawk sawk a, ka tlan let leh a, mahse Mawia te unau chu hmuh tur an awm lo tawh lo va, dawr neitunu ka zawt a, an khaw lam panin an haw leh tawh tih min lo hrilh a.”

“Krismas laiin Aiduzawl khaw mi rawngbawltu kan nei a, a thusawi chu ka ei pawh a ni hran lova, mahse Mawia te khaw mi a nih avangin ka ngaina ve ringawt a. Kan inah chaweiah ka pain a sawm a, chawei khamah rem leh rem lovin Mawia te chhungkaw chanchin ka zawt a. Mawia chu a pa a boral tawh a, a nu hovin a nau nen an pathumin an khawsa a ni tih te min hrilh a. Kan motora kan khaw lam kan pan lai khan inhlawhfa chawpin Aizawl ah lehkha a zir a ni tih a sawi zauh kha ka hre chhuak leh bawk a.....a, hei, Kawlkulh kan thleng chu a ni ta der mai,” a ti a.

Aizawl to Champhai road an zuk pawh veleh Motor chu kawngsir zau laiah Partei chuan a hung fel a. Partei thiannu zawk chuan, “ Ka pu, la kal zel tur nge i nih he tah hian i tawp dawn?” tiin a zawt a. Mawia chuan, “ Aizawl kal tur ka ni a, heta tang hi chuan motor a tam tawh a, ka chhuk san tawh mai ang che u,” a ti a, Partei chuan, “Keini pawh Aizawl pan tur kan ni alawm. I awm ve kha a thlamuan thlak a, chuvangin min chhuk san bik suh. Tirawh, thingpui te in ang,” a ti a. Mahse Mawia chuan, “A, chutia in ruala kal ve zel a rem dawn chuan khi laiah khian hmuh lawk tur ka nei a, in chawlh chhungin ka lo han hmu lawk ang e,” a ti a, a kal ta nghal a.

Hmuh tur a nei lo, dawt a sawi a ni zawk. A rilru a buai a ni. An intawn dan velte Partei sawi chu ngaihnawm a tih rualin hrehawm a ti bawk si a, an chawlhnaa a chawlh ve zel chuan engemawtiin Partei chuan a hre chhuak mai ang tih a hlau bawk si a, chu chu a duh bawk si lo va, chuvanga dawt sawia inthiarfihlim ta chu a ni a. Mahse, an motora chuang zel tura an sawmna erawh a hnar phal bawk si lo.

Khatia motor a khalh sak a, an khua a thlenpui a, a tuka an khaw lam a pan tak ni khan dik tak chuan Partei chu a ngai a, a kianga awm zui zel a chak a ni. A hmel leh pian te, a mizia te chuan a hip a, mahse ani hmeithai fa mai tan chuan phu phak rual loh a ni tih a hria a. An khuaah a awm thei pawl an ni ang tih an in leh lo leh an thil neih leh khawsazia atangin a hre thiam thei a. Naupan lai deuh ngaihzawng te chu a lo nei ve tawh a, mahse thinlung taka vei zui tak tak a la nei ngai lo. Aizawlah lehkha zirin a awm a, nula ho chu an duhawmin an tituai pawh a nalhin an tha hlawm hle a, mahse tumah a thinlung thlenga fan thei khawpa a mit la an awm lo va, awm tir pawh a tum lo, a chhan chu an dinhmun a ngaihtuahin chutiang lama rilru pe thei niin a in hre rih lo a ni.

Partei te hmuh phak loh ah chuan kawng thlang lamah a ding a, Dulte khua vel te, Mualzavata ram vah an tih vel te chu a thlir vang vang a. Partei a tawn leh dan chu mak a ti a, amaha a huhang neih kha a lo la danglam miahlo tih pawh a inhria a ni. Minute 10 vel hnuah chuan a chhuk ta a. Motor chhak deuh ah chuan a ding a, anni pawh rei vak lovah motor panin an lokal ta a. Tichuan, an tlan leh ta a.

“Ka pu, kei hi Ruati ka ni a, ka thiannu, kan driver hi Partei a ni, motor neitu a ni nghal bawk a. Engtinnge kan koh ve ang che?” Ruati chuan a ti a. Mawia chuan, “ Biaka ka ni e,” a ti a. Chutih lai tak chuan hnunglam enna darthlalangah chuan Partei chuan a rawn en a ni tih a mitsirin a hmu a, ani erawh chuan hmu awmlo takin a awm thung a. A aw ri chuan Partei beng chu a verh deuh ni ngeiin a lang a, chuvang chuan a tawng tam duhlo a ni.Ruati chuan, “Engmah pawh i ei ve ta lo a ni awm si a,” a ti a. Mawia chuan, “Ei e, ka han kalna ah khan thingpui leh kawlbahra ka han ei teuh a lawm,” a ti a.

An tlan zel a, anni thian dun chu eng eng emaw sawiin an ti ti dun a. Dulte an pelh hnuah chuan Mawia chuan a hmai chu a lukham hliah tirin, muhil awm takin a awm leh ta a. Ruati chuan, “Thiannu, han sawi zawm leh teh,” a ti a. Partei chuan, “ Eng thleng nge ka sawi kha?” a ti a. Ruati chuan, “Inhlawhfa chawpin Aizawl ah lehkha a zir a ni tih a sawi zauh kha ka hre chhuak leh bawk a.....a, hei, Kawlkulh kan thleng chu a ni ta der mai tih thleng chiah i sawi,” a ti a, Partei chuan, “Va ngei awm tak,” a lo ti hlak a, an pahnih chuan an nui a.

“ Kum a thar a, class kal turin Aizawlah ka chhuk leh ta a. Ni khat chu class kan chawl bawk a,Ramhlun South ah ka thiannute inah ka leng a. Ka haw tur chuan Bus stand ah Bus ka lo nghah lai takin, ka awmna thlang deuha insak lai mekah chuan Mawia chu ka hmu ta a. Rod a tan mek a. Ka en reng a, ka awmna lam chu a rawn en ka beisei tehlul nen, a rawn en miah lo va, Bus a lo thleng ta bawk si a. Ka lawn a, tukverh bulah ka thu a, bus a kal dawn chiah tihah chuan a rawn hawi chhova, kan mit a intawng a, mahse bus a tlan ta si a. Min hmuh rual khan mak tihna a mitmengah ka hmuh rualin, a phu deuh hlekin ka hria a, ka mitmeng atangin eng tak hmu ve ang maw tiin ka ngaihtuah a. Ka rilru ah chuan, ‘Naktuk class banah a thawhna lamah hian ka kal leh ang a, ka hmu leh mahna,’ ka ti a. Zanah te chuan ka mitthla ah a cham reng a. Khatianga hnathawh thuamhnaw nena thlan tla zaih zaih chunga hna a thawk lai kha.....ka lainat a, ka khawngaih bawk si a. Ka vei ang hian min vei ve ka ering bawk si lo. College ah pawh min duh tu te chu ka tawng ve nual a, mahse ka thinlung luahtu tumah an awm lo, Mawia hian a luah tlat a ni.”

“Hetih hunlai hian kan unau thumin Chaltlang dingdi vengah in kan luah a. Zan khat chu mithi lu men a ngai a, ka u kan khuaa a haw lai a ni a, ka nau lah lehkha zir a induh thawh si a. Kei chu zanlai vela haw leh mai tumin, kan thenawm nula Hliri nen kan kal a. Dar 11 leh a chanve vel chiah niin ka hria a. Ka hma lam dinglam sir kil deuh lam chu tum lem lovin ka en zawk a, rinloh deuh maiin Mawia ka hmu ta a. Bang ngheng hian a thu a, a maimichhing a, a hla sak chu a ngaihtuah zui ni ngei hian a lang a. Ka rilru chuan, ‘ Min hmu ve angem le aw?’ ka ti a. Kan hla sak lai chu vawi 3 kan nawn hnuah a tawp ta a. Inneitunu a rawn ding a, an pa boral dan te leh a nat dan te sawi pahin lawmthu te a sawi a. Chutih lai tak chuan Mawia nen chuan kan mit a intawng ta a. A nui deuh sak a, min la hre ve a ni tih ka hria a, chu bakah a mitmeng ah chuan sawifiah thiam theih siloh hi ka hmu a.......” a tih mek lai chuan a thiannu chu a en zawk a, Ruati chu a lo muhil daih mai a lo ni a.

Partei ngawi ta daih chu Mawia chuan a ui hle mai a, Ruati chu la meng sela chuan a hriat chak em em hlir chu Partei chuan ala sawi chhunzawm ngei dawn a ni tih a hre si a. Keifang an pel a, km 2 vel an tlan leh hnuah kawngsirah motor chu Partei chuan a ti ding a. A din rual chuan Ruati chu a rawn harh a. “Awi, ka lo muhil daih a, a van zia lo. I thusawi te kha ka lo mang phan vel asin,” a rawn ti a. Partei chuan, “Min zawt te te a, ka sawi tui dawn chauhva, min mutthilh san leh daih a, a fair lo khawp mai. Keipawh ka mut a chhuak deuh tlat a, chuvangin in phih harh deuh ka duh a ni,” a ti a. Motor atangin an chhuak a, Partei chuan a tui pai chuan a hmai te chu a phih a, Ruati chu a zung a.

An tlan leh dawn chiah tihah chuan Mawia chuan, “ Ka lo khalh chhawk dawn che em ni ka pi? I mut a la chhuah hmel riau si a,” a ti a. Partei chuan, “Zep lovah chuan nizan ka mu tlem a, ka mut a chhuak alawm. Mahse.....” Mawia chuan, “ Lungngai suh, ka khalh thiam a lawm,” a lo ti a. Partei chuan hriat chian loh motor han khalh tir ngawt chu a hreh deuh bakah a khalh thiam tak tak nge thiamin a insawi mai mai a hre si lo va. Chu chu Mawia chuan a lo hrethiam nghal thuai a ni.

Ruati chuan, “Hawh thiannu, a hnungah thu dun ila, mutthluk a rem zawk. Chuan Pu Biaka hian khalh mai se,” a ti a. Thutna te chu an inthlak vel a. An tlan atanga rei vak lovah chuan an pahnih chuan an muhil dun ta a.

Hnunglam enna darthlalang te tak te chu Partei hmel hmuh theih tawk tur chiahin a siamrem a. A khat tawkin a en zauh zauh va, a hmel chu tlemin a lo puitling tawh a, mahse a thatdan chu ala pangngai reng niin a hria a. Englaimahin Partei lak atang hian a thinlung hmangaihna hi ala uire ngai lova, nitin leh zantin hian a theihnghilh ngai hek lo. Chutiang taka a hmangaih ni si chu engatinge a nupui a nih loh?

Nunhlui liam tawh hnu, a thinlunga liam ve thei si lo, nghet taka la cham si chu a rawn thar zual a. A hnung ah, a kiang lawkah a hmangaih em em hmeichhia chu a awm a, tui takin a muhil mek a ni. tun hun takah hian eng ang dinhmunah nge a din, pasal a nei tih chu a hrechiang em em a, mahse fa a nei nge, a pasal nen chuan an la innei nge innei tawhlo tih erawh chu engmah a hre lo. Hriat zui zel a chak thin a, mahse a ngam mawlh ta lo a ni si a.

Inrinni a ni a, Edentharah insakna ah a inhlawh a. Tlaiah chuan kawng chho zet maiah kalin Chaltlang lama a inluah panin a haw chho va, Dingdi veng a thleng chho va, motor kawng pui, Indoor atanga Dingdi veng pan na a pawh chho chiah tih ah chuan Indoor lam atanga Partei lokal nen chuan an intawk a. “E hee,” an ti rual thawt a.

“I bazar em ni Parte?”

“Aw, khi laiah khian chawhmeh ka han lei lawk a. Khawnge i kal?”

“Edenthar ah khuan insakna ah ka inhlawh a. I dam maw?”

“A ni maw. Ka dam. Hawh, saw lai lawk saw kan inluah a ni a, lo leng rawh.”

“A khai, ka bal si, bakah eirawng bawl te ka la ngai a.”

“Chuti lehnghal, kan inah i ei ve nghal dawn nia.”

“Ni love Parte, ka kal zawk ang e.”

Kal mai a tum a, Partei chuan a kut veilam banrekah a rawn man chat a. “Chaw i ei loh pawhin kan inluah chu min hmuhpui tur a ni. Ka unaute pawhin an hmu chak che a, khami tuma kan chunga i thiltih kha kan theihnghilh ngai lo,” tih leh kaih a rual ta a. Mawia pawh a tang zel duh ta bik lo va.

Partei te inluah chu chhawng thum a ni a, chhawng hnihna chu an luah a. A zau thain furniture te chu a nalhin a tha hlawm hle a, Partei nau Chhandami, Damte tia an koh chuan chaw a lo chhum mek a, Mawia nen chuan a inhmelhriattir a.

“Chaw ei ve nghal rawh u Mawi. I Chanchin hi A Pain a khat tawkin a sawi thin a, vantirhkoh i nih te kan ring asin,” Damtei chuan a ti a. Mawia chuan, “ Ni lo ve, ka bal si a, inbual fai thuai thuai ka duh a ni,” a ti a. Kal a tum pawhin an unau chuan an chelh lui tlat a, “Ka u Thanga’n nichin lawk khan a thiante inah chaw a ei dawn tih a rawn sawi a, ka lo chhum kep tawh si a, chuvangin i ei tur a ni,” Damtei chuan a ti a. A ei ta nge nge a.

Rethei, thingtlanga seilian tan chuan mi hausa leh neinung deuh, furniture nalh tak tak nei te ina awm leh lenluh ringawt pawh hi a nuam lo va, chhungrilah insitna leh zahna engemaw tak hi a awm thin a ni tih Partei te unau chuan an hrethiam kher lovang. Chawei kham chuan rei pawh awm lovin a haw ta a. Partei’n thui vaklo a thlah a.

“Mawia, khami nia ka mangan zia leh ka thla i tih muan si zia kha.”

“Parte, sawi nawn tawh teh suh, a zahthlak. tupawh nise, ka tih ang tho khan an ti ang. Ka lawm zawk asin.”

“Khami ni atang khan ka rilruah i awm reng a, hmuh leh che ka chak thin,” zak chung chungin Partei chuan a ti a, Mawia chuan Partei chu a en zawk a, an mit a intawng a, Mawia chu a hawi sawn vat a, “Keipawh.....ka lawm e Parte,” a ti a. An in mangtha zui ta a.

Zanah a han mu a, a mitthlaah Partei hmel leh mitmeng chu chiang takin a lo lang a. Partei mitmeng atanga lo lang, a sawifiah thiam siloh chu engnge ni ang? Engnge a awmzia ni ang tiin a ngaihtuah a ngaihtuah a, a hma pawhin a hmu tawh a, a hik deuh chuaih thei hian a hria a.

Exam an zo va, kar hnih vel inhlawh leh phawt a, chumi hnua an khaw lama hawn a rilruk a. Ban khur an lai a, a chhungah chuan a thawhpui Puia nen an inluh chhawk a. Thirtianga lung a chhun lai takin chhak lam atangin lung a rawn lum lut a, a ngal veilamah a rawn fuh a, a thu nghal hnawk a. Puia chuan midang a pun a, damdawiinah an tlanpui nghal a. Vanneihthlak deuhvin a tliaklo hlauh a. Chutianga casualty kawta an inbuaipui vel lai chuan Partei nau Damtei chuan a lo hmu a, an thiannu pum na casualty ah chuan an kalpui ve a lo ni a.

Chaltlang Tatkawng venga mi inhnuai chep zet mai a luahah chuan a mu a, a ke chuan a tur ut ut reng a. Ei rawng bawl tur pawha chet vel a huphurh avangin Puia’n hmawmsawm a lei sak chu tuisik nen a hmeh a, a puar tawk thovin a inhria a.Chuvangin a hranpaa eirawng bawl pawh a tum ta lo va.

Dar 3 velah tuin emaw kawngka a rawn kik a, chhung lamah a kalh avangin khum atangin a tho va, tiang nen kawngka chu a thleng thei hram a. A han hawn chuan a rinloh deuhvin Partei nen an inhmachhawn a. A rinloh leh beiseiloh lutuk a han hmu chu a phu chiang kher mai. A inluah awmna lai a lo hrilh kher kher te chu a inchhir rum rum a.

Chutianga nula hmeltha leh thianghlim zet mai a thutthlengsei, mi pahnih thut theihna, cushion pawh awm lova a han thu te chu...nuam lo a lo ti a. “Damtei hnen atangin chanchin ka lo hria a, ka rawn kal nghal a ni,” tiin a intihnat dan velte chu a zawt a. Partei haw tur kawngkaa a chhuah dawn lai tak chuan a tum loh deuhvin, “Ka van ngai dawn che,” a ti chhuak palh a. Partei chu a rawn let leh a, “Min ngai ang maw? Tak tak a ni em?” a ti a, Mawia chuan, “A, ka tih palh a ni Parte,” a ti a. Partei chuan, “Han tipalh leh teh, mawh, vawi khat chiah. I sawi leh hma chuan ka kal dawn lo,” a ti ta tlat mai a. Mawia zak lutuk chu a sen tawn tawn a.

“Khawngaihin Parte....”

“Ni e, khawngaihin han sawi leh teh.”

“Min huat phah vaih.”

“Huat phah dawn che ila chuan ka kal daih tawh ang.”

Mawia chu a maimichhing vang vang a, chutah a tum loh deuh a sawi leh ta.

“Ka hmangaih che a ni.”

A meng ngam lo, thawm a reh a. Partei chu a la awm tih a perfume rim atang chuan a hre thei si a, mahse a che lo va, a tawng bawk si lova, a meng ngam bawk si lo. Dimtein kut nel thep chuan a biangah a rawn chul ta a. A taksa pum chu hik chuaih chuaihin a hria a, chu kut nel thep ah chuan duatna hi telin a hria a, chu chuan a taksa ah chuan mak takin nghawng a nei ni ngeiin a hre bawk a.

“Keipawn ka hmangaih che asin.”

EPISODE III

Nunhlui liam tawh mah nise ngaihtuah let leh meuh chuan a tirilah ala khur thei hial a. Kha nula thianghlim leh duhawm tak kha tunah hian a hnung maiah tui takin a muhil mek a ni si a. An in hnaih a, mahse hmuhtheihloh anmahni daidangtu chu engtiang taka thui leh hla nge a nih ang a chhut thiam lo.

Seling dai Custom duty te awmna an thlen lai chuan Partei leh Ruati chu an rawn harh ve ta a. Din lawk an duh thu an sawi a, tichuan, kawngsir zau laiah chuan motor chu a tiding a. Anni pahnih chu an chhuak a, an zi mar vel a. Partei chuan kawr ruam lam chu a thlir vang vang a, thlifim chuan a sam te chu a rawn chhem che siau siau lai chu Mawia chuan hmuhnawm ti takin a thlir reng a. Eng tak ngaihtuah ang maw ti tein a lo ngaihtuah ve mai mai a. Tichuan Seling panin an tlan leh ta a.

“Pu Biaka chu motor i khalh thiam hle mai, chuan a nuam zaih mai. Tuemaw min hriat chhuah tir lehnghal,” Partei chuan a ti a. Mawia chuan, “Tuemaw chu tu tak ni ang maw? Mi pawimawh tak a nih ngei ka ring,” a ti a, Ruati chuan, “Pawimawh tak a ni ringawt,” a lo ti a. Fiamthute an thawh a, an nui a, nui a. A nuri te chu....Mawia tan a mawi dan, a nalh dan a la pangngai reng, a zual zawk mah mah em ni?

Seling Bazarah chawhmehte an lei a, Mawia erawh chuan engmah pawh a lei lo. Motor chu a lo hru fai vel mai mai a. Amah hmutute chuan khum parh a khum a, a hmui hmul leh khabe hmul a sei bawk si a, an melh leh ralh ralh thin a. Mipa naupang pahnih hian piah deuh atang hian an rawn en reng a. Pakhat chuan, “Cowboy a ni chiang ang,” a ti a, pakhat chuan, “Pistol a pai loh saw,” a ti thung a. Mawia nuih chu a za ang reng hle a.

Partei motora a lut tur chu Mawia chuan kawngka a lo hawn sak a, Partei mitmengah chuan mak tihna a lo lang a, “Ka lawm e,” tih leh thut luh a rual a. Ruati pawh a lo hawn sak ve bawk a. An tlan leh dawn chiah tihah chuan, “ Pi Parte, i khalh duh zawk em?” a ti a. Partei chuan, “Aih...a,,,, nangman khalh rawh. A nuam zawk, ka hahdam zawk bawk...” bah deuh lek lek hian a ti a.

“I thil sawi lai kha a chhum bung, ka ngaithla zawm chak,” Ruati chuan a ti a. Partei chuan, “Ka sawi duh tawh lo, min mut thilh san leh ang. Mutthilh san atan chuan ka ui lutuk,” a ti a. Ruati chuan, “Mutthilh san tawh miah lovang,” a ti a. Partei chuan pawn lam chu a thlir vang vang a, a aw a thian a.

“Kan innei ta si lo a......” a ti a, a thaw deuh halh a.

“Chu tak chu alawm mak ka tih,” Ruati chuan a ti a. Partei hmel chu a thutak hle a, a chhungrilah na a awm a ni tih a hriat theih a.

“ A thiamloh ti ila, a insit lutuk vang a ni pakhat a. Kum thum chhung ka nghak a, mahse min ngawihsan tlat si a, ka tan tih ngaihna a awm ta lo a ni. Kawlkulh to Ngopa road viltu PWD SDO chuan min duh ve em em mai a, ka nu leh pa leh unaute a tilawm thiam bawk a, amah a vengva in a fel bawk a. Ka nu leh pa chuan Mawia ka hmangaihzia an hria a, mahse a hnen atangin engmah hriat tur a awm si loh avangin Robert-a chu nei mai turin min ti a. Dik tak chuan Mawia ka neih loh rau rau chuan pasal nei lova awm mai ka duh a, mahse Robert-a khan fing thiam takin ka nu leh pa a hmin a, ka tumloh tawpin a thang kamah ka awk ta a....ka thinlungah hian Lalthanmawia lo hi hmangaih ka la nei ngai lo, ka neih leh pawh ka ring lo.......mahse....a na a ni thian...”

A in sut hraih a, a tarmit chu tlema chawi kangin a mittui a hru a. Amah avanga Partei tawrhna chu tun hi chiang taka a hriatna hmasaber a ni. A thinlung a na a, a tha te a khur a, kawngsir ah chuan a ding ta ringawt a.

“Ngatinge Pu Biak?” Ruati chuan a ti a.

“A...kan zi mar vel lawk ang e,” tih leh motor atanga chhuah a rual a. Motor hnung lamah chuan zawi muangin a kal a, Tuirial Airfield vel chu a thlir vawng vawng a. Thikna, insitna, sum leh pai....vanga Partei nena an inkara thil thleng chu...’ka thinlungah hian Lalthanmawia lo hi hmangaih ka la nei ngai lo, ka neih leh pawh ka ring lo.......mahse....a na a ni’ Partei ka ngei atanga lo ri chhuak chuan a thinlung chu a deng na takzet a, a inchhir a, mahse engmah a sawt tawh si lo. Robert-a chuan engtin nge thang a kam? Engtianginnge Partei nen an inneih theih? Kimchanga hriat a duh a, mahse a hriat belh zel ngam meuh si lo. Motor danga chuan san a duh a, mahse a mawiin a hre bawk si lo.

Motora a luh leh dawn lai tak chuan Partei chuan chik fahranin a lo en tih a hria a, “Pu Biak, i nuam vak lo em ni?” a ti a. Amah ngaihsakna awka, a hmangaih em em atanga a dawn hnuhnun ber tum kha...a va rei tawh em, tunah chutiang ang deuh chu a dawng leh ta a,...

“Nuam e, ka thaw a rawn sa deuh thut a ni,” a ti a.

Bung bangla an thlen lai vel chuan ni chu a tla a, khua a hnim ruai a. Partei leh Ruati chu an ngawi hle hle a, an ngaihtuahna an kawm ve ve ni ngei tur a ni. Mawia pawhin a ngaihtuahna chu a kawm ve tho va, hun kal tawha Lalthanpari leh tun huna Lalthanpari danglamna te chu a ngaihtuah nauh nauh va.

Bawngkawn an thleng a, Durtlang pan chhohna an thlen hmain Ruati chu a chhuk ta a. An tlan leh tan chiah tihah chuan Mawia chuan, “Pi Parte, khawi vengah nge in awm?” a ti a, ani chuan, “Chhinga vengah, nang?” tiin a zawt let a. Mawia chuan, “Chuti chu he laiah hian ka chhuk mai ange aw. Chawlhhmuna awm ka ni a, Taxi ka la mai ang,” tih leh kawngsira motor din tir chu a rual a.

“In veng lam pan chuan tlan zui zel ang Pu Biak.”

“Ni lo e, i tan a hahthlak mai mai. Taxi a tam alawm.”

“Tlan rawh le, inhnial lo mai ang.”

Mawia chuan hnial leh a tum a, mahse Partei hmel a hmuh chuan hnial zel chi niin a hre lo. tichuan Sairang road lam zawh chuan an tlan ta zel a. Chaltlang Dingdi veng zawn, Edenthar veng ni bawk si an thlen chuan Partei chuan, “Pu Biak, kawngsirah khan ding lawk teh ang,” a ti a. Mawia chuan motor chu a din tir nghal a.

“Khi lai khi eng veng nge ni kha?”

“Chaltlang Dingdi veng a ni lawm ni?”

“Chaltlangah hian Tatkawng veng a awm em kha Pu Biak?”

“Aw....awm...a ni lawm ni?”

“ I hming hi Pu Biaka a ni tak tak em?”

“Ni e, engtizia nge?”

“I aw leh che velah hian mi pakhat i ang riauvin ka hria a. I sam a sei a, i hmuihmul leh khabe hmul a seiin a buk bawk a, lukhum parh i khum a, i hmel chiang takin a hmuh theih bawk si lo va. Mahse, i mit pahnih, veilam tlema zim deuh zawk ang kha... mi pakhat mit awmdan chiah chiah chu a ni si a.”

“Kan kal leh tawh mai dawn em niang?”

“Awle.”

An tlan zel a, Sairang road atangin Vaivakawn panin an chho va, Chhangurkawn an tlan pel a, CH.Chhunga Memorial School peng an thlen chuan Mawia chuan, “ Pi Parte, thuilo te kan peng zawk thei angem?” a ti a, Partei chuan, “I duh a thu, a khalhtu i ni si a,” a lo ti a. School Gate zawn chu tlemin an tlanpel hret a. Motor chu a kawngpui lam hawiin a her rem a, kawng sirah chuan a ding ta bawk a.

“Mi pakhat i tih kha i tan a hlu viau em ni Pi Parte?”

“A hlutzia hi sawifiah phak a ni lo.”

“A nih he lai hmun hian engemaw a hriat chhuah tir che em?”:

A hmai a hup a, a insut hraih a, ri chiah lovin a tap ta a.

Chu lai hmunah ngei chuan zan thla eng hnuaiah inthlahlel takin an inpawm vawng vawng tawh a, Partei pasal neih hmaa an intawnna hnuhnung ber a ni dawn tih reng an hre lawk bik lo.

Motor atang chuan a chhuak a, kawngsirah dingin arsite chu a thlir vel a. Chutah hnunglam atangin kut nel thep chuan a pumah a rawn pawm ta a.

“Mawia, ngatinge ka nghak che ka tih mawlh mawlh lai khan min chhan duh loh, mawh, ngatinge?”

“Parte, chhungkaw dinhmun inthlauhna ringawt kha ka ngaihtuah a, i tan a hrehawm dawn emin ka hria a, hrehawm tuar tur ringawta neih che kha ka phal lo a ni. Mahse, ka lo tisual a ni, pasal i neih atang khan ngai ka awh leh thei tawhlo a nih hi.”

“ Kei hian asin ngai awh thei tawhlo chu. Ka tawng leh che hi ka van lawm em.”

“Mahse, a rem tawh si lo.”

An ngawi hle hle a, an ngaihtuahna chu a kal thui dun hle a. Muangchangin motor ah an lut a, Mawia te in lam chu an pan ta a. Kohhran Thianghlim hotupa Dr.Biakmawia in thlen hma lawkah chuan Mawia chuan motor chu a ti ding a.

“Ti hian ka chhuk san tawh ang che aw Parte. Ka lawm takzet.” tih leh motor atanga chhuah a rual nghal a, a bag chu a la chhuak a, Partei pawh motor atangin a lo chhuak a.

“In in thlengin ka thlah ang che.”

“Ni lo ve, i hah mai mai. Nidangah i duh phawt chuan i lo la leng dawn nia. Kan intawn leh dan hi a mak teh thut lutuk a, ka thluak pawh a fim zanlo.”

“A nih leh le. A nih kal rawh, ka thlir liam ang che.”

Veilamah Mawia chu a peng phei a, kawng kawi a thlen dawn lai takin a rawn hawi let a, a kut a rawn vai a, Partei bianga mittui luang chu a rawn hmu pha tawhlo. Partei pawh chuan a bye bye ve a, phurlo zetin motorah a lut a, Chhinga veng lam panin a in khalh haw ta hna hna a.

Kum engzatnge Mawia hmel a hmuh tawh lohva, a awri a hriat tawh loh a chhut let a, kum tam tak ni mai hian a hria a. Vawiina Mawia mitmeng leh hmel a hmuh tirh phat khan a hriat hnu, a hmuh tawh hnu ni ngeiin a hria a, chhungrila natna thuk tak nei niin a hre bawk a. Motor a han khalh a, a chet vel dan te kha a hmuh tawh hnu niin a hria a, Seling an pelh hnu lawka hnunglam enna darthlalanga Mawia mitmeng chik taka a en khan midang ni theiin a hre ta lo kha a ni a.

“Pasal i neih atang khan ngai ka awh leh thei tawhlo a nih hi.” Mawia’n a tih te chu....engtiang takin nge a lo tawrh ve ang? Dik tak chuan Mawia chu thiamloh a chantir a, a dem takzet a ni. Vawi engemaw zat a hmeichhia zawkin zawhna a zawt a, a hmangaiha, nupui atana a duh phawt chuan a nu leh pa pawhin rem an ti tih thlengin a hrilh a, khatiang tluka tlawmna kha awm chuangin a hre tawh lo va.Tu lakah mah khatiang khan a tlawm ngai lova, a tlawm ngai bawk hek lovang. Mahse, chhanna a dawng lo va, a rehin a reh vawng vawng a. Khawi emaw laia hla deuh hleka a kal a hmuh leh zauh thin tih loh chu mumalin a hmu ta miahlo kha a ni a.

In a thleng a, garage ah motor a dah lut a. A ni fanu Puitei chu a lo chhuak vat a, an pahnih chuan an in zui lut a. A inbual a, chaw pawh ei lovin a mu zui ta nghal a. Mahse a mut a chhuak thei mawlh lo a ni.

Roberta chu Ngopa leh Hliappui leh Kawlkulh vel kar tawn deuh reng a ni a, an inah a rawn chuang kai ngun em em a. A felin a hawihhawm a, a ngaihsak thiam bawk a. A duhzia thu a hrilh thin a, mahse Partei chuan frank takin hmangaih a neih thu a hrilh a. A hmangaih chu tunge a nih tih te a chhungte a lo zawt a. Hre vek chung pawhin a kiang duh lo va. tumkhat chu Kawlkulh ah kal a ngai a, a driver chu Ngopa ah a hnutchhiah a, amah chauhvin a ni a. “Min va kalpui lawk rawh, kan haw leh thuai dawn nia. Darkar hnih vel bak kan awm a ngai lovang,” tiin a sawm a, a hnar pawhin a nghak lui tlat a. A nu pawhin, “ I u Robert-a chu va kalpui lawk mai rawh Mami,” a ti ve ta hial a.Tichuan, an pahnihin Roberta motor in Kawlkulh ah an kal ta a.

An haw leh lamah chuan energy drink bur li Roberta chuan a lei a. Kawng sirah dingin bur khat ve ve an in a, rei pawh chawl lovin an tlan leh ta nghal a. Reilote ah Partei mut chu a chhuak ta em em a, a meng lui thei ta ngang lo va. A han harh chuan an khaw thlen hma km 2 vel kawngsirah motor chu a lo ding a, Roberta chu piah deuh hlekah hian meizial zuin a lo ding a. Partei chu motor seat hnungah a lo mu reng mai a. Chutah a serh vel chu na a ti hle mai a. A indap a, a han in en chuan thisen te a lo chhuak a. Chutah chuan thil awmzia chu a hrechiang ta. Roberta chuan a thil inah khan mutchhuahna a telh a, a muthilh hlanin a thianghlimna chu a lo laksakin, nawmchen nan a lo hmang a ni.

A thinrim lutuk chu a tap zawih zawih a. Lalthanmawia chu a ngai ngawih ngawih a, mahse tunah chuan a nupui ni tlak a ni tawh dawn si lo. A chunga thil lo thleng chu a nu a hrilh vek a, chhungkuain ro an rel a, thubuaia lak tur nge ni ang tiin an ngaihtuah a. Mahse Roberta te chu Aizawla mi hlun tak mai leh thiltihthei tak an ni a, thubuaia an lak pawhin eng vak an ang chuang lovang a, an mualphona zakhua mai mai a ni ang tiin an ngawihpui ta a. A vanduaia siamin nau a pai ta tlat mai a. Chu chu hriain Roberta chuan palai a tir ta vat a. A hmangaih berin a ngawihsan daih tawh bakah tunah chuan a tan neih tlak a ni tawh chuang lo bawka tiin Roberta neih chu a remti ve ta mai a. Mahse, thla ruk chauh an in nei hman tihin Kawlkulh daiah motor accident in a boral ta a, rui lutuk chungin motor a khalh vang a ni ber. A nau pai chu a chhiat ta bawk a. Tichuan, Aizawl Chhinga venga an inah chuan a awm ta a, Secretariat ah hna a thawk ta bawk a.

Mawia chu a ngai thin, a ngai takzet thin. Roberta chu ngaihna reng reng a nei lova, a chhungril takah chuan nau a chhiat leh Roberta boral te chu a lawm mah mah zawk a. Nupa nun an hmanin nuam tihna reng reng a nei lova, chakna leh phurna pawh a nei ngai heklo. Roberta pawhin, “Robot mutpui ang chauh i ni,” a ti thin. A dam a, a la thaw a, hna a la thawk thei a, mahse chhungrilah a thi tawh niin a inhria a. Amah kaitho leh theitu tur chu mi pakhat chiah a awm a, chu chu Lalthanmawia a ni. Ni e, chu chu a chianzia Mawia a han hmuh leh chiah khan a hrechiang a ni. Mahse, chung a chanchinte chu Mawia’n hria se engtinnge a ngaih ang? Mawia chu nupui fanau neiin a awm mek nge nei lovin a awm zawk?

A lung a leng a, a khua a har zual a. A tho va, a khum bul tukverh chu a hawng a, Zemabawk te, a aia hla deuha Chalfilh tlang te, a panga Tualbung khuaa electric eng de neuh neuh te chu a thlir vawng vawng vawng a. Mawia chu nupui nei lova a awm a ring tawh lo. A tan khawvelah beisei tur engnge awm? A kuah pawh khan a kuah let ve tawh lo kha a ni a. Amah inlainatna leh khawngaihna avang chuan a tah a chhuak a, mahse thlemtu leh mittui hruk saktu awmlova tah chu....

Mawia pawh a muhil thei lo. A pang kham a let a let a. Partei te ang, nula hmeltha leh duhawm si, neinung bawk si nupuia han neih a, hmeithai ina lawi lut tur chuan a phal lo va, a insit a, chutih mek laiin Roberta nena an kal dun leh motora an chuang dun hmuh zauh zauh chang a nei a, Roberta chu eng hnathawk nge a nih pawh a hria a, chuvangin a cho phak rual loh a ni tih a hre nghal a. Partei nuna inrawlh zui loh mai chu thain a hria a. Mahse, Partei a han tawn leh meuh chuan.....Roberta nen an la innei angem? Fa engzatnge an neih ang? Engtiin nge Aizawlah a awm?Zawhna a in zawt a, a chhan theih pakhatmah a awm si lo.

A tho va, bathlarah thuin zan thim hnuaiah chuan a hawi vel a. Leihrik leh khuangchiri te chu an hram neuh neuh va, an kawmthlang chu ramhnuai a ni mai a, zan pawh a reh hma thei em em thin. Partein a chanchin Ruati hnena a sawi lai te kha a bengah a rawn ri nawn leh a. A thinlung chu chhun angin a na ngawih ngawih a. Partei hmuh leh chu a chak a, mahse mi nupui a ni si a, a tihchi ang nge tih chi loh ang tih erawh a la hrethiam lo.

EPISODE IV

Vawk pahnih an hralh a, an vawk man chu a nu chuan thu chungin a chhiar nawn a chhiar nawn a, a hmelah hlimna leh lungawina a lo lang a, Mawia chuan hnunglam atangin a nu chu a kuah a, “ I hlim hmel hmuh hi nuam ka ti,” a ti a. A nu chuan, “Pathian hi a tha a ni tiraw Bawiha. I Pa la dam ve sela chuan a hlim ve thin ngawt ang,” a ti a. A nu rilru tur chu a hriatthiampui khawp mai.

“Bawiha, tu neih ve tawh ka chak a ni.”

“Nu, ala hmanhmawh thlak hlei nem.”

“ Kum 35 i ni tawh asin.”

“He he he.”

“Partei chanchin hi i hre zui em?”

Kawngka kik ri an hria a, a nu chuan, “Lo leng rawh,” a lo ti thuai a. Kawngka chu a rawn inhawng a, Partei chu a lo lut ta nghal a.

“E hee, Parte, i lo lan teh thut a.”

“ Min sawm hun ka nghah chuan engtikah mah lo lenna hun a awm lovang tih ka ring si a, ka lokal tawp mai a ni.”

“Nu, hei hi Partei chu a nih hi, Parte, hei hi ka nu Lalduhawmi a ni a, Nu Lal tiin ko mai rawh.”

Mawia nu leh Partei chu an in chibai a. Mawia nu bulah chuan Partei chu a thu nghal a.

“Pawisa i van ngah ve nu Lal.”

“Nia, hausa tak ka ni hei. Tun lawkah khan kan vawk pahnih kan hralh a, ah pawh ka ak mai phal lova, ka chhiar nawn chhen mai a nih hi. Khawi vengah nge i awm Parte?”

“Chhinga vengah.Lo la leng ve ang che aw. I la naupan hmel e nu Lal.”

“Ka naupang vak tawh hlei nem. Hei, tu neih ka chak tawh a, Bawiha lah hian nupui tur a hmu zo mang si lova, engtin emaw kan tih dawn ni?”

Eng eng emaw an sawi zui a, mawia a awm ve a ni tih pawh an hre talo emaw tih tur a ni a, an hlim dun phian leh nghal a.

“Ti khan lo inkawm ula, vawk in siam that ngai a awm a, ka zuk siamtha lawk ang e,” Mawia chuan a ti a, tuboh leh perek leh ara nen a chhuahsan ta a. Darkar khat vel hnuah chuan a siam zo va, in lampanin a chho leh ta a. Partei chu a haw tawh a ring a, kawngka a hawn ruala a thil hmuh chuan a ti hrilhhai hle a.

A nu leh Partei chu an lo inkuah a, Partei chu a lo in sut faih faih a. A nu chuan duat taka kut dinglama kuahin a kut veilam chuan a lo chul a. Mawia thawmri a hriat chuan Partei chu a thu tha vat a. A tho va, a mittui a hru a, “Nu Lal, ka kal mai ang aw. A rem chuan ka lo leng leh vat dawn nia,” a ti a. Mawia leh a nuin an chhan hmain chak deuhvin a chhuak ta nghal a. Mawia en zui nachang pawh a hre lova, a hmai hup chunga ngawi renga thu a nu chu a en ringawt a. Zawi muangin a nu bulah chuan a thu a.

“Ka nu, engnge thil awmzia?”

“Awi, ka khawngaih lutuk. Nangma thiamloh vek a ni.”

“Engnge thil awmzia?”

Partei’n a hnena a sawi te chu a hrilh ve leh chhawng a.

“Engmah chanchin chiang kuangin min hrilh ve lo va, min hrilh ni la, khatiang hrep khan hrehawm tuarin a awm lo tur. Ka van lainat tak em. En teh Bawiha, tunah pawh zah pawh dawn lovin a rawn pan che a, dinhmun inthlauh chhuanlamin i ngawihsan leh dawn em ni ang? Kei chuan ka remti dawn hauhlo a ni,” a nu chuan a ti a.

Mawia chu a tho va, bathlarah ngawi rengin a ding a. Partei chanchin chu a ngaihtuah zui a. “Ka nghak che asin Mawia, nanglo hi tumah hmangaih ka nei lo. Khawngaih takin min chhang hram rawh,” tia lehkha a rawn thawn te kha a ngaihtuah let leh a. Hla thu pakhatin a thinlung chu a rawn deng nghal a.

Ka tlinglo a ni Mampui,

Biahthudi nemten min hlan kha,

A chhan ka thiamlo ka tlinglo a ni.

A thinlung chu a na vawng vawng vawng a. Zah pawh dawn lovin an inah a rawn pan a, amah hringtunu hnenah ngei a nun leh a hmangaihna zawng zawng a rawn puang a ni si a.

Aw vawikhat tal dar ang in tawng in,

Pawm lai lungdi thenin aw nangnen;

Kumtluang run lum nuthai chan zai,

Rel ka nuam ngei aw enchimloh.

Chu hla thu chu, Partei thinlung puanchhuahna ni ngeiin a hria a.

Chutah a thawk thut a, pawnah chhuakin Partei kalna lamah chuan hmanhmawh fein a kal a. Kawngpui a thleng a, a hawi vel a, mahse Partei emaw, a car emaw hmuh tur a awm tawh lo. A phone number lah a lo la nei bawk si lova, a thinlung chu so but butin a hria a. A insit lutukna leh dinhmun inthlauhna a hriat lutukna chu chapona chi khat a ni tih thlengin a ngaihtuah a. Kalkawnga an pahnih inkar chanchin Partei sawi te kha a bengah a rawn ri nawn leh a. Partei chu chhete mahin a dem lo, amah chu a indemlo theilo ta zawk a ni.

A kir leh lam chu a zawi zo vek a. In a thlen chuan a nu chuan, “I han hmu hman em?” a lo ti a, “Hman lo,” a ti ringawt a.

“A chanchin a sawi lai chuan a changin a tap a, a sawi hlei thei lova. Keipawh ka insum zo lo. Tiang em ema hmangaihtu che hi kan ngaihsaklo thianglo. Ka remti mawlh lo, Pathian pawh a zahawm lutuk,” a nu chuan a ti mial mial a.

“Ka thiamlo a ni ka nu. Keipawhin amah chauhlo chu vawiin thleng hian tumah dang hmangaih ka la nei lo a, ka neih theih pawh ka ring lo. A pasal nen an la innei emaw ka ti a, chuvang chuan ka ngaihsak ngam tawh lo a ni,” tiin a nu hnenah chuan a inpuang ta a.

Tlaia an nufa thuma chaw an ei lai chuan a nu chuan Partei a khawngaihzia leh a chanchinte chu a sawi leh a. Mawia nau Tluangtei pawh chu a mittui a parawl teuhva.

Khatia Mawia te in atanga a chhuah hnu khan a car awmna a thleng a, tlawm ngawih ngawih hian a inhria a, mahse pawi a ti lo. A hmangaih hmasak ber leh a hmangaih neih chhun la ni reng Lalthanmawia nu hnenah ngei a inhri thla a, chutah duat leh hmangaih takin a lo dawng sawng a, a lo tahpui bawk a. A thinlung chu engemawti takin a zangkhai huai hian a hria a. A car ah a lut a, Aizawl khawpui hnuchhawn zawngin a tlan ta a. University lam a pan a, remchang laiah a car chu a hung a. Amah chauh chuan a vei kual rak rak a. Ni chu a tla a, khawvel a hnim ruai a, a lung a leng a, a khua a har a, insum miah lova tah hawm hawm a chak a, mahse a chhia leh tha hriatna chuan a mawilo tih a hriattir a. A car ah lutin zawi muangin Aizawl lam a pan leh ta a, Mawia te in peng a thlen chuan a ding a, a thlir vang vang a. Mittui parawl teuh chungin zawi muangin a tlan leh ta zel a. Zanah chuan chhin khat te mah a chhinglo.

A nu hnena a chanchin a hrilh khan kawngro su tak ang maw? A hun lokal zel tur thui tak a ngaihtuah lo, Mawia a duhna leh hmangaihna chuan a chim hneh lutuk a, Mawia hmangaihna chu a thlahlel a, a mamawh takzet a ni. An khua ah a neinung pawl an ni a, Aizawlah pawh zahpuiawmlo tak in an nei a, mahse chung zawng zawng chu a mamawh hmangaihna a dawn si loh chuan a tan hlimna leh nawmna thlentu an tling zo mawlh si lo.

A awmpui Puitei chu a pindanah tui takin a muhil tawh tih a hria a. Ani erawh chu a muhil thei lova. Khum atangin a tho va, tukverh a hawng a, ral lehlam chu a thlir vang vang a. Ramtharah chuan mitthi lumenin an zai dap dap a.

Min ngailoten an leng ramthianghlimah,

Kir an rel lo an kal zel e;

Lei hi hnuchhawn ram a lo ni,

Par lai tlaini a liam lung a leng e.

“Mawia, min ngai ve lo em ni?” mittui tla zawih zawih chungin a ti a, chhangtu a awm si lo.

A nunah beidawnna nasa tak a rawn thleng a, khawvela dam zel chakna reng reng a nei lova, pialral famkhawpui tia an sawi thin chu a ngaihtuah neuh neuh va.

“Khawvelah hian ka tan beisei tur a awm ve lo a nih hi,” tiin a ngaihtuah a, intihhlum chakna te chuan a rilru a rawn luah a.

Tah chuan mi suaksualten chawhbuai an bang a,

Chhiahhlawh pawh a pu lakah a fihlim.

Joba bua thihna chungchang sawina niin a hria a, chutah chuan kal ta se, a hahchawl a ngem? A ngaihtuahna kil khatah chuan tap hliam hliam hi awmin a hria a. A dinhmun a ngaihtuah a, mi vanduai takzet niin a inhria a. Khawfing a chat a, kawl a lo eng a, a thinlungah erawh khawfing a chat lo va, kawl a eng thei hek lo. Beiseina chhete a nei a, chu lah chu mei si de vet vet ang chauh hi a ni.

A sahal a, awm ngaihna a hre lo. Zing dar 5 a pel a, bualinah a lut a, tui vawtin a inbual sar sar a. Amaha Roberta sulhnu awmte chu tleuh fai vek a duh a, a duh takzet a ni. Mahse tuisik chuan a tleuh fai theiin a hre si lo. A hmangaih Lalthanmawia’n atana a inpekna leh a hmangaihna te a pawmna chauh chuan tlengfai theiin a ring a, chu lah chu a beisei ngam chiah si lo.

A inbual zo va, a pindanah lutin darthlalang hmaah dingin a taksa ah chuan eng eng emaw a hnawih a. Chutih lai tak chuan a phone chu a rawn eng phat phat a, chu number chu a contact list a awmlo a ni a, zualko lam thil em ni ang tiin a ngaihtuah a. A pick up a.

“Hello,”

“Hello Parte.”

Mawia aw a hriat rual chuan a nghing dawtin a hria a, khumah chuan a thu nghal hnawk a.

“Nang i ni maw?”

“Min ngaidam rawh Parte.”

“Mawia...engtin?”

“Keimah vanga i tawrhna te hi....ka rul seng lovang. Mahse min la pawm thei a nih chuan ka hmangaih neih chhun i ni a..........” an ngawi dun vang vang a, Mawia pawhin a sawi zawm hlei thei lo.

“ I tana tawrh hi ka nun hian a huam zel si a.....Mawia,...”

“Parte, ka hmangaih che asin.”

“..................Mawia...........”

A biangah mittui a luang zawih zawih a, lawmna mittui a ni.

“Parte, min la ngaidam thei angem?”

“Ngaihdam i ngai lo, i insitna thinlung kha ka lakah chuan dah bo la, i hmangaihna ngenin i ke bulah ka bawkkhup mek a ni zawk asin.”

“In in awmna lai min hrilh thei em?”

“Ngatinge?”

“Ka lokal nghal duh.”

Zing dar 7 a ri chiah tihah an doorbell chu a ri tlang tlang a, Puitei chuan kawngka chu a hawng a, Mawia chuan, “ Partei, Lalthanpari te in a ni em?” a ti a. Puitei chuan, “Aw ni e, a pindanah a nghak che,” a ti a.

Partei pindan kawngka chu a hawng a, amah pana lo kal mek Partei nen chuan an inpawm chawt a.

“Parte, ka phulo che.”

“Nang tluka min phu an awm mawlh lo. Tiang hian rawn ti vatlo la chuan.....”

“Engnge a awmzia?”

“Khawvelah engnge dam chhan ka neih ang? Hremhmunah pawh kal dawn ila, damlai khawvel hi kalsan ka duh ang.”

“Ka phal lo.”

“Chuti min ngawihsan tawh suh aw.”

“Ka tan pialral i ni Parte.”

Zing dar sarih, zing boruak thiang takah chuan hun kal tawha an inhmangaihna avanga an tawrhna zawng zawngte elsen nan ti ni awm fahranin an in pawm a, a changin an in fawp a. Khawvelah hian tute nge awm ve tih te, Irag ramah thih chilh bomb puakin mi 34 a tihlum tih te, chumi khami ah ruang an chhar tih te chu an hre lo, an hre mawlh lo. Hmangaihna tuipui ah an cheng dun a, Pathian leh a kohhran hriatpui leh pawmpuina hnuaia pumkhata an insiam hun tur chauh chu thlir chungin, khawchhak lama ni lo chhuak mek chu Partei pindan bula bathlarah chuan inkuah rial chungin an thlir dun a. Hmangaihna chuan an hun liam tawha an tawrhna leh hrehawmna zawng zawng chu hun reilote chhungin a rawn tuam dam vek ni ngei tur a ni, engmah dang an lungkham lo.

A tawp ta. 

( A ziaktu ka hre mai lova, kan dah thei lo.)