NUNPUI

By C. Lalthazuala

Columnist, www.exploremizoram.com

Govt. Aizawl college chu engtizawng pawhin a vawrtawp lai tak a ni mai hian a lang. Zirlai tam zawk chuan zirna lam ai mahin a boruak hrim hrim chu an thlahlel zawk ta hial emaw tih mai tur a ni. He college hmingthang tak mai hi a din tirh phat atangin night shift zan college ang a kalpui a nih avangin mi chitin chitang kal khawmna a ni lo thei lo. Zokhaw lam atanga rawn kal tan pawh chhun lama inhlawh pahin a lo remchang phian a. Tin, chhungkhat leh chhungkhat ni kher lo te bula awm te tan hlei hlei a remchang lehzual ve bawk. A chhan chu nileng in an awmna chhungkuate tan tangkai takin an lo awm theih phah ve bawk a. Zirlai pawh an thahnem ngiang mai, chumi piah lamah sawrkar hnathawk mek, sawrkar pisa a kal mek, la graduate chiah lo, zirna chhunzawm lehzel duhte tan hlei hlei office hnathawh tibuai si lova lehkha zir zawm nan a lo remchang em em mai leh a, chuvangin, sawrkar hnathawk mek te, bik takin thalai rual. He 'Zan college' lungkham buaina laka fihlim ve hmel tak takte nen, mitin mitang kan inchiahpiah hneh hle a ni.

Puipuii Ricardson

 Khawvel tehfung atanga han teh a, dinhmun sang bik lo ve tak chuan, Aizawl khawpuiah meuh pawh college lian leh hmingthang ber pawl tling phak 'Govt Aizawl college' ah chuan ka hringnuna bung thar chu ka han keu ve leh ta chu a ni a. Ka la tawn ngai loh leh hmuh ngai loh deuh hlir mai chu min hual veltu boruak a nih avangin nitin leh zantin mai chuan thil zir tur thar hi ka nei reng mai a ni. Hun leh nite a her zela, Govt Aizawl college-ah chuan 1yr B.A chu ka zo ve ta mai a. Kumkhat zet a her liam hnu phei chuan ka tlangnel ve ta in, college mai bakah Aizawl khawpui hrim hrim pawh nuam ka ti ve ta hle mai a. He college-ah hian mi chitin chitang kan inpawlhsawp tih kan sawi tawh kha. Ka dinhmun aia sang bik lo, ka zawlpui ve te te, a bik takin zokhawlam atanga rawn kal, thawhtur leh inhlawhfakna tur dap chawp, engmah thawhhreh neilo leh inhlawhfa chunga lehkha zirve mekte pawh an kat ve nuk mai. Chutianga ka harsatna ang hmachhawn ve mek ka zirlai puite ka hmuh ve zel avang chuan ka hlim em em a. Huaisenna thar hi nitin ka rilru ah a lo lang fo thin.

 Kum te a lo vei leh chuan II yr B.A chu admission ka tifel ve leh ta reng mai a. Min duhsaktu pawh Pathian zarah ka tawng thar zel a, inhlawhfakna tur pawh ka haihchham bik lem lo. College ah pawh thian tha leh hmelhriat hrim hrim ka ngah ve ta phian bawk a. Hetih hun lai tak hian ka pa u fanu pasal neia Aizawl Republic venga awm mek te hnenah ka khawsa ve a. Anni chhungkua hi Republic vety quarter ah an awm a, anni chhungkua hi min hrechiang em em tu an ni, mi pawh an duhsak hle reng a ni. Chhun lama inhlawhfak leh zan lama class kal chu ka hun hman dan ber chu a ni mai a, nilenga hnathawh hnu a zan lama class han kal leh tho thin chuan, taksa faina leh thuamhnaw lam in uluk sen a har duh thin khawp mai. Class chhungah pawh kan in thla-hrung ru dui mai ni te hian ka hre thin. Chutih hunah tak chuan ka thurin, "Ka Philosophy, ka mihringpuite hlutna neih ang tho chu ka nei ve a ni," tih chuan min chhan tlat thin, awmphung pangngai hloh lo turin min uap tlat thin a ni.

 Zan khat chu kan lecturer pahnih lai mai an lo kal theih loh avangin, ban hun pangngai ai hma fe ah kan bang a. Ka chenna veng Republic vety mual lam pan nghal tuma Sikulpuikawn Bus stand bula ka din lai tak chuan ka thiannu, ka pawlpui nula ho zingah chuan ka kawmngeih deuh ber, Lalnunmawii chuan min rawn au va. A ni hi Aizawl, Ramthar venga In leh lo nei a khawsa an ni a, forest department ah clerk hnathawk mek chungin, he zan college ah hian B.A a rawn zir ve mek bawk a. Nula rualkawm thiam leh hawihhawm tak, induhna leh chapona nei miah lo, mi tute pawh an nih ang ang a pawm thiam leh rilru inhawng tak mai a ni a, kei ngei pawhin kawm nuam ka tiin ka ngaina khawp mai.

 Lalnunmawii'n min rawn auh lai tak chuan nula pakhat, a hmel ka hmuh ngai loh hi a bulah chuan a ding ve reng a. An dinna chu ka dinna lo lam, ka zawn chiah Sikulpuikawn kawngpui sir ve tho, Synod Conference hall luh chhohna sir chiaha Mission vengthlang lam pan thlakna kawng bul chiah, kawngpui hrula "Elvis" Restaurant kawtah chiah chuan a ni a. An dinna lam pan chuan hmanhmawh fe hian ka kal phei  hmawk hmawk a, an bul ka va thlen chuan Manuni (Lalnunmawii kan koh thin dan) chuan "Kan bang hma ve ngawt na in, kan haw thei dawn chuang lo a nih hi. Bus hi a tlan hun pangngaiah tho a tlan dawn a, a kal hmasa zawk kan nang hman lo tingtang si a," tih thu min lo hrilh mawlh mawlh a. Chutia thil min hrilh mawlh mawlh lai chuan min ngam tlak tih hriat tak hian Bus hnuhnung zawk kal hun thleng a an bula awm ve rih tur chuan min ngen ta tlat mai a, ka thiannu ngenna chu kei pawhin hnial ka tum bik lova, an bulah chuan ka ding ve ta reng a.

 Hetih hunlai hian Govt Aizawl college hian Bus pakhatmah a la nei lova. Zan dar riat leh a chanve vela zirlaite haw tur thlah turin Town Bus pali vel college hian hman bik, kum khat atan a nei thin a ni. Heng Town Bus te hi Sikulpuikawn atanga chhuakin Bawngkawn veng thleng va tlan kualin zirlaite an thlah kual thin a. Bus fare erawh zirlaite chawi tur a ni thung.

 Manuni te nena kan dinna chu, "King of Rock: King of Rock N Roll" Elvis Presley-a restaurant kawtah chiah chuan a ni a. Elvis a sakhming chawia restaurant awm hi a vang phian mai thei a ni. He restaurant hi engtiklai pawha Govt Aizawl college zirlai hote luh chhuahna hi a ni ringawt mai a. Ka thiannu Manuni leh a thiannu chuan a chhung lama luh ve chu an rawt avangin keini thianho pawh chu kan lut ve ta nghe nghe a. Restaurant a kan luh ve hnu chuan zirlai lutchhuak vel pawh an tlem deuh pharh tawh a, a chhan chu, tum hnih vel bus in a phurh ho tawh vang a ni. Tin, heng hunlai hian veng hla zual tih loh chu bus ah an chuang ngai hran lo. |hian zaho riahrun lam pan a kea han haw ho dal dal mai te kha thalai rual tan chuan thil nuam tak a lo ni ve reng reng bawk nen. Hemi zan pawh hian zirlai la haw ve lo chu an tlem viau tawh reng a ni.

 Chutia dawhkan khat kil a kan han thut ho tak hnu chuan ti ti khawchangte kan sawi ho chho ta a. Chhungkaw engzat nge an nih thute chu ka sawi tur haihchham chuan ka han zawt ve ta ngawt a. A ni chuan unau pali an nih thu leh unau zinga upa ber an nih thute min hrilh bakah, an unau chu mipa leh hmeichhia inkar hlaka piangin mipa pahnih leh hmeichhe pahnih an nih thute, a pa chu Presbyterian Kohhran Pastor a nih thu mai bakah a nu chu Govt High School zirtirtu a nih thute chuan min chhang let a. A tawng zawngte chuan hmel hlim tak a pu a. Mitmeng chiai lo leh huai takin min rawn en a. Ka lam a rawn hawi tlat bawk a. Thil sawi pah chuan min melh ran mai a, a nui seih seih bawk a. A nuih zawngin a ha rual mawi tak leh var thianghlim ser sawr rawn lang deuh ziau ziau thin te chuan zuk leh hmuam lamah a fihlim hle tih a pholang chiang viau bawk. A ni chu a nu Govt High School zirtirtu a nih avangin kei teh thlawt ai chuan a dinhmun chu a tha hle ang tih ngaihtuahna chuan ka rilru a rawn luah nghal vat a. Ka pa ngei pawh Presbyterian Kohhran Pastor a nih ve tho thu erawh ka hrilh ta lem lova, hrilh ngai pawh ka ti hrih lo. Kan chhungkaw chanchin min zawh chian ve hma in ka thiannu Manuni chuan ti ti khawchang dang daih a rawn vawrh ta bawk nen, chumi zan chuan keima chanchin leh kan chhungkaw chanchin chu ka hrilh ta phawt a ni.

 Chutia kan tawng mawlh mawlh lai chuan Bus chhuak hnuhnung ber tur chuan a horn a ti ri ruai ruai mai a, zirlai la awmchhun te pawh chu hmanhmawh fe hian Bus kawngkhar ah chuan an lut zung zung bawk a. Ka thiannu Manuni leh a thian rawn hruai thar Lalnunpuii nen pawh chuan Bus dinna lam chu kan pan ve ta nghal a. Bus chhungah chuan an han lut ve zet na a, a khawl lam a lo chian chiah loh avangin minute 10 vel zet chu Driver leh conductor te chuan an han siam leh hrih a. Chumi chhung chuan anni thian dun pawh chu Bus atanga rawn chhukthla leh rih in Elvis Restaurant kawtah chuan kan han ding ho leh ren rawn a. Bus Driver chuan zirlai mitmei a veng deuh a, an ning mai ang tih a hlau deuh nge ni Bus engine an enfel chhung zawng chuan Tape recorder bus chhunga mi chu a play reng bawk a. "Ka thiante nen chuan sap zai mawi tak kan ngaihthlak reng avang chuan titi khawchang engmah kan sawi chhunzawm lem lo. Chumi zan chuan hla mawi tak tak kan ngaithla a, chung zingah chuan Phil Collins a hla "One more night" tih hla mawi dangdai tak mai chu kan ngaithla a, kan ngaihthlak lai chuan, ka thian chhar thar chuan mawi a tih zia thu a sawichhuak a, "Mawi i ti ve em?" tiin min zawt ta sap mai a, rang takin kei chuan "Ti ve tehreng mai," tiin ka lo chhang let var a, chu zawng chu kan thil sawi chu a ni tawh mai.

 Chumi zana thla eng chu a mawi dangdai kher mai. Arkai den zan tak mai hi a ni a, Sikulpuikawn leh a bul vel reng reng chu thla eng chuan a chhun eng no deuh nghulh mai a, a fiah deuh kuk mai bawk nen, ka thian nu chhar thar chu thla eng no nghulh mai hnuaiah chuan engnge maw ti tak hian a lang mawi lehzual sauh hian ka hria a. A lang nu hnap a ni ber mai. Thla eng fiah kuk mai chuan a sam dar vaw deuh hnap mai chu a ti tle deuh seng a ni ber mai. Kan vawikhat inhmuh na mai a ni a, ka thiannu Manuni thian a nih avangin ka mit a la ru hle a ni. Mahse, a mit ti kham zawnga awm chu ka tih hauh loh tur a ni ngei ang, hmeichhe laka a engamah hma a mit hawkdak viau nih te chu thil tha a nih ka ring bik lo. Hmeichhe tam tak chuan mit tla lek lova anmahni en ching, mipa mit hawkdak takte hi an ngeiin, an ngaithei lo tlangpui thin a. Kei pawh ka thiannu thian nu leh chhawng hian min ngei mai ang tih chu ka hlau ru ve tho mai a, hmeltha tiru hle mah ila, en ngawih ngawih reng mai chu thil mawi pawh a ni hran lo. Thil tih dan tur phung pawh a ni lem lo tih pawh ka hai bik lo. Mahse.... a mak em a ni tih mai loh chu sawifiah thiam ngaihna pawh a awm lo. Chuti taka ka vawikhat hmuhna mai lehnghal a  hmeltha ka ti nghal em em mai leh ka thinlunga engemaw ti taka min fan a, min hneh nghal a, ka thinlung luah nghal tlat thei tu hmeichhia chu. Chumi zan chuan tunhma lama ka hringnun a thil la thleng ngai reng reng lo a lo thleng ta tlat mai le.

 Tichuan, Bus chu kal leh thei tura a khawl an siam that leh hnu chuan, ka thiannu Manuni leh Nunpuii chu Bus chhungah chuan lut ve leh in Khatla kawn lam pan chuan Bus chu a tlan liam ve leh ta nghal a. An tlan liam tak hnu chuan kei pawh chu muangchangin ka awmna veng, Republic vety mual lam pan chuan ka liam ve ta nghal a. Ka rilru leh ngaihtuahna chu a kal ding hle mai a, hmun hrang hranga vak darh erawh a ni hauh lo. Manuni thian rawn hruai, ka hmelhriat thar, tunhma lama ka la hmuh ngai reng reng loh nula nungchang that hmel zet bulah hlir chuan a vak kual vel ani ber mai. He nula ngaihtuah chung reng a ka kal ta chu, In ka thleng hma riau emaw tih mai tur a ni, In ka thlen meuh chuan Dar 10 a ri tep tawh a. Ka tihdan pangngai ang bawk in ka zirlai bu tlem te tal chu chhiar ka han tum leh zet na a, ka thei lo chu a ni ber e. Chu ka thian nu chhar thar ringawt mai chuan ka rilru a luah avangin ka lehkha chhiar ah ka ngaihtuahna ka sawrbing hleithei lo a ni ber mai, hetiang em em hi chuan tunhma lamin hmeichhiain ka ngaihtuahna ka rilru hi a la kuai her ngai tlat lova, an la tibuai ngai hek lo. Tin, pianphunga thian ngaina mi tak ka lo ni ve reng reng a, rual khatah chuan thian ngah pawl tak pawh ka nih ka ring. Mahse....he zan kher kher a ka thiannu chhar thar in min deh dan hi chu a dang bik zar mai le.

 Lehkha han chhiar turin ka rilru ka sawrbing thei bawksi lo. Mut mai zai chu ka rel ta thuai a. Mu chunga zan rei tak thleng muhil mai thei lova ka thian nu chhar thar chu ka ngaihtuah leh reng hnuah ka muhil ve ta nge nge a. A tuk khua chu a lo var a, ka harh rual rual chuan ka rilru chu ka thiannu chhar thar bawk chuan a rawn luah leh nghal vawng vawng mai a. Eng amah hma chuan lunglenna ruk eng emaw tak chuan min zem chiai mai bawk nen, hmeichhie pakhat vawikhat chiah ka la hmuh chuan in tibuai rilru hle mai. College lama kal leh thuai thuai ringawt mai chu ka rilru ah a awm ber mai bawk a. Ka thiannu chhar thar hmel hmuhnawm tak mai hmuh leh thuai thuai mawlh mai chu ka chak et et mai a ni. Zan hmasa lama a hmel ka hmuh dan leh a thuamhnaw inbel te chu ka mitthla ah a cham tlat mai bawk a, chutiang taka ka rilru chenchilh tlattu leh rawn awp bet nghaltu hmeichhia chu a ruk tak chuan ka ngaisang ru kher mai le. Zingkar eirawngbawl leh inchhung tihfai velte chu ka nuam tih zawng tak pawh a ni bawk. Zing khua a lo var a eirawngbawl pah chuan ni chhuak eng mawi tak mai te chu ka thlir leh vawng vawng mai thin a. Nizan lama ka thiannu ngainat em em Manuni min hrilh dan kha chuan a hming chu Lalnunpuii(Nunpuii) a ni a. Zirtiri Women College ah BA II yrs a zo chiah a. Govt Aizawl College lamah English Subject a BA (Hons) rawn zir zawm turin admission a rawn la ve a lo ni a. Hetih lai hian English subject bikah  BA (Hons) an college ah chuan a zir theih  loh a ni awm e. "Arkai den" zan thle eng hnuaia kan intawn hmasak ber tuma a inthuamna thawmhnaw ka mitthlaa chamzui tlat reng mai chu hei hi a ni. Levis Jeans kekawr paw dang, a eng (Bright) deuh mah mah hi a ha zaih mai a. T-shirt var thianghlim ser sawr, a hmalam leh a hnung lam engmah inziak awmlo hi a ha bawk a. Tin, Jacket rawng chi hnih a chei, a ban ve ve sen uk hlang leh a dang zawng dumpawl, a mawi tawk chauh va uk deuh hret chu a ha bawk a. Tin, sneaker pheikhawk ver thianghlim taka bun bawk. Bengbeh erawh a beh lova. Amaherawhchu, a tul thut a beh nan a ti nge ni, a beng chu verh sa a ni thung. Tin, Elvis Restaurant chhungah inhmatawn in dawhkan kan kil tlang kha a ni a. A inthuamna thawmhnaw te'n a khuh phak tawh loh a taksa lang laite chu ka hmuchiang viau a ni. A dik tak chuan a kut phah bawr ringawt pawh chu thil hmuhnawm a tling takzet a ni. A ban rek leh a kut phah bawr lo lang te chu a thianghlimin a hmuhnawm kher mai. A kutphah bawr hnung lam vun te chu han chul sak ta ila chu a nel thep ngei ang tih chu a hriat reng mai a, engtiklai maha Mizopa, hna hram chi hrang hrang la thawh pui ngai loh leh thawh nana la hman ngai loh a ni tih a chian mai bakah, baibing hnai leh lamkhuang hnai ten an la hnim hnai ngai lo tih a chiang hle bawk.

 Ka mitthla a cham reng mai chu a sam dar vaw hnap mai kha a ni. A buang theng mai a, a ngil tha seng sawng hle lehnghal a. A kim tlang han sawifiah dawn ta ila "A mawi tawk chauh va hmai tung, hnar ngil mawi tak mai leh chal arh deuh hlek, khabe phir a ni a. Vun ngo, tisen nei sawk, a bahsam buan vang nge ni, alang ngo paw phak mai a. Tin, a sakhmel lan dan atang chuan a hrisel hmel hle bawk a, chu mi piah lamah, a hawi her hrim hrim pawh a ti zawk zawk lo na a, zangkhai tak a ni. A hmel landan hrim hrim mai bakah a  mitmeng fiah kek kawk chuan zahawmna a keng tel ru tlat bawk. San zawng ah chuan ft 5.4 vel a nih a rinawm a, nulian ti a sawi tur chu a ni hauh lova, nute takte a sawi tur pawh a ni chuang lo. Ka mitah chuan amah chu engtizawng pawh in a mawi tawk hle a ni.

 Tukthuan te kan ei fel hnu chuan kan kawmthlang lawka pa khawsa thei tak Pu Kapthuama te thing ek a inhlawhfa tur ka ni a. Zokhawlam atanga motor a phurh haw thing pum, uipum tiat leh a aia lian te chu thirkhen nen nilengin kan ek phel phawk phawk a. Zokhawlam atanga lo kal an nau hnaivai tak, a hnena cheng ve mek thahrui nei zet mai nen chuan hemi ni hian thing eh hautak zet mai chu kan bei dun a ni. Tlai lam a lo ni a, kan hna chu bansanin, kan in bualfai hnu chuan ka thawmhnaw neih mawi hnai ve ber nen college lam chu ka pan ve leh ta hnak hnak a.

 Nunpuii ringawt ngaihtuahna a khat tlat chung chuan college lam chu ka pan ve leh ta hnak hnak chu a ni. Sikulpuikawn ka han thlen chiah chuan ka thian nu Manuni leh Manuni zar ka thian nu chhar thar Nunpuii chu a hma zan chiah a kan inhmuhna "Elvis Restaurant" kawtah chiah chuan an lo ding dun hi ka va hmu a. Anni erawh chuan min hmu ve lo thung. Nizan lamah kha chuan ka thiannu Manuni khan min rawn hmu hmasa in, min rawn au hmasa zawk a nih kha. Tichuan, an dinna lam chu ka pan phei ruak ruak a, "In va thleng hma ve," tih pah chuan an bulah chuan ka va ding ve ta nghal a. Nunpuii pawh chuan mi nel hmel ve tawh tak mai hian min lo nuih ve sen sen bawk a. Chumi zan chu Nunpuii nen kan vawihnih inhmuhna tur chauh a la ni a, mihring pianphung mizia han inzir chian sakna hun pawh a la awm lo. Mahse, a nui hmel mawi tak leh a mitmeng mawi tak ringawt pawh chuan mi a hneh tawk em em mai si a. A pianphung leh a sakhmel mawi tak, nu hnep mai leh thinlung bawlhlawh a awm theih ka ring lo takzet a ni.

 Hemi zan, kanin hmuh tum hnihna zan tak hi chuan a hma chiah zan ang taka inkawmna hun a awm thei ta lo. Manuni nen chuan in classmate kan nih avangin class chhung lamah pawh kan la inthurual zel a, class pawh kan nei mar tluan hle a. Nunpuii erawh kan chung hret, BA (Hons) a nih avangin a tlahrang lo thei si lova. Hemi zan hian a chanchin pawh kan va hriatpui thei bik lo a ni. Inpawl rual chu ni ila class chhung leh pawn lamah kan inhmu tam thei deuh ngei ang. Ka thiannu Manuni te nena veng khata cheng ho, class kal lam leh haw lam inthurual chawt an nih vang erawh chuan kan inhmu reng ang tih chu thil beisei awm tak a ni. Ka beisei ang neiin a hnu zelah pawh kan inhmu chho ta reng thin a. Rokhawlhna eng emaw tak a awm a nih loh chuan zantin mai hi inhmuhna hun remchang kan nei thei ziah a, kan inkawp ho chho ta zel a, kan in zui ho chho ta chawt a ni ber mai.

 Nunpuii avangin Govt Aizawl College chu nuam ka tiin ka thlahlel ta ngawih ngawih mai a. Class off chang leh class tan hma te, class ban tawh si, mahni chenna veng leh In lam pana kan la tin darh hma deuh si, hun hlu tak mai te chu ka thlahlel ru thin kher mai. Amah Nunpuii pawh chuan Manuni ang mai chuan min nel ve thuai a, kan in pawh em em bawk a. Kan zaithiam tih zawng leh kan music ngainat zawng te thlengin a inmil em em a. Chubakah kan sawi duhzawngte pawh a inang riau mai a. Chutiang thil vangte chuan kan rilru a inmilin kan inthurual dun thei hle. Class kalna leh college tual vel leh a chhehvel mai pawh nilo, college week leh college picnic na ah te thlengin kan inkawp tlang ta chawt a, keiin nuam ka tih thin zia chu sawi pawh a ngai lo. A dik tak chuan ka thiannu Manuni hlei hlei chuan nuam a tiin ka hria. Nunpuii pawh chuan nuam a ti ve takzet niin ka hre bawk.

 Ka thiannu Manuni chu sawrkar hnathawk chunga class rawn kal a nih avangin class rawn kal hman loh tum a nei fo thin a. Nunpuii nen chuan class kan kal mar tha angreng hle thung. Manuni rawn kal theih loh chang pawh chuan, kan inzui chawt zel tho thin. Pi pute'n hun leh tuilianin tumah nghaklo an lo ti thin a. Hetia hlim taka kei, Manuni leh Nunpuii nen hun hlimawm tak kan hman ho mek lai hian hun chu a kal ngai in a inher liam zel a, Kum chanve chu kan lo hmang liam ta der mai. Nunpuii pawh tunge a nih ka hre chiang thawkhat tawh a. Ka chanchin leh kan chhungkaw chanchin erawh chu hrilh duh chin kei erawh chuan ka nei tlat thung. Ka pa hnathawh pawh ka hrilh ve ngei a, amaherawhchu chutih laia ka dinhmun harsa tak mai te chu ka hrilh ngam ngang lo. Ka zahpui ru tlat mai a ni ber. Amah leh an chhungkaw chanchin chu ka thil ngaihven ruk ber anih miau avang leh, ka thiannu Manuni'n a kip akawi a min hrilh theih avangin amah Nunpuii rin phak bak in ka hre chiang hial ang.

 Ka hmuh dan leh zirchian dan chuan, amah chu naupan lai atanga, hringnun kalkawng tluang taka zawh, nun kawng chhuk chho leh harsatna liam tham em em la hma chhawn lem lo, mi nun tluang leh hlim thei tak niin ka hria. A chapo lova, a in ngaitlawm pawh a ni chuang lo, a nih ang ang chuan a lang tawp mai a, chu tak chu amah ti duhawm zualtu pawh a ni reng a ni. A pianchhuah pui mizia chu a ngainat awm em em a ni ringawt mai a, amah chu a lawmawm hliah hliah a ni ber mai. Midangte tana hnawksak chi a ni lova, hnawksak taka awm tum pawh nise a awm thiam hauh lovang. Nunpuii chu a ruk tak chuan ka ngaisang em em a, ka chung en ngawih ngawih leh zual na thin, a chanchin chhuanawm tak takte ka hriat belh reng bawk nen, matric 1st Division a a pass thu min han hrilh te, English subject-ah letter mark a hmuh thu min han hrilh tum te khan a chhuanawm ka ti teh asin. Amah chu ka ngaihsan rual rual in keimah lam ka indah hniam phah ve thung a, ka chung en ta mah mah a ni ber mai. A lakah ka t~m ru deuh tlat mai a, chuvang tak chuan a lakah mipa ka nih ang taka ka thlen tur ang pawh ka thleng pha lo niten ka hre thin. A hringnun hman dan chu ka kawm ve phak loh ang hial ah te ka dah chang a awm thin.

 Ka dinhmun diktak hrilh chu ka hreh hle mai, zirlai, a tul apiang thawk a inhlawhfa chawp ka nihzia te, Mizoram khawpui ber Aizawl ah meuh pawh chhungkhat laina hnaivai, harsatna eng emaw tak han tawh ni khua a han belh tur leh behchhan ve deuh tur mi awm thei ve deuh ka neih loh zia te han hrilh hriat vek mai chu a tulna pawh ka hre hran lem lo bawk. A ni erawh chu chutiang zawnga han thlir phei chuan ka lakah kher chuan chhuan tur a ngah thei viau ang. A nu thisen zawmpui te phei chu thu leh hla lama ram pum hriat tham te pawh an awm hial. Ram pum hriat ni ve kher lo pawh sumdawnna lama mi hlawhtling tak takte pawh an ni nual mai bawk. Nunpuii nu leh pate ngei pawh hian Aizawl khawpui chhungah inhmun hmun hnih hmun thumah an nei a ni. Kei, ka pa u fanau te hnenah ka khawsa ve a ni mai a, sum leh paia tanpuitu mumal tak ka neih loh avangin rilru thlamuang taka awm lai ka nei tlem hle. Nunpuii hi ka dinhmun hahthlak ru tak mai te, ka rilru hah ruk na te, ka phur rit phurh lai te chu hrilh ta vek ila thian atan min hnualsuat phah emaw, min hmuhsit phah emaw ka ring chuang hauh lova. Mi va hmuhsit hrim hrim chu a pianpui mizia nen a in mil thei dawn lo tih chu ka hre sa tho. Chung thute ka hrilh avang chuan min khawngaih phah hlauh emaw min tanpuina tur ngaihtuahna lamah a rilru a seng hlauh zawk maithei. Amaherawhchu keimah leh keimah ka inzahpui tlat si a, thil engmah ka hrilh ngam ngang lo a ni.

 Hun leh nite a her zel a, college leh a chhehvel ah te chuan kan inzui ngun em avangin kan in ngaina tawn chho ta hle mai tih chu phat tur a awm lo. Nunpuii ngei pawh chuan thiantha tak anga min ngainatna piah lam deuh thlengin ka chungah a rilru a pu ve ta emaw ni chu le? tih theih tur hian min ngaina ve hle niin a lang. Ka ngaihbel thil mai mai chu ni thei bikin ka hre tlat lo a ni. An chenna in lamah te chuan leng ve turin min sawm ta fo mai a, min sawmna zahawm tak mai chhan let nana ka va len ve tum te lah hian a chhungte, a nu leh pa, a unau te chuan min lo ti tlangnel thiam em em mai thin a. Chaw te pawh ka ei ta fo mai a nihchu mawle! Heitak hian Nunpuii nena kan inkara inpawhna thuk tak leh inngainatna thuk tak awm chu a nemnghet chiang hle ani dawn lawm ni? Nunpuii hi ka thiantha tak Manuni'n "Elvis Restaurant" a min in hmelhriat tir zan kan vawikhat inhmuhna atang chiah khan ka thinlung zawng zawngin ka lo hmangaih em em mai tih hi keimah ngei hi a hrechiang ber tu ka ni tlat a, khami zana kan inhmelhriat hnu atang khan thiantha tak angin ani chuan min en chho ta a, kei erawh chuan hmangaihna nen nitin ka en chho ve thung tih thu chu zep theih a ni lo. Amaherawhchu, kan chhungkaw khawsak leh dinhmun inthlauh deuh na chuan min ti dawih em a, mipa ka nih anga hmeichhe laka ka tih ve ngei tur chu ka ti ngam lo mai chauh a ni.

 Kan in zui nasa in kan in ngaina chho tawn ta viau pawh chu thil mak tak pawh a ni hran lem lo. A kumpui lingleta han inzui tak ah chuan inngainat tawn hle pawh a awm ve bawk alawm. |hian anga hlim taka kan inzui lai zawng zawng te khan keichuan ka thinlung zawng zawng hi atan ka hlan vek tawh a, dinhmun inchen lohna avanga ka inthlahrun ruk na chuan mipa ka nih anga ka tihtur ti ngam loin min siam tlat si a, huaisenna min pe thin tu, ka in nghahna thurin, harsatna hrang hrang hmachhawn nana ka ralthuam hman ber thin, "Ka mihring puite hlutna neih ang chu ka nei ve tho a ni" tih thurin chu Nunpuii tawn ah chuan ka hmatheh ngam ta hauh lo mai le! Nunpuii tawn ah kher kher hi chuan keiteh lul hian thil hlu tawktarh tur ka nei hian ka hre thlawt lo a ni.

Chutianga hlim taka hun kan hman reng lai chuan Krismas chu kan hnaih chho leh ta thuak mai. Chumi kum Krismas chu, Nunpuii leh Manuni chuan Aizawl ah an hmang dawn a, kei erawh Aizawl mihlun ka nih loh avangin Zokhawlam ah ka hmang thung ang. Kan college thu neitu te chuan kum tawp December thla chawhma lam hian "Notification" siamin kumthar February thla tirah Final Exam a nih tur thu an tar chhuak ta bawk a. Tin, hemi rual hian class khar hun tur an puang bawk a, keipawh class tihtawp hma hret in Zokhawlama ka seilenna hmun ah ngei Lalpiancham lawm turin ka haw ve ta nghe nghe a ni. Khua hmun loh tlang hrang hrang ah kan awm ta si. Nunpuii nen chuan kan inhmu thei ta tlat lo. Chhungkhat laina hnai leh thenrual thate hriatpui ve lem loh Lunglen rukna chu ka mal tawrh ta ngawt ngawt mai a, a tih ngaihna dang lah avang si. Final Exam hmachhawn mai tur kan nih avang chuan ka rilru ka ti paukhauh a, zirlai bu atam thei ang ber chu ka chhiar lui hram hram ve bawk thin. Rilru thunun erawh a har khawp mai.

 January thla chhung zawng chu hnathawh nan leh Exam tura inbuatsaih nan hun ka hmang tluan zak a, February thla tir te ah Zawlkhawpui lamah Final Exam hmachhawn tur chuan ka chhuk thla ve leh ta a ni. Tluang takin Final Exam pawh chu kan han zo fel ta a. Exam chhung zawngin vawikhat chiah Nunpuii nen kan inhmu leh nghal nen, a ruk tak chuan ka khua a har ru angreng hle thin. Amaherawhchu, Final Exam lai kher kher chuan ka rilru leh ngaihtuahna chu thunun ka tum nasa ve hle a, eng emaw chen chu ka hlawhtling ve tho reng a ni. Final Exam te kan zawh fel hnu chuan, Zokhawlamah bawk chuan ka haw leh thuai angai tlat si. Lo neimi te tan chuan April leh May thla chho vel hi mawng vawm ba ang hlim a nitina hnathawh a tul chho tawh si a. Kei, a hminga kum puitling ni ve tawh chu, ka awm awl mai mai thiang bik lo a ni. University thunei tute chuan college Final Result te an rawn tichhuak ta a, kei leh Manuni chuan II yrs B.A chu kan pass ve tawk tawk a, Nunpuii pawh chuan BA (Hons) chu tha takin a pass bawk a. Nikhat chu Marksheet vel lachhuak tura college ka va kal tum chuan ka thiannu Manuni leh Nunpuii te nen chuan kan in hmu ta mial a. Kan inhmuh khat hlawm tak em avangin kan hlim tlang hle nghe nghe a. Nunpuii chuan MA English, NEHU, Mizoram Campus ah a zir chhunzawm tur thu min hrilh a, Manuni erawh chuan a zir chhunzawm tawh loh tur thu min hrilh ve thung a. Kei erawh chuan Govt Aizawl college ah vek chuan B.A (Hons) political science Dept ah ka zir chhunzawm leh nghal tur thu an pahnih chuan ka han hrilh ve bawk a. Kan pathum chuan kan 'cool' hle mai a, eng emaw tak rilru kan pu ta hlawm a ni ngei ang. Kumpui lingleta khati taka lo inzui ho thin, kan han inthen darh mai tawh tur chu hrehawm kan titlang ru hle tih chu a hriat reng mai a. Mahse, a tihngaihna dang a awm ta silo. BA (Hons) zirtur chuan admission chu ka tifel leh ta a. Mahse, Nunpuii khawvela ka mihring lungkham ber mai leh thlakhlelh em em chuan, NEHU Campus lamah min in sawn san tawh si. Ka thiannu ngainat awm Manuni lah a Office lamah lehkha zir bansan in a in pe pumhlum ta bawk si. Nunpuii avang chuan chhun ni leh zante nuam ti em em a ka lo hmanna thin leh ka college thlakhlelh ber ni thin chu ka tan chuan hmun khawhar thlak a chang zo ta.

 Zan khat chu college atanga ka haw tur chu "Elvis Restaurant" kawtah chiah mai chuan ka ding khaw muang lawka thla lah chu a eng ngang mai si a, "Arkai den zan" tak mai a ni lehzel bawk nen, ka rilru ngaihtuahna chu second hnih khat lekah a vak thui hman hle mai a, chutiang ang tak maia "Arkai den" zan thla engmawi hnuaiah ngei khan khawvela ka hmangaih ber, mahse, engmah ka hrilh ngam si loh Lalnunpuii nen khan kan lo  intawng ngei mai chu a ni tlat mai si a, mak tak mai in, kumtluan in, inngaina tawn takin kan inzui chho tlang ta kha a ni a. Mahse, ka va mal ta em, khawiah nge ka thiannu Manuni kha? a nih leh khawilam ah nge, engtikah mah ka theihnghilh ngai loh tur Nunpuii ve kha?

 Rilru khawvar vawng vawng in inlam ka pan ta a. In ka thlen chuan pen leh paper ka la a Nunpuii vang liau liau in he hla hi ka sual chhuak ta phawng mai a nih hi.

NUNPUI

Phuahtu:- C. Lalthazuala

Satu: Lalngengpuii Tochhong

Mahriak awmkhawhar changin,

Ka dawn thin sakhmel-thai

Tawn leh ni her silo maw;

Lenna tlang adang ta si.

Chutin ka dawn ka dawn thin

Kan nunhlui lungruala lenlai nite

Han dawn ve thin tak che maw

Nunpui

Kha leh chen sul ang zuia

Lenna zawlkhawpui mawiah

Suihlungruala lenlai khan

Zawlkhawpui lanu leng zingah

An awmlo nang chhing zo tur

A ngur nun ka iang lo a pawi ber mai

Chutin i tan ka tling zo lo maw

 A ngur nun ian loh vang mai maw

 A riang vala thinlai na hi

 Engvang kher nge maw ka tawn che

 Aw luahloh tur di nuimawi

 Heihi maw an sawi phu loh

 Di zun a uai chu

Ka hlan lo che biahthu D

Ka thinlung luah tu ber

Zaleng zingah ka thlang che

Mahse maw rairah riang val hian

Biahthu hlan che ka zuam lo

Mahse, Nunpuii i parmawi leng dang tawnah

A uai mai tur ka dawn ngam si lo.

---

C. Lalṭhazuala,

Columnist, www.exploremizoram.com