ZONUNMAWII - 3

(True Story)

BUNG-3 NA

Pic: Lalhriatpuii

By:- Rs Thangluah 

"Bawihi,i hming min hrilh thei em?,"tiin nurse chuan min zawt a. "Aw ka hming chu Zonunmawii a nia,"ka ti zawi sap a. Nurse chuan,"I chhungte koh mai theih tur an awm em?,"a ti leh a. Ka lu ka lo bu nghut a,"Aw anu a awm,"ka ti leh sap a,Nurse chuan ka nu biak theihna tur number chu min dil a,ka nu chu a be pawp ta a. Rei tak chhung ka nu bulah naute ka pai thu chu zep mah ila,a tawpkhawkah chuan zep rual a ni ta si lo. Naute ka neih avang chuan ka chunga ka nu rilru put hmang chu a danglam ve deuh ka ring a;mahse, a teuh lo mai. 

Ṭhenawm khawvengten naute ka nei tih an han hriat meuh chuan rinhlelh tur âwm ang chu an hrethiam nghal mai a. Ka nu erawh ramhuaipa lamah a la ṭang reng thung a,naute ka neih aṭanga kar khat vel chu Damdawiinah chuan ka awm ta rih a. Kar 1 hnuah chuan ka chhuak ve thei ta a,ka ṭhiante ho chuan naute ka nei tih an hriat chuan an lo leng ve sap sap hlawm a. Naute en nan tiin pawisa te min rawn pe a,la duh lovin lo hnial ve bawk ṭhin mah ila min pe lui ṭalh tho ṭhin. 

In lamah chuan duattu leh hmangaihtu ka nei lem lo. Naute ka neih avang chuan duat ka hlawh phah chuang lova, In chhung chet engkim ka tih a ngâi a. Hah viau ṭhin mah ila, hah anga lan a rem lo ṭhin. Min hringtu nu chuan ka chungah rilru ṭha a pu ngâi lova,inkhâwma zai ho te kha ka châk ve em em ṭhin. Mahse,ka nu chuan a phal ngai lo,hetiang em em a nunrawng hi ka nu a ni thei dawn em ni? tiin ka ngaihtuah hial ṭhin. Ṭumkhat chu naute ka neih hma in ka nu hriat lohvin a rukin ka inkhawm a,kanu in ka i khawm tih a hriat chuan min vaw nasa khawp mai. Kan In chhung chu ka tan chuan hremhmun pate a ni ringawt mai a ni.

Kum tam tak liam ta a ka chunga thil thleng rapthlak tak tak avang chuan depression ka neih phah a. Dam ka thlahlel lova,mahni in tihhlum duhna hial thinlung ka pu ṭhin. Mahse, chutih hunah chuan ka fanu duhawm tak hian chakna thar min pe leh ṭhin. Ani hi khawvela ka neih chhun a ni a,ka rohlu a ni.

Têt lai aṭanga kutthlak tuar ṭhang ka ni bawk a,keima tawkah chuan ka chhel ve khawp mai. Mahse,ka nu min endan erawh a dang ṭan khawp mai. Ka ṭhianten naute en nan tia pawisa min pek te kha ka khawl ve keuh keuh ṭhin a. A ṭul fe ah lo chuan ka hmang ngai lo,chutia pawisa ka hman te chu ka nu chuan,"Pawisa kha khawi ami nge i neih a? I pa in a pe che mi? Min pe ve ngai miah lo,"tiin min chhuah chhal hial ṭhin. Mahse,ka nu bulah chuan engmah ka sawi ngai lem lo,ani hi ka nu a ni a,ani lo chu nu dang ka nei lo tih ka hria. Chuvang chuan,kan inkar chhe tawh tak hi ka theihtawpa siamṭhat ka tum zawk a ni.

Ka naute pawh thla khat a lo tling ve ta reng mai. Mahse,Pathian hian vanduai tur hrim hrim hian min lo duang a ni mahna. Ka nun zawng zawng min tihchhiat sak a,ka hma hun zawng zawng pawh min tihchhiat saktu ka pahrawn chuan kan In aṭang chuan min pet chhuak ta. Ka fanu tellova chhuah ka duh si lo,ka fanu erawh hruai an phal si lo. Khami zan khan ka rilru nat namên lohvin a na a ni,ka fanu chu a ṭap hawm hawm a. Kei erawh ka fanu lak aṭangin dah hran ka ni tawh si,ka fanu chuan hnute a mamawh a a ril a ṭam takzet a ni. Mahse, hnute pe turin ka fanu bulah ka awm thei si lo, ka nu lah chuan chhete pawn min chelh a tum si lo. 

Kalna tur hre lova,ka vah kual ka vah kual hnu chuan ka cousin te In lam pan chuan ka kal ta rawih mai a. Ka cousinte bulah chuan ka awm ve ta reng a,ka fanu erawh ka ngaihtuah lo thei si lo. Hnute pe tur takngial pawn a bulah ka kal thei si lo,ka fanu chu ka ngaihtuah takzet a ni. Zanah nise ka mu thei lova, ka taksa pawn a tuar khawp mai. Ka nu te lah chuan naute nena kan awmdun chu an phal lo nasa mai si.

Hun leh ni te chu an her liam zel a,ka nun hrehawm tak leh hahthlak tak erawh chuan min kiansan zai an rel thei si lo. Hetiang reng reng a hringnun hman chu a van hahthlak ṭhin tak êm! Ka fanu nen kan awm hran aṭanga thla tam pawh a liam hma chuan,ka nu chuan pasal nei turin min ti mauh mai.

Ka fanu chu thla 1 chiah ka enkawl hman a, chumi hnuah In aṭanga pet chhuah ka ni a. Chumi hnuah tihluihna hmangin pasal min neih tir an tum leh a, engtianga awm tur nge tih pawh ka hrethiam tawh lo. Ka ngaihtuahna chu a buai zova, ka â vek ni maiin ka hria. Hmeichhe naupang fel tak ni ṭhin leh nulat pawh hre hman lo, ngaihzawng takngial pawh la nei ngai lo kha, min hringtu ka nu ngei chuan tih luihna hmanga pasal min neih luih tir ta si. Ka nu hi eng ang nu nge maw a nih chiah le? Tinge hetiang em em a nungrawng hian a fanu chungah hian a chet mai le?

Ka fanu chu thla 1 chhung chiah ka pawm hman a, tihluihna hmanga pasal nei tura tirh liam ka ni ta. A châng chuan thih daih mai te hi ka châk ṭhin;mahse,ka fanu bawk chu ka ngaihtuah a,a tan ka inti chak hram hram ṭhin. Ka tan chuan duhthlan tur hi a vâng ngawih ngawih a ni. 

Ka pasal lah chu Mizorama awm a ni lova,ram pawnah a bulah ka chen ve a ngai ta si. Ka thla hi a muang hlawl lo a ni, ka pasal lah chuan zan tin mipat hmeichhiatna min hmanpui a tum ṭhin. Mahse, ka chunga thil thleng rapthlak tak avang khan mipat hmeichhiatna hi ka hlau tawh a ni. Ka pasal in mipat hmeichhiatna min hmanpui a tum pawn ka duh lova, ka hnial ṭang ṭang ṭhin. Mahse, ka pasal chuan min dim lo thei ṭhin khawp mai,"Hmeli,ka nupui i ni tawh a,ka thu angin i awm tur a ni," tih pahin min beng ṭhuai ṭhuai mai a. Engang pawn duh lo sateh mah ila, kei aia chak zawk leh tha nei zawk na na na chu ka hneh thei ngang si lo. A tawpah chuan tihluihna hmang bawkin mipat hmeichhiatna chu rapthlak taka hmanpui ka ni leh ta.

Hetiang reng reng a nun hman reng chu a van hahthlak ṭhin tak êm! Pan tur ka hre si lo,khawvelah hian min hmangaihtu tumah an awm lo a ni. Pathian lakah pawh hian vui châng ka ngah ṭhin,"Tinge hetiang hi ka nunah a thlen bik le?,"tiin Pathian chungah meuh pawh ka vui ve ṭhin. 

Ka pasal nen chuan hlim takin kan awmdun ngai lova,hmangaihna vanga awmdun kan ni miau si lova. A bulah chuan ka thla a muang lova,hlauthawng reng rengin hun ka hmang ṭhin. Engtikahnge min sawisak leh ang? Engtikahnge tenawm takin mipat hmeichhiatna min hmanpui leh ang? Heng zawng zawng ngaihtuah chung hian ka pasal bulah hian thlamuang takin ka awm thei lo a ni. Hetianga in nghaisak a,in sawisakna tawrh reng aichuan ka pasal chu tlanbosan ka tum ta a.

Ramsa aipawha rapthlak, ka pasal chu ka huaisenna zawng zawng  sawm khawmin In aṭang chuan ka tlanbo san ta. Mahse, engtinnge ka nun ka hman tak zel ang le? Ka hma lam kawng chu a thim mup a ni ber mai,pan tur tumah ka hre si lo. Ka nu te bulah let leh dawn pawh ni ila, ka chan tur chu ka hre lawk sa vek bawk si. Bei hi a dawng ngawih ngawih mai a ni;mahse, vanneih thlak takin ṭhian fel tak ka tawng hlauh mai. Ani chuan an bulah min chen tir ve a,engkimah min pui ṭhin a ni. Hnathawh tur te min zawnpui a, Pathian zarah hna pawh ka hmu ve ta. Mahse, ka nu chuan ka chanchin chu a lo hre leh vek a,hna ka thawk tih a hriat phei chuan pawisa a rawn phût ṭhin. 

Ka nu chuan ka fanu naupangte chu min vau nan a hmang ṭhin a,"Pawisa i rawn thawn loh chuan, i fanu hian a tuar ang," a ti ṭhin. Ka fanu chu ka hmuh phakah a awm si lo, ka ngâiin ka thlahlel ngawih ngawih a ni. Ka fanu in a tawrh aichuan tiin thla tin ka hnathawhna aṭanga hlawh ka lak apiangin ka nu te chu pawisa ka thawn ziah ṭhin a. Mahse,ka nu chuan kam khat pawn lawmthu min hrilh ngai lo.

Ka fanu chu ka ngâi thei em em ṭhin. Ka lak aṭang hian nu hmangaihna te dawng ve thei se, duat taka enkawl te chu ka châk a ni. Mahse, chu erawh ka tan chuan Vana Arsi lak tum ang vel a ni  si. Ka fanu chuan nu hmangaihna ropui tak leh hlu tak chu a dawng ve ngai dawn si lo. A lo lian ang a, nikhua a hriat hunah,"Anu,khawnge apa? Tunge apa?,"tiin min la zawt ngei awm si a. Chutih hunah chuan ka fanu zawhna chu engtinnge ka chhan tak ang le? 

Ka mumangah ka thil hmuh avang chuan ka harh chiang kher mai. Ka mumanga ka thil hmuh chuan ka rilru chu a tina thar leh a ni. Ka taksa chu thlanin min bual huh vek a,ka thaw hlawp hlawp a,hlauhna in min tuam nghal a. Ka mangah chuan kha mihring rapthlak tak leh nunrawng tak kha ka hmu a ni. Kum 15 liam ta a ka chunga thil thleng rapthlak tak kha,ka mangah chuan ka mang a ni. Kha thil thleng kha hriat reng ka duh tawh lo a sin;mahse,ka mumang thleng thlengin min umzui zel mai si. Tinge hetiang hi ka nunah a thlen bik le? Lalpa,a tawk tawh viau lo em ni?

Ka chunga thil thleng rapthlak tak chuan min ûmzui reng a. Nun nuamin ka nung thei lo a ni,"hetiang reng reng nun hman reng aichuan thi ila ka tan a nuam zawk ang,"tiin eng dang mah ngaihtuah lovin,in tihhlum chu ka tum ta a. Mutthilhna damdawi ka ei ṭhin chu ka bar ṭeuh mai a; mahse,ka vannei nge ka vanduai pawh ka hrethiam lo. Ka damdawi ei vang khan ka thih phah si lo,tun thleng hian he khawvel ânchhe dawngah hian nun hrehawm tak hmang turin ka nunna chu Pathianin min la zuah sak a ni.

Ngatinge hetiang thil hi ka chungah a thlen bik le? Hetiang reng renga hrehawm taka nung tur hian em ni ka nu hian min lo hrin chhuah? Ka tan chuan dam hi a nawmna a awm lo a ni,ka neih chhun leh ka hmangaih em em,ka fanu lah chu ka hmuh phakah a awm si lo. Engtinnge a nun a hman ve ṭhin? A nu hi min ngai ve ṭhin ang em le? Zawhna tam tak chhanna ka dawn theih si loh chu,ka thinlung hian ka inzawt nawn tluk tluk ṭhin. "Nun nuam taka nun hman hi ka phû ve lo em ni?,"


##A hnuaia fakna hi lo hmet ve rawh.##