HRINGNUN HLIMNA PAR

 - ✍🏻 Vidpuia Hrahsel

Khawvêl kan chên dân leh kan hman dân hi mihring ṭheuh ṭheuh si hi a in ang lo hle a. Pathian in a duh tak a a siam ṭheuh ṭheuh mize inang miah lo te, zirna avâng emaw hnathawhna avângin hmelhriat ah leh ṭhian ṭha ah kan insiam thin a. Hringnun zinkawng kan zawh dân a inang lo tlang hle awm e. Hringnun zinkawng harsa tak zawh chho mek te hian kan ni tin nun ah harsatna emaw lungngaihna kan tâwk thin. Kan nun ṭheuh hi en ila, kan hlim lohna te emaw kan beidawnna te hi midang in min hliam thin vâng emaw kan thiam loh vâng ani châwk.

Kan harsatna hi keimahni siam thin nge ni a, midang vângin harsatna kan tâwk thin, harsatna tam tak a awm a, beidawnna tawk te, hringnun ning ngawih ngawih khawp a mahni intihlum ta te hi an harsatna su kiangtu tur an ṭhian te hian kan ṭanpui ngai em?

Mahni mihringpui te harsatna hrethiam lo tu khan harsatna i tawh ve hun tur kha i dawn thiam em? Tupawh hian kan hringnun hman dân ah hian chak loh na te hi kan nei vek a, inhrethiam tawn a, in mamawh tawn vek kan ni a, tumah hi induh thei kan awm lo. Aizawl veng pakhat ah chuan chhungkaw pangai ve tak, eizawnna kawngah pawh mi awmthei tak chhungkua an awm a, mahse an fapa neihchhun kha an harsatna leh an buaipui ber ani tlat thung! A chhan erawh mi awmthei tak chhungkaw fapa khan an neih rosum chên in, a duh duh lirthei khalh chhuak thei in a awm a, college ah erawh  hlawhchham in a subject a ba leh tlat thung, subject ba a neih tam em avângin leh a hringnun kalkawng ah retheih awmzia hrelo in a seilian a, chhungte thawhchhuah sa chapo pui a, inla lian ve tak kha, a ṭhiante khawsa thei vak lo te nen an inkawm rei thei tlat lo. Hetiang ang dinhmun a ding hi mi tam tak an awm a, a ṭhian kawmte nen an  dinhmun a in ang lo em a, an inkawm rei thei ngai lo.

Zirna avânga khawsak harsa tak chhungkua aṭânga chawrchhuak, college pawh inhlawh chunga kal si kha subject ba nei miah lovin rilru nei tak chungin a graduate leh lawi si! A hringnun ah, harsatna tam tak a paltlang tawh avangin hlimna thuruk chan tawk a lungawina nen hlim takin a hringnun a hman avangin a nunkawng zawh nuam takin a hmang mai ani. Hringnun hlimna nei tu chuan a hringnun ah beidawnna leh lungngaihna te hmun a chan tir ve ngai lo a, harsatna hnehtu hlimna in a hun a hmang thin zawk. Beidawnna te manganna te a tawk ve thin tho, mahse hringnun hlimna chan tawk a, lungawina a neih avangin, chhel takin a hun a hmang thin a ni.

Harsatna hi mahni in kan insiam thin avângin leh midang te ngaihtuah miah lova engthawl taka kan awm thin vâng hian kan ṭhiante hian min ṭanpui peih dawn lo tih hi kan hriat a tha awm e. A nun beidawng tak hrethiam a, buaipui tur ber a chhungte bul ah a hrilh ngai loh avângin beidawnna khur ah a tang   a, a tâwp ah chuan inchhir na nen an hun an hmang a, hun kal tawh kohkir lêt theih se chuan insiamṭhat nan a hmang ngei ang.

I ṭhianten an neih ang kha, i nei ve thei lo anih pawhin lungawi tak a pawm mai kha i tân a ṭha ber. Mihring kan inang lo ang bawkin, hringnun harsatna kan paltlang dân a inang lo hle a, retheih awmzia hre lo chung a puitling chho te hian an hringnun  hman ah harsatna an tâwk ve tho ani tih hi hria la, nang erawh, mi rethei chhungkua aṭânga seilian, i nih avângin, rilru nei tak in nung la, khuanu duan hringnun hlimna hi i  chan tâwk ah lungawi takin chên ang che. I hringnun ah mi te awt reng reng emaw, mi te itsik rêng rêng a i khawsa anih chuan i  hringnun ah beidawnna leh lungngaihna bak in a zui dawn lo che.

Pi leh pu ten harsatna hrang hrang an pal liam hnu a khawsak nuam ta te, mi ṭhenkhat erawh nu leh pa ni tin eizawng a thawkchhuak te, nu leh pa te thawhchhuah ring ṭheuh ṭheuh si hi kan dinhmun a inang lo hle a, mahse kan in mamawh tawn vek thung. Hringnun harsatna nge i hmachhawn zin hringnun hlimna mahni ṭheuh ah inzawt ila, harsatna tam tak paltlang a, hlawhtling tawh te, i awt mai loh nan mahni tawk ah kan lungawi hian hringnun hlimna hi a par kan tliak dawn a lo ni reng mai! Mi khawsa thei tak, nei nung tak te thil neih i awh ve zel chhûng chuan he hlimna par mawi tak hringnun hlimna hi a par i lawh theih mai tur hi, i ban pha lo ṭhin a, i ban phak mai a, a awm lai hian hringnun hlimna par hi i man pha dawn zuk nia. Hringnun hlimna i neih tawh chuan khawvêl hi nuam ti tak in i hmang dawn mai ni lovin, beidawnna te emaw midang itsik reng a i nun hman kha i thlah liam theih reng dawn a lo ni!