Kolasib | March 1, 2019: District Hospital Kolasib OPD a inentir duhte tan Online Registration March 1, 2019 aṭangin hmang tan a ni dawn. District Hospital Kolasib hi OPD Card online a lak theihna hmang hmasa ber Mizoram-ah a ni dawn ta a ni.
OPD Card lak nana Online Registration hman a nihna chhan hi Dr. James RE Mawia, District Medical Superintendent Kolasib chuan OPD a inentir tur damlote rei tak tak Card la tura an intlar thin a bo theih nan a nih thu kan palai a hrilh a, District Hospital Kolasib chu OPD Card lak nana online Registration Mizoram a hmang hmasaber tur a nih thu a sawi bawk a ni.
District Medical Superintendent, Kolasib chuan, Online hmanga OPD Card la duhte chuan Mobile phone emaw computer emaw hmangin www.zohms.org ah luh a, enrollment tihtur a nih thu sawiin, registration ti thiamlo tana tihdan tur OPD Building hmun li velah tarchhuah a nih dawn thu a sawi bawk.
Tin, online registration ti te hian vawikhat bak in registration tih a ngaih loh thu Dr. James RE Mawia chuan sawi bawkin, registration tih hunah enroll number print theihin a awm ang a, chumi hmang chuan OPD a inentir dawn apiangin registration an tih tawhna www.zohms.org -ah phone emaw Computer hmangin emaw online a luh leh mai tur a nih thu leh enrollment number chu hman zui zel theih a nih thu a sawi. Online Registration ti te hian mahni in atang pawhin inentir an duh ni ah an enrollment number hmangin OPD Card an hauh mai ang a, card la tura intlar vak vak ngai lovin OPD hawn hunah an hming an lam hun an lo chang mai dawn niin a sawi bawk a ni.
- ZINGṬIAN / ZMP Tlau
Post a Comment
He post chungchanga i ngaihdan lo sawi ve rawh: