ZU ZUAR FANU 26

CHAPTER--26

*R'z Thangluah✍🏻*

Hun a liam a,ni leh thla a ral a,kum pawh a lo liam ve ta zel a. Msi pawn a zirnaah te hlawhtlinna hmu in a tet te aṭanga a nih tum leh a nih chak em em ṭhin Doctor chu a rawn ni ve ta a. Max pawh Engineer tlangval a ni ve tawh a,Emily pawh Sumdawnna lam buaipuiin a buai thei khawp mai. Sangtea erawh a dinhmun ngaiah a la ding thung a.Msi chu Max nen pawh an la inkawp tluang chho zel a,chutiang bawkin Sangtea leh Emily pawh an inkawp tluang chho ve khawp mai. Mahse,Sangte hian Msi a hmangaihna hi a thup theilo leh lek lek ṭhin a. Msi erawh hi chuan a nu bula a sawi bak chu engtinmah a ti lang ngai lem lo.

"Ms,i buai em?,"

"Aih buai zo chiah a,engnge ni ta a?,"

"Rawn len i phal em?,"

"Tinge?,"

"I phal em?,"

"Umm lo kal la,"

"Max a rawn leng dawnlo mi?,"

"Aih an zin a,kar 1 vel an zin ang,"

"Umm nihchuan ka rawn kal ang aw,"

"Awle,"

Rei vak lo hnuah Sangtea chu a rawn thleng ve nghal a,"I nu a awm em?,"a rawn ti nghal a. Msi chuan,"MHIP Committee naah a kal a,an lo la haw dawnlo deuh ang,"a lo ti vat a. Sangtea chu Msi bulah chuan a ṭhu nghal a,"Ms,hmangaih loh bula hun hman reng hi nuam ka ti lo,"a ti nghal tawl mai a. Msi chuan,"Tiang kha sawi tawh suh,Emily hian a hmangaih che,"a lo ti vat a. Sangtea chuan,"Chu pawh nise,ka hmangaih ve hleinem. Ka hmangaih chu nangmah chiah,"a lo ti nghal vat a. Msi chuan,"I hrethiamlo anihkha,"a lo ti ringawt a. Sangtea chuan,"Ms,ka hmangaih lutuk che a sin. Tinge engmah i hriatthiam duh lova?,"tiin Msi kut chu a vuan a,Msi chu a mur nghal chuai chuai mai. A sen nghal ṭawn ṭawn bawk a,engmah a sawi thei tawh lo. Sangtea bawk chuan,"Ms,nangpawn min hmangaih kha. Min hmangaih tiraw?,"a ti mawlh mawlh mai a. Msi chuan leh lam hawi vat pahin,"Aih haw tawh rawh,"a ti a,a âw te chu a khur der der tawh a. Sangtea lah chuan haw mai mai a tum lo,"Nang hian min bum theilo ang,ka hrechiang ve tawk che. Tinge i thinlunga thu awm kha i up bet reng a?,"a ti ve salh salh mai si. Msi chuan ṭawng ngaihna pawh a hre tawh lo,a taksa chu a khur der der a. Theih nise,Sangtea chu a hmangaih thu chu hrilh ve chu a duhthusam a ni;mahse,a ṭhiannu thinlung chu a tihnat sak thei silo,"Haw tawh rawh ka hmangaih lo che,"a rawn ti chhuak thei ṭawk a. Sangtea chu a rawn thaw hak a,"Awle nih ka haw a nge;mahse,i thu ka awih tawh bik lovang,"tih pahin a chhuak tau nghawng nghawng mai a.

Msi chu a thaw hak a,"Sangte,ka tihpalh aw min ngaidam dawn nia. Kei ang hmeichhe mawl tak min hmangaih vang hian i la inchhir ngei ang,"a ti sep sep a. Engmah thil dang ngaihtuah lova a ṭhut veng veng lai chuan phone call a dawng a,a phu zuk zui lehnghal a. A en chuan Max-a phone call a lo ni a;

"Aw Max,"

"Hei kan thleng deuh chiah a,a lum khawp mai,"

"Imm in tluang maw?,"

"Aw tluang e,ka chhungte ka biak hma in ka rawn bia che nih hi. Ka ngai tawh lutuk che a,"

"Ka van chang sang bik thei tak e aw,keipawn ka ngai che lawm. Engtiknge i rawn haw leh ang?,"

"Kar 1 vel kan cham ka ring,signal hi a ṭha vak lo lehnghal a. Hei tunah pawh tlangah thlifim dawn pahin signal ṭhatna lai ber aṭangin ka rawn call che nih hi,"

"Awii nihchuan tlangah chiah chuan signal a awm tihna mi?,"

"Aw ni e,tlang aṭang ka chhuk hun chuan a khawhar thlak ngawt ang,"

"Tlanga i kal apiangin min lo call ziah ṭhin mai dawn nia aw,"

"Nia mahse,i buai dawnlo mi?,"

"Zan lamah chuan buai love,"

"Umm nihchuan tun ang hunah hian ka rawn call ziah ang che aw,"

"Awle mahse,chhunlamah khua a har duh dawn e,"

"Kei tak hi a nia khawhar tur chu,lo inenkawl ṭha ang che aw."

"Umm nangpawh in enkawl ṭha ang che aw,khua a lum bawk si,"

"Awle ka chhungte kan be ve lawk a nge aw. Chumi zawhah ka rawn be leh dawn che nia aw,"

"Awle tehreng mai,"

"Nih ka dah aw,"

"Awle,"

Msi chu OPD a a duty ni a ni a,a buai ve khawp mai. Khaw lum nen,mipui lah chu an zi hut hut hlawm a. Mahse,damlo te enkawl a ṭha taka lo dawnsawn chu an hna a ni tih a hre reng a. Damlo te hmuh laiin hmel hlim lo a pu ngai lo.

A ṭhutna dawhkan bulah chuan pa upa tawh lam,chawrche deuh mai. A hmel en reng reng pawh a hrisello tih hriat ngawih ngawih hi a lo ṭhu a. Chupa hmel chu Msi chuan a hmuh hnu ang a ti hle mai a, nui sâng chungin,"Ka pu,engnge i insawiselna le?,"tiin a lo zawt vat a. Chu putar chuan,"Ka khawsik hi a reh hleithei lova. Ka kawng leh ka zâng vel te hi a kham na leh ut ṭhin a. Engmah ka ei thei bawk silova,"tiin a nat dan chu a sawi nghal mawlh mawlh a. Msi chuan,"Hetah hian lo kal la,ka lo check ang che aw,"tih pahin a piah deuh hleka room tereuhte an siamah chuan a luh pui nghal a.

Msi chuan a damlo en zawh tak chiah hming leh veng a en nak chuan,a kut chu a khur nghal der der mai. Mahse,damlo pa chuan a hmuh hma in a in control leh nghal vat a,"Ka pu,lehkhaah hian i damdawi ei tur leh ei dan tur ka ziah sak che a nga. I haw pahin sawlaia damdawi tlawm an zawrh naah sawn i va lei dawn nia aw,"tih pahin OPD card ah chuan damdawi leh ei hun tur vel chu a ziak nghal mawlh mawlh a. Chu putar chuan inthlahrun hmel takin,"Engzatmannge ni hlawm a? Leina turin pawisa pawh ka nei dawn em mawn le?,"a ti khur der der mai a. Msi chuan,"Ka pu,pawisa engzat nge i ah a?,"tiin a zawt ta tawp mai a. Chu putar chuan,"OPD Card lakna tur khan ₹50 ka ak chhuak a,card lak naah ₹10 ka hmang a. A bak chu ₹40 chiah ka ak tawh,damdawi chu vawiinah kher lei tur a mi?,"a rawn ti leh a. Msi chuan,"I lehkha kha min lo pe leh lawk mai aw,"tiin chu putar lehkha ken lai chu a laksak leh a. A phek mawng lamah chuan tihian a ziak a,

*Khawngaihin heng damdawite hi in lo pe dawn nia aw,a man chu nakinah keiman ka rawn pe ang.*

_Dr. Vanlalmalsawmi_

Tiin a ziak a,"Ka pu,tihian lehkha hi keng la damdawi tlawmna hmunah chuan han kal la,lehkha hi i entir a nga an lo pe mai ang che aw,"tiin lehkha chu a pe leh a. Chu putar chuan,"Pawisa tellovin min pe phal dawn mi?,"a lo ti leh a. Msi chuan,"Aw han kal tawp la,an lo pe ang che an pe duhlo che anihchuan rawn let leh la. Keimah nen kan kal dawn nia,"a tih takah chuan, Putar pawh chu ngaihngam deuhin a chhuak ta a.

Msi chu chawhnu lam dar 3.00pm velah chuan a inziak fel ve thei hram a,hmun danga kal kawi lovin damdawi dawr lam chu a pan ding nghal a. Damdawi dawr nghaktu nu chuan nui sâng chungin,"E nang meuh i rawn kal le,lo ṭhu rawh,"tiin a lo chhawn nghal vat a. Msi chuan,"Awii casualty-ah chhuk leh nghal ka ngai a,ṭhu hman pawh ka ni rih lo. Vawiin chhun lama damdawi ka rawn lak tir na man kha rawn pek ka tum a,engzatnge ni a?,"a ti nghal mawlh mawlh a. Dawr nghaktu nu chuan,"₹850 a nih hi,"a lo ti vat a. Msi chuan a purse aṭangin ₹2000 note hi a lo phawrh a,damdawi man chu a pe nghal a. Dawr nghaktu pakhat mipa chuan,"Dr. Ms,chhuna damdawi i rawn lak tir kha in chhungte em ni?,"tiin a lo zawt a. Msi chuan,"Ni em em chuang love,ngatinge a?,"tih pah chuan a lo nui sâng a. Chupa chuan,"Aaa eng nilove ka zawt mai mai che a,"tih pah chuan a nui suk a. Pawisa vel an inkir zawh hnu chuan Msi chuan,"Ka lawm lutuk e,anih ka kalsan phawt ang che u aw,"tiin Casualty lamah chuan a chhuk thla nghal hlawk hlawk a.

Damdawi dawr nghak tu nu chuan,"He Doctor hi chu a fel ve ngawt mai,thla hmasa lawk pawh khan pitar deuh mai hi a rawn kal pui a. Damdawi a rawn lei sak tawh a sin,"tiin Msi fel zia chu a sawi zui nghal a. Dawr nghaktu mipa ve thung chuan,"He nu hi a 1st life i hria em?,"a rawn ti thung a. Chu nu chuan,"Aih hre miah lo i hria mi a?,"a lo ti vat a. Chupa chuan,"Ee hre tehreng e le,tun hma chuan kan vengah an awm ṭhin a. Mahse,a nu hian zu a lo zawrh ve vangin veng chhung aṭangin an chhuah tir a lawm,"tiin Msi nunhlui chu a rawn sawi chhuah sak nghal bawrh bawrh mai a. Mahse,a dawr nghahpui nu erawh chuan,"Chutia tih ah te chuan mi zawng zawng hian,kan nunhluiah chuan chanchin chhia leh ṭha sawi tur kan nei vek a lawm. Nang ngei pawh kha i nunhlui chhui duh ni ila chuan a chhe lai sawi tur chu a tam ang chu. Tin,kei ngei pawh hi ka nunhluiah chuan damdawi ngawl vei ka ni ṭhin;mahse,insiam ṭhat tumin theihtawp ka chhuah ve a. Tunah chuan mi pangngai tak niin ka dinhmun ka siam rem ve tawh a sin,kan veng a mi te pawn ka nunhlui min sawi chhuahsak ngai tawh lova. Tlangnel takin kohhran leh khawtlangah pawh ka in hmang ve thei tawh a sin,"tiin a sawi duah mai a. Chupa erawh chu a tlawm duh bik ṭhak silo,"Keichuan Zu Zuar Fanu a nihna hi ka theihnghilh thei lovang. Anmahni nufa vang hian kan veng kan mualpho nasa lutuk,"a la ti ṭalh a. Chutah le dawr nghaktu hmeichhia chuan,"I sawi takah chuan ka hre leh si,engtik kum nge ka chiang chiah tawh lo. Class-Xii examah topper a ni a,an veng a mi class-Xii fail in a itsik vangin a nunhlui rawn phawrh chhuah sakin social media ah a ti mualpho vak a. Mahse,khami ṭum pawh khan engtinmah an bei let lo. Chuan,zu an zawrh tawh loh hnuah an nunhlui phawrh chhuah sak lehin kum tam liam ta a,an zu zawrh vangin in veng aṭangin hnawhchhuah an ni. A dik em? In veng hruaitu te khan an ti diklo hulhual a ni,"a ti ve ta sak sak mai a. Chupa chuan,"A tawk e,i sawi zo tawh em? Doctor Zu Zuar Fanu kan nei hi a ṭha ve hrim hrim,"tih pah chuan ngeiawm zetin a nui zui a. Chu nu chuan a melh rum nasa mai,"Mipa nilovin tuai i nih hi,"tih pahin thinrim deuhin pawnah chuan a chhuahsan ta daih a.

Casualty-ah chuan an buai map map khawp mai. Tlangval 1 accident hi an rawn zawn lut a,a ban veilam chu a tliak tih hriat ngawih ngawih hian a zawi hnuang mai a. A hmai lah chu thisenin a bual khat vek a,a hmel tak pawh a hmuh theih lohva Msi chuan,"Hliam tuar kha hetah rawn mut ula,ka lo en nghal dawn nia,"tiin kutkawr a bun nghal sawk sawk a. Nurse chuan lapua leh damdawi vel a rawn pe nghal bawk a. Chu hliam tuar hmel hmai chu a kak nasa khawp mai,Msi chuan a hmai thisen kai hnuang chu a hrufai nghal sawk sawk a nurse bulah chuan,"Nachhawkna kha lo buaipui rawh aw,a hliam hi a nasa e mai. Nachhawknaa kan chiu vat a ngai dawn nih hi,"a ti nghal mawlh mawlh a.

Hliam tuarpa hmai kak vel chu a ṭhui nghal mawlh mawlh a,"Kan hliam tuar hi a chhungte emaw a ṭhiante emaw kan awm hnai em le?,"tiin Msi chu a âu lauh lauh a. Tuman an chhang si lo,nurse 1 chuan,"Tumah chhungte a nei lo aniang,a rawn hruaitu te pawh kha ka hmu tawh miah lo,"a lo ti a. Msi chuan,"A va buaithlak ṭhin e aw,midang buaipui ngai vak an awm rihlo tiraw?,"a lo ti a. Nurse chuan,"Aw amah deuh chauh hi a ni tawh mai,"a lo ti a. Msi chuan,"Nihchuan hei damdawi lei tur ka ziak a nga,canteenah zu lei lawk mai ta che aw. Cash memo rawn lak theihnghilh lo la aw,"tiin pawisa leh damdawi ziahna lehkha chu nurse a ken tir a,nurse pawh chu a chhuak ve nghal vat a.

Hliamtuarpa hliam vel an ṭhui zawh hnu chuan a ban ruh chu X-Ray turin an buaitsaih leh nghal a. X-Ray vel an tih zawh chuan a ban ruh tliak chu ruh lam doctorin a rawn buaipui ta nghal a. Hliam tuarpa erawh chu a la harh rih lova,Msi chuan,"Zomuanpui,a va mak ve. Hetiang dinhmunah hian in din ka ring ngailo a sin,i pa lah kha vawiinah engmah nei lovin a rawn inentir a. Khawvel hi chu a lo mak a nih hi tiraw?,"ti rilru neuh neuh chungin damlo khuma mu Zomuanpuia chu a en vang vang a.

Nurse 1 chuan,"Doctor,kan hliam tuar hi a chhungte an rawn lang bawk silo. Engtia tih chi nge ni ang le? News lamahte hian post mai chi a ni lo maw?,"tiin a rawn zawt a. Msi chuan,"Aih news lamah chuan post lo mai rawh. Keiman ka lo buaipui mai ang,ka kutah dah mai rawh,"a lo ti a. Nurse chuan,"I buai lovang maw?,"a lo ti leh a. Msi chuan,"Aih buai lovang,a harh veleh an in lamah ka hruai haw mai dawn nia. Admit ngai khawpa hliam nasa em em chu a ni rih lo,"a lo ti leh a. Nurse chuan,"Nihchuan in chung lamah ka han chho nge aw,min mamawh chuan min lo call mai dawn nia aw,"a ti a. Msi chuan,"Awle tehreng mai,"a lo ti vat a.

Tlai dar 4.00pm velah chuan Zomuanpuia pawh a rawn harh ve ta hlawl mai a. A ban chu rawn tih chet mai a tum a;mahse,a chet thei miahlo mai a hawi kual ruai a,"Khawnge ka awm a?,"a rawn ti a. Msi chuan a lo chhang vat a,"I accident a,damdawiinah kan hruai che a,"a lo ti vat a. Zomuanpuia chuan,"Khawnge ka ṭhiante kha?,"a ti nghal vat a. Msi chuan,"I ṭhiante ho chu tumah ka hre lo,hmuh tur pawh an awm lo. Hahdam deuh la,inah kan haw dawn nia,"a lo ti dam thlap a. Zomuanpuia chuan,"Hmel ho chu min kalsan vel a maw? An chaklo ang maw le,"a ti bawrh bawrh a. Msi chuan,"Hahdam rih rawh,tikhan lo awm la taxi chu ka zu la a nge,"tiin a chhuak a.

Msi chu a duty hun chhung aia rei damdawiinah chuan a awm a,nurse 1 chuan,"Awii i chau tawh awm e,"a lo ti a. Msi chuan nui sâng chungin,"Ee chau love,hetiang te chu kan tih tur a lawm. Anih ka kalsan phawt ang che u aw,naktukah kan inhmu leh dawn nia nih phawt u aw,"tiin Zomuanpuia nen chuan Taxi ah chuan an lut nghal a.

Zomuanpuia chuan Msi hmel chu a en vang vang ṭhin a,"Henu hu ka hmuh hnu a van ang e,"ti rilru nuah nuah chungin a hmai vel chu a tuai a,a rin aiin an lo chilh hnem a. Msi chuan,"I hmai kha inrinniah dressing turin i rawn kal leh dawn nia aw,"a lo ti a. Zomuanpuia chuan,"Awle,"a lo ti ringawt a.

Zomuanpuia te veng chu an thleng ta,kawn vel chu a la danglam lo khawp mai. Mahse,building sak ṭhat thar leh rawng hnawih thar vel chu a awm nual hlawm a. Msi chu a lung a leng thar khawp mai,kha chen kha he vengah hian in ti neitu takin an lo cheng ve tawh ṭhin kha a ni a. Mahse,a nu thil lo tih tawh te avangin an veng aṭang chuan hnawhchhuah an ni ta kha a ni a. Hnawhchhuah an nih zan aṭang khan tun hi a vawi khat kal lehna a ni,a lung chu a leng ve khawp mai.

Zomuanpuia te in chu an thleng ta,Msi chuan taxi pu hnenah chuan,"Ka pu,engzat tur nge?,"tiin a zawt a. Taxi pu chuan,"₹100 a ni mai,"a lo ti vat a,Msi chuan a purse aṭangin ₹100 note chu a rawn phawrh a,"Kan lawm e aw,"tih pahin taxi pu chu a pe nghal a. Taxi pu pawh chuan,"Awle keipawh ka lawm e,"a lo ti nghal vat a.

Msi chuan Zomuanpuia chu a dawm a,"Damdawi hi ṭha deuhin a hunbi takah ei ang che aw,"a ti leh a. Zomuanpuia chuan Msi thu hrilh pawh chu ngaihven lem lovin,"Nang hi ka hmuh hnu i ang khawp mai,tunge i nih a? Tinge tiang hian min buaipui em em a?,"a lo ti thung a. Msi chuan nui chungin,"Mi naran ve mai ka nih hi,"a lo ti ringawt a,an ti mawlh mawlh pah chuan Zomuanpuia te kawngkhar bul chu an thleng ve ta a. Msi chuan kawngkhar chu a kik karh karh a,in chhung lam aṭang chuan an lo hawng nghal vat a,Msi chuan Zomuanpuia chu a kuah lut nghal a.

"Awi,engnge thleng a? Engnge awmzia?,"Zomuanpuia nu chu a meng kawk kawk mai a. Msi chuan,"A accident a,a ban veilam ruh hi a tliak a. A dangah chuan hliamna lutuk a neilo,a hmai kak vel a ni leh mai,"tiin a lo sawi nghal zung zung a. Pu Chhuana chuan,"Ehee vawiina doctor kha i ni tiraw? I va fel ve a,"a lo ti nghal vat a. Msi chuan,"Hei in fapa damdawi tur a nia,chuan lehkhaah hian a ei dan tur ka ziak nghal bawk a. A hun takah in lo ei tir ṭhin dawn nia aw,chuan inrinniah hian tu emaw berin a hmai hi dressing turin in lo kal pui dawn nia aw. Chuan,inrinniah chuan a ban ruh pawh hi check leh tur a nia,theihnghilh su aw. CIVIL HOSPITAL AIZAWL,CASUALTY-ah aw,"tiin a hrilh nghal zung zung a. Zomuanpuia nu chuan,"Thingpui kan lum ang aw,kan fapa hliam tuar i buaipui nasa e mai kan lawm lutuk e,"tiin lawmthu a sawi nghal mawlh mawlh bawk a. Msi chuan,"Aaa lum buai duh rih lo mai rawh,ka hmanhmawh deuh a ka haw leh tawh zawk a nge. In lo dam zel dawn nia,"tiin thu tam an sawi leh hma in Zomuanpuia te in chu a chhuahsan ta a.

A chhuak chiah chu a phone a rawn ri nghal ral ral mai a,a nu phone call a lo ni a;

"Aw Nu,"

"In buai deuh a mi? Tinge phone call i chhan theih miah lova?,"

"Umm tlai lamah khan kan buai deuh a,ka rawn hrilh hman ta lo che nihkha tihpalh lutuk aw,"

"Umm tihpalh tihkha a ngailo nia,in buai tawhlo mi tunah khan?,"

"Umm ka rawn haw dawn chiah,ka rawn thlen hunah ka hrilh ang che,"

"Engchu?,"

"Ka buai chhan maw le,tunah chuan sawi a rem chiah lova,"

"Awle rawn haw vat la aw,ka ngaihtuah che nia,"

"Awle rawn haw har lovang,"

"Umm nih ka dah aw,"

"Awle,"

Msi chu a hmaa an in luahna ṭhim lam pan chuan a chhukthla hnak hnak a. Engkim mai chuan a lung a ti leng takzet a ni,an in luahna ṭhin chu a thleng thla ta a. Veranda light chu a lo eng va va a,an awmlaia dawrte an siam pawh kha a lo la awm nia. Mahse,an in luah ṭhin erawh chu tala in a lo inkalh khap a,in neitu te inah chuan a lut chho nghal a,in chhung lam thawm chu tlemte a hre thei a. Naupang ho infiam thawm leh hlim nui ri chu a hre thei a ni,kawngkhar chu a kik karh karh a. Chhung lam aṭangin naupang âw hian,"Lo lut ru,"a lo ti lang lang a. Msi chu a pen lut ta,an nu ber chuan a lo hre nghal vat a,"Awiiii Ms,...Ms,nang maw? I la hmelṭha reng a nih hi,"tih pahin a lo kuah nghal chung chung a. Msi chuan,"In lo damṭha em? Ka ngai thei lutuk che u,"a ti sap a. Pa ber pawh chu a rawn tho chhuak a,"Ehe hei chu kan nau kha a nih hi,i lo va lian tawh ve a?,"a lo ti ve bawk a. Nu ber chuan,"Lo ṭhu phawt teh,tlangkam aṭangin Doctor i ni tih te kan lo hria a,kan lawmpui takzet che a sin,"a ti leh nghal mawlh mawlh a. Msi chuan,"Umm nia a dik a lawm,Civilah sawn ka thawk ve a,"a lo ti vat a. An hlim hlawm khawp mai,"In damṭha maw?,"tiin Msi chuan a zawt leh a. Nu ber chuan,"Aw damṭha e,kan chhangchhe deuh tih mai loh chu,i nu a damṭha maw?,"a lo ti ve nghal vat a. Msi chuan,"Aw damṭha e,nakinah remchangah chaw in lo ei dawn nia aw. Ka hna bang ka rawn tlang nghal a,ka nu in rei min ti tawh ngawt ang. Ka hawsan phawt mai ang che u aw,"tiin a tho nghal a. Pa ber chuan,"Engtinnge i haw dawn a? Taxi ka lo koh sak ang che aw,"a lo ti vat a. Msi chuan,"Kawnah taxi ka chang mai ang ka ti deuh a,"a lo ti a. Pa ber chuan,"Ka ṭhianpa hi kan be chhin a nge,lo nghak lawk rawh aw,"a ti a,a ṭhianpa chu a call nghal a.

"Aww,a van pawi tak. An lo zin daih anihchu,kawnah chuan ka lo chanpui ang che aw,"a rawn ti leh a. Msi chuan,"Aaa ka tibuai lutuk palh ang che u,keimahin ka chang mai ang. Min ngaihtuah suh u,puitling ka ni tawh lawm,"tiin a lo nui var var a. Nu ber chuan,"I ngaihtuahawm loh tak tak maw?,"a lo ti ve a. Msi chuan,"Umm min ngaihtuah suh u,ka kal phawt a nge. Mangṭha vek u aw,"tiin a chhuahsan ta a. Pa ber chuan,"Awle nangpawh mangṭha le,"tiin a thlah liam ve ta a.

Kawnah chuan Msi chuan Taxi chu a chang ngat ngat mai a. Zan a ni tawh bawk nen,taxi chu a vang ve reuh phian a. A piah lawkah chuan taxi 1 hi a lo ding a,Msi chuan,"Ka pu,a hman theih em le?,"tiin a va zawt nghal vat a. Taxi pu chuan,"Aw hman theih e,khawi lamah nge ni ang?,"a lo ti vat a.

"Chanmari-ah nia,"a lo ti a. Taxi pu chuan,"Aw lo lut la,lo kal rawh,"a lo ti a. Msi pawh chu a lut ve nghal a.

"Nu,vawiin chu U Msi te nen kan duty ho a. A mizia kha a la ngai reng,a la fel reng;mahse,min hre miahlo,"tiin a nu bulah chuan Siamtei chu a rawn ṭhu nghal a. Siamtei nu chuan,"Nia a hrelo ang che,a chhanchu in kum a inthlau em a lawm. A ni lah chhuak vak chi a lo ni lo bawk nen,"a lo ti vat a. Siamtei chuan Msi'n Zomuanpuia hliam a buaipui dan leh a thlah haw dan vel chu a nu bulah chuan a hrilh mawlg mawlh mai a. Siamtei nu chuan,"Msi te nufa hi chu misual an ni hleinem. Kan veng aṭanga an hnawtchhuakte kha ka khawngaih a sin aw,"a lo ti ve bawk a. Siamtei chuan,"Nurse dang ho pawn fel an ti thei lutuk,an sawi ve sap sap zel,"a ti leh a. Siamtei nu chuan,"Naktukah chuan in duty ho leh anihchuan insawi la,a hrelo che anihchuan ka hming sawi la a hre em em ang che,"a ti leh a. Siamtei chuan,"Awle ka insawi tawh ngei ngei ang,"a lo ti ve bawk a.