ZU ZUAR FANU 27

CHAPTER--27

*R'z Thangluah✍🏻*

"Khati khawpa kan chunga rilru chhia an pu chung pawh khan,ka haw thei hlawl lo,"tiin Msi chuan a nu bulah chuan Zomuanpuia te pafa a puih dan chu a sawi mawlh mawlh mai a. Pi Ruati chuan,"Thil ropui tak i ti anihchu,khawvela thil harsa ber chu min haw em emtu te puih hi a ni. Mahse,nangchuan i thei miau si a,ka fanu ka chhuang takzet che a ni,"tiin a fanu chu a kuah vawng vawng a. Msi chuan,"Nu,heng zawng zawng hi i hnen aṭanga ka zir chhuah vek a lawm. Khawvela nu zawng zawngah i ṭha ber,ka hmangaih che Nu,"tiin a nu biangah chuan a fawh sak zauh a. Pi Ruati chuan a fanu sama chul hliau hliau pahin,"Nang hi ka fanu i nilo ang tih ka hlau a ni,"a ti leh a. Msi chuan,"Nu,keipawh hian nang hi ka nu i nilo ang tih ka hlau a sin,"a lo ti a,an pahnih chuan hlim takin an inkuah vawng vawng a.

Max pawh a zinnaah chuan ni 3 vel a châm ve ta. A zinnaah chuan hmelhriat em em pawh a nei lem lova;mahse,a zinna khuaa an VCP te inah a thleng a nuam pawh a ti ve khawp mai.

A thlenna te chuan fanu tleirawlte kum 19 mi vel awm hi an nei a. Fapa 2 an nei bawk a,an fel hlawm khawp mai,zanah chuan Max chuan,"Network hi tihian a chhe reng ṭhin a mi?,"a ti tawl mai a. An fanu tleirawlte Kimkimi chuan nui har har chungin,"Tower a kang a,an la siam thei lova i lung a leng tawh nimaw?,"a lo ti vat a. Max chuan,"Ka chhungte biak ka duh a,"a lo ti ringawt a. Kimkimi chuan,"Tlangah khan han kal ila,keipawh phone hman ka duh lawm,"a lo ti a,a lo phur khawp mai a. Max chuan,"I nu in chhuah a phal mi a?,"a lo ti vat a. Kimkimi chuan,"Ka'n dil chhin nge aw?,"tih pahin choka lamah chuan a phei nghal a,a rawn let leh rang khawp mai,"Ummm a phal mahse,rei lo ula a ti nihchu,"tih pahin chhuah nghal mai a tum a. Max chuan,"Lawk aw jacket ka va ha lawk nge,"tih pahin roomah a lut nghal a,rei vaklo hnuah a rawn chhuak leh mai a,Kimkimi nen chuan tlanga phone hmang tur chuan an inzui chhuak ta a.

Khua a dur deuh vangin boruak a vawt sur mai a,Max chuan a nu chu a call nghal a. 20 mins vel an inbiak hnuah a dah a,Msi chu a call leh nghal a;

"Aw Max,i ṭha em?,"

"Umm ṭha e,i ṭha zawk maw?,"

"Aw ka ṭha lawm,tlangah i kal leh tawh mi?,"

"Aww an tower a chhiat vangin network a lo awm lova,tlangah kan kal tlut tlut mai anih hi,"

"I tan chhuah reng a buaithlak chuan a nuamlo nia aw,"

"Zan lamah chuan hunawl ka ngah zawk a lawm. Tunlai in buai em?,"

"Buai lutuk love,naktuk zan ṭangin ka night dawn a,"

"Nihchuan kan inbe khât deuh dawn tihna nimaw?,"

"Ka hrelo le i hman chang chang chuan min lo call tho la,"

"Nia rawn call ang che,i nu a damṭha em?,"

"Umm damṭha ve zel e,a lu na pawh a sawi khat tawh khawp mai,"

"A ṭhat nasat chu Emily te an ṭha maw?,"

"Aw ṭha turah ka ngai mai,tunlai chu a buai ve bawk aniang kan inbe khat khawp mai,"

"Eheee ruah a sur dawn nih hi,ka dah phawt ang aw. Muttui mangṭha aw,"

"Awle muttui le in enkawl ṭha la aw,"

"Awle nangpawh in enkawl ṭha ang che aw,ka dah aw,"

"Awle bye,"

Max chuan a phone chu a off nghal a,"Khai aw a sur hnem dawn takngial,kan do haw tawp mai dawn mi?,"tiin Kimkimi chu a va zawt a. Kimkimi chuan,"Sawlaiah sawn in te a awm sin,tahchuan phei zawk ila do chu ka duh teuh lo,"a lo ti vat a. Max chuan,"Nihchuan phei ila,"a ti a,an inzui phei nghal a.

Ruah chu a sur duh buan buan khawp mai,thli lah chu a thaw vuk vuk mai bawk si. Kimkimi chuan vawt a ti tawh khawp mai. A inkuangkuah hlun a,a khur beuh beuh mai a. Max chuan a jacket chu a phelh a,"Kha hei ha rawh keichuan vawt ka ti vak lo,"tiin a jacket chu Kimkimi a pe a. Kimkimi chuan,"Aaa a ngai hleinem,"tih pahin a lo nui mai a. Max chuan,"Ha mai mai teh,a vawt i ti a i khurh beuh beuh kha,"tih pahin Kimkimi darah chuan Jacket chu a rawn bat a. Kimkimi chuan,"Imm nih ka lawm lutuk aw;mahse,vawt i ti ve lo tak tak maw?,"a ti leh a. Max chuan,"Mipa chuan vawt kan hre ve hleinem,"a lo ti mai a. Kimkimi chuan,"Min lo ngheng tal la,i hritlang ang tih ka hlau lawm,"tih pahin Max chu a va ṭhut hnaih a,Max erawh chu a ṭhut dan ngaiin a lo la ṭhu reng thung a.

Zan dar 9.00pm velah pawh ruah sur chuan ban zai a rel silo. Max pawh chuan vawt a ti ve ṭan tawh khawp mai,"Mei kan zu lawk nge aw,"tiin a ipte chu a zen ruk ruk a,"Khaiaa lighter chiah ka ak a nih hi,va ho e aw,"tih pahin a phone flash chu a on a,an bul vel chu a enkual thuak thuak a,"Kimkim,thingṭang ho hi kan hal a nge aw tikhan lo ṭhu rawh aw,"tih pahin a tho nghal a,in te chhunga thingṭangro a hmuh ang ang chu a ṭham khawm a. A chhep a,a chhem alh hluah mai a. Kimkimi bulah chuan a han ṭhu leh mai a,chu veleh Kimkimi chuan a lo kuah a,"Dar engzatnge?,"a lo ti vat a. Max chuan a sana chu a bih zauh a,"Dar 9.30pm a ri ṭep,i chhungte chuan min ngaihtuah tawh viau ang maw le. Hetah hian network a awm mang bawk si lo,"a lo ti vat a. Kimkimi chuan,"Ka hlau e keichu,"a lo ti zawi sap a. Max chuan,"Engmaw i hlauh chu?,"a lo ti vat a. Kimkimi chuan,"Aww thim hi ka hlau,kawl phê pawh hi ka hlau tho,"tih pahin ngaihno bei zet hian Max chu a rawn melh a. Max lah chu zeilo tih takah a lai chhe nghal der a,"Aaaa...nia thim chu a hlauhawm hleinem,"a lo ti bah deuh nuai a. Kimkimi chuan Max chu a rawn ngheng tawlh tawlh ṭhin a,"A vawt i ti ve lo tak tak maw?,"a ti leh a. Max chuan,"Aw ti lo e,"a lo ti vat a,a âw te chu a khur der der tawh a. Kimkimi chuan,"Hei i kut pawh a vawh vek hi,"tih pahin Max-a ban puamah chuan a rawn chûl a. Max chuan,"Vawt ve mai mai nihkha,"a lo ti ringawt a.

Zan dar 10.00pm velah chuan ruah sur pawh chu a hàn ve ta a. Max chuan,"Hei ruah sur pawh a bang tawh a nia,kan haw tawh mai dawn mi? I nu ten min ngaihtuah lutuk palh ang,"tiin a tho vut a. Kimkimi pawh chu muang changin a rawn tho ve mai a,"I khuasik vaih chuan min puh miah suh aw,"tih pahin Max-a banah chuan a rawn kaikuah nghal a. Max chuan,"Umm puh lo ang che,i ni in min hau ang tih ka hlau zawk,"a lo ti a. Kimkimi chuan,"Huh veka kan haw aichuan ro veka kan haw hian min hau lo zawk ang. A nu hian ruah do a phal ngailova,"tih pahin a lo nui sen sen a. Max chuan,"Min hauh chuan i sawifel vek ang aw,"a lo ti leh a. Kimkimi chuan,"Tehreng mai,min ring tawp rawh. An fanu neihchhun hi min hau phal teuhlo mai,"a lo ti leh vat a.

Pi Rami chuan,"Ka ngaihtuah zia che u hi in hria em? Biak tlang theih bawk siloh,"a lo ti nghal bawrh bawrh a. Kimkimi chuan,"Nu,kan tihpalh lo haw kan tum lai takin ruah kha a sur sia. In teah khan kan tlan phei ringawt a lawm,"tiin inthlahrun hmel takin a nu chu a melh a. Pi Rami chuan,"Ka fanu thusawi hi a dik em?,"tiin Max chu a rawn melh ram ram a. Max chuan,"Aww dik e,a sawi dik chiah lawm,"a lo ti vat a. Pi Rami chuan,"Awle nihchuan mu nghal rawh u,"a ti hmak mai a. Max chuan,"Awle,"tih pahin a room lam chu a pan nghal nul nul a.

Kimkimi chuan,"Nu,nangchu tikhan i ti leh vak ṭhin a. Nuamlo a ti phah vek ang,"a lo ti a. Pi Rami chuan,"Nangpawh mu rawh,vawikhatmah tiang hian awm tawh suh ang che u,"a ti leh a. Kimkimi chuan,"Awlee,"tih pahin a nu chu a nuih sak a,mu turin room lam a pan ve nghal a.

Max chuan a mut hmunah chuan Kimkimi ngawt chu a ngaihtuah reng mai. Ngaihno bei taka a rawn nuih sen sen lai te kha a mitthlaah a cham reng a,Msi nen a tehkhin ṭhin a. Msi chu a hmelṭha,a fel em em bawk a tunah phei chuan Doctor niin thawhchhuah a nei ve tawh a. Neih pawh tum se,a chhungte chuan an hnial dawnlo tih chu a ni aia hrechiangtu an awm lovang. Kimkimi erawh chu thingtlang nula thawhchhuah em em pawh neilo. Mahni fel fel a fel ve tawp,lehkha erawh a hming chuan a la zir ve. Mahse,a hmel a ṭha a,a duhawm em em bawk a ni mipa tih hlim dan a thiam em em bawk a. Kimkimi bula a awm tawh chuan a hlim viau zel ṭhin a ni. Mahse,a tam zawkah chuan Msi a tluklo a ni.

Kimkimi pawh chuan tudang ngaihtuah lovin Max bawk chu a ni a ngaihtuah chu. Max-a jacket chu a mutpui a,a kuah a hním veng veng a,"Awii a perfume rimtui zia hi,ka zûnah chuan i la uai dawn khawp a lawm,"tih sep sep pah chuan a muhil ve ta siai siai a.

Pathianni zing a ni a,Max pawh inkhawm turin a insiam ve malh malh a. A zinna chu nuam pawh a ti ve tawh khawp mai,ṭhian fel tak tak a neih phah bawk a,a haw hun chu a lung a leng ve viau ang.

Sitting roomah chuan Kimkimi leh a ṭhiannu chuan an lo nghak reng tawh a. Max chuan nui var var chungin,"Min lo nghak rei tawh em?,"a lo ti chhuak nghal a. Kimkimi chuan,"Rei love,rei pawh nila kan dem lo,"tih pahin a lo nui sak a. Kimkimi ṭhiannu Puitei chuan,"I rei tehreng nen i zipper i zip lo hram a?,"tih pahin a lo nui har har a. Max chuan,"Khai aww,van zialo ṭhin e aw,"tih pahin a inher a,a zipper chu a zip nghal sawk sawk a,"Kal ila,"a rawn ti nghal zat a.

Inkhawm ban chuan Kimkimi te inah a ṭhiannu chu a rawn lut kawi leh a,Max erawh a la rawn haw thleng ve lova. Kimkimi chuan,"A haw hma ngei hian ka chhaithluk a ngai,"tih pah chuan a nui zui har har a. Puitei chuan,"Zaninah tlangah phone hmang leh ula,"a lo ti vat a. Kimkimi chuan,"Biak tur ka hre hleinem,"a lo ti a. Puitei chuan,"Aww i zei viau emaw tia? Kan result chhuah hun tur ka ṭhiante zawh ka duh ti la ni mai lawm,"a lo ti vat a. Kimkimi chuan,"Nia a tihchi ngawt ang,ṭha dawn lutuk. Zanin chu ka inkhawm dawnlo nia aw,"a ti nghal ringawt a. Puitei chuan,"Inkhawm e le mahse,inkhawm ban hma in i haw dawn nia,"a lo ti vat a. Kimkimi chuan a hrethiamlo hle mai,"Awmzia ka hre map lo,"a lo ti a. Puitei chuan,"Huiham zanah ka hrilh ang che,ka haw phawt ang bye aw,"a ti a,a chhuak nghal daih a.

Notei leh Msi inkhawm bang chu an inzui haw a. Notei chuan,"Vawiinah Mama'n a rawn be tawh che em?,"a ti a. Msi chuan,"Aih la be miahlo,a la rawn be biklo che u mi?,"a lo ti vat a. Notei chuan,"Aih be lo a lo biak tak che in ka tia,ka zawt mai mai che,"a ti leh mai a. Msi chuan,"A inkhawm ve ni maithei ni,chubakah a zinnaah khan an tower a chhia a tia. Tlangah chiah phone a hman theih aniang,zingah pawh khan ka call chhin a a tlang theilo reng reng. Min lo call hun ka nghak tawp zel,"a lo ti leh a. Notei chuan,"Nia buaithlak e mai,zib tawhlo se a ṭha ang,"tih pah chuan a nui zui hawk hawk a. Msi chuan,"Dik chiah mai,duh duh hunah a inbiak theih siloh,"a lo ti ve vat bawk a.

Zanah chuan Kimkimi chu inkhawm turin a insiam malh malh a. Max erawh chu a inkhawm dawnloh vangin In nghak turin an dah a,midang zawng chu inkhawm turin an kal diak hlawm a.

Inkhawm ṭanna dar a rik hnu rei vak lovah chuan Kimkimi leh Puitei chu an rawn lut hlawl mai a. Max chuan sitting roomah T.V a lo en a,"Ehe engnge awmzia?,"a lo ti vat a. Puitei chuan,"A pum a na a,ka rawn hawpui tawp a nih hi,"tih pahin ṭhutthleng seiah chuan Kimkimi chu a mut tir nghal a. Max chuan,"Aww a van zialo ve aw,a na viau em?,"tih pahin Kimkimi bulah chuan a rawn ṭhu phei nghal a. Kimkimi chuan a pum dawm vang vang pahin,"A na lutuk,"a rawn ti a. Max chuan Kimkimi pum chu a dawm a,"Puite,damdawi awmna i hria em? Engmah ka hre ve silova,ti ringawt chuan a dik dawn lo,"a ti nghal mawlh mawlh a. Puitei chuan,"Lawk aw damdawi chu ka va zawng a nge,"tih pahin choka lamah chuan a phei nghal a.

Kimkimi chuan,"A na lutuk,"tih pahin Max-a kutah chuan a rawn hmer a. Max chuan,"Tuar fan fan rawh aw,i ṭha leh vat mai ang,"a ti nghal mawlh mawlh a. Puitei pawh chu choka lam aṭang chuan a rawn phei leh vat a,"Awii pum lam damdawi engmah ka hmu miah lo,a van buaithlak tak,"a rawn ti nghal bawrh bawrh a. Max chuan,"Engpawh nise ṭhutthlenga mut tawp aichuan khumah mu la,a nuam zawk ang. I kal thei ang tiraw?,"tiin Kimkimi chu a melh a. Kimkimi chuan,"Umm kal thei e,"tih pahin a rawn in bengkang a. Max chuan a lo kuah vat a,room lamah chuan an in kaikuah phei nghal a. Puitei chuan,"Awii hetianga awm reng chu a ṭha lo. Max,tikhan lo buaipui la Biak In lamah ka han chho leh a nga,Kimkimi nu ka han ko a nge aw,"tih pahin a chhuak nghal daih a.

Max chuan a thiam ang tawk tawkin a buaipui ve mawlh mawlh a,"I zia deuh tawh em?,"tih pahin Kimkimi kutah chuan a vuan a. Kimkimi chuan,"Umm tlem chuan ka zia deuh tawh e,"tih pah chuan a thaw ham ham a. Max chuan,"I ṭhat tawh tho chuan i nu chu koh kher pawh a ngai mawn le?,"a ti leh a. Kimkimi chuan,"Nia mahse,pawilo an bang ṭep tawh tho ang,"a lo ti vat a. Max chuan,"A la na em?,"a rawn ti leh a. Kimkimi chuan,"Na lutuk tawh lo,ka pum hi min lo zut sak teh,"tih pahin Max chu a rawn melh leh ralh ṭhin a. Max chuan,"Awle,"tih pahin kut khur dar dar chungin Kimkimi pum chu a zût sak a.