ZU ZUAR FANU 25

CHAPTER--25

*R'z Thangluah✍🏻*

Inrinni zing a ni a,Max chu a phur surh surh khawp mai,"Ka nau duhtak,vawiin ni hi i la hria maw?,"tih pahin a rawn nui vur vur a. Notei chuan,"Umm ka theihnghilh phal i ring mi?,"tih pah chuan a rawn nui sâng a. Max chuan,"Mahse,engnge ka sawi ang?,"a ti leh ta. Notei chuan ner nung chungin,"Huiham,i rilrua thu awm ang ang kha ni mai. ..tak takin hmeichhia chuan duat leh care kan mamawh ṭhin. I theihtawpin duat la,i ngaihsak bawk dawn nia,"a lo ti nghal vat a. Max chuan,"Nia dik chiah lawm...an dawrah thil ka zu lei lawk aw,"tih pahin a chhuak nghal a.

Msi chu a nu a bazar daih vangin,amah chauhin a lo awm a a buai khawp mai. Max chuan,"I va buai awm ve a? Puih theihna che ka nei em?,"tiin Msi bulah chuan a rawn kal a. Msi chuan,"Awii nangmah law? Buai lutuk love,lo ṭhu rawh heng ho kan rem fel lawk a nge,"tih pahin Lays package vel chu a rem nghal mawlh mawlh a. Max chuan,"Khawi keiman ka lo ti ang,i hah lutuk palh ang. Lo ṭhu chawl tawh zawk la,"tiin Msi thil khawih lai chu a va khawihpui nghal a. Msi chuan,"A hahthlak hleinem,lo ṭhu rih mai mai teh,"tihpahin Lays package 1 chu a chawi nawlh a;mahse,a mawng lamah a baw hawk hawk mai,"Awii a mawng a pawp a nih hi,ka van ngei tak,"tih pahin chhuatlaia Lays vel tla nuai chu a buaipui nghal mawlh mawlh a. Max chuan,"Lo ṭhu teh,khawi ka lo ti ang,"tih pahin Msi chu a hnung lam aṭangin naute pawm angin a pawm kang nawlh a,ṭhutthlengah chuan a ṭhuttir a,"Tahkhan lo ṭhu la,tihdan tur min lo hrilh dawn nia,"tih pahin Lays ho chu a va buaipui nghal a. Msi chuan,"Engtinnge min pawm zawh a?,"a lo ti daih thung a. Max chu a nui hak hak a,"Nakinah ka la hrilh ang che,hengho hi engtinnge ka rem dawn?,"tih pahin Msi chu a rawn nuih a. Msi chuan,"Khi a chungah khian rem tur a nia;mahse,a bawm kha a chhe daih sia,"a lo ti vat a. Max chu a ngawi vang vang,a hawi kual thuak thuak a,"Parcel hi a ruak dang in la nei em? Hetiang tiat vel hi,"a rawn ti a. Msi chuan,"Aih nei tawhlo,vawk talh ṭhin hovin nizanah an rawn la vek tawh,"a lo ti a. Max chuan,"Imm nihchuan cello tape hlai in nei em?,"a ti leh a. Msi chuan,"Imm nei e,"tih pahin rawn thawh mai a tum a. Max chuan,"Rawn tho chhuak suh,a awmna sawi la ka la mai ang,"a lo ti vat a. Msi chuan,"Khalai basket tereuhteah khan a awm,"tih pahin basket awmna chu a rawn kawk a. Max chuan,"Awle ka hmu e,"tih pahin a la nghal a,parcel mawng chu a char nghal mawlh mawlh a.

"I hah awm sia,thingpui ka lo va lum a nge aw,"tih pahin a tho a,choka lamah a lut phei nghal a. Max chuan Lays ho chu a rem fel nghal zung zung a,Msi rawn let leh hma chuan a awmna turah a dah fel nghal vek hman tawh a. Kuhva kheh tur in chhawp chu a la a,a kheh leh nghal zung zung a.

"Awii,kha kha chu lo ti duh tawh suh. I hah lutuk ang,"Msi chu thingpui chawiin a rawn phei a. Max chuan,"A ho e mai,tlangval tan engmah hahthlak a awmlo,"a lo ti vat a. Msi chuan,"Ka awihlo kha i thlan a far a nia,"tih pahin a nui sen sen a. Max chuan,"A lum a lawm,"a lo ti vat a. Msi chuan,"Nihchuan thingpui in zawhah ice cream i ei dawn nia aw,"a ti leh a. Max chuan,"Chutiang em em chu ka phûlo a sin...taka dinner kha theihnghilh lo la aw,"a rawn ti vat a. Msi chuan,"Theihnghilh bik love,ka lo phur ve tawh lutuk a sin,"a lo ti vat a. Max chuan,"A ṭhat nasat chu,i nu bulah chuan i sawi tawh ang tiraw?,"a lo ti leh a. Msi chuan,"Umm sawi tawh e,a phal a lawm,"a lo ti vat a. Max chuan,"Ṭha lutuk zanah inkhawm hman turin kan haw leh dawn nia,"a lo ti vat bawk a.

Notei chuan,"Mam,U Msi chu i chhuahpui dawnlo mi?,"a lo ti a. Max chuan,"A hun tawh mi? Dar 2 chauh a la nih hi,"a lo ti hâ mai a. Notei chuan,"Awiii,hetiang em em hian i zeilo ang tih hi ka ring pha ngai lo. Dineout hma in,in leng chhuak ve ang chu,"tih pahin a chek tlak tlak a. Max chuan,"A ṭul kher a mi?,"a lo ti leh hram a. Notei chuan,"Huihammm...ka bialpa nilovin ka unaupa i ni hi chu vanneihna a ni ringawt. Khawi i phone rawn la teh,"Max bulah chuan a va ṭhu a. Max chuan,"I call dawn mi?,"a lo ti leh hû a. Notei chuan,"Aw call dawn e,zeilo thei teh tuh lutuk mai,"tih pahin Msi number chu a hmet chhuak a,a call nghal a. Max chuan,"Engnge ka sawi a nga?,"a ti leh a. Notei chuan,"Dineout hma in lenchhuahpuiah i sawm ang,"a lo ti vat a,Msi pawh chuan phone call chu a lo chhang ve vat bawk a;

"Aw Max,"

"Aaa i buai em?,"

"Buai love,nge ni ta a?,"

"Ihmaww dineout hma in i chhuak hman em?,"

"Aaa ka hre lo le,ngatinge?,"

"I hman chuan chhuak ila ka ti deuh a. Mahse,i hman loh chuan pawi chuanglo nia,"

"Umm tunah tak chuan ka la hman lova,"

"Engnge i tih a?,"

"Hei kuhva ka kheh laklawh lutuk a,"

"Nihchuan ka rawn khehpui leh mai ang che aw,"

"Aih a ngai lo a nia,ka zo ṭep a lawm,"

"Ka rawn tihpui che chuan i zo hma thei dawn a sin,"

"Aih a ngailo nia,ka zo ṭep tak tak lawm,"

"Awle nih ka dah mai aw,"

"Awle bye,"

"Bye le,"

"Hetiang em em hian mihring fapa hi i lo zeilo ang tih hi ka ngaihtuah pha ngailo,"Notei chu a lo nui hawk hawk a. Max chuan,"A hmanloh kha,"a lo ti zawi sup a. Notei chuan,"Eee i muah tawh em?,"a rawn ti thut a. Max chuan,"Hmm chutiang an inzawt ngai a mi?,"a lo ti vat a. Notei chuan,"I la muahlo ni maw? A va hahthlak ṭhin e aw,"tih pahin a unaupa darah chuan a vuan a,"I muah ngam loh chuan pa lo a ti ngawt ang che,"a tia,a nui tlawrh tlawrh a. Max chuan,"Chutiang rilru a pu ve lo e aw,tihian thianghlim deuhin kan inkawp a tawk chiah lawm,"a lo ti mai a. Notei chuan,"In muah chu a tenawmna awm lo,em em che hian a,"a lo ti hluk a. Max chuan,"Tûm lian,ka inbual dawn nia,"tih pahin a roomah chuan a chho nghal daih a. Notei chuan,"Zeilo si hahthlak,Msi hi ka ni ang tih ka hlau,"a ti zui hram a.

Tlaiah chuan Max leh Msi,Notei te chu Dineout tur chuan an in phur chhuak ta a. Thui pawh an thlen hma in Max chuan a nu hnen aṭangin phone call a dawng a;

"Aw Nu,"

"Bawiha,lo let leh vat teh u. Msi nu hi a tlu a,hei kan buaipui mek. Damdawiin lamah rawn tlang nghal mai ru aw,"

"Maw? Nu,i ti tak tak mi?,"

"Aw Msi kha kan call tlang thei lova,lo tlan let leh mai ru aw,"

"Awle kan lo let nghal ang,"

"Umm nih ka dah aw,"

"Awle,"

Notei leh Msi chu an hawi phawk hra mai a,"Engnge thleng a?,"an lo ti nghal vat bawk a. Max chuan,"Ms,i nu damdawiinah an kal pui a,kan let leh nghal a ngai a,"tih pahin kawng zau laiah chuan a motor chu a her rem a,damdawiin lam pan chuan a tlan phei nghal a. Msi chuan,"Nilo ka nu chungah engmah a thleng theilo,"tiin a ṭap nghal a. Notei chuan a lo kuah vat a,"Lungngai mah ta che,engkim a ṭha leh vek dawn a lawm,"tiin a thiam dan ang ang chuan a lo hnem ve bawk a.

Damdawiin an thlen chuan Msi nu chu an lo zawn lut deuh chiah a. Max nu leh pa chu an lo awm bawk a,midang hmelhriat hmuh tur erawh an awm hran lo. Msi chuan ṭap deuh pur chungin,"Ka nu chu engtinnge a awm?,"a rawn ti nghal mawlh mawlh a. Max-a nu chuan,"Bawihi,a ngaihtuahawm loh a nia. Engkim a ṭha leh vek mai ang,"tih pahin a lo kuah nghal a. Msi chuan,"Hetiang hian ka nu hi a la awm ngailo a sin,"a ti leh a,a lungchhe telh telh mai bawk si. Max-a nu chuan,"Umm i rilru ti hah lo la,hahdam deuhin awm rawh aw. I nu chu a ṭha leh vat dawn lawm,"a ti leh mawlh mawlh a.

Rei fe hnuah chuan Doctor chu a rawn kal a,"Pi Vanlalruati chhungte kha in ni tiraw?,"tiin Max-a nu chu a rawn bia a. Max-a nu chuan,"Aw ni e,engnge chanchin?,"a lo ti vat a. Doctor chuan,"Khawngaihin min lo zui lawk mai ta che aw,sawipui duh che ka nei a,"tiin Doctor room lamah chuan an inzui phei nghal a.

"Kan damlo hi rin aiin a lo serious zek mai. A tluknaah khan a lu hi a sawh na angreng a nih hi,X-Ray kan ti zo chiah a. A lu ruh hi a sawh khi a,nakinah test hrang hrang dang kan ti leh a nga. Chumi zawhah chuan zai turin a taksa a in fit tawk em?tih te kan en leh a nga. Chumi hnuah chuan nangni lamin rem in tih chuan kan zai dawn nia,"tiin tlang takin a sawi nghal vek a. Max-a nu chuan,"Doctor,zep thu chenglo tuna damlo hi kan inhnuai luahtu te an ni a. An nufa chauhin an khawsa a,engpawh tih ngai se keini hian kan ti vek ang. Pawisa chawi ngai pawh keini hian kan chawi vek ang,"a ti ve mawlh mawlh mai a. Doctor pawh chuan,"E chutiang rilru in pu thei chu a lawmawm takzet a ni. Midang ho bulah pawh khan lo sawi la,ṭha ber tur chu zai hi a ni a. Mahse,in lo inrawn khawm ve dawn nia aw,"tiin an in thlah ta a.

Damdawiinah chuan Emily te chhungkua te,Rki te chhung leh Lawma leh Sangtea pawh chu an lo thleng nghal vat a. Msi nu chu zai a ngaih tur thu chu Max-a nu chuan a sawi bawk a,puitling ho chu an han inrawn khawm ṭhin a. An lu a hai ve map map khawp mai,Msi lah chu a ṭap reng tawh mai bawk si. A hahthlak tak zet zet a ni.

Pathian rawn chunga an inrawn khawm hnuah chuan Msi nu chu zai turin thu an ti tlu thei ta a. Mahse,engkim chu a risky vek mai a ni,in zaina room piaha common roomah chuan an ṭhu ṭhap hlawm a. Tupawh mai chu an ngui nghiai hlawm mai a,Msi chu Emily chuan a kuah a,"Bawih,engkim a ṭha leh vek dawn a lawm. Lungngai reng reng suh aw,i nu chu Pathianin a ti dam leh dawn lawm,"tiin a thiam ang tawk chuan a hnem ve malh malh a.

Darkar 1 tehmeuh hun an hman hnuah Doctor chu a rawn chhuak ta a,"Kan hlawhtling e,ngaihṭha deuh khan awm ru aw. A harh hunah nurse ho in an lo hrilh ang che u;mahse,a hmuh laiin hmel hlim put in tum hram hram dawn nia,"tiin a rawn hrilh a. Msi chuan,"Doctor,engtiknge ka nu chu a rawn harh ang le?,"a rawn ti nghal vat a. Doctor chuan sana bih zauh pahin,"20 minute hnu velah a harh ang,ngaihṭha deuh khan awm rawh u. Engkim a ṭha vek a nia,"tih pah chuan a nui suk a,a room lam pan chuan a kal phei nghal a.

Msi chuan sana chu a bih chhen tawh mai a. 30 minute a liam ta,"Doctor khan 20 minute hnuah a harh ang a ti ve sia. Tinge nurse ho hian engmah an la rawn sawi loh le?,"tiin a ṭap leh pur tawh mai a. Max chuan,"Ms,hahdam hram hram rawh aw. A rawn harh ṭep ang,"tih pahin Msi kut chu a rawn vawn sak a. Msi chuan,"30 minute a liam tawh hi,"ṭap ṭuau chung chuan a rawn ti a. Max chuan a kuah a,"A ṭha vek mai ang,hahdam rawh,"a ti leh a.

Nurse 1 chu in zaina room aṭang chuan a rawn tlan chhuak a,doctor room lam pan chuan a tlan phei nghal a. Reilo te hnuah doctor nen chuan an rawn let a,in zaina room lam pan chuan hmanhmawh zetin an kal hlawk hlawk a. Doctor leh nurse te chet vel dan ah chuan tumah ngaihṭha takin an awm thei tawh lo,tumah chu an ṭhu hle hle thei tawh lo. An vei kual sek hlawm mai a.

20 minute hnuah Doctor chu a rawn chhuak leh a,"Tunah chuan a harh tawh e,a fanu a hmu duh a,"a rawn ti a. Msi chu a rawn tho chhuak nghal vat a;mahse,Doctor chuan a lo ti ding leh a,"I mittui kha hru hul phawt la,i nu chu i hmu dawn nia. Hmel hlim tak pu chungin hmu ang che aw,"a lo ti a. Msi chuan a mittui hru a hul nghal sawk sawk a,"Awle Doctor,ka hria e ka lawm lutuk aw,"tih pahin in zaina roomah chuan a phei nghal a.

Thla 2 a liam leh meuh chuan Msi nu pawh a damṭha tawh khawp mai. Mahse,eng emaw changin lu na fek fek a sawi leh zauh ṭhin tih loh chu na dang em em a nei ngai lo. Msi pawh a zirna lamah a insawr bing ve thei ta bawk a,zan lamah chuan a nu mutthilh hnuah lehkha a zir ve ṭhin.