ZU ZUAR FANU 24

CHAPTER--24

*R'z Thangluah✍🏻*

Zing dar 3.00am velah pawh Msi chu a khumah chuan a la mu meng kar mai a. A room kawngkhar chu a kalh lem lova,sitting room a mu Sangtea thawm erawh hriat tur a awm lem lo.

Zing dar 4.00am vela Pi Ruati zung tur rawn tho chuan,sitting room ṭhutthleng sei a mi lo mu chu a hmu thut a a phu nasa ngei mai,"Heyy nang hi tunge i nih a? Bawihi,lo tho teh,"tiin a au chiam mai a. Chu veleh Sangtea chu a rawn in perh tho nghal a,Msi pawh room aṭangin a rawn chhuak nghal vat a. Pi Ruati chuan,"Nang maw? Ngatinge i hmai te neu nuau chu?,"tih pahin phawk hra hian Sangtea chu a en a. Sangtea chuan,"Tunkar chhung vel chu in Inah hian awm in phal a ngem? Hnathawh a ngaih pawn ka thawk mai ang,"a lo ti nghal mawlh mawlh a. Pi Ruati chuan,"Engnge thil awmzia sawi phawt teh,ka hrethiam lo a nia,"a ti leh a. Sangtea chuan a chunga thil thlen dan chu kimchang takin a sawi nghal vek a. Msi chuan,"I chhungte chuan chhuak turin an tih loh che chu? Hetianga chhuah tauh hi engnge a hlawkna? Rawn chhuak tau lo la chuan,i hmai pawh hi engtinmah a awm lovang,"a lo ti hlak hlak a. Pi Ruati pawh chuan,"Ni e Bawihtei hian a sawi dik a lawm. Engpawh nise,khua te han var phawt se ngaihtuahna tharin kan ngaihtuah ṭha dawn nia. Ka zun a chhuak e mai,ka zung a nga ka mut san leh mai ang che u. Nangni pawh kha in mutna hmunah mu ve ve rawh u,tunah,"a ti nghal hmak hmak a. Msi pawh chu ngawi rengin a room lam pan chuan a kal nghal vat a. Sangtea pawh chu phur lo zetin ṭhutthleng seiah chuan a mu leh nghal sawt sawt a. Pi Ruati pawh chu bathroom lam pan chuan a kal phei ve nghal bawk a.

"Nu,nangpawn i ti dik bik lo a sin. Nitin a theihtawpin a pui che a,a duhna hmunah takngial pawh a kal ve theilo. Kar hmasa te khan an ṭhianho picnic an ti a;mahse,mama chuan engmah a sawi lo. A chhanchu,dawrah nangmah puih che a duh vang a ni. Thawhchhuah neilo tiin i hau ve ziah a,a rilru a nat loh bik i ring a mi? A class kal pawh nangmahniin chawl tura in tih vangin laklawh deuhin a chawlh phah bawk a,"tiin Partei chuan a nau thlavang chu a hauh ve nasa mai a. Pi Zuali chuan,"Nang lah hian i lo ṭan ve ziah mai. Kan Local Council Chairman a chhan dan te kha i hre velo zawk a mi? A nu leh pa te min tih mualpho zia hi,"a ti nghal hlawih hlawih a. Partei chuan,"Nu,i ngaihdan kha a diklo a ni. Ka nau hi chuan dikna hi a duh ber a ni a sin. Chuan,ka pa pawh a hmingin Kohhran Upa chu a ni ve ngei a lawm. Mahse,a thusawi hi a nung ngailo a sin,kan chhungkua hi in enfiah kan ngai a ni,"a ti leh a. Chu veleh Pu Thanga chuan,"Enga? Lalparmawi,i pa hi min hmusit em ni a? Ka thusawi hi a nunglo i ti a maw?,"a lo ti nghal bawrh bawrh a. Pi Zuali chuan,"In unau ah Zothansanga nen hian in sual bik lutuk,"a ti zek a. Partei chuan,"Umm a tawk e,engmah ka sawi ve tawhlo ang. Mahse,Mama lamah chuan ka ṭang zel ang,"tiin a room lam pan chuan a kal nghal hlawk hlawk a.

Pu Thanga chuan,"Huiham,i fate hi enkawl ṭha turin ka ti lo che em ni?,"tih pahin a nupui chu a melh khui khui a. Pi Zuali chuan,"A chhia apiang hi min puh kher suh. I fate pawh an ni ve tho,kan 2 a kan fate an nih hi,"a lo ti nghal tawn tawn a. Pu Thanga chuan,"In chhungkhur leh fanau enkawl chu nu ber hna a ni,"a ti leh a. Pi Zuali chuan,"Pa ber pawn mawhphurhna i nei ve tho a lawm,"a lo ti leh a. Pu Thanga chuan,"Keichuan ei in hmuh theih nan hna ka thawk a sin,"a ti leh a. Pi Zuali chuan,"Keipawh hian ka thawklo bik em ni?,"a lo ti leh tun tun a. Pu Thanga chuan,"Hna chu i thawk ngei a lawm. Mahse,i sumdawnna aṭanga i sum hmuh hi kan chhungkua hian kan chhawr ngai bik a mi?,"a lo ve leh hmak hmak a. Pi Zuali lah chu a tlawm duh ṭhak lo nia,"Engmah i hrelo,ngawi mai mai rawh. Ka lo nei che hi chu ka inchhir takzet a ni,"a ti leh hlak hlak a. Pu Thanga chuan,"Keipawh hi ka inchhir a sin,"a lo ti ve leh hluk a. Pi Zuali chuan,"Immm kan inchhir ve ve a nihchu,"tih pahin a phone chu a en a,a nui zui nghal kur kur a. Pu Thanga chuan,"I phone kha pasal ah chuan nei la,i hlimpui zawk ngei ang,"tih pahin room lamah chuan a kal tau hmuk hmuk a.

Zingah chuan Sangtea pawh a tho hma ve khawp mai. A hmai erawh chu a duk chur hlawm mai a. Msi chuan,"Tikhan i hmelṭha tawp,khawi selfie lawk ang,"tih pahin Sangtea bulah chuan a rawn ṭhu a. Sangtea chuan,"A chi loh e mai aw,"tih pahin a kun nghal daih a. Msi chuan,"Kha phone call i dawng a nia,"tih pahin Sangtea phone chu a melh a. Sangtea chuan,"Ka u anih hi,nizanah pawh min lo call char char a ka chhang duh lova,"a lo ti a. Msi chuan,"U Partei mi? Chhang ve mai la,i ti khawngaihthlak,"a lo ti vat a. Sangtea chuan,"Imm kan chhungkuaah chuan amah chauh hian min ngaihtuah,"tih pahin a u phone call chu a chhang ve mai a;

"Aww U,"

"Khawnge i awm a? Nizanah phone call i chhang thei bawk silo,min ti mangang lutuk,"

"U,tunah chuan ka awmna ka hrilh thei rihlo che,"

"Tinge?,"

"Nakinah ka hrilh ang che,"

"Awle chuan rawn haw i tum lo mi?,"

"Ka hrelo le,ka lo in ngaihtuah ang,"

"Awle hei hnaah ka kal a ngai tawh a. Office ka thlen hunah ka lo call leh ang che aw,i phone kha keng reng ang che aw,"

"Awle keng reng ang,"

"E chuan,chaw i ei tawh em? Pawisa te i nei em?,"

"Umm min ngaihtuah suh,ka ṭha nia aw,"

"Awle nih ka dah phawt aw,"

"Awle bye,"

"Bye,"

Msi chuan,"Lo haw rawh a ti mi?,"a lo ti vat a. Sangtea chuan,"Umm ti e chuan,ka awmna min zawt bawk a,"a lo ti a. Msi chuan,"Tinge i hrilh mai loh? Midang rilru hah deuha siam hi nuam i ti mi?,"a ti leh a. Sangtea chuan,"Nuam ti bik love;mahse,ka u chuan ka chanchin a hria a,ka ṭha tih a hria a. A rilru hahnate chu tlemin a zia tawh a lawm. Mahse,ka nu emaw,ka pa emaw ka u Ely emaw chuan min ngaihtuah lo. Ka tan an rilru an seng ve ngailo,tun thlengin an phone call pawh ka la dawng lo,"a lo ti hmarh hmarh a. Msi chuan,"I chiang maw?,"a ti hâ mai a. Sangtea chuan,"Umm chiang e,"a lo ti vat a. Msi chuan,"Nihchuan selfie tawh ila,"tih pah chuan Sangtea chu a rawn nuih sen sen a. Sangtea chuan,"I sual e mai ka duhlo e a,"tih pahin choka lamah chuan a phei daih a. Msi lah chu a nui zui hawk hawk thung a.

Zomuanpuiate ṭhian ho chu thlanmualah chuan an ṭhukhawm leh laih hlawm a. Zira chuan,"Hman zan chu Sangtea leh i pa an in chhang deuh a ni maw?,"tih pahin meizial chu a ṭan a,a pak khu nghal hluah hluah a. Zomuanpuia chuan,"In chhang e maw le,a zan la la in ka naute ho in an shock a lawm,"tih pahin a nui hak hak a. Zira chuan,"A va chawh ve a,ka khawih ve chak a nia khipa khi,"a lo ti leh a. Ruata chuan,"Veng mawng tlangval zu rui ho an man kha a lo chhan ve khanglang a,"tih pah chuan zu no chu a dawm a,a tlak nghal pup a. Zira chuan,"Veng mawng tlangval ho lah hi,zu te hi in ve tawh suh se. Min ti ṭhing vek,keini angin zu changkang an in pha ve silova. Local rim an nam rum rum zel a,"tih pah chuan ngeiawm zet hian a nui a. Zomuanpuia chuan,"Zanin chu veng mawngah insualpui tur kan zawng dawn mi? Ka tha hi a za tlat mai,"a rawn ti ve bawk a. Ruata leh Zira chu an lo phur khawp mai,a thinchhe tawk chiahin an rui a,veng mawng lam pan chuan an inkhalh thla ta puat puat a.

Kawngpuiah c1huan chak zet zetin an tlan puat puat a. An bike lah chu a bengchheng chi a la ni zui lehnghal a,kawngpui án a awm ho chuan an ning takzet a ni.

Zomuanpuiate chuan insual pui tur chu an hmu miahlo mai. Tuallaiah chuan mihring vei vak hmuh tur lah an awm hek lo,a rehin a reh ṭhuap mai a. Taxi leh private car rawn tlan zeuh zeuh tih loh chu hmuh tur a vang khawp mai.

Zan dar 9.00pm velah chuan bike 1 hian a rawn tlan pel a. Zomuanpuia chuan,"Heyy lo ding teh min rawn tlan pel ve ngam e law,...um nghal ang,"tih pahin chu bike chu an um nghal a. An hmaa bike tlan chu tunge anih tih an hre miahlova,chak theihtawpin an um nghal ringawt mai a ni.

An hmaa bike chu bazar lamah tlan in,Chanmari lamah a tlan kual phei leh a. Zomuanpuia te ṭhian ho chuan um phak ngei an tum ruh hle mai. A tawpah chuan an hmaa bike tlan chu kawng sirah hian a lo ding vang mai a,Zomuanpuia te pawh chuan a va umpha nghal bawk a. Chupa chuan,"Engvanginnge min rawn um a?,"tih pahin a helmet chu a phelh nghal a. Zomuanpui chuan ngeiawm zeta nuih pahin,"Ekhai nang i ni maw? Ṭhian hlui...kan nuai chak mai mai che a,"a lo ti vat a. Lawma chuan,"1 leh 3 maw? Mipa in ni emaw ka tia,"tih pah chuan a nui suk a. Zira chuan,"Khanglang che chuan mipa kan nih leh nih loh chu i hre duh mi?,"tih pah chuan a rawn pan hnai nghal vat a. Zomuanpuia chuan,"Lawk,,heichu keiman aw lo in bengdai rih rawh,"tiin a lo dang vat a. Lawma chuan,"Hman zanah ka ṭhianpa in lo khawih leh a ni awm a,nangni tuai ho hian,"tih pahin Zomuanpuia chu a mitah tak a melh khui mai a. Zomuanpuia chuan,"A awmdan in zir miau hek lo le,tuai ka nih leh ni loh chu i hre khawp ang,"tih pahin Lawma in rin loh lai chuan a hnek nghal pawp mai a. Lawma pawh chu a tlu nghal rawk rawk mai a;mahse,a tlu rei bik lo a rawn tho leh nghal vat a,"In rinloh laia in beih hi tuai ho tihdan,tunah mipa takin kan inbei ang aw a fair ngatin,"tih pahin a jacket chu a hlip a. A bike steeringah chuan a khai a,"I ngam em? A fair chuan...,"a ti leh a. Zomuanpuia chuan,"Nang ngamlo tur che hian ka piang hleinem,"tih paihn posi chu a rawn la ve nghal a.

Zomuanpuia chuan a rawn vai leh fua ṭhin a;mahse,Lawma chu a lo thle sawn hman zel thung a. Chutianga Zomuanpuia'n vawi 4 vel a rawn vai hnu chuan Lawma chuan a Zomuanpuia khabeah chuan a chho dawm siah mai a. Zomuanpuia chu kawngpui charah chuan a thal nghal tawp mai a. Lawma chuan khawih zui pawh a tum lem lo,"I la duh em? Ka awm loh hlanin ka ṭhianpa hi lo khawih tawh suh ang che u aw,in lo khawih leh tih ka hriat chuan kha aia na khan ka khawih ang che,"tiin a jacket chu a ha a. A bike chu a ti nung a,chak lutukin a phit chhuak nghal a.

Zira chuan,"Bawiha,i ṭha em? Damdawiinah kan kal dawn mi?,"tiin Zomuanpuia chu a va kaitho vat a. Zomuanpuia chuan ṭhen tlawk tlawk pahin,"A ngailo,"a lo ti tawi tup a. Ruata chuan,"Ka va um leh dawn mi? Ka khawih ve chak a sin,"a lo ti ve bawk a. Zomuanpuia chuan,"Aih a ngailo,"a lo ti bul hmuk a.