ZU ZUAR FANU 23

CHAPTER--23

*R'z Thangluah✍🏻*

"I ngam zawngte chauh zu rui hi a mi i man dawn?,"Sangtea chuan Pu Chhuana chu a melh khui khui a. Pu Chhuana chuan,"Nang hi ka kawng daltu i ni ziah mai. I pa hi zah viau lo ila chuan ka man tawh ang che,"a lo ti thung a. Sangtea chuan,"Eee min man ta che ka rui a lawm. Min man rawh,i duhtawk in min vaw bawk dawn nia. Ka pa vanga min man ngamlo anihchuan midang rui ho pawh hi an pa te vangin man lo ve mai la,"a ti hmak hmak mai a. Pu Rama chuan,"Khai khai a tawk e a tawk e,nangni pawh haw tawh rawh u,"tiin veng mawng tlangval zu rui ho an man khawm lam chu a hawi a. Sangtea erawh chu a lung a la awi thei nganglo a niang,"Ka pa rual i ni a,zah pawh ka zah ṭhin che. Mahse,i chet dan hi zah pawh i phû tawh thlawt lo,in thlan dawn kha chuan i fapa te zu rui kha chu i man ngam khawp kha tiraw?,"a rawn ti leh sak sak mai a. Pu Chhuana chu a ngawi kar tawh mai a,Pu Rama bawk chuan a rawn khap leh a,"Sangte,duhtawk rih ang le haw tawh rawh u,"dam thlap hian a lo ti leh a. Sangtea te ho pawh chu YMA RÛN aṭang chuan an chhuak ve nghal a.

Pu Rama chuan,"Duh aiin i kal thui mah mah ṭhin a,"tiin Pu Chhuana chu a hrilh a. Pu Chhuana chuan,"Khati khan min ti reng reng suh. Ka paihthla mai ang che,"a lo ti zawk za mah a. Pu Rama chuan,"Ka sawi diklo a mi? Veng ṭhenawmte hian min nuihzat tawh a sin,"a lo ti thung a. Midang ho erawh chu an ngawi ṭhuap hlawm a,"Veng dang ho chuan duh leh min nuihzat ang hmiang,zu kan do a nih hi,"Pu Chhuana chuan Pu Rama chu a rawn melh rum khawp mai. Pu Rama chuan,"Hetianga kan kal zel dawn anihchuan keichuan ka zui tawhlo ang che,"a ti hmak mai a. Pu Chhuana chuan,"I nihna aṭangin i bang dawn tihna maw?,"a lo ti vat a. Pu Rama chuan,"Kan la ngaihtuah ang chu,mirethei fa te zu rui kan hmu thei em em a. Mi hausa fa te zu rui chu kan hmuh kân leh lawi si,nichina kan mi man ho khan eng buaina nge an siam? Kawnah khan an ṭhukhawm ringawt anihkha,hetiang renga kan kal dawn anihchuan YMA President ka nihna aṭang hian ka bang zawk mai a nge,"a ti hmak hmak mai a. Pu Chhuana chuan,"I va dawihzep ve a,"a lo ti hmuk a. Pu Rama chuan,"Ni e mirethei te zu rui man tur hian ka huaisen tawk lo a ni a nge,"a lo ti thung a. Pu Chhuana chuan,"I nihna aṭanga i ban hi chu ka remti ngailo ang,"a lo ti leh a. Pu Rama chuan,"Engvangin maw?,"a lo ti vat a. Pu Chhuana chuan,"Nang tluka hruaitu ṭha an awm hleinem,"a lo ti mauh mai si. Pu Rama chuan,"Awle ka bang lovang;mahse,zu rui buaina siam apiang chu tu pawh nise man an ni zel tawh ang,"a ti leh hmak hmak mai a. Pu Chhuana erawh chu a ngawi leh kur tawh a.

Pi Zuali chuan,"Nang hian Pu Chhuana i lo chhuahchhal leh pek a mi a?,"tiin Sangtea leng haw chu a lo ânkhum nghal ringawt a. Sangtea chuan,"A thil tih dan dik hek lo maw le,"a lo ti vat a. Pi Zuali chuan,"Hmeithai fa zu rui ho i lo chhan vel a ni maw? I nu leh pa hi min ti mualpho khawp mai,"a ti ta zek a. Sangtea chu a ngaihdan a ni vak lo khawp mai,"Ka nu,i ṭawngkam hi fimkhur ve ṭhin rawh,"a lo ti vin ve ṭhak mai a. Pi Zuali chuan,"E khai kan fapa hian min zilh ve a maw? I lo puitling tawh lutuk em ni? Bawiha pa,i fapa min tih dan hi i hria em?,"tih pahin an pa chu a va melh zauh a. Pu Thanga chuan,"I nu a nih hi zah ta che,"a lo ti sup a.

Sangtea chuan nuih hak pahin,"Ka pa,ka nu hi ka zah khawp mai. Mahse,nu zahawm tak nih hi a tum ngai em? In chhungah nise,a fate min uap lum ngai lova. In chhunga a awm ve chhunah pawh phone bak ngaihtuah a nei lo,pawnah chhuak se a ṭhiante nen an inhmu khawm a,mi an rêl loh leh Pathian thu awih ber ang maiin Pathian thu an sawi a. Ka nu hi zah tlak in a nung bik a mi?,"a ti ve bawrh bawrh mai a. Pu Thanga chuan,"I nu a nih hi,khatiang thu kha rawn chhakchhuak tawh suh,"a lo ti hmak a. Pi Zuali chuan,"Thawhchhuah nei bawk silo,mamawh ngah em em ringawt mai,"a lo ti leh hluk a. Sangtea chuan,"Ka nu,a tawk tawh nitin i hnathawk ka puih che i la duhtawk lo a mi? Thawhchhuah neilo ti chuan min sawi tawh suh,"a lo ti vin hlar mai a. Pi Zuali chuan,"Chuti chu hnathawh tur dang zawng la ti nia,"a lo ti hmak a. Sangtea chuan,"A ṭha lawm ka zawng khawp ang. He In chhung hi nuam pawh ka ti hrep love,"tih pahin a chhuak zui nghal a. Pu Thanga chuan a au zui lawm lawm a;mahse,Sangtea chuan a pa auhna chu a chhang lo. A bike a ti nung a,pan lam tur bik pawh hre lovin chak lutukin a phit chhuak nghal a.

Zing dar 1.00am velah chuan Msi te kawngkhar chu tu emaw hian a rawn kik dawt dawt a. Msi chu a harh nghal hlawl mai a,a lukham hnuaia a phone dah chu a rawn vibrate nghal vut vut bawk a,"Tunge mawn le?,"tih pahin a phone chu a la vat a,Sangtea a lo ni a;

"Aw Sangte,"

"Kawngkhar hi lo hawng teh,a na lutuk,"

"Maw? I ṭha em? Ka lo hawng nghal ang,"

Msi chu rang lutukin a tho nghal a,choka lam panin kawngkhar chu a va hawng nghal a. Pawnah chuan Sangtea chu a lo ṭhu sawp nuai mai a,"Awii Sangte,tinge a? Engnge thleng a? Lo kal rawh lut ang,"tih pahin a kuah a,in chhungah chuan a luhpui nghal a.

"Engnge thleng a? Mi nen in insual a mi a?,"a ti nghal mawlh mawlh a. A hmai vel chu a duk chur a,a hnar leh kam sir velah chuan thi khar chu a awm ṭeuh bawk a. Sangtea chuan,"Zomuanpuia kid te ho maw le,"a rawn ti sup a. Msi chuan,"Buaina in nei leh tawh mi a?,"a lo ti vat a. Sangtea chuan,"Nakinah kan sawi dawn nia,tunah chuan ka hmai vel hi a na lutuk,"a rawn ti leh a. Msi chuan,"Awle tikhan lo ṭhu la damdawi vel ka va la nge aw,"tih pahin a room lam panin a phei nghal a.

Msi chuan Sangtea hmaia thikhar khawro vel chu a hrukfai sak phawt a. Sangtea na ti chu a ṭhen leh sawk sawk ṭhin a,"Ee I nu hi a lo va lang love,"a rawn ti a. Msi chuan,"A khuasik a chaw eikhamah khan nachhawkna a ei a. A mu nghal daih a,a mutui viau ang. Chhun lamah a hah bawk sia,"a lo ti vat a. Sangtea chuan,"I van dimlo tak,tikhan doctor nih i tum ve chu a ni sia. I kut hi a damlo nhawt mai,"tih pah chuan a ṭhen leh sawk sawk ṭhin a. Msi chuan,"Awii i zaklo i tuar a zuau ve hrim hrim anih hi. A thuhrimin tun ang hun thleng thlengin tinge i len a?,"a ti leh a. Sangtea chuan,"Nakinah ka hrilh ang che,ti zo phawt teh...," "Chuan,in Inah hian riah i phal em?,"a ti nghal zat bawk a. Msi chuan,"Engvanginnge i rawn riah ang?,"a lo ti thung a. Sangtea chuan,"Nakinah ka hrilh ang che,"a lo ti leh mai a. Msi chuan,"Nakinah ti zel ringawt mai,lo in ring rawh aw damdawi ka hnawih dawn nia. A thip maithei nia aw,"tih pahin damdawi chu a rawn lek chhuak va va a.

Msi'n a hmai pem vela damdawi a hnawih sak lai chuan Sangtea chu a lo ṭhen sawk sawk a,"A thip lutuk a nia aw,"a lo ti char char a. Msi chuan,"A thip reilo ang,lo tuar ve mai mai teh. Mipa i nih kha,tuar zuau leh lutuk mai,"a lo ti hluk a. Sangtea chuan,"I la hnawih kim lo a nia,"a lo ti a. Msi chuan,"Khawilai maw?,"a lo ti vat a. Sangtea chuan a kutin a hmui a khawih a. Msi chuan,"Engtinmah a awm loh kha,"tih pahin kal mai a tum a. Mahse,Sangtea chuan a lo pawt let vat a,Msi hmuiah tak chuan a fawp nghal a. Msi erawh chuan a lo duhlo nasa mai si,"Eng thil nge i tih a? Kal teh,"tih pahin a lo nam sawn a,Sangtea pawh chuan a thlah ve mai a. Msi chuan a damdawi bawm chu kengin roomah a luhsan nghal daih a.

Sangtea chuan kawngka chu a kalh ṭha a,sitting roomah chuan amah chauh chuan a ṭhu ngawi kur mai a. Msi lah chu a reh vang vang mai bawk si,a hmai lah chu a hma aiin a na emaw tih mai turin a tur ut ut mai bawk si. A tawp a tawpah chuan Msi chu a call leh ta nge nge a,Msi pawh chuan a lo chhang ve leh mai a;

"Engnge?,"

"Sitting room chhuatah hian ka mu mai ang aw,"

Msi chuan phone chu a off a,blanket 1 chu a pawm phei a sitting room lamah chuan a phei nghal a.

"Ṭhutthlengah khan mu mai rawh,"tih pahin Msi chuan blanket chu ṭhutthleng seiah chuan a dah a. A room lamah chuan luh leh mai a tum a;mahse,Sangtea chuan,"Ms,ka tihpalh aw,"a rawn ti zawi sup a. Msi chu a ding det a;mahse,engmah a sawi lo a room lamah chuan a lut phei leh nghal a.

Msi chu a muhil thei tawh hlawl lo,a hmui chu a pet a pet a,a chang leh a khawih a,"Sangte,ka tihpalh aw. Ka thinlunga thu awm te hi ka hrilh che a rem silo,"tiin amah leh amah chu a inbe mawlh mawlh a.