ZU ZUAR FANU 22

CHAPTER--22

Ziaktu: R'z Thangluah✍🏻

"Ms,ṭhian ang chuan ka en reng thei tawhlo che,"Max chuan Msi chu zam hmel tak hian a rawn melh a. Msi chuan,"Max,ka chanchin zawng zawng leh kan chhungkaw chanchin pawh i hre vek a. Keimah vanga mi hmuhsit i ni tur hi ka duhlo a ni,"a lo ti thung a. Max chuan,"Nangmah vang hian tupawn min hmusit se pawi tihna ka nei hleinem. Ms,ka hmangaih che,"a zam avang chuan a âw chu a khur der der a. Msi chu a ngawi vang vang a,"Max,khawngaihin min hrethiam hram mai teh. Keichuan ṭhian anga awm hi ka duh zawk a ni,"a lo ti leh a. Max pawh chuan sawi tur a vân ta hle mai,Msi bulah chuan a ṭhu ngawi reng ringawt a.

Msi chuan mut pahin whatsapp message a dawn ho chu a check malh malh a. Sangtea message chu 5 vel a lo awm a,a hawng rang khawp mai;

"I thu ka awih a,ka hmangaih miah loh hnenah ka hmangaih che tiin ka hrilh a. Nangpawn ka thu i awih ve a ngai ang aw."

"Ms,ka hmangaih che tih i hria tiraw? Nangmah vangin i ṭhiannu pawh hi tih hlim ka tum hram hram a sin."

"Max kha nangpawn i pawm ve a ngai ang."

"Max kha i pawm lo anihchuan i ṭhiannu lak aṭang hian ka kalbo ang."

"Ka sawi chu i hrethiam tiraw? I lo in ngaihtuah dawn nia aw."

Msi chuan Sangtea message chu vawi tam a chhiar nawn a,"Sangte,keipawn ka hmangaih che a sin. Mahse,ka ṭhiannu rilru tihnat ka duhlo a ni,"a type vek tawh a;mahse,send lovin a clear leh a,"Vanlalmalsawm,rilru fim takin ngaihtuah rawh. I ṭhiannu hi i tan a hlu a,i tina tur a ni lo,"amah leh amah a inbe mawlh mawlh a. Sangtea message pawh chu chhan a tum lem lo,mutthilh a tum mek lai chuan a phone chu a rawn vibrate dut dut a,Sangtea phone call a lo ni a.

"Ummm,"

"Ka message zawng zawng i seen vek a,tinge min reply loh?,"

"Sawi tur ka hrelo lawm,"

"Ka thu i zawm dawn nge i ṭhiannu hi ka kalsan dawn?,"

Msi chuan chhan mai dan tur a hre silo,a ngawi vang vang a.

"Ka zawhna chu min chhang dawnlo mi?,"

"Ka lo in ngaihtuah dawn nia,"

"Hmeichhia chu an hmangaihte bulah aiin an mahni hmangaihtu te bulah awm se,a ṭha zawk. Max hian a hmangaih che,"

"Umm nia ka hria lawm,"

"Tun kar chhungin chhanna pe ang che,"

"Order a va khauh ve,"

"I ṭhiannu pawm tur khan in ngaihtuahna hun pawh min pek loh kha,"

"Ka hrilh lawk vek che kha,"

"Nia,"

"Ka mut chhuak tawh nia,"

"Umm muttui,"

"Muttui le,"

Sangtea chuan mutthilh tum sateh mah se,a muhil thei meuhlo a ni. A khum aṭang chuan muang changin a tho a,a wardrope kila a zu dahṭhat chu a phawrh a. A room veranda ah chuan a chhuak a,thlifim thaw heuh heuh dawn pah chuan zu chu a in leh khulh khulh mai a.

Msi pawh a muhil thei bik lo,a khumah chuan a let a let a. Max hi a pawm loh chuan Sangtea hian Emily hi a kalsan duh tak tak dawn tih chu amah aia hrechiang tu an awm lo. Ni e,Max hi misual chu a ni hauh lo,an vengah pawh tlangval fel tia an chhal ngam ngat a ni. Mahse,Max lakah hian a rilru a pe thei thlawt silo. A rilru a buai a ni,a ṭhiannu rilri tihnat a duh bawk silo. A ngaihtuahna chu a buai chingchivet vel vek ni ber hian a hria a,a harsatna leh a rilru hahna a thlenna ber ṭhin Emily chu a hmangaih ber tan a hlan tawh si. Tu hnenah nge a harsatna te chu a thlen tak ang le?

Zing lam dar 3.00am velah pawh a khumah chuan a la meng kar mai a. A rilru tawt lutuk chu in bunruahna tur a mamawh takzet a ni,a khum aṭang chuan a tho a. A nu mutna room lamah a phei ta tawp mai a.

A nu room kawngkhar chu a kik karh karh a,"Nu...," chhangtu a awm lo. A kik leh karh karh a,"Nu...,"vawihnih a kiknaah chuan a nu pawh chu a rawn harh ve ta a,"Bawihte,nangmah mi?,"tih pah chuan chhung lam aṭang chuan a rawn hawng nghal a. Msi chuan,"Nu,ka mamawh lutuk che tunah hian,"a ti nghal mawlh mawlh a. Pi Ruati chuan,"Aww engnge ni ta Bawihte? I harsatna chu min hrilh la,"tiin khumah chuan an ṭhu nghal a. Msi chuan a nu kut vuan chungin Sangtea a hmangaih zia leh Emily rilru tihnat a duhloh zia te chu a sawi nghal mawlh mawlh a. Pi Ruati chuan,"Bawihte,kha chen kha nangmahin i lo tuar tlawk tlawk a ni maw? A tirah khan i nu hi tinge min hrilh vat loh?,"tiin a fanu chu a kuah a. Msi chuan,"Nu,ka tuarchhuah theih mai ka in ring a. Mahse,Nu,..keimah mai chuan ka tuar zo lovang,"tiin a nu awmah chuan a bei a. Pi Ruati chuan,"Bawihte,tun aṭang chuan i harsatna chu engpawh nise i nu hi min hrilh zel tawh dawn nia aw,"a lo ti leh a. Msi chuan,"Nu,harsatna dang ka la nei,"a lo ti sap a. Pi Ruati chuan,"Aw sawi la,"a lo ti vat a. Msi chuan,"Max hi ka pawm lo anihchuan Sangtea hian Emily hi kalsan a tum a. Nu,engtinnge ka tih ang?,"a nu bulah a rilru hahna zawng zawng a sawi meuh chuan,a pangchang ve ngei mai. A mittui chu a rawn hnâm nghal a,a hnuk a ulh a,a ṭap deuh pur tawh mai a. Pi Ruati chuan,"Khawvelah hian kan ṭhian ṭha te hi an hlu takzet a sin. Mahse,chutih rual chuan kan hmangaihte pawh hi an hlu takzet a. An bulah kan awm theih loh leh lek phei chuan nun hi a hahthlak lehzual ṭhin. Mahse,kan hmangaihte aichuan kan ṭhian ṭha te hi thlang ila kan ti fuh zawk ṭhin. A chhanchu maw,in ṭhian ṭhatna hi chu a tlo a,daih pawh a daih rei nge nge ṭhin. I thu tlukna hi keichuan ka pawmpui che a,nat pawh i na ang. Mahse,i ṭhiannu hlim hmel i hmuh khan i hlim ṭhin ang,a na hmel i hmuh erawh chuan amah aiin i na ang,"tiin a fanu hnunga chul heuh heuh pah chuan ṭhian ṭha hlut zia chu a sawi siam siam a. Msi chuan,"Nu,ka hmangaih che. Ka ṭhiannu rilru tihnat aichuan Max chu ka pawm ve mai ang,"tiin thutlukna chu a siam ve thei ta hram a.

Notei chuan,"I nula chhai chu engnge a an a? Chhai thlu thei tawh em?,"tih pah chuan a rawn nui sun sun a. Max chuan,"Ka hrilh che kha,min la pawm ve em em ang ka tihkha,"a lo ti ringawt a. Notei chuan,"A la pawm lo che nih hmel,"a lo ti leh a. Max chuan,"Min ringlo viau suh,zaninah ka leng leh dawn a. Dar 9.00pm hma a ka lo haw chuan ka hlawhchham tihna a ni a nga. Mahse,dar 9.00pm hnu lama ka lo haw chuan ka hlawhtling tihna a ni mai aw,"tiin a nui vur vur a. Notei chuan,"Yess in chawi ila,"a lo ti vat a. Max chuan,"Min va ringlo tak e aw,engnge i chawi ngam?,"a lo ti vat a. Notei chuan,"I hlawhtlin phawt chuan tunkar tawpah hian in 2 in KFC ah dinner ka treat ang che u,"a lo ti ham ham mai a. Max chuan,"Yess a ṭha lutuk,ka hlawhtlin loh chuan ka bike ka hralh a nga,phone thar ka leisak ang che,"tih pahin a nui zui hak hak a. Notei chu a phur khawp mai,"Umm chiah mawṭ?,"a lo ti nghal vat a. Max chuan,"Umm sure loh pawn ngei ngei,"tih pahin a tho nulh a,"Ka kal a nge aw,zanin chu ka lo haw thlengin i lo meng ve thei aw,"tih pahin nui vur vur chungin Msi te ina leng tur chuan a chhuak a.

Pu Chhuana ho chuan veng mawnga hmeithai 1 zu zuar in chu an dap leh chiam mai a. Hmeithai pitarte chuan âw khur dar dar chungin,"Khawngaihin kan bungrua kha chu min tihchhiat sak lo hram rawh u aw,"tiin a ngen mawlh mawlh a. Mahse,a thusawi chu ngaihthlak sak a ni lova,ngaihven a ni hek lo. Pu Chhuana chuan,"Khawtlang duhloh thil i ti a,tun aṭang chuan en thlak i ni reng tawh ang. Zu i zuar leh anihchuan veng chhung aṭanga hnawhchhuah i ni bawk ang,"tiin a vo zui nghal zat bawk a.

Partei chuan,"Kan veng chu veng dangin min nuihzat ngawtin ka ring a ni,"a lo ti hlak hlak a. Sangtea chuan,"Timaw?,"a lo ti vat a. Partei chuan,"Kan veng groupah te khan en ve ta che. Mi hausa ho zu rui man ngam silovin,hmeithai zu zuar an man leh tawh kha,"a lo ti vat a. Sangtea chuan an veng groupa thu post ho chu a en nghal vat a. Pu Chhuana ngeiin a lo post chu a chhiar chhuak dap a.

"ZU ZUAR MAN A NI"

"Kan veng chhungah hian ruihhlo zuar hi an awm kan rem ti lova. Ti lui leh dan pal zut in awm anihchuan veng chhung aṭanga hnawhchhuah emaw,ensan emaw in nihpawn khawtlang hruaitute in dem theilo ang.

Hei tunah pawh khawtlang hruaitu te zah lova zu zuar chu man a ni leh tawh a. Veng chhung tan a mualpho thlak takzet a ni.

Tiin post a lo siam a,Sangtea chuan a ei lo khawp mai,"Ve khanglang a,mi zu zuar a man hma hian a fapa te rui buai hi man ve phawt sela maw le,"a ti pung pung a. Partei chuan,"Hetiang hi chuan kan veng hian hma kan sawn thei lovang,an ngam zawng zawng chungah an ṭuan a. Mi hausa fa te rui chu an en liam leh mai mai thung a,ka haw hlawm a nia,"a lo ti ve bawrh bawrh bawk a. Sangtea chuan,"Groupah hian kan chhang ve fak teh ang. Msi te nufa chunga a thil tih dan te kha ka lung hi a la awi theilo,"tih pahin message chu a type nghal mawlh mawlh a.

"Ka pu,mi zu zuar i vei viau a nihchuan. I fapa te zu ruiin buaina an siam ṭhin te hi i vei ve lem lo tihna a mi? Mi hausa fa te zu rui te hi man ve ngam la,mi rethei fa te zu rui chiah i man ngam a mi?," tiin Pu Chhuana thil post chu a chhang let ve fak fak mai a. Sangtea comment na chu an lo like sap sap hlawm a;mahse,tuman engmah an sawi lem lo.

"Ms,i lo in ngaihtuah tawh ang tiraw?,"Max chuan Msi chu a en kar mai a. Msi chuan,"Umm thu tlukna chu ka siam fel thei tawh e,"a lo ti sap a. Max chuan,"I thu tlukna chu engpawh nise,a ṭha lam a nih ngei ka beisei,"a lo ti vat a. Msi chuan,"Max,ka inpeih e tun aṭang chuan i ṭhian chauh nilovin,i bialnu ka ni ve tawh ang,"Msi chuan Max a lakah feelings nei lem lo mah se,tlemte chuan a lai ve deuh a,a thusawi zawng chuan Max pawh chu a en ngam lova. Max chu Msi thusawi vang chuan a hlim takzet a ni,"Ms,ka van lawm tak em! Khawvela mipa vannei ber ka ni. Ka hmangaih che,"tih pahin Msi kut chu a hmer vang vang a,a biangah chuan zawite in a fawh sak zauh a. Msi chuan,"Ka lawm e,hlimna tam tak pek che ka tum ang,"a ti zawi sap a. Max chuan,"Kei deuh hi nia lawm chu,i tan ka awm reng a nga. I tan mipa ṭha tak nih ka tum bawk ang,"a lo ti ve mawlh mawlh bawk a.

Notei chuan sana chu a melh leh zauh ṭhin a. Dar 9.30pm a lo ri der tawh mai,"Zanin chu a hlawhtling a ni ngei ang le?,"tih sap pahin a nui ver ver a,T.V en pahin a u leng hawn hu chu a lo nghak ran mai a.

Zan dar 10.00pm pelh hretah chuan Max pawh chu a lo haw ve ta a,kawngka a rawn lut chiah chu a rawn ṭhen nghal ṭhaw mai. Notei lah chuan,"Engnge chanchin?,"a lo ti vat bawk a. Max chuan,"Kar tawpah chuan min treat thei aw,"tih pahin a lo nui vur vur a. Notei chuan,"Heyy fiamthu a hun lo aw,"a lo ti vat a. Max chuan,"Huiham,i u hi mipa ka nih hi,lo en rawh in ka thlen veleh ka lo text ang che ka tia. Kan text a nge aww,"tih pahin Msi chu a text nghal a.

"Bawihi,ka thleng chiah aw i mu tawh em?,"

"La mu lo deuh,lehkha chhiar leh lawk ka duh a,"

"Meng rei lutuk lo la aw,i chau palh ang,"

"Umm mengrei lovang,i mu nghal dawn mi?,"

"Lehkha i chhiar dawn chuan ka lo nghak ang che,i chhiar zawhah min lo text leh dawn nia,"

"I mut a chhuak lo mi? Tihbuai che ka duhlo nia,"

"Umm chhuak love,keipawn chhiar tur ka nei nual a lawm,"

"Umm nihchuan kan chhiar phawt nge aw,"

"Awle,phone ka dah aw😘"

"Awle keipawn ka dah nia aw😘,"

Notei chuan,"Yoooo...ropui lutuk. Mahse,tina miah suh aw,"a ti nghal a. Max chuan,"Aih ka tina dawn hleinem,hlimna tamtak ka pe a nga. Khawvela hmeichhe hlim ber anih theih nan hlimna tam tak pek ka tum a lawm,"a lo ti vat a. Notei chuan,"A ṭha lutuk,diktak chuan U Msi hi chu a fel thlawt a lawm,"a lo ti leh mawlh mawlh a. Max chuan,"I tluklo a nia aw,"tih pahin Notei hnarah chuan a pawh sak zauh a. Notei chuan,"Hmmm nia ka tluklo a lawm,ka mut a chhuak ka mutsan dawn che. Muttui phawt aw,"tih pahin a room lam a pan nghal a. Max chuan,"Awle muttui le,"a ti a,kawngka chu a kalh ṭha a. Light vel a off a,a room lam a pan ve nghal a.