ZU ZUAR FANU 21

CHAPTER--21

*R'z Thangluah✍🏻*

Msi chu inkhawm turin a insiam malh malh a,tlaia Emily leh Sangtea te chaw rawn ei tur chu a huphurh ru ang reng khawp mai. Sangtea khan a hmangaih thu a hrilh miau bawk si;mahse,a thinlunga thu awm erawh tuma bulah a sawi chhuah ve a rem lo a ni. A chhanchu a ṭhiannu hi tihnat a duhlo takzet a ni,a ṭhiannu rilru tihnat aichuan kumkhuaa a hmangaih bula awm loh pawh chu a thlang zawk a ni.

Jessy chuan Msi chu a rawn sawm a,inkhawm tur chuan an in zui chhuak ta a. Jessy chuan,"Ms,Max hi i duh lo mi? A fel tehreng nen,"a lo ti a. Msi chuan,"Max chu kan tan chuan a sang lutuk a lawm,a tan ṭhian ṭha tak nih hi ka duh ber a ni bawk a lawm,"a lo ti thung a. Jessy chuan,"I nhaihdan kha a dik lo a nia aw,Max te chhungkua hi mi rilru ṭha tak an ni a. Tun hma chuan Max hian hmeichhia a ngaihsak ngai lem lo. Mahse,hmeichhe tam tak star rawn erawh a ni tho. Mahse,hmeichhia hi a ngaihsak ngailo hrim hrim,nangmah a tawn che aṭang chiah hian a zia pawh a dang a sin,"a ti ve leh a. Msi chuan,"Nhaaa Jes,keichuan phû ka in ti lo a lawm. Chubakah ngaihzawng neih hi ka thiam ve vak lo,"a lo ti leh a. Jessy chuan,"I la inchhir ang maw le,"tih pah chuan a nui a. Msi chuan,"Nia ka in chhir tak leh min hau hrep mai dawn nia,"a lo la ti zui a. Jessy pawh chuan tih vak ngaihna a hre tawh lo,a nui ve hawk hawk a.

Chawhma inkhawm banah chuan Sangtea pawh Msi te kawtah chuan a lo ding leh vang tawh a. Msi chuan,"Awii i va rawn hma leh si ve,"a rawn ti nghal a. Sangtea chuan,"Rawn kal hma turin min ti sia,"tih pahin a bike aṭang chuan a rawn chhuk a. Msi chuan nui var var chungin,"Umm a pawi hleinem,anu nen eirawng in lo bawl a nga ni mai,"a ti leh a. Sangtea chuan,"Khawnge pakhata kha?,"a lo ti thung a. Msi chuan hriatthiam loh hmel zetin,"Tu pakhata maw?,"a lo ti ha mai a. Sangtea chuan,"E khi a lo kal a lawm,"tih pahin Max te rawn kalna lam chu a melh a. Msi chuan,"Hmm min hmehbel phet tum kher suh,"a lo ti hluk a.

"Hi...Max,in bang chiah ni maw?,"tih pahin a darah chuan a rawn kuah a. Max chuan,"Aw bang ve chiah e,"tih pahin za lo zet hian a lo nui a. Sangtea chuan,"Ṭhianpa,nakinah hrilh tur che pawimawh lutuk ka nei a nia aw,"a ti leh a. Max chuan,"Tunah min hrilh mai la,"a lo ti sup a. Sangtea chuan,"Aih tunah a chi loh nakinah tlai lamah ni mai aw,"tih pahin Msi chu a va melh zauh a. Mahse,Msi chu a ṭhiante nen an lo ti ti malh malh thung a. Max chuan,"Awle tlai lamah chuan min hrilh dawn nia,"a lo ti ve bawk a.

Msi chuan,"Max,thingpui rawn in ula kan inah Jessy te pawh an rawn kal dawn hi,"a lo ti a. Max chuan,"Nia a pawi hleinem,"tih pahin Msi te inah chuan an inzui lut leh ta hlawm a. Msi chuan,"Ka inthlak lawk a nga,thingpui chu ka rawn lum dawn nia aw,"tih pahin roomah chuan a lut nghal a.

Pi Ruati chuan,"In hla rem tur chu kan nulat lai te pawh min ti ngai a lawm le,"a rawn ti ve a. Jessy chuan,"In nulat laiin har in ti ve ṭhin tho em?,"a lo ti vat a. Pi Ruati chuan,"Eee har kan ti ve thei lutuk zir chhung pawh a rei. Mahse,kan rem chiah kha chu mipui ho chuan thiam min tih thu hlir an sawi ve sap sap a sin,"a lo ti ve leh vat a.

Msi chuan thingpui no 5 leh a hmeh tur chhang chu a rawn chawi phei a. Dawhkana hung pah chuan,"Tumah mihrang in awmlo bawk a,rawn ban vak vak mai ru aw,"a ti nghal zat a. A thingpui in tur chu a la a,Jessy bulah chuan a ṭhu ve nghal a.

Msi chu chawhnu inkhawm leh tur anih avangin a insiam leh malh malh tawh a. Sangtea erawh chu amahin sitting roomah ṭhu in TV a lo en a. Msi inkhawm kal tur chuan,"Heyy nang hi anu saw lo va pui ve la,"tih pahin a samah chuan a rawn tuai sak a. Sangtea chuan Msi kut chu a lo vuan chat a,"I nalh lutuk,"tih pahin Msi mitah tak chuan a en a. Msi erawh chuan a mit chu a la sawn nghal vat a,"Ka kal a hun nih phawt aw,Emily chu ka be tawh dar 1 velah i va hruai dawn nia,"tih pahin hmanhmawh zetin a chhuak nghal a. Sangtea chuan ngawi rengin a thlir zui vawng vawng a.

Pi Ruati eirawng bawl chu Sangtea pawh chuan a thiam ang angin a pui ve a,"Nu Ruat,Msi khan Emily kha dar 1 velah lam turin min tia. Ka va lam lawk a nge aw,"tiin a helmet chu a la nghal a. Pi Ruati chuan,"Awle a lo nghak reng tawh zawk maithei che a sin,va kal vat rawh,"a lo ti ve bawk a. Sangtea chu Emily hruai tur chuan a tlan chhuak nghal a.

Chawhnu dar 2.30pm velah chuan Msi te inkhawm pawh chu an lo bang ve tawh a. Chokaah chuan Sangtea leh Emily chuan a nu eirawng bawl chu an lo pui malh malh bawk a. Chokaa va luh pah chuan,"Awiii a rimtui lutuk,ka ril a ti ṭam nghal vek nia,"a rawn ti lut nghal a. Sangtea chuan,"Nang hi engmah pawh i la ti ve lo aw,tlemte chiah i ei kan phal ang,"a lo ti vat a. Msi chuan,"Aww keite chu ka inkhawm a lawm,"a lo ti vat a. Emily chuan,"Ni e kan 3 aiawhin a inkhawm a,hlapui an rem bawk a. Tam tawk a ei ang,"tiin a lo chhan vat a. Sangtea chuan,"In va in chhan dun tak e aw,nakinah in la hre ve ang maw le,"tih pah chuan a nui hawk hawk a. Msi chuan,"Kan tlangval neihchhun hian min phût ve sia,ka va inthlak a nga ka rawn pui ve dawn che u nia,"tih pahin room lamah chuan a lut phei leh nghal a.

"Vanlalmalsawm,in control hram hram rawh aw. I ṭhiannu hi i tina tur a nilo,in control hram hram ang che aw,"tiin amah leh amah chu a inbe mawlh mawlh a. Room aṭanga chhuah leh a tum lai tak chuan Emily chu a rawn lang hlawl mai,"Bawih,enteh ka kawr hi thil eng ka in tih per a. Kawr hak hawh mai tur i nei em?,"a rawn ti nghal mawlh mawlh a. Msi chuan,"Awii a zialo thei e,ka kawr chu wardrope kha lo hai mai teh i kawr kha ka lo chiah nghal daih ang,"a lo ti nghal mawlh mawlh a. Emily chuan a kawr chu a hlip nghal a,Msi chuan a mawm laiah chuan powder a phul ṭhet ṭhet a,"Tihian chiah deuh vang vang phawt ila,nakinah robin in kan chiah dawn nia,"a ti leh a. Emily chuan,"Awii ka van lawm tak,nih ka pheisan leh mai ang che aw,"tiin a phei leh nghal daih a. Msi chuan Emily kawr chu bathroomah a luhpui a,robin chuan a chiah nghal a.

Pi Ruati chuan,"Sangte,tunlai i nu leh pa te an damtlang maw?,"tiin a rawn zawt a. Sangtea chuan,"Aw damtlang a ni mai e. Nitin zan tin an inhau ṭhin tih loh chu,"a lo ti vat a. Pi Ruati chuan,"A va zialo ve aw,"a lo ti ringawt a. Sangtea chuan,"Hman aṭang tawh khan an tih dan ania,keichuan ngaiah ka nei tawh. Kan in chhung pawh saw nuam pawh ka ti lo,"a lo ti leh a. Pi Ruati chuan,"Khaih khaih...khatin an ti ngailo. I In ania,saw lo saw in dang i neilo tih in hre reng ta che. Chubakah i nu leh pa te chu lo inhau in lo inkhak ṭhin mah se,a remtu tur zawk i ni a sin,"tiin a hrilh nghal mawlh mawlh bawk a. Sangtea chuan,"Ka thusawi tuman an awih ngai hleinem. Engpawh sawi ila,thawhchhuah neilo min tia min ânkhum chiam chiam zel a. Chu aichuan ngawih reng hi ka duh tawh zawk,"a lo ti ve leh a. Msi chuan,"Mawii kha a awm tawhlo mi a?,"a lo ti ve thung a. Sangtea chuan,"Sawtiang in chhungah sawn tunge awm rei peih ang? Mawii kha a fel ngawt zawk a sin,ka u in a duhtawka a ânkhum lai pawh khan hmel hlimlo leh thinrim hmel a pu ngailo. Mahse,a rukin keiman a hna thawh tur ka zawn sak a. Kan ina hrehawm deuha a awm aichuan tiin a ṭhiante in luah finin a chhuak ta nihkha,"a lo ti leh bawrh bawrh a.

Pi Ruati chuan Sangtea chu a in phun thinrim leh dawb takngialin a hria a,ti ti dang a rawn vawrh ta daih a,"E Emily i exam chu engnge i an?,"a lo ti daih a. Emily chuan,"Aaa ka hrethiam chiah lo,ka ti ṭha pangngai chuan ka hria,"a lo ti vat a. Msi chuan,"I tlin chuan Sorkar zem zen i ni tawh mai dawn sia,keini chuan kan be ngam tawhlo ang che a,"tih pah chuan a lo nui kar kar a. Emily chuan,"Awii ka tlin pawh ka ring chiah lo e a,mi 3 lak turah mi 50 velin exam kan bei a nia. Ṭhenawmte fanu kha a tel ve bawk sia,"a lo ti a. Pi Ruati chuan,"Ee i tling hrim hrim ang. Lungngai mah ta che,"tiin a lo hnem ve vat a.

Sangtea chuan,"Max te in hi a chung chiah hi mi?,"tiin Msi chu a rawn zawt a. Msi chuan,"Aw ni e tinge?,"a lo ti vat a. Sangtea chuan,"Thil pawimawh deuh sawipui tur ka nei a,"a lo ti vat a. Msi chuan,"Eng thil nge a?,"a lo ti nghal vat a. Sangtea chuan,"Hmeichhe hriat chi loh,"tih pahin a lo nui suk a. Msi chuan,"Hmm ngeiawm viau suh aw,"tih pahin a samah chuan a rawn tuai leh a. Emily chuan,"Dikchiah sawi ve mai la,mihrang pawh kan awm chuangloh hi,"a lo ti ve nghal vat bawk a. Sangtea chuan,"Huiham nangni 2 bula awm hi chu a hahthlak,in inchhan si. In thinrim lai phei chuan inbulah ka awm duh teuh lo,"a lo ti leh bawrh bawrh a. Emily chuan,"Engvangin maw?,"a lo ti vat a. Sangtea chuan,"I thinrim laiin inbulah awm ta ila min kek buan buan a nga,min sawisa hrep duh ang chu. Hmeichhe thinrim phei chu in bon thei ropui si,"tih pahin a nui hak hak a. Msi chuan,"Hmm i zak lo e a,kan sawisak nghal loh che aw,"a lo ti ve nghal zat a. Emily chuan,"Nakinah kan phuar hlawm che nga kan sawisa ang che,"a lo ti ve bawk a,an 3 chuan an nui bawk bawk a.

"Max,ka thusawi tur hi ngun deuhin lo ngaithla ang che aw,"tiin Sangtea chuan Max-a bulah chuan tihtak zet hian a sawi a. Max pawh chuan,"Awle sawi la,"a lo ti vat a. Sangtea chuan,"Msi hi ṭha deuhin i enkawl thei ang tiraw?,"a ti ta mai. Max chuan Sangtea thusawi chu mak a ti hle mai a,"I thilsawi awmzia hi ka man chiahlo a nia,"a lo ti vat a. Sangtea chuan,"In inkarah engpawh thleng se i venghim zel ang tiraw?,"a ti leh a. Max chuan,"Ṭhianpa,keipawn chu chu ka duhdan a ni lawm. Mahse,a ni hian min hnar tlat si anih hi,ka tan ṭhian ṭha tak ni turin min tiam tawh a sin,"a lo ti thung a. Sangtea chuan,"Ni e keichuan a ṭhian nih hi ka tlin lo takzet a ni. Nangchuan i venghim thei zel ang tih ka ring a ni,ka ring che nia aw,"a ti leh a. Max chuan,"Awle ka hrethiam e,ka venghim zel dawn lawm,"a lo ti nghal vat a.

Zan lamah inkhawm leh an duh vangin chaw chu an ei tlai lutuk lova. Msi chuan,"Max-a bulah chuan engnge maw i sawi chiah le?,"tiin a lo zawt leh a. Sangtea chuan,"Hmeichhe ho tak hi chu in hriat loh tur hi chu hre chak viau zel lo mai rawh u. Ka hrilh dawn pit lo che,"a lo ti vat a. Emily chuan,"I van sual tak,nakinah thuruk kan neih ve hunah kan hrilh bik lovang che,"tih pahin Sangtea chu rum zet hian a rawn melh a. Sangtea chuan,"Hmeichhe ho chuan engtiklaipawn thuruk 3 vel in pai reng a lawm. Min hrilh tum mah ula,ka ngaithla peih chuang lo,"tih pahin bai tui chu bowlah a suak a,engmah ngaihtuah lovin a in deuh pup a,"Awiii a sa lutuk,"tih pah chuan a ner nung nung a. Emily leh Msi erawh chuan an lo nui ṭiah ṭiah zui a.

Chaw eikham hnu chuan reilo te an ṭhu hahdam a,Emily chu Sangtea chuan a thlah leh a ngai sia Emily thlah haw tur chuan an inbuatsaih ta a. Pi Ruati chuan,"In puar meuh maw? In ei tlem si,"a lo ti a. Emily chuan,"Umm puar lutuk tak tak,a tui bawk sia,"a lo ti vat a. Sangtea chuan,"Naktuk tlaiah ka lo ei leh ang,bai kha a tui lutuk,"a lo ti ve thung a. Msi chuan,"Ṭul tawhlo chaw i heh ropui si,"a lo ti vat a,a nui sen sen a. Sangtea chuan,"I thu pit lo i nu in a phal chuan nangchu lo ngawi mai teh,"a lo ti ve leh a. Emily chuan,"Awii ei tir tawh su aw,inleng zaktheilo anih hi,"tih pahin a lo nui ve kur kur a. Pi Ruati chuan,"In va naupang chhia tak e aw,"tih pahin a lo nui hawk hawk a. Sangtea chuan,"Nih kan kal phawt a nge aw,inkhawm tlai a hlau bawk sia nihphawt u aw,"tiin a bike chu a ti nung nghal a. Msi chuan,"Awle nih u...Emi bye aw,"tih pahin a ban chu a vai a. Emily chuan,"Umm bye bye u,"tiin a kut chu a rawn vai ve lauh lauh a,Msi chuan an lan theih chhung chu a thlir a kawngkawia an tlan liam hnu chuan in chhungah lutin,inkhawm turin a insiam ve nghal a.