ZU ZUAR FANU 19

CHAPTER--19

Ziaktu: R'z Thangluah✍🏻

Msi chu a rawn nui var var a,"Awii LalMax,fiamthu thawh hun pawh a nih loh hi aw. I hmeichhe duh deuh chu sawi la,ka lo sawifel vek mai ang,"a lo ti leh a. Max chuan,"Aaa nia ka fiamthu mai mai anihkha,"a rawn ti zawi sup a. Msi chuan,"Thingpui kan lum nge aw,"tih pahin choka lamah a phei nghal daih a.

,"Huiham,ka van zeilo ṭhin tak em. Hetiang chuan engtikahmah ka chhai thlu lovang,"tih nuah nuah pahin kuhva chu a thel leh malh malh a.

Msi pawh chu a rawn let leh vat a,"Awii i lo thel duh anihkha,khate chu ka ti ve thei a lawm. Lo thel duh suh,"a lo ti nghal mawlh mawlh a. Max chuan,"Ka thiam ve tho lawm,"tih pah chuan a lo nui suk a. Msi chuan,"I kut kha a chhe vek mai ang,"a lo ti leh a. Max chuan nui chungin,"A ho e mai a,kha nangpawh engtinmah awm loh kha,"a lo ti vat a,a nui zui hak hak a.

Dar 8.00pm velah chuan Msi nu inkhawm pawh chu a rawn bang ve tawh a,"E Max,i lo leng a ni maw? I van fel ve a,"tih pahin ṭhutthlengah chuan a rawn ṭhu ve nghal a. Max chuan,"Nia hei hmun dangah chuan lenn tur pawh ka hrelo,"a lo ti vat a. Pi Ruati chu a nui var var a,"Ni e tikhan lo leng tlut tlut mai rawh aw,ka lu na deuh riau mai. Ka mut san mai ang che u aw,"tih pahin room lamah chuan a luhsan nghal a.

Max chuan kuhva chu a thel malh malh a,"Ms,inrinni chu rawn kal ve la,"a ti leh ringawt a. Msi chuan,"Awii khawiah maw?,"a lo ti vat a. Max chuan,"Family picnic naah,a nuam dawn lutuk a nia,"tih pah chuan a nui a. Msi chuan,"Awii a zahthlak e a,"tih pah chuan a lo nui var var a. Max chuan,"Zahthlah lo e le,nangni te chu kan chhungkaw member in ni lawm. Ka pa pawn a rawn sawm leh tho ang che u,"a ti leh a. Msi chuan,"Tak tak a nia,a hun te lo thleng phawt se tiraw?,"a lo ti leh a. Max chuan,"Ni e a dik lawm,"a lo ti ve leh mai a.

Emily leh Sangtea chu Emily te in chung zawlah chuan an ṭhu dun a. Emily chuan Sangtea chu thlahlel tih hriat tak hian a kuah a,"Duat,zu in tawh suh aw. I ruih hian nuam ka tilo a nia,"tiin Sangtea chu ngaihno bei zet hian a rawn melh a. Sangtea chuan,"Umm ni e ka in tawh dawnlo a lawm,"tih pahin Emily biangah chuan a rawn fawh sak zauh a. Emily chuan,"Ka hmangaih che,min kalsan dawnlo tiraw?,"a rawn ti sap a. Sangtea chuan,"Umm ka kalsan lovang che,i bulah ka awm reng dawn lawm,"tih pahin Emily hmui senno chekah chuan a rawn fawp a,Emily pawh chuan a lo chhang let vat a.

Sangtea chuan,"E Sunday kha theihnghilh awih loh aw,"a rawn ti a. Emily chuan,"Theihnghilh phal teuhlo mai a,"a lo ti vat a. Sangtea chuan,"Chuan,zawh duh che ka nei a,"a ti leh a. Emily chuan,"Umm min zawt la,"a lo ti vat a. Sangtea chuan,"Msi nen hian engtik aṭanginnge in inhriat a?,"a ti a. Emily chuan,"A rei ve tawh lutuk,Class-X kan nih aṭangin a nia. Khang hun lai khan ṭhian vak ka nei ngai lova,keimah te chauh hian ka awm keuh keuh zel a. Ṭawng pawh ka ṭawng tam lem lo,Msi hian min be ve zeuh zeuh ṭhin a. Puih ka ngaih pawn ka tan a awm reng ṭhin;tichuan,kan in nel chhova. Class-Xi leh Xii ah pawh kan inkawm chho zel a,chuan in veng ami Rki kha kan schoolah a rawn lut thar a. Kan 3 ij kan in kawm chawt ṭhin,"tiin a sawi siam siam a. Sangtea chuan,"Rki aichuan i thlavang pawh a hauh na zawkin ka hria. Kan intihbuai hlek lah hian min lo hau hrep zel lehnghal,"tih pah chuan a nui kur kur a. Emily chuan,"Ni e a dik chiah lawm,ka hlimna tur anihchuan engmah tih hreh a nei ngai lo. Engkim min hrilh ṭhin bawk a,ka tan chuan a hlu takzet a ni,"a lo ti leh mawlh mawlh a. Sangtea chuan,"Tun hma chuan ka hre vak ngailo,veng chhunga ka hmuh pawn ka enliam vel mai mai ṭhin. Mahse,kan ṭhian hova zu kan in tak tak lai khan a nu zu zawrh hi kan in ṭhin. Chuan,hostel aṭanga a lo chhuah khan Msi hi chu ka hrechiang ve chiah,"a lo ti ve thung a. Emily chuan,"Kei aichuan a chanchin chu i hre tlem deuh a ni maw?,"a lo ti sap a. Sangtea chuan,"Aaa nia hre tlem deuh maithei. Mahse,hetia kan inkawm tlangnel hnu hi chuan a pa dam lai leh a pa boral hnua an dinhmun inthlauh zia te hi chu a sawi ve leh zauh ṭhin. Ka khawngaih thei a sin aw,"a ti ve vawng vawng a. Emily chuan,"Ni e a nu in zu a zuar tih a hriat tirh a,min hrilh lai te khan ka khawngaih a sin aw,"a lo ti ve bawk a.

Inrinni a ni a,Msi te nufa pawh chu Max te chhungkua chuan picnic naa kal turin an sawm ngawrh bawk a,kal ve chu an ti tlu ta a. Zing chaw eikham chuan an in siam ve malh malh a.

Max pawh chu a helhhawlh ve a ni ngei ang,a insiam sawk sawk a. Msi te inah chuan a lut phei nghal vat a,"Ms,in hman tawh em?,"a va ti lut nghal ringawt a. Msi chuan,"Hman lo deuh ka hman ṭep,i va hma ve a,"a lo ti vat a. Max chuan,"Hma mi? A tlai tawh em hi,"tih pahin sana chu a en a,dar 10.00am chiah chiah a lo i a. Msi chuan nui var var chungin,"I chhungte dang aiin i hmanhmawh fal bik a ni maw?,"a lo ti leh zauh a. Max chuan,"Nhaa awihawm loh lutuk emai aw,"tih pah chuan a tukhum thak lo pui chu a hiat nauh nauh a. Msi chuan,"Ka va awihlo e aw,kha in duang nalh bawk si,"tih pah chuan a nui sen sen a. Max chuan,"I ho e mai aw,"tih pah chuan lai tih hriat tak hian a nui suk a. Msi pawh chuan a zak tih a hriat chuan a chhaih zawm tawh bik lova.

Dar 11.00am velah chuan an chhuak ve ta a. Max chuan a bike in Msi chu a phur a,midang 2 wheeler nei ho pawh chu an inphur nual bawk a. A tam zawk chu Car leh Bolero ah an inhnawh hlawm a.

"Ka bike khalhah i vawi 1 chuanna tiraw?,"Max chuan tlemin a bike chu a khalh zawi deuh a. Msi chuan,"Umm ni e,"a lo ti vat a. Max chuan,"Ka khalh thiam ve tho tiraw?,"a ti leh a. Msi chuan,"Umm thiam lutuk ringawt,Rossi aipawn i thiam,"a ti ngei a(h). Max chuan nui hak hak chungin,"Rossi aichuan ka thiam kher lovang,"a lo ti vat a,an nui dun hawk hawk a.

Max chuan ral khat aṭangin Msi che tla vel chu a lo thlir reng a. Thil dang reng reng a ngaihsak thei tawh lo,a mit chu Msi ah chuan a fu tlat tawh a ni. A bula ṭhu a nau in a biakna pawh a hrelo reng reng.

"Mam,....,"tih pahin a bengah chuan a rawn pawt a. Max chuan,"Aiahh..engnge ni vak vak a?,"a lo ti nghal vat a. Notei chuan nui var var chungin,"I duh viau chuan i duh a ni tihkha hrilh tlang ve mai la,"tih pahin Max chu a rawn melh a,a nui zui har har a. Max chuan,"Tu maw?,"a lo ti vat a. Notei chuan,"Eeeh a hrelo der vel,tukin zingah pawh zing kar aṭangin i insiam tawh kha,"a ti leh a. Max chuan,"I sawi awmzia ka man lo,"a ti leh a. Notei chuan,"U Ms....,"tiin a au lauh lauh mai. Msi chuan Max te awmna lam chu a rawn hawi a,a ban a rawn vai lauh lauh a. Notei chuan,"Lo kal ve la,"tih pahin a kutin a hui a. Msi chuan a lu a bu nghat a;mahse,midangin an lo biak buai leh avangin a rawn chho mai thei bik lo.

Max chuan,"Nge i auh vak kher a?,"a lo ti vat a. Notei chuan,"I nau hian engkim ka hrethiam vek tawh. Mipa i nihkha,a rawn chhoh hunah chance ka pe ang che u. Chuan,engkim i hrilh vek dawn nia,"a ti ta mai. Max chuan,"Eng rilru nge maw i put le?,"tih pahin a nui hak hak a. Notei chuan,"A lo kal a nia,a lo thleng vat ang,"a lo ti thung a.

Msi pawh chu reilo te hnuah a rawn thleng chho ve nghal a,"Awii helai chu a van nuam reuh ve a,"a rawn ti nghal bawrh bawrh a. Notei chuan,"Nia nuam lutuk lo ṭhu ve rawh,"a lo ti vat a. Msi chu a tui cheng zo hlim rawn chho a ni bawk sia,tawnzau leh boxer chauh a in bel lehnghal. Max chuan a lo en leh veng veng tawh mai a,Notei chuan,"Mam,khitah khan han kal ang u. Thlalak ka chak a nia,"a tia,Max samah chuan a rawn tuai a. Max chuan,"Khawiah maw?,"a lo ti leh hâ mai a. Notei chuan,"Aww tlangah khan,"a lo ti leh a. Max chuan,"Ms,i rawn kal ve peih em?,"tih pahin a melh zauhva. Msi chuan,"Umm peih e,"a lo ti mai a,an 3 chuan tlang lamah chuan an inzui chho ta a.

Notei chuan a phone chu a la chhuak a,a in selfie nghal char char a. Msi leh Max erawh chuan ngawi rengin an lo thlir thung a. Notei chuan nui var var chungin,"Awii tikhan lo ding lawk ru aw,a nalh tawp ka lo click ang,"tih pahin Max te awmna lam hawi chuan a phone chu a lek chhuak a. Max leh Msi pawh chu an awmdan ngai chuan an lo awm ve mai bawk a.

"Lawkin ka theihnghilh daih,ka bagah khan naupang ho ei tur chocolate a awm tak e. Ka zu chhuk lawk ang,"tih pahin Notei chuan a u leh Msi chu a kalsan daih a.

Max leh Msi chu tlangah chuan an ding dun a. Thlifim rawn thaw heuh heuh chuan Msi sam dum tle siau mai chu a chhem leng siau siau mai a. Max chuan a âw chu a han thian leh kharh kharh a,"Ms,hrilh tur che ka nei a,"a rawn ti zawi sup a. Msi chuan nui sâng chungin,"Umm sawi la,ka lo ngaithla ang,"a lo ti vat a.

"Ihmaww Ms,englo a nia....min hau lo la aw,"a ti phawt a. Msi chu a lo nui var var a,"Umm hau lo ang che,sawi la,"a lo ti leh a. Max chuan,"Ihmawww ka....ka duh lutuk che a,"a zam em avang leh a zah em avang chuan a âw te chu a khur der der a. Msi chu a lo nui sen sen a,"Max,keichu i ṭhian ka nih hi,"a lo ti vat a. Max chuan,"Ms,ṭhian ringawt chuan ka en thei tawhlo che a ni. I hrethiam tiraw? I bula ka awm dan hi,"a ti leh a. Msi chuan,"Ummm nia ka hria lawm. Mahse,Max ṭhian angin awm ang,"a ti leh a. Max chuan,"Ka theih i ring a mi?,"a ti mauh mai. Msi chuan,"Kha chen kha ṭhian angin kan awm tawh a lawm. Tinge i theih loh ang?,"a lo ti thung a. Max chu a ngawi vang vang a,a kekawr ipte chu a zen a,"Nihchuan hei hi chu min pawm sak hram ang tiraw?,"tiin a kekawr ipte aṭang chuan Bracelet hi a rawn phawrh chhuak a. *Friend Forever* tih hi a in ziak kalh bawk a,a mawi dangdai khawp mai. Msi chuan,"A mawi hle mai,"a lo ti ringawt a. Max chuan,"I tan ṭhian ṭha tak nih ka tum a nga,engtik hunah pawh i tan ka awm reng ṭhin ang. He thil hi min pawm sak thei a ngem?,"a ti leh a. Msi chuan,"Awle keipawh i tan ṭhian ṭha tak ka ni reng ang,"a lo ti ve vat a. Max chuan Msi kut vei lam chu a la a,bracelet chu a bun tir a.