ZU ZUAR FANU 16

CHAPTER--16

*R'z Thangluah✍🏻*

,"Engtin a bawiha? An veng aṭangin an hnawtchhuak maw?,"Max-a nu chuan mak a tih hmel hle mai a. Max chuan,"Aw ni e,ka khawngaih a sin. Nu,kan inhnuai kan siam zo ṭep tawh em?,"a lo ti vat a. A nu chuan,"Aww vawiinah wearing vel an ti a nga,naktuk lamah light an vuah a nga an zo a ni mai,"a lo ti leh a. Max chuan,"Nu,nihchuan nakinah ka pa bulah pawh ka sawi tho a nga. Kan in hnuaiah hian awm a rem ti thei a ngem le?,"in thlahrun hmel takin a nu chu a en a. A nu chuan,"Ni e,zan lamah kan sawi ho dawn nia. An khawngaihthlak reuh em anihchu,"a lo ti ve bawk a.

,"Nu,Msi te an veng ṭangin an hnawtchhuak a nia,"a sawi zawng chuan a ṭap deuh nghal pur mai a. Emily nu chuan,"Enga? Engnge tihsual an neih a? An va ti mak ve a,"a lo ti nghal tawn tawn a. Emily chuan,"Sangtea min hrilh dan chuan,hmana a nu zu zawrh vang khan a ni awm e. Tunah an zuar tawh tawp silova,ka khawngaih ee. Msi chu a rilru a na ngawt ang,"a ti leh a. Emily nu chuan,"An ti em em bawk anihchu maw le,chutiang em em te chu a zia lo lam hret chu a ni. Hmeithai ve mai an ni si a,"a lo ti leh a. Emily chuan,"Nu,vawiinah va leng ang aw,ka khawngaih e mai,"a ti leh a. Emily nu chuan,"Ni e,kan va leng dawn nia,"a lo ti vat a.

Kawnah chuan Taxi driver  4 vel chu an ṭhu khawm laih a,an zinga 1 chuan,"Nu Ruati te nufa chu kan veng aṭangin an hnawtchhuak em ni? Engmah tih dik loh an neih awm ka hre silo,ngatinge le?,"a lo ti a. Pakhat chuan,"Ni e,a mak ngawt mai. Hmana an zu zawrh ṭhin vanga in hnawhchhuah chu chhuanlam a tlinglo e. Keichu kan veng in relbawl dan hi a dik ka ti lo,"a lo ti ve bawk a. Pakhat chuan,"Kan Local Council Chairman hian hetianga chet a la dawn ro ro anihchuan,a fapa te zu rui te hi man ngam se ṭha tur a nia,"a lo ti ve leh a. Pakhat chuan meizial ṭan pahin,"A fapa te zu rui chu in thlan dawnah chiah anihkha a man ngam,inthlan leh hun chu a tla chiang ang chu aw,"a lo ti ve bawrh bawrh bawk a.

Msi chuan,"Nu,vawiin chu ka pa thlanah kal ka duh e,rem i ti em?,"tiin a nu chu a dil a. A nu chuan,"Bawihte,i pa thlanah pawh chuan zu kal mah la. Engnge maw i tih chuan ang le? I lung a leng thar leh mai mai dawn a sin,"a lo ti a. Msi chuan,"Nu,kan vengah hian kar 1 bak awmna hun kan nei tawhlo. Kan veng aṭanga kan chhuah chuan ka pa thlan hi ka tlawh khat tawh dawn a sin. Nu,nangpawh ka pa thlana i kal duhloh chhan ka hria lawm. Ka pa thlana i kal chuan,in nunhlui tam tak i chhui kir a,i lung a leng thar ṭhin tih ka hria lawm. Mahse,Nu,ka pa thlana ka kal hian chakna thar ka neih phah ṭhin a sin,"tiin a nu chu a rawn kuah a. A nu chuan,"Bawihte,ka hmangaih che. Awle,i pa thlanah chuan zu kal la. Mahse,awm rei lutuk suh aw,"a lo ti a. Msi chuan,"Awle awm rei lovang,ka rawn haw leh vat ang,"tiin thlanmuala kal tur chuan a chhuak nghal a.

Msi chhuah hnu rei vak lovah chuan Emily te nufa chu an rawn thleng ve bawk a. Pi Ruati chuan,"E Emily,nangni in  ni maw? Lo leng ṭhu rawh u,"tiin a lo chhawn nghal vat a. Emily chuan,"In chanchin kan hria a,kan rawn kal nghal a nih hi. Khawnge Msi?,"a ti nghal vat a. Pi Ruati chuan,"A pa thlan a zu tlawh a,in rawn nang hmanlo chiah chiah a nih hi,"a lo ti vat a. Emily chuan,"A lo haw har a ngem le?,"a ti leh a. Pi Ruati chuan,"Rei lovang,lo ṭhu ula thingpui te kan lum dawn nia. Kan chanchin ṭha lam aia,ṭhalo lam in hria chu pawi ka ti khawp mai,"a ti nghal mawlh mawlh a. Emily nu chuan,"Kan veng lamah In ruak kan lo zawng dawn nia. Lungngai reng reng suh u,in tan kan awm reng a nia,"tiin a lo hnem ve bawk a. Pi Ruati chuan,"Awii in ti lawmawm lutuk. Mahse,tumahin an venga awm atan min duh ka ring lo,"a lo ti vat a. Emily nu chuan,"Ee tihsual in nei hleinem,khatiang zawng khan ngai reng reng suh,"a lo ti nghal vat a.

,"Pa,van aṭang khan min lo thlir reng a ni tiraw? Nangchuan,hrehawm takin kan awm i phal ngai loh kha tiraw? Mahse,Pa i tello chuan a nuamlo. Pa,i thlarau khan min pui hram teh aw. Pa,kan vengah hian kar 1 chhung bak kan awm thei tawh dawn lo. A nu rilru na hi engtinnge ka tuam dam sak ang? Engkim hi ka tan veka a tih a ni si. Pa,min ngaithla tiraw?,"Msi biangah chuan hruk sen lohvin mittui a lo luang nghal zung zung a. A pa thlan lung ngheng chuan a ṭhu a,"Pa,ka ngai che ka ngai lutuk che. Zan tin ka lehkha zirna bula min ṭhutpui ṭhin te kha ka ngai takzet a ni. Pa,Anu hi engtinnge ka ni ang? Keimah vangin a tuar mek a sin,"a hmai a hup a,a ṭap hawm hawm mai a.

"Nu Ruat,khawnge Msi?,"Max chu kawngkhar pawh kik lem lovin a rawn lut nghal a. Pi Ruati chuan,"Awi Max,lo leng rawh. Msi chu thlanah a kal a,a lo haw ṭep ang lo leng ṭhu rawh,"a lo ti nghal vat a. Max chu ṭhutna awlah chuan a ṭhu ve nghal a,"Kan in hnuai chu vawiinah an khawih zo dawn a. Ka chhungte pawn rem an ti vek tawh a,kan veng hruaitu te zawng zawng pawh ka be fel vek tawh. Engkim a ṭha vek aw,zaninah in lo lut nghal dawn nia,"tiin a sawi nghal mawlh mawlh mai a. Pi Ruati chuan,"Max,min buaipui naah kan lawm tak zet a ni. Mahse,kan va phûlo em,"a lo ti a,a mittui chu a rawn hnâm nghal a. Lehlam a hawi a,a hru nghal vat a. Emily chuan,"Awii Max,i van ti lawmawm tak. Kan vengah ka nu nen zawn kan lo tum ve mek a. In vengah an awm theih hlauh chuan a lawmawm lutuk,Msi chu a lawm ngawt ang,"a lo ti ve mawlh mawlh bawk a. Emily nu chuan,"Veng chhung mipui ho hian in thlavang pawh an hauh ngam na nge? An mak ka ti khawp mai,"a lo ti ve leh a. Pi Ruati chuan,"Ni e mi tam zawk hi chu kan lam ah an ṭang ngei a lawm. Mahse,kan thlavang an hauh vak pawh khan veng chhung tan buaina zakhua a thleng leh mai mai dawn a. Tihian,ngawih rih hi keichuan ṭha ka ti zawk,"a lo ti mai a. Max chuan,"Zaninah chuan kan chhungkua leh kan veng Local Council Chairman leh Vice Chairman an rawn tel bawk dawn nia aw. Engkim ka hrilh tlang vek tawh a,an hrethiam lutuk che u nia aw,"a ti leh a. Pi Ruati chuan,"Mahse,Max,zu zuar ṭhin kan ni tlat a lawm,"a lo ti leh a. Max chuan,"Kha kha hun kal tawh a ni. Sawi chhuah fo chi pawh a nilo,"a lo ti thung a.

Msi chu an rin aiin a lo haw har daih mai. Max chuan,"Msi chu ka zu ngaihven chhin a nge aw,ka rin aiin a lo haw har daih mai,"tiin a tho nghal a. Pi Ruati chuan,"Ni e zu kal chhin teh,a phone a keng bawk silo ka ngaihtuah deuh riau mai,"a lo ti ve vat a. Max chu Msi ngaihven turin thlanmual lamah chuan a tlanthla nghal a.

Msi chu thlanlung ngheng chungin a lo muhil a. Max chuan,"Ms,...Ms,..i ṭha em?,"tih pahin a darah chuan a zu sawi det det a. Msi chu muang changin a rawn hawi chhuak a,Max chu a rawn kuah nghal a,"Pa,ka ngai lutuk che. Min kalsan tawh suh aw,"a rawn ti a. Max chuan engmah a sawi lo,ngawi rengin Msi kuahna chu a dawh tawp a. Msi chuan engnge a sawi leh dawn tih chu a ngaichang rih a ni. Mahse,Msi chuan Max chu a kuah rei lo,"Max,tihpalh lutuk aw. Pawi ka ti lutuk,"tih mawlh mawlh pahin Max a kuahna chu a thlah a. Max chuan,"I ṭha tiraw? Haw tawh ila,"a lo ti vat a. Msi chuan,"Aw ka ṭha lawm min ngaihtuah suh,"a lo ti vat a. Max chuan,"I nu pawn a ngaihtuah tawh lutuk che,haw tawh ila,"a ti leh a. Msi chuan,"Awle....,"a ngawi vang vang a,a pa thlan lung chu a vuan a,"Pa,mangṭha aw ka rawn tlawh zing thei tawhlo maithei che a. Ka rawn tlawh khat deuh che anihpawn min hrethiam dawn nia aw. Pa,ka hmangaih che Mangṭha aw,"a mittui chu a rawn hnâm leh ta,a ṭahna vangin a mit pawh a sen rûm tawh a. Max chuan,"Kal ang le,i pa chuan a hrethiam lutuk ang che,"tiin Msi darah chuan dimte hian a rawn kuah a,kawngpui lam panin an chho ta a.

Zanah chuan Max te pawh chu 407 nen Msi te veng lam chu an pan a. Max chuan,"Pa,Msi'n min rawn be zo chiah a. In leng an nei nual a ni awm e,an Local Council Chairman pawh a tel a ti. Pa,engpawh thleng se ka lamah in ṭang ang tiraw?,"a ti nghal mawlh mawlh a. Max-a pa chuan,"Ee ka fapa,i thusawi zawng zawng kha keichuan ka ring vek a lawm. Keichu i lamah ka ṭang reng a lawm,"a lo ti nghal vat a. Pu Zova(Max te veng Local Council Chairman)pawh chuan,"Ni e Max,dawt i sawi ngailo tih chu kan hria a lawm. Engpawh thleng se,i lamah kan ṭang tlat dawn a lawm. I ṭhiannu te nufa pawh chu kan venga an lo awm hunah kan veng tan mi ṭangkai tak an nih ka ring tlat a ni,"a lo ti ve bawk a.

Pi Ruati te chuan an bungrua chu an pack malh malh a. Sangtea,Lawma leh Rki te pawh an awm a. An ṭhenawm te leh an mahni lam ṭang ho pawh an awm nual mai. Emily te chhungkua pawh an rawn lang ve bawk a. Tin,an kohhran Upa ṭhenkhatte pawh an awm nual a. An veng Local Council hruaitu te leh,NGO hruaitu hrang hrangte an awm nuk bawk a. Mak ve deuh chu Pi Ruati te nufa chungchangah hian an veng MHIP ho hian engmah an sawi miahlo nia. Mahse,Pi Ruati chuan a chhan tur awm ang chu a hrethiam nghal mai. A chhanchu,an veng MHIP President hi a pasal farnu a ni miau a.

Max te chu dar 8.00pm velah an rawn thleng a. In chhungah chuan bungrua chu an pack malh malh bawk a. Pi Ruati chuan a lo chhawn nghal vat a,"Ekhai in va zahawm hlawm ve aw. Lo kal rawh u,a rem lai laiah khan lo ṭhu tawp phawt mai tu aw. Kan awm hnawk nei nuai bawk si,"a lo ti nghal vat a. Max te pawh chu a rem lai laiah chuan an ṭhu ve nghal bawk a.

Pu Chhuana chuan,"Khawi veng aṭangin maw in rawn kal a?,"tih pah chuan a rawn hawi deuh vawh vawh a. Pu Zova chuan,"Chanmari ṭangin nia,"a lo ti nghal vat a. Pu Chhuana chuan,"A va ropui ve,in veng chuan zu zuar nufa in kawl ve dawn a nihchu,"tih pah chuan ngeiawm deuhin a nui hak a. Pu Zova chuan,"Zu zuar nufa nilovin,nepnawi nuar nufa an ni zawk e. Zanin aṭang chuan kan veng chhung mi an ni tawh ang,"a ti ve sak mai a. Pu Chhuana chuan,"Thla 1 vel a liam meuh chuan,in vengah chuan zu rui hmuh tur an tam khawp ang,"a ti leh kher a. Pu Zova chuan âwka zaidama chhan chu harsa a ti khawp mai,thinrim vanga âw khur dar dar chungin,"Kan hria ang chu,"a ti tawi tup a. Pu Chhuana pawh chuan engmah a sawi tawh lo.

Bungrua an pack zawh ho chu motor ah an hlang nghal zung zung a,vawi 1 ah chuan a phur zo thei lova. Dawr bungrua te nen a nih vangin,vawi 2 lai an thiar a. Vawi 2 naah chuan an in thiar zo ve thei ta hram a.

Msi te awmna tur chu a zau ṭha in,a nuam khawp mai. Bungrua vel an in lak luh fel hnu chuan Pi Ruati chuan ding meuhin lawmthu sawi pahin thupha a chawi nghal a,"Hei keini nufa chu nangniin min lo pawm a,kan lawm khawp mai. Lawmthu han sawi vak dan pawh ka thiam lo,kan lawm a ni tawp mai. Kan lawm rual rualin,mualphona tam tak karah in veng a awm min phal sak leh zel bawk a. Mi tam tak chuan an sêl ngei dawn che u,tunah pawh an sêl mek ang che u. Chung zawng zawng avang pawh chuan ngaihdam ka dil mawlh mawlh che u a. In mit kan tlung reng lo maithei bawk a. Mahse,he veng tan hian ka fanu nen hian kan theihtawp kan chhuah ve dawn a ni,"a ti mawlh mawlh mai a. Pu Zova chuan,"Ee inthlahrung duh reng reng suh u,mihringte hi kan famkim vek lo tih kan in hre vek a. Tu pawn tihsual changte chu kan nei ṭhin a lawm. Mahse,hma lam kan panna kawngah hi chuan kan inpui tawn zawk tur a ni,"a lo ti ve bawk a. Max-a pa pawh chuan,"Ni e ṭhianpa Zova khan a sawi dik a ni. Mihringte hian tihsual chang kan nei ṭhin;mahse,kan tihsualte siam ṭha tur chuan kan in puih tlan a ngai a ni. Kan vengah hian hlim leh nuam deuhin,in thlahrung lovin in nun in hmang tawh dawn nia,"a lo ti ve bawk a. Pi Ruati te nufa chuan sawi leh chuan tur pawh an hre lo,an hlim lutuk chu an biangah chuan mittui a lo luang zung zung a.

Msi te nufa pawh Chanmari ah chuan thla 1 an awm tling ve ta reng mai. A nu pawhin dawrte siamin sumdawnna bul a ṭan chho leh bek bek a,an theih tawpin kohhran leh khawtlangah an in hmang chho ve bawk a. Veng chhung mipui ho pawn an dawm thiamin an lawm thiam khawp mai,tumahin an nunhlui an chhui sak lo a ni.