ZU ZUAR FANU 15

CHAPTER- 15

R'z Thangluah✍🏻

Pi Ruati chuan,"I motor chu a chhe nasa em?,"tiin Max chu a rawn zawt ve vat a. Max chuan,"A glass chiah a keh a,a dang chu engmah a chhe love,"a lo ti nghal vat a. Sangtea chuan,"Hemi te unau hi chu ka la nuai ang maw le,"a lo ti sup a. Msi chuan nui vur vur chungin,"Kimkima pawh i hneh loh kha aw,"a lo ti fiamthu hlut a. Sangtea chuan,"Aww khate chu 5 in min khawih rawn a nihkha,a fair chuan ka cho chiang e mai a,"a lo ti nghal vat a. Max chuan,"An sual rawn che ni maw?,"a lo ti ve bawk a. Sangtea chuan,"Khawih rawn e maw le,ka ban pawh hi ka la hmang ṭha ngam lo,"a ti leh a. Max chuan,"In khawih rawn hi chu pa loh thlak e mai a,"a lo ti leh a. Msi chuan,"Awii in thil sawi kha a ho e,thil dang sawi ang u,"tiin an ti ti chu a lo pawt chat a.

Max chuan,"Ee inrinni chu inkhel en ve ila,"a rawn ti nghal vat a. Msi chuan,"Tu te nge inkhel dawn a?,"a lo ti vat a. Max chuan,"Aizawl FC leh Chanmari FC an inkhel dawn lawm,"a lo ti vat a. Sangtea chuan,"Eee ni e a hmuhnawm viau ang,keipawh ka en chak khawp mai,"a lo ti nghal vat a. Msi chuan,"Nia ka hman chuan aw,"a lo ti ve leh mai a.

Max leh Sangtea pawh chu an in kawm ngeih chho khawp mai a. An tui zawngte an sawi a,a chang leh an han inhnial leh bap bap ṭhin a. A chang leh an nui dun hawk hawk a,dar 8.30pm velah Msi chuan,"Thingpui kan lum nge aw,"tih pahin a tho nulh a,choka lamah chuan a phei nghal daih a.

Sangtea chuan,"Bawiha,Msi nen in inkarah hian engmah a awmlo tak tak maw?,"tih pah chuan a nui suk a. Max chuan,"Ṭhian a lawm kan nih,"a lo ti mai a. Sangtea chuan,"I chiang meuh maw?,"a ti leh a. Max chuan,"Amah hian ṭhian anga awm a duh tlat sia,"a rawn ti leh a. Sangtea chuan,"A van phakar tak e aw,bialnu i neih hunah bialpa ka nei ve ang a ti ve sia,"a ti nang nang a. Max chu a lo nui hak hak a,"A bialpa chu midang a ni ngei ngei ang,"a lo ti vat a. Sangtea chuan,"Bialpa nei chu nise min hrilh ve awm tak,chubakah mipa amah hnaih ber tu chu nangmah i nia. Midang ngaihzawng chu a neilo tawp ang,"a lo ti leh a. Max chuan,"Nia a la neilo a ni ngei ang,"a lo ti ve leh mai a.

Msi chu thingpui chawi chungin a rawn phei a,"Ehe Sangte,nang hi Emily i bia em?,"a rawn ti nghal ringawt a. Sangtea chuan,"Ka rawn kal hma in ka call a,min chhang theilo,"a lo ti vat a. Emily chuan,"Vawi engzatnge i call a?,"a lo ti leh vat a. Sangtea chuan,"Vawi 1 chiah,"a lo ti mai a. Msi chuan,"Awii tunah call leh rawh,min lo bia a. A ngai lutuk che nia,"a ti leh nghal mawlh mawlh a. Sangtea chuan,"Whatsappah ka be mai ang,"a lo ti vat a. Max chuan,"Bawiha,hmeichhia hi chu duat thiam an ngai a sin,"a lo ti ve bawk a. Sangtea chuan,"Ni e i sawi dik chiah lawm,"a lo ti ve mai a.

Zan dar 9.30pm velah chuan Local Council hruaitu te leh YMA hruaitu te chu an lo lang leh hlawl mai a. Pu Chhuana chuan,"Khawtlang duh loh thil in tih vangin in In leh in dawr hi kan dap dawn,"a ti hmak hmak mai a. Sangtea chuan,"Khati khan in che ngawt theilo ang,"a lo ti nghal vat a. Pu Chhuana chuan,"Nang bawk maw,i pa i ti mualpho khawp mai. Lo han haw mai ta che aw,hei tunah chuan dap theihna lehkha kan nei thlap,"tih pahin lehkha chu a rawn phawrh a,ngeiawm zet hian a nui a.

Pi Ruati chuan,"A va mak awm ve a,eng thil dik lo nge kan tih leh tawh a?,"a lo ti nghal mawlh mawlh bawk a. Pu Chhuana chuan Pi Ruati thusawi chu a bengkhawn lem lo,"Leee naute u dawr hi dap hmasa phawt ru aw,"a ti hmak hmak mai a.

Max chuan,"Pu te u,min lo ngaithla lawk teh u. Hetianga chet vak hi engnge a ṭulna? Hmeichhia an nia,chubakah khawtlang duhloh thil an tih awm ka hrelo keichuan,"tiin Msi te nufa thlavang chu a lo hauh sak ve a. Pu Chhuana chuan Max chu a en vang vang a,"Nang hi chu kan veng tlangval i nilo tlat mai,lo ngawi rih mai ta che aw,"tih pah chuan a nui suk a.

Msi te dawr chu an dap nasa khawp mai. Dawr lamah chuan engmah an hmu lova,dawr an dap zawh hnu chuan in chhung lam chu an dap leh ṭan ta. A daptu te ho lah chuan engmah dim an nei silo. Pi Ruati chuan,"Khawngaihin kan bungrua kha chu min zah sak ve ula,khang bak kha kan nei biklo a sin,"tiin a ngen lawm lawm a. Mahse,in dap tu te chuan Pi Ruati thusawi chu an bengkhawn lem lo khawp mai.

Pi Ruati chuan engmah a sawi thei tawh lo,ṭhutthlengah chuan a ṭhu a,a biangah chuan mittui a rawn luang ngiai ngiai a. Msi chuan a nu chu a rawn kuah a,"Nu,apa kha la dam se chuan tiang hi kan tawng biklo ang tiraw?,"a lo ti zawi sep a. Pi Ruati chuan,"Bawihte,hrehawm ti suh aw. Engkim a ṭha leh vek dawn lawm,"tiin a fanu chu a lo hnem ve bawk a.

Max leh Sangtea pawh chuan chet vak ngaihna an hre bik lo. Mahse,Sangtea chu a insum thei ta nganglo aniang,"In duhtawk thei tawh em? En teh u,in hmu em? An thinlung in tihnat te hi,Pathian pawh in zah em em lo a mi?,"a ti ve phiar phiar mai a. Max pawh chu Sangtea bulah chuan a rawn ding a,"Khawngaihin duhtawk hram teh u,"a lo ti ve bawk a. Sangtea chuan,"Man tur in duh viau anihchuan i fapate zu rui hi man leh ta che,tihsual neilo hmeithai in chhunga in lak pa hi mipa nihna a nilo,"a ti ve sak sak mai a. Pu Chhuana chuan,"Vala,ngawi rih teh i pa hi ka ṭhianpa nilo se chuan,ka man tawh ang che,"a lo ti leh a. Sangtea chuan a hlau biklo khawp mai,"Eee tunah pawh hian min man ta che,i ngam phawt chuan min man rawh,"a ti leh sak sak mai a. Pu Chhuana chuan nui chungin,"A tawk e a tawk e. Tunah chuan Pi Ruati hi kan be lawk a nge aw,"tih pahin Pi Ruati te nufa awmna lam chu a pan phei a.

"Pi Ruat,tun thla chhungin kan veng chhungah nilo veng dangah in luah tur in zawng dawn nia aw,"a ti mauh mai. Pi Ruati chu a meng phawk nasa mai,"Engnge awmzia? Eng thil sual nge kan tih a? Veng chhung aṭanga hnawhchhuah ngai khawpin eng thil ṭhalo nge kan tih a?,"a ti nghal mawlh mawlh mai a. Pu Chhuana chuan a ipte aṭangin lehkha a rawn phawrh a,"Hei hi in lo chhiar dawn nia aw,kan kal tawh a nge,"tiin an chhuah san diak hlawm a.

Pi Ruati chuan,"Engnge kan chunga thleng ta hi?,"tih pahin a fanu chu a kuah a,a insum thei tawh bik lo a ṭap hawm hawm mai a. Sangtea chuan,"Hmel ho chu lee,an thil tih man chu an la tel ve khawp ang,"tih pahin in chhung dung hnawk nuai karah chuan a tei kual sek mai a. Max chuan,"Ms,lehkha hi kan chhiar chhin aw,"tih pahin inthlahrun hmel takin lehkha chu a hawng a. Lehkhaah chuan,a hmaa zu an zawrh ṭhin lai vel kha an rawn ziak a. Chumi avanga veng chhung aṭanga chhuak tura tih an lo ni a. Max chuan,"An thil tihdan mai mai chu le,eng emaw in phum ru chu a awm chiang a lawm. A hmaa zu in zawrh ṭhin vanga tuna veng chhung aṭanga chhuak tura in tih ringawt chu thil felhlel deuh chu a aw chiang a lawm,"a ti ve mawlh mawlh a. Sangtea chuan,"An chhungkaw rilru chhiat zia hi chu aw,"a lo ti ve leh bawk a.

Pi Ruati chuan,"Kan chan tawka khawrel anih si chuan kan pawm thiam a ngai si a nih hi. Mahse,he thil ti tu hi chu a hlim rei bik hauhlo ang,"a lo ti ve bap bap bawk a. Msi chuan,"Nu,Pu Chhuana te leh aní te hi tunlai chu an inbe ṭha viau a sin,"a lo ti zauh a. Sangtea chuan,"Ms,i ní te leh Pu Chhuana te chuan engnge inzawmna an neih?,"a lo ti vat a. Msi'n a chhan leh hma in Pi Ruati chuan a lo chhang vat a,"Engmah a nilo,chuan in 2 chungah hian kan lawm takzet a ni. Engpawh thleng se kan hmaah in ding zel a,kan lawm lutuk a nia aw,"tiin lawmthu a sawi nghal mawlh mawlh bawk a.

Max chuan,"Tun thla chhunga In luah tur in zawn a ngaih dawn chuan a va buaithlak awm ve aw,"a lo ti ve vawng vawng a. Pi Ruati chuan,"Min ngaihtuah lutuk suh u,In luah tur chu kan hmu leh mai ang,"tiin zawi sap hian a lo sawi a. Max chuan,"Vawiin ni 15 ania,thla chanve kan hmang tawh. Ka nu te bulah ka lo sawi ang,kan in hnuai saw kan siam mek a. Tun thla ral hma chuan kan siam zawh theih ka ring a,kan siam zawh chuan in rawn lut tawp dawn nia,"a lo ti leh a. Msi chuan,"Veng chhung aṭanga hnawhchhuah tawh chu tuman an veng chhunga awm turin min duh teuhlo mai,"a lo ti ve thung a. Max chuan,"Lungngai suh,kan veng Local Council Chairman saw ka pa ṭhianpa a nia. Naktuk lamah ka lo ti ti pui dawn nia. Thiamlohna engmah in nei hleinem,"a lo ti leh a. Sangtea pawh chuan,"Kan veng a mi tam zawk hi chu in lamah an ṭang tih hre reng ang che u,engpawh thleng se in lamah kan ṭang zel a nga. In hmaah kan ding zel bawk ang,"tiin a lo in Msi te nufa chu a lo ṭawng thlamuan ve mawlh mawlh bawk a.

Zan dar 11.30pm ah chuan in neitu te chhungkaw zin pawh chu an lo thleng ve chiah a. Boruak engmah an la hriat loh vangin mak an ti hle mai,"Engnge ni ta? In va in phawrh hnawk tehnuai ve a?,"tiin in neitupa chuan a rawn zawt a. Pi Ruati chuan,"Aa eng nilove,in rawn thleng tluang maw?,"a lo ti vat a. In neitupa chuan Pi Ruati mit sen ram mai a hmuh chuan a ngaih a ṭhalo nghal a,"Engnge thleng a? Min hrilh teh u,"a ti leh a. Sangtea chuan lehkha chu a lo chhiar tir a,"Eheee Lalchhuana chet duh dan mai mai chu aw,in chhuak lovang. Kan zin hlan kher leh nghalin a lo che lehnghal a,"tiin a in hrosa nasa mai a. Pi Ruati chuan,"Pa Mawi,khawngaihin inbengdai hram hram teh aw. Kan chunga thleng hi keinipawn pawm harsa kan ti a lawm;mahse,khuanua remruat a ni miau sia le. Tih ngaihna vak a awm silo a nih hi,"a lo ti ve a. Pu Mawia chuan,"Hmmmh...an thil tih dan mai mai chu aww,"a ti leh ringawt ṭhin a.

Zan lai dar 12.00pm pelh hretah Max leh Sangtea pawh chuan ṭin zai an rel ve ta a. Msi te nufa erawh an ngui nghiai mai a,an chunga thil thleng chu na an ti a. Pawm thiam pawh har an ti a ni;mahse,an tana khuanu ruat a ni miau si tih vak ngaihna a awm lo a ni.

"Nu,engtinnge kan awm ang?,"a rawn ti zawi sap a. Pi Ruati chuan,"Bawihte,engkim hi Pathian chungah nghat phawt teh ang aw. Pathian chuan kan tana ṭha tur vekin ro min rel sak ṭhin a lawm,"tiin a fanu chu a kuah a,"Engpawh nise,Pathian hnenah ṭawngṭaiin in hlan phawt ang aw,"tiin a fanu kuta vuan chungin a ṭawngṭai ta a,"Aw Lalpa,kan Pathian min hmangaihtu,kan chunga i ṭhatna leh zahngaihna avang hian keini nufa hian lawmthu sawi dan pawh kan thiam lo. Aw Lalpa,hei tunah hian keini nufa chuan hun harsa tak kan tawk mek a ni a. He kan hun tawn mek hi i tello chuan kan paltlang zo lovang. Khawngaihin chakna min pe ang che aw,i fapa Isua hmingin kan dil e Amen,"tiin Pathian hnenah a in hlan ta a.

Ely chuan,"Msi te nufa chuan an phû tawk chiah lawm,"a lo ti hlawih hlawih a. Sangtea chuan,"I ṭawng tam mah mah ṭhin,kan venga awm pawh hi a zahthlak ka ti tawh. Hetiang em em hruaitu nunrawng han neih mai chu,"a lo ti nghal vat a. Ely chuan,"A nunrawng lo zawk ngawt a lawm le,tun thla chhung hun a la pe nia,"a lo ti leh a. Sangtea chuan,"Huh a lo nih chu a,nangni ṭhian ho hi chuan Msi hi chu in haw ve hrim hrim a lawm tiraw?,"a lo ti leh a. Ely chuan,"A lo nih chu a,"tih hluk pah chuan a tûm deuh bâr a. Partei thung chuan,"Kan hruaitu te ho hian man tur hi an duh khawp anih hi a,keichu Msi te nufa hi ka khawngaih tlat,"a lo ti thung a. Ely chuan,"Zu an zuar khanglang anihkha,"a lo ti leh a. Partei chuan,"Aww an zu zawrh te chu a rei tawh ee,tunah chuan dawr pangngai an siam a hma lam an pan ve mek a nih hi. Chubakah hman zana an In an dap pawh khan engnge an man chuang a?,"a lo ti ve zek mai a. Ely chuan,"Hmm in ṭan e mai a,"a ti leh hmuk a. Sangtea chuan,"Ṭan ang chu thiam lohna an nei miau silova,"a lo ti ve leh a.

"Pu Chhuana thil tih dan mai mai chu aw,a zialo lam hret chu a ni,"tiin Pu Siama chu a phun nang nang a. A bula ṭhu a nupui chuan,"Ni e a ti dik lo ka ti keipawh,a hma chuan zu lo zuar pawh nise tunah chuan hma lam panin an kal ve mek a. An nufa chauha khawsa ni mah se,pangngai takin an awm a,ka lainat takzet a ni,"a lo ti ve bawk a. Pu Siama chuan,"Tih theih lah hi kan nei tlem si a,a buaithlak ngawt mai. Zanin chu zu leng ve ila a ṭha ang,"a ti a. A nupui chuan,"Ni e a tih chi ngawt ang,an khawngaihthlak e mai. Pui tu leh hnemtu tur an mamawh takzet a ni,"a lo ti ve leh a.