DAN LOVA KHAW DIN MZP TEN NGAIMAWH

Aizawl | January 11, 2019: Nimin January 10, 2019(Ningani) khan MZP General Headquarters bultumin Chakma Autonomous District Council (CADC) Area a MZP ten an sak Zofate Chawlhbuk samfai hnatlang neih a ni a. Zofate Chawlhbuk hi kum 2014 khan a sak buaipui tan a ni a, kum 2015 khan sak zawh niin, ni 10th September, 2015 khan hawn a ni.

Zofate Chawlhbuk samfai hnatlang tan hma hian huntawi hman a niin, Pathian hnenah tawngtaipui na neih a ni a. He huna thusawitu L. Ramdinliana Renthlei President MZP General Headquarters chuan, "Chakma Autonomous District council (CADC) area chhungah hian Chakma tan lo chuan in leh lo, ram neih theih loh turin Chakma council in dan an siam a, hei hi MZP chuan tha lo kan ti hle a, he lai hmun hi kan pi leh pute lo luah chin ram Mizoram a ni a. Mizoram chhungah ngei Mizo ten in kan nei thei lo a, ram kan nei thei lo hi a na kan ti hle a. He an dan hman hi siamtha turin kan ngen a, Mizoram Sorkar pawh siamthat a nih theih nana hma la turin MZP chuan kan ngen nghal bawk a ni. MZP chuan nasa taka bei in leh dodalna thahnem tak karah tih luihna in CADC area Borapansuri khuaah hian in tha tak Zofate Chawlbuk kan nei a, he Zofate chawlbuk hi Mizo te tan a ni a, khualzin ten an duh phawt chuan riahnan te an hmang thei dawn a, an hmang reng tawh bawk a ni."a ti a.

L. Ramdinliana Renthlei chuan, "CADC area chhungah hian Mizo te hmuhsitna leh diriamna a nasa hle a, Sorkar atanga hamthatna kal thin pawh hi Mizo khua awmchhun te pawh hi sem kan an ni thin a ni. Kan missionary te pawhin Chakma vauna an tawk thin a, an quarter sakna tura ram an hawh pawh hnawk an ti tawh hle a ni. Kan ram Mizoram chhung ngei ah kan missionary ten Kristian ram kan tih thin Mizoram ah ngei zalen taka rawng an bawl thei lo hi na kan ti hle a ni. Kan missionary ten en hranna an tawh a, harsatna an neih thawm kan hriat leh chuan MZP chu an thlavang hauh turin a che chhuak dawn a ni."a ti bawk.

MZP in Zofate Chawlbuk samfai hnatlang ah hian MZP General Headquarters Aizawl atangin President L. Ramdinliana Renthlei ho in hruaitu thahnem tak an kal a.

Hemi ni vek hian MZP hruaitute hian Kurbalovasora khua tlawh in an khawtlang hruaitute VC leh YCA te ko khawm in an khua a Kristian an tih duhdah avangin an zilh a, missionary te en hrang lova zalen taka rawngbawl tir turin leh an khuaah Chakma Foreigner seng lut lo turin hrilh an ni bawk.

MZP hruaitute hian dan lova din, Chandovagarh khua Chakma khua an tlawh nghal a, he khua hi an awm tanna a la rei lo a, in 38 a awm a,  foreigner deuh vek an ni a. He khua hi dan lova din a ni a, enfiah turin MZP chuan Mizoram Sorkar an ngen nghal bawk niin MZP thuchhuah chuan a tarlang.