ZU ZUAR FANU 11

CHAPTER- 11

R'z Thangluah✍🏻

Sangtea chuan a phone chu a tuai a tuai a. Emily chu a kalsan ang nge a be leh ang? A rilru chu a insual ve nasa a ni. Msi lah chuan be turin a ngen mawlh mawlh mai bawk si,zan dar 11.00pm velah chuan a text ta nge nge a;

"Emi,ka tihpalh aw,"

Chhanna a dawng lo,a nghak deuh vang vang a. Emily chu a online tho sia a message a seen duh lo. Mahse,vawi thum vel tal beidawnnan hrim hrim text chu a tum a ni;

"Emi,ka tihpalh lutuk aw min ngaidam thei a ngem?,"

A message chuan chhiartu a nei lo,5mins hnu velah a text leh a;

"Awle Emi,i online reng a ka message pawh i seen duh lova. Tun bak hi chu i hmaah ka rawn in lan tawhlo ang,mangṭha aw. Hlim takin i lo awm dawn nia."

Sangtea chu a muhil thei lawk si lo,a khumah chuan a tal a tal a. Zan a rei telh telh a,a harh chiang telh telh mai bawk si. A rilruah zawhna tam tak a rawn lut zut zut bawk a,"Msi hian ngatinge a ṭhiannu rilru hi ka tihnat a hlauh em em le? Ngatinge a ṭhiannu hi a ngaihven em em le? Kan inkar a buai apiangin keimah min hau ziah leh nghal a,ngatinge le?,"a ngaihtuah nasat poh leh a rilru a buai a ni.

Zing dar 1.00am velah pawh a la meng kar mai. Khum chu a ning ta deuh a ni ngei ang,a tho lawk a room veranda lamah chuan a chhuak ta a. Pawn boruak chu a vawt ruih mai a,a reh em em bawk a. A ciggarate chu a ṭan a,a fawp vang vang a,"Ms,engtikniah emaw chuan ka hmangaih che tih hi ka la hrilh khawp ang che,"a ti zawi sup a.

"Bawih,i ṭhianpa khan nizanah ngaihdam min rawn dil a. Mahse,ka chhang duh lova,amah zawkin thu tawp a rawn siam ta mai,"tiin Sangtea message vel chu a en tir a. Msi chuan,"Ngatinge i chhan ve mai lohva?,"a lo ti vat a. Emily chuan,"Hrem ve hrim hrim ka duh a lawm,"a lo ti sam et a. Msi chuan,"Huiham Sangtea luhlul zia i hrelo a nihkha,mangṭha tia a thlah tawh che chuan engtikahmah a rawn let tawhlo ang,"a lo ti leh a. Emily chuan,"Nihchuan engtinnge ka tih ang? Chân ka duhlo a sin,"tih pah chuan a ṭap nghal pur a. Msi chuan,"Zanah ka lo be leh dawn nia,lungngai lo phawt la aw,"tih pahin Emily chu a kuah a. Emily chuan,"Nizanah ngaihdam min dil tawh a,ka chhang let lova. Engtinnge min biak duh tawh nga? Keichu ka rilru hah e,"a ti leh mawlh mawlh a. Msi chuan,"Min ring tawp rawh,engkim a ṭha leh vek mai ang,"tiin a ṭhiannu chu a hnem leh malh malh a.

"Hi,Max ka nia ṭhian kan ni thei a ngem?,"

Msi chuan rawn text tu Dp chu a check nghal a. An class a mi a ni tih a hre nghal a,a message chu chhan tur nge chhan loh tur tia a ngaihtuah mek lai chuan a rawn text leh a.

"Min reply ve la...hehe,"

"Ka lo buai deuh a tihpalh lutuk,"

"Ṭhian chu kan ni thei ang tiraw?,"

"Umm ni thei tehreng mai,"

"Chuan,HSSLC topper kha i ni tiraw?,"

"Aaa aw ni e,"

"Ka ngaisang lutuk che a,"

"Ka phûlo hle mai,ka lawm e,"

"Zaninah in vengah kan lo kal dawn a,rawn len i phal a ngem?,"

"Phal e,engnge i rawn tih dawn a?,"

"Ka u fanu birthday a nia,"

"E a nihchu,in lo kal dawn nia,"

"Awle nih duhtawk phawt ang aw,ka tibuai lutuk palh ang che,"

"Awle nih le,"

Zan dar 7.30pm velah chuan Max chuan Msi chu a rawn call ta ngei a;

"Aw Max,"

"Hei ka rawn chhuk mek a. Mahse,in In awmna tak ka hre lova. Kawngpui sir velah min lo chang hman em?,"

"Awle kan in kawtah ka lo ding ang aw,"

"Umm Whole sale dawr kha ka rawn tlan pel chiah,"

"Aw i rawn thleng ṭep tawh,kawng sirah ka ding min hmu nghal mai ang,"

"Awle aww ka hmu thei che,"

"Umm ka lo nghak ang che,"

Max chuan a phone chu a off a,Msi te In bulah chuan a car chu a hung rem a,"Birthday cake kan zai zova,ka rawn chhuak daih. Ka chhungte chuan min zawng maithei a ni,"tih mawlh mawlh pahin Msi chu a chibai nghal lawp lawp a. Msi chuan,"I rawn kal dawnin i chhungte hrilh tal tur che lawm,i ti ho e mai,"a lo ti vat a. Max chuan nui var var chungin,"Min rawn call mai ang,"a lo ti sam et a. In chhung lamah chuan an in zui lut ta a.

Zomuanpuia chuan Msi te in kawta car dum tle var mai rawn in hung chu a en kual vel dun dun a,"In leng a nei ve khanglang a ni maw? Veng dang mi an ni ngei ang,"tih pahin Msi te inah chuan kawngkhar pawh kik lem lo chuan a lut nghal a. Sitting roomah chuan Max leh Msi te chu an lo ti ti dun malh malh a. Zomuanpuia chuan,"Ekhai in leng i nei nimaw?,"tih pahin Max chu thip zet hian a han melh nghal ringawt a. Msi chuan,"Nia kan class a mi a nia,Max a nih hi. Max hei hi Zomuanpuia a nia,"tiin a hmelhriat nghal zung zung a. Max chuan Zomuanpuia chu chibai tumin a kut a han phar chhuak a;mahse,Zomuanpuia chuan a lo ban duh lova. Max chu a nui suk ringawt a,engmah sawi lem lo mah se Zomuanpuia chet dan chu mak a ti tih a hmelah a lang reng mai.

Zan dar 8.00pm velah Sangtea pawh a rawn lang leh hlawl mai. Zomuanpuia chuan,"Zu i rawn zawng a mi a? Hetah zu an zuar tawh lo,"a lo ti kher a. Sangtea chuan,"Nang angin zu ka zawng ve duk duk ngailo,"a lo ti deuh hmuk a. Msi chuan,"Khawngaihin duhtawk teh u,"a lo ti vat a. Max chu a va mit sir zauh a,nuamlo a ti tih a hre nghal thei. Whatsappah a text nghal vat a;

"Max,pawi ka ti lutuk min hrethiam hram hram mai rawh aw,"

"Umm hrethiam lutuk e,i thiamloh pawh a ni hleinem,"

"Ka lawm lutuk e,"

"Ee zanin chu ṭhian ṭhar a rawn lang a ni maw? Sangtea ka nia,"tih pahin Max lamah chuan a kut chu a phar a,Max pawh chuan,"Max ka nia,"tih pahin Sangtea kut chu a lo ban ve nghal vat a.

"Nang hi Emily i bia em?,"Msi chuan Sangtea chu a melh nghal kur a. Sangtea chuan,"Aih be lo,"a lo ti vat a. Msi chuan,"A lo nghak reng ang che,be ngei ngei ang che,"a ti leh a,midang an awm ve ṭhup avang chuan engmah an sawi zawm ta lova.

Dar 9.00pm velah Sangtea chu a haw a,Max leh Zomuanpuia erawh chu an la ṭhu kur mai. Zomuanpuia lah chuan mei nei deuh deuhin ṭawngkam a hmang ziah leh nghal a.

"Ṭhianpa,henglaiah te engnge i rawn tih ve a? Zu i rawn zawng ve chu a ni em lovang chu maw?,"ngeiawm zet hian a nui zui nghal a. Max chuan,"Zu ka in ngai lova,Msi hi ka ṭhiannu a nia chuvang chuan ka rawn leng,"a lo ti ve salh a. Zomuanpuia chuan,"I car te khi a nalh hle mai,nangma thawhchhuah ngeia i lei emni?,"a ti leh a. Max chuan,"Ni e ka thawh chhuah ngei a ka lei a nih khi,"a lo ti leh hmak hmak a. Msi chuan,"Khawngaihin in duhtawk thei tawh a ngem?,"a lo ti leh a. Max chu a ngawi mai a,Zomuanpuia erawh chuan,"I rawn len leh hunah chuan car hi rawn keng tawh suh aw. Ka bike hun naah i lo hung ve ringawt lehnghal a,"a ti leh hram a. Msi chuan,!Khawngaihin Zomuan,duhtawk teh,"a lo ti leh a. Zomuanpuia chu a nui hak hak a,"Ka haw san phawt ang che u. Mahse,zan dangah chuan i car hi rawn keng tawh suh aw,"a ti leh hram a,a chhuak nghal a. Msi chuan muttui ti pawn a thlah lo.

"Max pawi ka ti lutuk,i vawi khat rawn lennah tiang hi i tawng bawk si,"a ti nghal mawlh mawlh a. Max chuan nui sâng chungin,"Nuamlo ti duh reng reng suh,i thiamloh a ni lo ka tihkha,"a lo ti vat a,a phone chu a bih nghal vat a,"Ehe ka nu missed call 5 a lo awm a nih hi,ka hrelo reng reng,"tih pahin a nu chu a call nghal a.

"Aw Bawiha,khawnge i awm a?,"

"Nu,ka tihpalh lutuk ka ṭhiante inah ka kal lawk a,kan ti ti tui lutuk a engmah ka lo hrelova,"

"Rawn haw vat rawh,kan nghak reng che,"

"Awle ka rawn chho nghal ang,"

Max chuan a phone chu a ak nghal a,"Ka han chho phawt a nge aw,min lo nghak rei tawh hmel sia,"tih pahin a tho nghal hluai a. Msi chuan,"Nia nidangah hun thawl zawkah kan la inkawm leh dawn nia,"tih pahin kawt lai thleng chu a thlah a.

Zan dar 10.00pm velah chuan Sangtea pawh chuan Emily chu a be leh ta nge nge a.

"Emi,i mu tawh em? Ka tihpalh lutuk aw,"

"Mu love min rawn biak hun ka lo nghak a. Ka ngai lutuk che,"

"Min ngaidam thei tawh em?,"

"Umm theihnghilh vek tawh rawh,"

"Ka lawm e,tiang khan ka awm tawh miahlo ang,"

"Awle nihchuan naktuk min chhuahpui la,"

"Engti turin?,"

"Monday hi Tuesday hi ka nau birthday a nia. Chuta gift tur vel chu min leipui la ka ti deuh a,"

"Awle mahse,chawhma lam chu ka hmanlo maithei a,"

"Umm i hman hun hunah a ni mai,"

"Chawhnu lamah chhuak ila,tlaiah chaw kan ei chhuak nghal a nga,"

"Nia i tih dan dan a ni mai,"

"Nihchuan dineout turin i lo inbuatsaih dawn nia aw,"

"Awle ka lawm lutuk e,"

"Heh i ho e mai,hei a tlai tawh sia. Naktuk zingah ka thawh hma a ngai sia,mu tawh mai ila,"

"Awle nih muttui aw,"

"Awle nangpawh muttui le,"

Pi Ruati chuan kuhva kheh mawlh mawlh pahin,"Nizana rawn leng kha khawi lam mi nge a?,"a lo ti a. Msi chuan,"Kan class a mi nia,Chanrami mi anihkha,"a lo ti vat a. Pi Ruati chuan,"Anih chu ṭhian kawm te hi fimkhur tur a nia aw. Nula in ni tawh a,ho teah pawh in mualpho vak thei a nia,"a ti leh a. Msi chuan,"Nu,Max kha chu a fel lutuk,"a lo ti vat a. Pi Ruati chuan,"Ni e a fel ang. Amah ka sawichhan kherlo a nia,"a ti leh a. Msi chuan,"Nizan Zomuanpuia rawn chet dan kha chuan min ti zak ngawt mai,"a ti leh a. Pi Ruati chuan,"Zomuanpuia hi chu en liam mai mai tawh rawh,kan tih let zel chuan min bei reng zawk ang,"a lo ti leh a.

"Nu,vawiin chu chawhnu lamah ka chhuak dawn nia aw,"Sangtea chuan dawr bungrua vel chu a rem fel malh malh a. Pi Zuali chuan,"Khawiahmaw?,"a lo ti nghal vat a. Sangtea chuan,"Ka ṭhiannu nen a nia,"a lo ti leh vat a. Pi Zuali chuan,"Msi nen maw?,"a lo ti leh vat a. Sangtea chuan,"Aih nilove Emily nia,"a lo ti leh a. Pi Zuali chuan,"In kal hma in amah ka hmu duh a nia,"a lo ti leh a. Sangtea chu a ner nâng nâng a,"Nhaaa Nu,a zak ang,"a ti leh a. Pi Zuali chuan,"Bialpa pawh nei ngam chuan bialpa te nu te chu hmuh ngam awm tak," a lo ti bak hlak a. Sangtea chuan,"Awle nihchuan ka lo hruai dawn nia,"a ti ve ta a.

Chawhnu lam dar 2.00pm velah chuan Sangtea chuan Emily chu an dawrah chuan a hruai phei phawt a. A nu chuan awihawm loh khawpin a lo lawm a,"Emily maw i hming? I hmelṭha hle mai a,khawi vengah nge in awm a?,"tiin a lo kuah nghal chung chung a. Emily chuan,"Aww Zarkawtah kan awm a,"a lo ti zawi sap a. Pi Zuali chuan,"Anihtak chu i nu leh pa ten engnge an thawh a?,"a ti leh nghal zat a. Emily chuan,"Ka pa chu PHE Departmentah a thawk a,ka nu chu Nurse a nia,"a ti leh a. Pi Zuali chuan,"Ekhai chhungkaw ropui tak in nih chu maw le,"a lo ti leh a. Sangtea chuan a nu chu a ti ti tui dawn lutukin a hria a,a ṭawnglai chu a lo pawt chat a,"Nu,kan kal a hun tawh a. Kan kal phawt a nge aw,"a lo ti a. Pi Zuali chuan,"Awle anih bye u,"a lo ti ve nghal vat a.

"Ka nu hi chu zawhnate hi a ngah thei a nia,i ning hman em?,"tiin Sangtea chuan a zawt nghal vat a. Emily chuan,"Aih ning love,a fel khawp mai. A bula awm pawh a nuam,ka nel nghal thei,"a lo ti thung a. Sangtea chu a nui chhuak hak a,"A lawmawm nasa a nihchu,"a lo ti vat a. Emily chuan,"Tinge min nuih a?,"a lo ti hâ a. Sangtea chuan,"Ka nuih lo che,"a lo ti leh nghal vat a.