ZU ZUAR FANU 6

CHAPTER--6

Ziaktu: R'z Thangluah✍🏻

Sangtea chuan Msi number chu nei mah se,a be ngam hlawl lo a ni. A khat tawkin a last seen leh a dp chu a check leh zauh zauh ṭhin a. A online ve chhunah pawh zing lamah reilo te te chiah a online ṭhin a,Msi'n Sangtea number a neih ve loh avangin Msi status erawh a hmu ve theilo a ni. An awmpui nula phone aṭangin a rukin a en sak ṭhin a,a status lah chu a lehkha zir chungchang hlir a la ni zui. Sangtea chuan,"I exam zawh hma hi chuan ka be lo law law mai ang che. Mahse,i exam zawh hunah erawh chuan mipa takin ka che ve tawh ang,"a ti ve bap bap a.

Lawma chuan a phone hmeh nuap nuap pahin,"Bawiha,zanin chiah min kal pui la. Hmanniah kan inhau deuh a,min be duhlo char char a,"a lo ti a. Sangtea chuan,"A ti leh ta,hmeichhe dang i be leh tawh niang chu,"a lo ti vat a. Lawma chuan,"Chutiang pawh nilo,ka cousin nen kan thlalak dunna kha status ah ka hmanga,kha kha a thinrim a,"a lo ti leh a. Sangtea chuan,"Tu i cousin maw? Cousin te hi i ngah hrim hrim lutuk a,Rki tan pawh rin che hi a har ve viau ang,"a lo ti leh a. Lawma chuan,"A thikthu chhe ve hrim hrim lawm. Thik awm leh awmlo pawh a hre lo,"a lo ti leh a. Sangtea chuan,"Hmeichhe thikthu chhe lo i duh mi? I lakah a thikthu a chhiat tawh loh chinah chuan i hawi lawl lawl mai ang. Hmeichhe thikthu chhia chu an lerh lo tlangpui,"a lo ti leh nghal mawlh mawlh a. Lawma chuan,"Umm anihchuan min zu kal pui la,"a lo ti leh a. Sangtea chuan,"Mipa ve si i nep thei lutuk,tun bak chu ka sawipui tawh dawnlo che nia. Vengthlang tleirawl te kha biak biak a ngailo,a tawpah Rki bulah bawk i let leh tho,"a lo ti leh hluk hluk a. Lawma chuan nui vur vur chungin,"Nangpawh Msi i bem ngam miahlo kha aw,"a lo ti zauh a. Sangtea chuan,"An exam zawhah kan hria ang chu,"a lo ti vat a,a bike chu a ti nung a a chuang kai nghal a. Lawma pawh chuan a bike chu a ti nung ve nghal a,Rki te ina leng turin an in zui thla ta a.

Msi chu a roomah chuan a in khung deuh chawt a ni ber mai. Chaw ei dawnah a nu in a ko a,a lo ei a chaw eikham reilo te a chawl a,a in ti fai a lehkha a zir leh nghal ṭhin a. A lehkha zir kawngah hian a nu hian engkimah a pui a,atan engkim a huam a ni tih a hriat vang hian a lawm takzet a ni. Chuvang chuan a nu tan theih tawpin lehkha a zir a,hlawhtlin ngei tumin a bei a ni.

Zan dar 9.00pm velah Sangtea chu Msi te inah a rawn chuangkai hlawl mai a. Pi Ruati chuan,"Ee Sangte,lo leng rawh tunlai chu i va reh thei ve a,"a lo ti nghal sawk sawk a. Sangtea chu ṭhutna awlah chuan a ṭhu ve nghal mai a,"Nia tunlai chu ka in khung ve deuh a,in dam ṭha maw?,"a lo ti ve nghal vat a. Pi Ruati chuan,"Aw damṭhat ee,tunlai class i kal ṭha maw?,"a ti leh a. Sangtea chuan nui chungin,"Aww kal ṭha e,"a lo ti ve mai a. Pi Ruati chuan,"Tikhan leng rih la,nakinah thingpui kan lum dawn nia,"a ti leh a. Sangtea chuan,"Awm rei hman vak pawh ka nilo,"a lo ti a,a nui deuh suk a. Pi Ruati chuan,"Kalna tur dang i nei mi a?,"a ti leh a. Sangtea chuan,"Ka ṭhianpa nen kan chhuak a,chhuak tih ah nula ka rimpui a. Ka rawn chhuah san zawk a nih hi,"a lo ti leh mai a. Pi Ruati chuan,"Nihchu Rki te inah niang maw?,"tih pah chuan a nui suk a. Sangtea chuan,"Aw ni e,"a lo ti vat a.

Lawma chuan,"Duat,dawt ka hrilh ngai lo che. Min ring rawh khawngaih takin,ka hmangaih che lawm,"a ti mawlh mawlh a. Rki chuan,"Khawmaw i phone?,"tih pahin Lawma phone chu a dil mauh mai. Lawma chuan,"Ngatan nge i tih a?,"a lo ti vat a,a meng buai nghal vek lehnghal a. Rki chuan,"I group awmna leh i chat list vel ka en duh,"a ti leh a. Lawma chuan,"A ho e mai,"a ti a,a phone pawh chu a pem lova. Rki chuan,"Awle i phone check i phalloh danah khan thil pawi tak chu a awm tih ka hre mai. Min rawn be buai tawhlo ang che,min haw san mai rawh,"a ti hul hak mai a. Lawma chuan,"Duat,khawngaihin min ring rawh. I ngaih ang kha engmah a nilo ania,"a ti leh a. Rki chuan,"Ring tur che in min duh a. Mahse,rin turin i awm silo anih hi,zu pawh ka in tawhlo ang i ti a. I in leh a,hmeichhe bula zu in ṭhin te pawh ka hre vek. Ka tuar ve hram hram a;mahse,ka tuar thei tawhlo a ni min ngaidam dawn nia,"leh lam a hawi a,a mittui chu a hru zauh a. A mittui tla chu Lawma chuan hmu lo se a duh a ni. Lawma pawh chu ngawi rengin Rki te in aṭang chuan a chhuak ta hna hna.

Rki chuan a lehkha zir pawh a ngaihsak theilo. A room tukverh chu a hawng a,van lam chu a thlir a arsi de sep sep leh thla eng no nghial chu a thlir vawng vawng a. A biangah chuan dan ruallohin mittui a lo luang a,"Hetiang hi emni hmangaina vanduai an tih chu? Aw Lalpa,i tello chuan ka tuar chhuak zo lovang,min pui ang che aw,"tiin ama hriat tawk lek chuan a phun sep sep a.

Sangtea chuan,"A ṭhen che maw?,"a lo ti vat a. Lawma chuan,"Aw min rawn be tawh suh a ti lawm,"a lo ti hul hak a. Sangtea chuan,"A thiamlo hmasa zawk chu nangmah i ni. Thu i tiam zut zut a,i ti hlawhtling leh thei silo. Rki hian i lakah hian a rinna zawng zawng a nghat tih i hrelo a mi?,"a ti leh a. Lawma chuan,"Tiang em em hian kan buai ka ring lova,"a ti leh sup a. Sangtea chuan,"Hmangaihna kawngah chuan engkim a thleng thei. Ho te a kan ngaih pawh hi midang tan chuan a ho miahlo thei a nia. Mahse,mipa i nihkha mipa chuan hmeichhia a umzui tur a ni lo,"a ti ve charh charh a. Lawma chuan,"Mahse,Bawiha a tellovin engtinnge ka awm theih a nga?,"a ti leh a. Sangtea chuan,"Mipa i nihkha,pa deuhin awm rawh. A tellovin i awm theilo anihpawn,a tellova i awm theih loh zia kha a hmuh laiin ti lang lo la. Ngaihven zui bawk suh ang che,chutiang i ti thei dawnlo anihchuan naktukah ngaihdam i dil dawn nia,"a ti ta a. Lawma chuan,"Ngaihdam han in dil ringawt chu ka hreh ve sia lawm,"a ti leh a. Sangtea chuan,"Huiham,i thiam loh ania ngaihdam dil chu i hreh tur a ni lo. Mahse,ngaihdam i dil duh lo ṭalh a nihchuan ka sawi ang khan chhel takin i awm a ngai ang,"a ti leh charh charh a. Lawma chuan,"Awle ka hria e,ngaihdam chu ka dil lovang. Engpawh nise haw phawt ang,"tih pahin a bike chu a ti nung nghal a. Sangtea pawh chuan a bike chu a ti nung ve nghal a,an 2 chuan an tlan leh fua fua mai a.

,"Aw ka tan chuan kalsan kha a ṭha berin ka hria. Kan inkawp reng chuan ka na reng dawn tho a,chuvang chuan ka tana ṭha ber tur nia ka hriat angin thu tlukna ka siam tawp mai,"Rki chuan a phone chu dawhkan chungah chuan a tuai vir a tuai vir a. Msi chuan,"Chaw i ei ṭhalo a ni maw? Lehkha pawh i zir ṭha lo ni chiang mai,"tih pahin a ṭhiannu chu a kuah a. Rki chuan,"Nia a dik a lawm. Ms,ngaihzawng hi nei ve duh reng reng suh aw,ngaihzawng neih chu hlimna aiin natna a tam zawk,"a ti leh a. Msi chuab nui var var chungin,"Ngaihzawng nei duh pawh ni ila,tuman min duh ve tak tak lovang,"a lo ti vat a. Rki chuan,"Zomuanpuia a rawn leng reng ṭhin hi. Hepa phei hi chu ka duhpui hlawllo che a nia aw,a chapo si,"a ti nghal mawlh mawlh a. Msi chuan,"A rawn leng ṭhin tih chu ka hria. Mahse,a rawn len pawn ka hmu ngai lo. Anu nen an inkawm ṭhin,"tih pah chuan a nui leh hawk hawk a. Rki chuan,"Kan exam zawh hunah pawh hepa kher kher hi chu be ṭha suh ang che aw,"a ti leh a. Msi chuan,"Awle tehreng mai,i thusawi te chu ka hnial ngai loh kha,"tih pahin a lo nui var var a.

March thla chawhnu lam a ni a,Msi te pawh an exam ve ṭan tawh a. An exam lai ngat phei chuan pawnah hian a chhuak ngailo a ni,a chhan chu a nu hian an exam lai chuan boruak dang hip lo se a duh vang a ni. A roomah chuan a in khung ngawt ngawt a ni ber mai.

Zomuanpuia chu zu rim nam phel phual hian a rawn lut hlawl mai a,"Nu Ruat,Msi awm em?,"a rawn ti nghal thawr a. Pi Ruati chuan,"Lehkha a zir a,"a lo ti mai a. Zomuanpuia chuan,"Ka rawn leng ngun ve tawh viau a. Tinge i fanu hi hmuh i phal miah lova?,"a ti buan buan a.