ZU ZUAR FANU 5

CHAPTER--5

Ziaktu: R'z Thangluah✍🏻

Pathianni zing a ni a,Sangtea pawh Pathianni tuk dang ang lo takin inkhawm turin a insiam ve malh malh a. A wardrope chu a en vang vang a,"Humm inkhawmna tur kamis leh kekawr lei ka ngai a nih hi,"a ti sup a. Kum hmasa krismas dawna a kamis lei chu a ha a,a kekawr neih ṭhat ber leh inhmeh ber nia a hriat chu a ha bawk a. Pheikhawk erawh smart shoe dum a bun ve thlap a,darthlalang hmaah a ding a. A in bilh lut ve mawlh mawlh a,"Kan veng tlangvalah chuan ka hmelṭha ber chu ka ti lo. Mahse,ka langsar ve larh larh e mai,"tih pah chuan a nui vur vur a. Hla bu a zak zeh a,inkhawm turin a chhuak ve nul nul a.

Msi te nufa pawh inkhawm turin veng mawng lam aṭang chuan an rawn in zui chho ve hnak hnak a. A ṭhiannu Rki chuan an in kawtah a lo nghak vang tawh a. Msi chuan,"Awii min lo nghak rei tawh em?,"a ti nghal vat a. Rki chuan,"Rei love keipawh ka hman ve deuh chiah lawm. Mawiin min lo nghak tawh zawk a,"a lo ti vat a. Msi chuan,"Nihchuan chho nghal ila,Nu kan kalsan mai ang che aw,"tih pahin hmanhmawh takin an kal nghal hlawk a. Pi Ruati chuan,"Keichu muang changin ka rawn kal ang,"a lo ti ve bawk a.

Mawii pawh chuan an in thlang footpath ah chuan a ṭhiante 2 chu a lo nghak vang tawh a. A bulah chuan Sangtea pawh a lo ding ve reng bawk a. Rki chuan nui vur vur chungin,"Ekhai kha lai tlangval chu a piangthar ni maw?,"a lo ti zauhva. Sangtea chuan,"Vawiin ni angah chuan inkhawm ka ṭhulh ngai lo,"tih pah chuan a lo nui hak hak a. Rki leh Msi chuan Sangtea thusawi chu an awih loh hmel khawp mai,an 2 chuan an in melh a an nui vur vur a. Sangtea lah chuan,"Nge in va awih loh hmel ve a?,"tih pah chuan a lo nui ve vur vur a.

Inkhawm banah chuan Sangtea chuan Msi te ṭhian ho bawk chu a zui haw leh a. Sangtea chuan,"Vawiin chu kan inah rawn chawl ula,thingpui te kan in dawn nia. Sunday chhun hi chuan midang tumah an awm ngai silova,Mawii nen chiah kan awm zel a. A khawhar thlak thei lutuk a,"a lo ti a. Mawii pawh chuan,"Nia lo chawl ru aw,thingpui tui tawkin ka lo siam sak dawn che u nia,"a lo ti ve bawk a. Rki leh Msi pawh chuan an hnial lem lova,Sangtea te inah chuan an lut ve ta a.

Zomuanpui chuan,"Rin aiin bem thluk a har hmel,a nu hian a veng hneh lutuk a,"tih pahin a meizial chu a ṭan a. Zira chuan,"Ve a,a nu khuan a veng ve khanglang a. An inah kan duh duh hunah zu kan in thei tih te kha hre ve rawh se,"a lo ti nghal pung pung a. Zomuanpuia chuan,"Nia mahse,a ho lutuk mipa ka ni lawm. Hmeichhe 1 lek bem thluk chu har lo e mai a,"a lo ti ve nghal vat a. Zira chuan,"A har aniang chu hei thla 1 chhung i rim tawh a,i la rimthlu zo lo ania,"a lo ti hmak a. Zomuanpuia chuan,"I hmanhmawh anihkha lungngai suh,"tih pah chuan a nui zui hak hak a.

Sangtea te in chu a lian in a ropui khawp mai. Mahse,an in chhung a lut chiah chu Msi chuan an inchhung boruak chu a rit luk hian a hria a. A hawi kual vel a,thil engkim mai chu a changkang em em vek mai bawk si. Mahse,a chhunga chengte erawh an in ropui angin an ropui lo a ni. Mawii chuan,"Tikhan lo ṭhu ula ka han inthlak lawk a nga,thingpui kan lum nghal dawn nia,"tih pahin a room lamah chuan a chho nghal a. Sangtea chuan,"In ngawi kur a,ṭawng ve bawrh bawrh ula. A nuam in tih loh hmel e,"a lo ti ve bawk a. Msi chuan nui chungin,"Aaa nia sawi tur a vang e lawm,"a lo ti ve leh mai a. Rki erawh chuan a phone a bih ngur ngur a,a rawn nui chhuak vur vur a,"Awii hepa khawloh zia hi chu aw,"tih pahin a hma aia nasa in a rawn nui leh a. Msi leh Sangtea chuan,"Tu maw?,"an lo ti rual ṭhawt a. Rki chuan,"Lawma hi maw le,a status kha en ve ula. Ka damlo a ti ve sia,awii ka ngei lutuk,"tih pah chuan a nui leh uar uar a. Sangtea leh Msi pawh chuan an phone chu an bih ve vat a,Lawm status a video  a lam lai chu an zu hmu nghal a. An nui ve hawk hawk mai a,"A inkhawm peihlo chhuan lamin ka damlo a ti leh tawh nihkha,zanah chuan a rawn leng leh tho ang,"tih pahin Sangtea chu a lo nui vur vur a.

Mawii chuan thingpui chu a lum nghal sawk sawk a. Sangtea chuan,"Eee chhang kha lei sa a la awm em?,"a rawn ti chhuak hlawl a. Mawii chuan chhang bawm chu a en nghal a,"Aih awm tawhlo,tukin zingah i ei zo vek nihkha,"a lo ti heu mai. Sangtea chuan chek tlak tlak chungin,"A zia lo thei e,7th day dawrah khan ka zu lei mai ang. Eng chhang nge in duh ang?,"tih pahin a tho nghal hluai a. Msi chuan,"Lei buai lo mai rawh,thingpui hlang pawh a tui tho a lawm,"a lo ti vat a. Sangtea chuan,"Lei hrim hrim kan ngai a lawm. Tikhan lo awm ru aw,ka zu tlan zuai a nge ka rei lovang,"tih pahin a bike chabi chu a la a,a chhuak nghal daih a. Mawii chuan,"U Sangtea hi chu a fel bik ngawt mai. Tih tur a awm reng rengin,a tih ve theih awm chi anihchuan min tir ngai lo amahin a ti vek zel,"a lo to vat a. Rki chuan,"Nia hepa hi chu a fel ve ngawt mai. Mahse,kan pa chu a tluk lo,"a lo ti zauh a. Msi leh Mawii chu an lo nui vur vur a.

Sangtea chu a zu thang rei lo kher mai. Chhang leh chips vel chu a rawn lei ṭeuh mai a,dawhkanah chuan a chhawp hnuk a,"In ei ṭeuh dawn nia,"tih pahin chips ho chu a hawng nghal mawlh mawlh a. Mawii pawh chuan thingpui chu a siam nghal bawk a,"Leee a in theih e,choka lamah hian lo phei mai ru aw,a nuam daih zawk,"tih pahin Msi leh Rki chu a va koh a. Msi te pawh chu an lo phei ve nghal a.

An thingpui in zawh chuan sitting room ah an ṭhu khawmuang leh a. Sangtea chuan Msi chu a lo thlir leh dauh dauh ṭhin a,Mawii chuan Msi'n hrehawm a ti ang tih a hlau si Sangtea chu hmun leh hmunah a call ta ringawt a. Sangtea'n phone call chhan tum a,a ban veleh chuan a hmet tawp leh a. Sangtea chuan,"Tunge mawn le?,"tih pahin a phone chu a bih a,rawn missed call tu chu Mawii a lo ni reng a. Mawii lam chu a va en a Mawii lah chuan hrelo ang hmakin a awm si. Sangtea chuan whatsappah,"Engnge a?,"a va ti ringawt a. Mawii chuan,"Msi hi en reng suh,nuam a ti lo ang,"a lo ti a. Sangtea chuan,"😄😄Nihchuan a number min lo pe,"a la rawn ti zui. Mawii chuan,"Awii i zak lo😠ama bulah ka dil phawt ang. Aman a phal chuan ka rawn pe ang che,"a la rawn ti zui. Sangtea chuan,"Nhaaaaa a rukin ka dil ve em em che a,🤦‍♂,"a ti leh a. Mawii chuan,"🤣🤣🤣🤣🤣🤣tak2in an haw hunah ka pe ang che,"a rawn ti ta a.

Dar 12.30pm a ni tawh a,Msi chuan,"Chawhnu hi kan inkhawm dawnlo mi?,"a rawn ti a. Rki chuan,"Keichu ka peih tawhlo e,inkhawmlo law law mai ang u,"a lo ti nghal vat a. Sangtea chuan,"Nia tikhan in lo leng ve a ni mai lawm. Chawhnu inkhawm ban rualin in haw ve leh anga,tuman chawhnu in inkhawmlo tih an hre tawp lovang,"a lo ti ve bawk a. Msi chuan,"Nhaa keichu ka inkhawm loh law law chuan lehkha zir ka duh a,chawhnu inkhawm kal hi kal rem phawt se ka haw ang ka ti deuh a,"a lo ti ve thung a. Mawii chuan,"Awii nang tak hi chu aww Sunday em em hi chuan awl ve tal la,i inzir â thei mai ang,"a lo ti hlak hlak a. Msi chuan nui chungin,"Nia mahse,ka subject lak hi inthlahdah a thianglo tawp a,"a lo ti vat a. Rki chuan,"Arts te hi la ve mai mai la ṭha tur ania,"a lo ti ve hluk a. Msi lah chuan,"Arts ka lakin doctor ka ni thei dawnlo a sin,"a lo ti thung a. Sangtea erawh chuan ngawi rengim Msi ti ti siam siam lai chu a lo thlir reng thung a.

Msi chuan a room ah lehkha a zir leh malh malh tawh a. A nu erawh chuan eirawng a bawl rak rak a,tlai dar 4.00pm velah chuan a bawl zo nghal der a. Tih tur em em a nei tawhlo bawka tiin kuhva te chu a kheh leh sawk sawk a.

Msi pawh dar 4.30pm velah chuan a rawn chhuak phei ve a,"Awii Nu,i lo buai em?,"tiin a nu bulah chuan a rawn ṭhu nghal a. Pi Ruati chuan,"Buai love rawng bawl tur vak a awm lova. Zanah i inkhawm dawn em?,"a lo ti vat a. Msi chuan,"Umm i phal chuan?,"tih pahin kuhva khehna chu a la a,a kheh ve nghal sawk sawk a. Pi Ruati chuan,"Lehkha zir i duh chuan ka awmpui thei reng che ania,"a lo ti thung a. Msi chuan,"Inkhawm ka duh zawk,zanah chuan zanin bak ka inkhawm tawhlo ang. Lehkha ka zir char char tawh ang,"a lo ti vat a. Pi Ruati chuan,"Awle i tih dan dan ni mai. Mahse,zan lamah chuan ka bulah kal la ka duh a ni,"a ti leh a. Msi chuan nui sâng chungin,"Umm tehreng mai,"a lo ti vat a.

Sangtea chuan a phone chu a hmet niap niap a. Msi number chu a hmet chhuak nghal a,a dp leh a last seen a en nghal a. A dp ah chuan a nu nen an thlalak dunna a hmang a. A last seen erawh today 12.25pm a ni,"He nu hi vawiin a kan ina phone a khawih bak kha a la khawih leh lo a ni maw?,"tih sap pahin a dp chu a en nawn leh a,"In nufa hi chuan hmuh in nuam ve ngawt mai,"a ti leh sup a. Amah chuan a nui vur vur a,head phone a vuah a Daduhi hla sak 'KA HLAN NGAM LO CHE'tih chu mit chhing diar diar chungin a ngaithla vang vang a.

Sangtea muhil a harh leh meuh chuan inkhawm an lo bang daih tawh a. Rang deuhin a zuang thova,a phone a la nghal a Msi number bawk chu a hmet chhuak leh a. A last seen chu a la ngai reng mai,"Huiham message thawn che pawh ni ila,i hmu awm silova,"tih sup pahin a phone chu a khumah chuan a theh let bal a. Bath roomah in thiar turin a lut zui nghal a,zai rat rat pahin a in thiar a. A hmai a phih a,sana a bih zauh a dar 8.20pm a lo ni tawh a,"Ka zu kal tho dawn mawn le? Mahse,dar 8 a pel tawh bawk sia,"tih nuah nuah pahin a in phih fai a. Dar 8.30pm ah chuan Msi te in lam pan chuan a in khalh chhuak leh ta nge nge a.

Pi Ruati chu kuhva khehin a lo buai leh hle tawh mai a. Kawngka kik ri a hriat chuan,"Aw lo lut rawh u,"tiin a lo chhawn vat a. Sangtea chu in thlahrung tih hriat tak hian zawi te in a rawn lut a,"Aah englo...rawn len i phal em?,"a rawn ti zawi sap a. Pi Ruati chuan nui chungin,"Ee phal tehreng e le,rawn leng rawh lo ṭhu rawh,"a lo ti nghal bawrh bawrh a. Sangtea chu ṭhutna awlah chuan a ṭhu nghal a,"Msi'n lehkha a zir mi a?,"a ti leh a. Pi Ruati chuan,"Aww an exam a hnai tawh sia,tunlai chu a zir ngawrh deuh a,"a lo ti vat a. Sangtea chuan,"A zir peih e,a pass ngei ngei ang. Keini class-Xii kan zir ve lai khan kan zir thatchhe thei sia,engtinnge ka lo pass theih le ka ti ṭhin,"tih pah chuan a nui hak hak a. Pi Ruati chuan,"Nia mahse,thil hi chu a hun lai te te hi a awm ve lawm. Tunlai class i kal ṭha em?,"a lo ti ve nghal a. Sangtea chuan,"Umm pangngai ni mai,"tih pah chuan a nui suk a. Pi Ruati chuan nui chungin,"Ekhai pangngai ni mai hi chu a ṭha vak lo nia aaw,"a lo ti a. Sangtea chuan,"Nia ni ve tho mai. Mahse,tunlai chu ka thatchhe thei lutuk a,"a ti leh a. Pi Ruati chuan,"Thatchhiat hi a ṭha lo,ṭhatna pakhatmah a awm lo ania,"a lo ti leh a. Sangtea chuan,"Nia dik chiah mai,"a lo ti leh mai a.

Dar 9.00pm velah chuan Zomuanpuia pawh a rawn lang ve hlawl mai. Pi Ruati chuan,"In rawn leng ta sa sa,zanin chu min pui teh u. Kuhva hi min lo khehpui teh u,thingpui te pawh kan lum dawn nia,"tih pahin kuhva khehna chu 1 ve ve in a pe a. Sangtea chuan engmah sawi lovin nui var var chungin kuhva chu a kheh nghal malh malh a. Zomuanpuia erawh chuan,"I va phakar tak,i fanu hmuh i phal bawk silo. Min chhawr leh hrep ringawt zel a,"tih nuah nuah pahin kuhva chu a kheh ve mai a. Pi Ruati chuan,"Nia tunlai chu a lehkha zirna lamah in sawrbing deuh se ka duh vang ania,an exam zawh ah chuan pangngai deuhin in rawn rim thei tawh ang chu,"a lo ti leh a. Sangtea erawh chuan engmah a sawi lo,ngawi rengin kuhva chu a thel ve malh malh a. Zomuanpuia chuan,"Nangpa hi zu in tur i zawng leh tawh nimaw?,"tih pahin ngeiawm zet hian a nui a. Sangtea chuan Zomuanpuia pawh en lem lo chuan,"Zawng love?,"a lo ti hul hak a. Pi Ruati chuan Sangtea te 2 chu a en dun hrek hrek a,"Nangni 2 hi tiang khan in hnial reng reng suh u. Ṭhian in nihkha hre reng rawh u,"a lo ti a. Zomuanpuia chuan,"Hetiang mipa ṭhian a neih aichuan ṭhian neih loh pawh ka duh fe,"a rawn ti hram a. Sangtea chu thinrim insûm tih hriat takin kuhva chehna chu a hum ngawt ngawt a. Pi Ruati chuan chu chu a hmuh hmaih lo,remna a siam lo anihchuan an 2 hian an insual leh duh mai ang tih chu a hre chiang em em mai bawk si. An rilru lak pen dan tur a ngaihtuah ta a,"Ee thingpui kan lum a nge aw,tikhan lo kheh ula thingpui tui deuhin kan lum a nge aw,"tih pahin choka lamah chuan a phei nghal a.

Pi Ruati chuan choka aṭang chuan a in lengte 2 chezia chu a va mit sir leh zauh ṭhin a. Zomuanpuia chuan kuhva chu a kheh tawh lova,phone a khawih nuap nuap thung a. Sangtea erawh chuan ngawi rengin kuhva chu a kheh malh malh thung a.

"Kha u le,thingpui ka rawn siam peih ta e,"tih pahin a rawn chawi phei va va a. Zomuanpuia chuan a lo ban vat a,"I fanu thingpui lum pawh in a chakawm hle mai,"a rawn ti leh zauh a. Pi Ruati chu a lo nui mai a,Sangtea erawh chuan ngawi rengin thingpui chu a la a,kuhva chu a kheh leh malh malh a. Pi Ruati chuan,"Sangt,thingpui kha in rawh a dai a nge. Kha i kheh hnem tawh si chawl ve tawh la,"a lo ti a. Sangtea pawh chuan ngawi rengin a kuhva kheh chu a dah a,thingpui chu a in ve leh mai a.