MKHC in Social Media lama fimkhur turin ngen

Aizawl | November 8, 2018: MKHC Executive Committee November 6, 2018-a thukhawm chuan tunlaia kan ram boruak tawn mek chungchang thlirin mipui hnena thuchah siam tha a ti a, hetiang hian thuchah a siam a, Mizoram mipuiten min ngaih pawimawh sak tur leh lo zawm hram turin a ngen a ni. 

1. Ram tana tawngtaina: November 7, 2018 Nilai zanah hian Kohhran mipui zawng zawngten a hnuaia thupui tarlan ang hian theihtawp chhuaha ram tana tawngtaina nei turin kan ngen e: 1) Kan ramah inthlanna fel leh muanawm awm neih theih nan. 2) Kan ramah sakhaw zalenna tha tak a awm zel theih nan 3) Ram leh hnam inpumkhatna tha tak kan neih zel theih nan 4) Tunlai kan ram boruak tawn mek hi tha taka chinfel a nih theih nan 

2. Social Media lama fimkhur tura ngenna: Tunlaiin kan Chief Election Officer (CEO) thiltih avanga boruak awm mek leh Inthlan tur boruak kan hmachhawn mekah hian Social Media (Facebook, WhatsApp etc) lamah te mipui rilru chawktho thei tur leh tharum zawnga infuihpawrh theihna lam chi te, thlalak hmuhhrehawm tura sawngbawl danglam ang chite tumahin thehdarh lo turin kan ngen a. Tin, kan ram hruaitute leh mi pawimawhte chet fuh lohna lai leh an lem duhdah taka ziaka fiamthu thawh nana Social Media lama tihchhuahte hi tumahin ching lo hram turin kan ngen bawk a ni.