GREEN SKILL DEVELOPMENT PROGRAMME TRAINING KHÂR

Aizawl | November 8, 2018: Vawiin Ningani (8.11.2018) chawhma dar 11:00am khân Mizoram Pollution Control Board hnuaia Mizoram ENVIS Hub buatsaih Green Skill Development Programme (GSDP) training Certificate Course in Pollution Monitoring: Air & Water Pollution chu Directorate of Economics & Statistics Conference Hall-ah khârna hun hman a ni a, he training hi September ni 3 khân hawn tan niin thla hnih lai a awh a ni.

He training khârna hi Dr. Lalramnghaki Pachuau, Scientist 'B' - MPCB & ENVIS Co-ordinator ni bawk chuan a kaihruai a, Pu C. Lalduhawma, Member Secretary - Mizoram Pollution Control Board chuan training chhuak tâte leh Resource Person-te hnênah Certificate a hlân a, an kal lehzêlna tur atâna thu tha tak takte sawiin fuihna thu a sawi nghal a, an zir chhuah thiamnate chu ei zawn nâna hmang tangkai ngei turin a fuih a ni.

GSDP hnuaia training khâr tâk hi a thawhkhatna niin lehkhathiam, Science graduate hna nghet nei lo mi 20-in training-in mi 18-in an zo thei a, training zo ve ta lo mi 2-te hi hna dang hmuh vânga zo ve ta lo an ni. Resource Person atân hian Mizoram University, Science & Technology Deptt., Mizoram Pollution Control Board leh Mizorama Science College hrang hrang leh Central Pollution Control Board atanga mithiam bîkte an ruai a ni.

Mizoram ENVIS (Environmental Information System) Hub hi sawrkâr laipuia Ministry of Environment, Forests & Climate Change (MoEF&CC) hnuai ami niin Mizoram Pollution Control Board-in a enkawl a, anni hian Mizoram chhûng hmun hrang hranga environment kaihhnawih data la khâwmin a duh leh mamawh apiangte hnênah an sem chhuak leh a, an website www.mizenvis.nic.in atangin eng lai pawhin a lâk theih a, an email miz@envis.nic.in-ah hian biak pawh theih reng niin sawrkâr laipuiah Report fel fai taka siamin an theh lût thin a ni. 

GSDP hi Skill India Mission of Hon’ble Prime Minister leh Ministry of Environment, Forests & Climate Change (MoEF&CC) tangkawpin India ram State hrang hrangah a chhawpchhuak a, he programme hnuaiah hian lehkhathiam hna nei lo kum 18 chung lam tân Course hrang hrangah Training buatsaihin Mizoramah chuan Mizoram ENVIS Hub-te'n training hi an kalpui a ni.