MAKE MIZO BRAVE AGAIN: MIZORAM DISTRICTS 5-AH “MIZO HNAM HNATLANG” AN THAWK CHHUAK NASA

- CT Lalrinawma

Nov 6, 2018 (MSR): Vawiin zing 8am atanga NGO Co-ordination Comtt-in Mizoram State CEO S.B Shashank, IAS an duhloh entirna leh Mizoram atanga puanthuah tela inla chhuak thuai tura an phutna vanga “Mizo Hnam Hnatlang” a kohvah Mizo mipui an pungkhawm hnem hle a. Zofate Jerusalem “Aizawl” khawpuiah phei chuan mipui 25000-30000 vel an pungkhawma ngaih a ni.

Districts khawpui dang, YMA Sub-Hqrs awmna Dist-5 ah pawh NGO Co-ordination Comtt hmalaknain “Mizo Hnam Hnatlang” koh vek niin, Champhai khawpuiah phei chuan chawhma dar 11am khan CEO S.B Shashank lim hal hial a ni. Mamit khawpuiah chuan Total Bandh ang hialin hun hman a ni bawk. Lunglei, Serchhip leh Kolasib khawpuiah te pawh mipui sang tam tak pungkhawmin, buaina leh tharum thawhna thleng lovin, CEO S.B Shashank duh lohna an lan tir a ni. Mizo mipuiten tharum thawh zawng ni lo leh boruak dai raih hnuaiah punkhawm (peaceful rally) an nei thei hi India ram hmun dang tan pawn entawn tlak a ni.

Kan hriat theuh tawh leh ziak tawh thin angin, CEO S.B Shashank chuan ama duh dan angin, Mizoram sorkar rawn lovin thil tam tak Bru Refugee ten Nov 28, 2018 a inthlannaa vote an thlak theih dan turte lo ruahmanin, a thiltih dan zawt fiahtu Mizoram Sorkara Principal Secy leh Home changtu Pu Lalnunmawia Chuaungo, IAS chu ECI ah zu hekin, Oct 29 a hekna vangin, Mizo pa chu a awmna leh pian seilenna State atang ngeiin Nov. 1 khan tranfer order pek thut niin, Mizoram atanga um chhuah a ni ta a ni. Hetianga Mizo pa ngei, a aia service junior leh conferred IAS maiin ECI ah hek a, a pet chhuak ta nawlh hian Mizo mipuite thinlung a ti na em em a, chu mai ni lovin, S.B Shashank-an Election atana a thil ruahman dan te chu Mizo mipuiten ringhlel zo vek tawhin, Election fel fai leh muanawm taka a hnuaiah kal pui theih an ring ta lova. Chuvangin Mizoram atangin inthiar fihlim se, an duh ta a ni.

Heng “Mizo Hnam Hnatlang” pungkhawmte hmaah hian CEO S.B Shashank-an Pu Lalnunmawia Chuaungo, IAS chu ECI hnena a zu hek dan zawng zawngte leh Bru refugee te chu Tripura hmuna vote thlaktir an tum dan, etc te an in hrilhfiah a ni. Aizawla thusawitu thenkhat chuan, “S.B Shashank, Mizo mipuite leh Mizoram sorkar zah lova hmusittu chuan Mizoram a chhuahsan hma loh chuan a awmna hmun apianga um zui turin leh an In thleng rawka um zui an tum tihte an sawi a, mipuiin kut an beng dur dur mai thin a ni. Aizawlah hian Mizo Mipui Hnatlang pungkhawmte chuan rama tana “tawngtai rual” an nei bawk. Aizawl lam hi mipui an thahnem hle a, LPS 1 leh Zonet TV chuan Live-in an pe chhuak a, YouTube lamah Live a en theiha ti chhuah a ni bawk.

Mi tam tak chuan hetianga Mizo Hnam thil (issue) vanga Mizo mipui inlungrual em em maia an han pungkhawm leh che tla an hmuhin, “Ka mittui a tla lo thei lo, ka hnuk a ulh a ni. Mizo nih hi ava lo nuam em!” tiin, hahipin an hrilh fak a ni. Mizo mipui pungkhawmte hian “Tawlloh puan”, “Mizo kawr tial”, “ Mizo Ipte pui” leh “Thangchhuah Diar” an inbel hlawm nual a ni. Kum lama upa zawk, kum 70-80 hial turte leh thalai lam leh hmeichhia thlengin “Mizo Hnam Hnatlang” ah hian hmuh tur an tam hle.

Aizawla Mizo mipui kalkhawmte chu hruaitu neiin, an au rual dual dual a, “Mizote hmusittu SB Shashank kan duh lo, Election kaihhruai turin kan ring zo lo, SB Shashank haw rawh se, SB Shashank-an Mizoram chhuahsan rawh se, Tripura a Bru tlanchhiaten Mizoramah vote thlak rawh se,” etc, ti tein an au rual thup thup a ni. NGO Co-ordination Comtt chuan an thil duh leh phutte India sorkar leh ECI lamin an tihhlawhtlin sak hma chuan, Tawlhloh puan sinin, hnung tawlh an tum lo, tih an puang. Mipui pungkhawmte hi Mizo zaithiam larten zaiin an awi deuh reng bawk.

Hetih lai hian Central Young Lai Association (CYLA) Gen. Hqrs chuan, NGO Co-ordination Comtt hmalakna chu a tawp thlengin an thlawp dawn tih thuchhuah an siam ve bawk. He “Mizo Hnam Hnatlang” atan hian Zoram mipuite chu tun hma anglo takin an lungrual tha hle a. Khawpui chhunga Bus/Taxi leh Commercial Vehicles neitute chuan Hnatlang turte chu man chawi lovin an phurkhawm a, Sumdawngtute pawh CEO S.B Shashank um chhuahna tura hmalakna hi an thlawp tih entir nan, an Dawr te an khar nual bawk.

Ngaihtuah zui atan!

(1) Mizo Hnam thilah chuan lutuk a awm thei lovang. Tuboh 5kg a rit pawhin Sihsen chu kan chhu hreh tur a ni lo. (2) Hnam thilah chuan fin kir kera dawihzep aiin, at so deuh butin thil a ti thei zawk. Hei hi khawvel ram hrang hrangah lantir a lo ni tawh thin a ni! (3) Ram leh Hnam chhan nan tuilai rap (neutral) in a awm theih loh. (4) Tuisik aiin Thisen chu a chhah zawk avangin, Zofate i tangrual tlat zel ang u. (5) Mizo Hnama min Siamtu leh Mizoram min petu Pathian hnenah lawmthu i sawi fo thin ang u. 
MAKE MIZO BRAVE AGAIN! GOD BLESS MIZORAM!
@ CT Lalrinawma