FIR CHUNGCHANGA AIZAWL FC THUCHHUAH

Aizawl FC thuchhuah mipui hriat leh chhiar atan a ngai ang angin kan rawn dah e.

AIZAWL FOOTBALL CLUB

PRESS RELEASE

15.11.2018

         Aizawl FC Academy chungchangah lehkha rawn kal dan hriat fuh loh nge hriat fuh duh loh vang zawk? Politics-a inbeih nan FIR submit a awm ta mai hi a pawi kan tiin a mak kan ti hle. A hnuaia mi hi thil awm dan a ni e.

1. AIZAWL FC (Academy Section) hi registered Society a nih ve angin IDMI Scheme hnuaiah Tanpuina a dil ve a. Kum 2015 khan Rs 17.71 lakh chu approved a ni. Heta 25% hi AIZAWL FC tum tur a ni a, 75% (Rs 13.28 lakh) chu Central Sorkar tum ve tur a ni. A Guideline angin 1st Instalment ah Rs 6.64 lakh chu AIZAWL FC Account ah 2015 khan an rawn thun tawh.

2. He Scheme hi Sorkar implement tur chi scheme nilovin registered NGO/Society tana scheme a ni a. A Matching Share(25%} pawh hi Sorkar nilovin Society tum zel tur a ni.

3. AIZAWL FC Academy hnuaiah zirlai tam tak an awm a,an puala Sikul leh Hostel siam chu AIZAWL FC tum a ni. N.Lunglengah hmun tha deuh AIZAWL FC in a neih avangin he hmuna Academy Project atan he sum Rs 6.64 lakh leh Approved atanga 25% ie Rs 4.43 lakh chu AIZAWL FC Academy North Lunglengah hman a ni a, IDMI scheme-ah hian sum a tam theihloh avangin Society te chu an ta a nih anga sum tepawh thawha Scheme dangte nena in CONVERGE (tan ho) chu Central Sorkar duhdan pawh a ni.

4. AIZAWL FC registered Office awmna chu Dawrpui a ni a, HRD Ministry sanction Order-ah pawh AIZAWL FC Academy, Dawrpui an ti reng a ni. Hei hian Dawrpuiah Academy hi sak tur a ni tihna a kawk lo.

AIZAWL FC BoG meeting in a rel angin AIZAWL FC Academy building hi N.Lungleng-ah sak a ni.

5. AIZAWL FC Academy sakna atan hian 1st Instalment Rs 6.64 lakh bak hmuh a la ni lo. Chuti chung chuan theihtawp a chhuah a, Donation leh Scheme dangte nen tangkawpin building tha tak a sa zo tawh a ni.

6. FIR thehluttu leh Dawrpui LC te hian an thenawm lawka Office nei AIZAWL FC hi min zawt chiang hmasa sela chu hetiang lehkha hi an siam lovang.

7. Aizawl FC Academy hminga lehkha rawn thleng-ah kan registered office address Dawrpui an rawn hman avanga Dawrpui hmuna AIZAWL FC Academy sak tura an ngai hi a fuhlova; Dawrpui a Aizawl FC Academy sak hi Aizawl FC tum dan leh project siam dan pawh a ni lo a. Aizawl FC implement tura sanction rawn pe an nih angin Aizawl FC Office awmna veng Dawrpui tiin sanction-ah an rawn ziaka chu chu a scheme awmzia hrelo ten Aizawl FC Academy hi Dawrpui a sak tur emaw an tih phah niin a lang. Tun thlenga Aizawl FC office awmna min la hriat chian sak lo ni awm tak leh Aizawl FC min zawt fiah miah lova Politics-a inbeih nana FIR min submit hnan ringawt mai hi a pawi kan tiin a mak pawh kan ti hle a ni.

8. A theih dan kawng kawngin Mizo thalai leh naupang te tan tiin Project hrang hrang atanga pawt khawmin Residential Academy din tumin Aizawl FC chuan hma a la a. Kan ram rohlu pakhat tur hi a sawihnawm zawng leh diklo taka Politics-a inbeih nana hman hi Aizawl FC chuan mak a ti a. Party Politics tenawm tak mai ram hmasawnna (Development) chung changah a inrawlh hi Aizawl FC chuan mak a tiin tha lo a ti tak zet a ni.

Sd/-

General Secretary

Aizawl Football Club.