Rangkachak tawlhruk Cheng Vaibelchhe 2.45 man hu chu Aizawl bul Sihphir ah man a ni.

Aizawl | October 21, 2018: Rangkachak tawlhruk tlang 45, Kg 7.482 a rit, Cheng Vaibelchhe 2.45 man hu chu Aizawl bul Sihphir ah man a ni.

Directorate of Revenue Intelligence (DRI), Aizawl Regional Unit leh 46Bn Assam Rifles, Aizawl te chuan an thu dawn bawhzuiin Aizawl atanga Silchar pan Maxi Cab No. AS-24C 1276 chu October 18 zan dar 8:30 vel khan Sihphir ah an lo ti ding a. Maxi Cab chhunga chuang Myanmar lam mi pahnih Thang Thawn Mung (19) leh Do Sian Lang (18) te chu rinhlelh vanga hren ni in an bungruate enfiah a nih hnu ah anmahni hnen atang hian Rangkachak, dan lo anga tawlhruk tlang 45, Kg 7.482 a rit, rampawn atanga lak luh ngei ni a rin chu man a ni. Rangkachak man hlut zawng hi Cheng vaibelchhe 2.45 ni a chhut a ni a, heng rangkachak te hi dan anga man a ni.

Heng mi hren pahnih, Myanmar lam mi te sawi dan chuan rangkachak man te hi Zokhawthar kaltlangin Myanmar atanga a ruka India rama an lakluh a ni a, Guwahati a pekchhawn tur a ni. Rangkachak kengtu te hian dan anga rangkachak lakluh phalna leh kawl phalna an nei lo a, DRI te chuan an mi hren te hi Customs Act, 1962 tlawhchhanin ni 19.10.2018 khan man an ni. He thil thleng hi a chinchhuak hre tura chhui mek a ni.

Tun kum kal lai mek ah hian DRI te hian West Bengal leh Hmarchhak state chhungah hian Bangladesh, Myanmar, Bhutan, Nepal leh China ramte atanga rangkachak tawlhruk Kg 298.173 chuang man, market rate a Cheng Vaibelchhe 90.84 man hu vel an man tawh a ni. Tin, Sorkar kum kalta chhung khan Rangkachak Kg 430, Cheng vaibelchhe 110 chuang man chu DRI te hian an lo man tawh bawk ni.

DRI te hi ramri kan a dan phal loh leh dan lo anga  thil tawlhtuk chi hrang hrang,  Cigarette, rangkachak, drugs, ruihhlo, nungcha, ramhmul, pawisa lem leh dan lo anga sumdawnna che vel te do tu ber an ni.

Mi tu pawh ramri kana thil sual ti tu te leh thil tawlhruk chungchang hria te chuan DRI hnenah report pek theih reng a ni a. Hetianga report pe tu hming leh nihna hi fimkhur thei ang bera thup tlat thin a ni in lawman (reward) tha tak pek an ni thin bawk a ni. He Reward Scheme hrechiang duh chuan he website ah hian en theih a ni http://dri.nic.in/main/reward