EI LEH IN THIANGHLIM MIPUITE ZIRTIRNA SWASTH BHARAT YATRA (EAT RIGHT INDIA) BEIHPUI HAWNG

Aizawl | october 21, 2018: Nimin October ni 20, 2018 (saturday) zing dar 7:00 khan Food Safety and Standard Authority of India (FSSAI) hmalakna in Ei leh in thianghlim neih kawnga mipuite zirtirna 'Swasth Bharat Yatra' beihpui thlak tan a ni.

Nimin zinga Swasth Bharat Yatra bultanna hi Millenium Centre, Parking tual-ah bultan a ni a. He hunah hian event organiser, Meraki India atanga lo kal, FSSAI partner ten hun an kaihruai a. He hmun atang hian 'Swasth Bharat Yatra' pualin zingkarah kawngzawh (Prabhat Pheri-Gandhi Walk)) neih a ni a. Dr.Lalsawma, Joint Director, F&D Admn. chuan kawng zawhte hi a vai liam a. Kawng hi Millenium Centre atanga zawhin Aijal Club-ah luh khawm a ni leh a. Aijal Club-ah hian Ei leh in hrisel neih kawnga inzirtirna leh thutiam sawi rualna hun hman a ni leh a. He hunah hian Khuallian Pu Lalsawma Joint Director, Food & Administration chuan thutawi a sawi a. Hemi hnu hian kalkhawmte fuihna thusawiin Professor KRS Sambasiva Rao, Vice Chancellor, Mizoram University chuan cycle rally neite a vai liam a. Bawngkawn lam panin cycle rally hi neih a ni a. Bawngkawna innghahkhawm a nih hnu-ah zingkar programme hi zawh fel a ni a. Chawhnu lamah khan, Millenium Centre kawtah hun hman a ni leh bawk. He hunah hian Ei leh In hrisel kan neih theih nana kan tih turte inzirtirna hun hman a ni a. Chi, chini, tel leh mawm lam ei tam a hlauhawmzia te, Non-Communicable Disease laka inven dante leh eitur tih thianghlim a tulzia te uar taka in zirtir a ni.

 

He beihpui thlakna hnuaiah hian FSSAI chuan October ni 16,2018 (World Food Day) atang khan India ram state tin hi tract paruka thenin a tuam chhuak a. Track tina feh chhuakte hian an area theuh an tuam zawh hunah January 27, 2019 hian Delhi-ah an intawk khawmin a hmawr an bawk dawn a ni.

Ei leh in thianghlim loh avang te, hriselna atana thianghlimna ngaih pawimawh nachang hriat tawk loh avang tea food borne illness leh natna benvawn dang tam tak kan tawrh thin hi India ram harsatna lian tak a nih avangin heng harsatna te hre rengin sawrkar hmalakna hmasa Ayushman Bharat, Swaach Bharat Mission leh Poshan Abhyian te hrulah 'Eat Right India Movement' hi duan chhuah a lo ni ta a ni. He thilin a tum ber chu Mitin tan ei leh in hrisel, ei leh in thianghlim, chakna pai ngei ei a in te, chaw  paih ral mai mai that lohzia te inzirtir a ni.  He Yatra Team-ah hian Volunteer Cyclist, Eat Righ Mobile Unit leh Mobile Food testing unit te tel vekin awareness a zau thei ang berin pek kual a ni.

Mizoram hi track 6-na ah awmin Health Department ten neitu chan lo changin Pu Lalsawma Pachuau, Joint Director, F&D Admn. hovin hun hman a ni.