DI TAWN A TLAI

Ka thiantha ber pianchiam lawmpuina thilpek kengin an in lam chu ka pan a, ka thlen chuan anlo awm nual tawh, sunday zan a ni a, chhun lama khua a that tehreng nen dar sarih velah chuan nasa mangkheng in ruah chu a rawn sur a, kan bengchheng ri leh thawm nat tehlul nen ruah sur thawm chuan kan bengchheng ri chu a khuh hneh ngei mai, chu tih lai chuan kawngka chu a rawn inhawng rawp a, sitting room kawngka lama thu ka nih a vangin kawngka inhawng ri ah chuan ka hawi thuai a, karei leh..!! Ka pianhnu a ka mipa hmuh tawh ah chuan ala tha ber thawt a ni.

A sam chu a huh hnuang a, a khabe hmul tlem te hnawng chap chu a hui thuak a, a leather jacket hak chu a phelh nghal mawlh mawlh a, karei! A ban len that zia leh taksa inphiar nalh zia chu a awmlen dan a tang chuan hmuh hmaih theih a nilo, tu hmeichhia tehlul hian nge tha tilo ang le? Ka en reng a ni tihreng kalo hre lo, ka thianpa pakhat chuan min lo nghawk zauh a, ka harhchhuak rang kher mai, mahse ka mit laksawn chu thil harsa a ni tlat tawh..

"Manuni hi khawnge?"

Choka lama ka thiannu chu thian dangten an ko a, a rawn phei thuai a, ka thiannu chuan ' E he.. John' engtikah nge ilo thlen a? Kha i huh nasa nih kha, mama room ah khan mama thawmhnaw hak tur a awm ang, hawh ka va inthlak pui ang che' a ti a, chu rawn kalthar pa pawh chuan a zui ve mai a.

Room-a an luh hnu chuan hmeichhe ho zawng zawngin a mah chu mittla dawnin kanlo melh vek a ni tih ka hre chauh a, ka bula thu kan thianpa pakhat chuan 'Lida, i melh nasa lutuk, i mitmu a chhuak palh ange, hrim hrimah heizawng mipa kan awm a, tinge khapa kha in melh vek a?' a rawn ti a, kan boruak kallai tawp ta thut chuan ngai a awh leh tan tawh, mikhual pa pawh chu ka thiannu manuni u thawmhnaw inbel chuan a rawn chhuak a, choka lamah an phei dun a..

Kan ri chelchul a, a then anlo lam bawk. Mahse a hma angin chu piancham lawmna boruak chuan min hneh tawh lo, 'John' chu hming ringawt mai chu ka thinlungah a awm a, a mitmeng thuk taka de sawr leh midang thunun theihna niawm taka ril ruih mai khan ka ngaihtuahna chu a liampui daih a ni.

Kei hmeichhia ah pawh hmeichhe luhlul leh rilru sak tak mai, mipa tamtak lo tituiral ve tawh tu, hmelah phei chuan ka aia tha pawh an awm nameuh e, mahse ka thatna chuan mipa tamtak ka hip hle tih chu ka inhrechiang a, college ka kal lai pawh a kan college mipa te mit la ber ni thin, thla leh maia Pasal nei tawh tur chu chu mikhual chuan min ti tuiral chiang a ni.

Manuni chuan choka lam atang chuan min ko a, ka va phei a, dawhkan bulah chuan thian dangte anlo thu nual a, thlanglam tuk verh kiangah Manuni te chu single chair ah inhmatawn in anlo thudun a, Manuni chuan 'ka thian, chair kha rawn pawt pheila, helamah hian lo thuphei ve rawh, an bengchheng sia, nuam i tilo ang' a ti a. An bulah chuan thuthmun ka rem ve ta, ka thutfel hnu chuan Manuni chuan ' hei hi John-a, u mama thianpa, Chennai a a zirpui thin a nia, mizoramah a awm vak ngailo a, sumdawng hausa na na chu rampawnah a zin kual reng a, inhmelhriat teh u, i chanchin chu kalo hrilh tawh a..' a ti a.

John-a chuan ' i dam maw?' tih leh a kut mi pek chu a rual nghal a.. A kut chu kalo vuan a, a kut ka vawn rual chuan mei a hliau ang mai in ka sa pup pup a, ka chhungril hi a khur ru der der bawk a, hmeichhe inring tawk tak, lai chhe mai mai ngailo kha ka ni ve a sin mawle, mahse tun tuma ka mipa tawn erawh chuan min tilai khawlo zo tak ngialin ka hria.

Ngaihzawng ka nei ngailo pawh a nilo a, mipa tamtak ka hriat tawh te lakah khan hetiang hian ka la awm ngai si lo, ka mit a min en reng chung chuan 'thla lehah maw pasal i neih dawn? Min sawm ve a ngem?' a la ti ta dah a, ka harh chhuak rang kher mai, ka kun a, ni e, kei hian thla leh maiah pasal ka nei dawn a ni. Reilote chhung khan kalo theihnghilh hmin der a.. U makima chuan min hria sela engtin tak mim ngai ang maw?

A zawhna chu 'umh' tih bakin ka chhang thei lo, pasal nei mai turin mipa dang ka melh a ka rilru a ka vei tlat chu ka inthiam theilo, ka ngaihtuahna zawng zawng hmu tlang vek niawm takin ' i pasal tur chu i hmangaih takzet maw? Nangang nula hmeltha tan zawng mipa an tam ang chu tiraw..' a ti a, ka nui suk ringawt a, diktak chuan hepa tehrep hi khawilam mi nge a nih pawh ka hrelo, chu tichung chuan a hma ah ka laichhe zo a, ka nihna ka hloh a. A mi uap a nä in a vawikhat melh ringawt pawhin min tikhur a ni si a, ka hlat a ngai a ni tiin ka thinlung chu ka hrilhru mawlh mawlh a.

Thian dangte chuan min rawn chimbuai tan a.. Ka lawm zaw mah a, mahse midang an rawn tel takah chuan a tawngtam lem lo.

Zan pawh a lo tlai hman tawh hle mai, piancham lawm a lokal an ni bawk a, mize inang lo tak tak kan ni a, a then an rui, a then lah lo nui pherh em em an lo awm bawk, mahse an vaiin an hlim tih chu a hriat theih a.. Ruah pawh a bang tawh bawk a, kan thian thenkhat techu an haw nual a, kei erawh thil sengfel ngai a tam a vangin ka la khawtlai a.

John lah chu haw zai a rel hauh silo, thiante haw fel hnu chuan tihtur awm ang ang chu ka tihpui thuai thuai a, haw turin ka inpeih ta, manuni chuan 'John-an a thlah dawn che a nih chu, ka thian' a chhelo sia, pasal neitur i nih kha hrereng rawh aw' a ti a, ka lungphu chu a inthum rawn tluk tluk ni in ka hria, chu mipa hlauhawm tak, a kut ka vawn ringawt pawh a ka taksa zawng zawng hliau sa thei, A thinrim lai phei chuan eng anga taka hlauhawm ni ang maw?

Pawnah chuan alo ding reng a, manuni chu ka mangtha a, kan inzui ta.. Tu mah tawng hmasak reng tumlo chuan ngawireng in kan kal dun a, chu boruak uap lutuk leh hahthlak lutuk chu ka kham tak zet a ni. thui vaklo kan kalhnu chuan ka dara mi rawn kuah pahin ' in pa chu a vannei hle mai, nang a neitur che hi lawm nachang a hria a ngem le?' tichungin ka lam hawiin a nuisuk a, ava hahthlak em! Ka kawchhung pawh hmu tlang vek thei niawm takin a mitah chuan min ngainep na mitmeng hmu in ka inhria.

A tawp a tawpah chuan kan thleng ta hlawl mai, kawngka a ka pen luh dawn chuan 'min mangtha dawn nange, lawm nachang hrelo' a ti a, nia, mangtha nachang reng reng kalo hrelo chu mawl ka va inti tak em! Hetiang em a ka chet thin ka hre ngai silo a.. Ka hawi let a..

'Hmmm... Mangtha.. Ka lawm e''

A tlai lutuk tawh, a in her a, a kal ta daih a..

Ka ngaihtuahna chu a buai takzet, mipa pahnih ka pasal la nimai tur Umakima leh John, tun maia ka hriat, khawilam mi nge a nìh pawh kala hriatloh chu ka khaikhin a, mahse ka ngaihtuahna chu ka thinlung atanga dahbo ka duh takzet.

A tukzing ka tho chu ka chhahluk in ka hria, zan a ka men rei vang pawh a ni mahna.. ka dawr chu ka thlengphei thuai a, monday a nih a vangin hna ka ngah a, ka buai nghal char char a, zan lama ka men rei avanga ka luhai bur pawh chu theihnghilh hram hram ka duh a, mahse kha mihring maktak kha ka lo ngaihtuah leh veng veng thin.

Dar 8 velah chuan ka nau Ramtei'n chaw min rawn pe a, Ramtei chuan 'U, zingah tlangval pakhat a rawn kal a, i awm silo a, a haw leh nghal a, u, a chhelo rapthlak, tunge i thian a mi?' a ti a, mak ka ti ang reng hle a, tu nge niang aw? Tia ka ngaihtuah lai chuan Ramtei bawk chuan 'U amah chu sang deuh, Palian ve deuh, khabe hmul tlem a nei a,' a ti a, ka hre ta,' khapa bawk kha a ni maw?' Ka tih chuan Ramtei chuan 'tumaw? I thian a mi? U, a va chhelo ve, Mahse Umakima chuan a tluklo deuh in ka hria' a ti a, ka thin a rim in ka sa zak mai.

'Lalramsiam, engtin nge midang nen umakima i tehkhin theih a? Ngawi chipcham rawh'

' Nge? Ka sawidik viau lo a mi? A chhelo e lawm'

'Ngawi rawh ka tih chu, ka velh hma che hian'

'U, Taktkah, ka fiamthu nih kha, u makima techu khawvelah a thaber, eh, i lawm awm e, u' money minlo pai ve, mawh? Pliz...'

Ka purse atang chuan cheng sawm note pahnih ka phawr a ka pe a, a tlem e tia phun nang nang chung chuan a chhuak ta a.

khawvel hi a kal ngai a kalreng a nih chuan thla khat hnu ah chuan Mi nupui ka ni tawh ang a, kumkhat hnu ah phei chuan fa pawh ka nei tawh hial mai thei, Umakima nen hian inngaizawnga innei tur kan nih lemloh a vangin amahah ka rilru hi ala nghet tak tak thei lo, chhungkaw pangngai tak atanga chawrchhuak a ni a, Phaiah lehkha zirin a zir zawh hnu ah amaha dawr hawngin sum pawh a lalut hnem ve reng a, tlangval lehkhathiam, hmeichhe ngaihsak em em lo, mahni a inchawmzo na na chu reitak inkawmlo mahila Pasal atan ka iai bik lo, a hmachuan kan inhre ngai biklo a, ka dawr(Lida's Bloom) piah lawkah hian Musical Instument leh Sound system dawr lianfe a enkawl a, nitin lane khat a dawr nghak nana chu kan inkawm chho ta thuai a, min duh thu pawh a sawi fo a, kei lah kalo naupang zawk zawk tawhlo bawk nen ngaihzawng duh em em kanei chuang lem lo a, palai te rawn tirin inneih chu kan tintuah ta a ni.

Nia, khapa hmelhriat loh vanga min hmangaih em em tu Makima ka theihngilh thei kha ka tidik lo a ni.

Ka dawr ah hian Pangpar chauh nilo Gift item chihrang hrang ka zawrh tel a vang nge ka lun ve phian a, mawi taka rem leh tihfai reng a ngaih avangin ka buaive thin khawp mai, monday ah phei hi chuan ka buai zual em em a, chumi ni pawh chu chau hnap in ka thleng a.

Zanah Umakima a lo leng a, hmalam hun tamtak kan sawidun a, diktak chuan Umakima zawng tlangval fel tak ni mahse ka hmangaih loh avangin ngaina hle mahila amahah hian kala beinghet taktak theilo a ni. Midang muthnu chuan kan pahnih chauhin ka thudun a, 'Bawihi, i va hlimlo ve? Min hmangaih lo tih chu ka hria alawm, mahse thla thar maia innei tur kan ni tawh a, min ring rawh, hlim takin ka siam ang che' a ti a.

'Ka hlim alawm, ka hlim lutuk, nupui thatak nih ka tum ang'

'mahse i rilru chhungril takah i hlimlo tih ka hria alawm, a nih leh, khawnge kan bazar ang? Inneih kawr leh neuh neuh vel pawh engmah kan la lei silo a'

'Hmun danga han Bazar kual vak pawh a ngai em ni? Hetah pawh nalh takin an thui thiam tawh a, mahse Gown chu hawh mai ila, evening Gown erawh order a ngai ang, manuni pawh kanla rawn ang chu'

' A nih chuan manuni nen chuan lo inrawn ula i thutlukna chu min hrilh leh dawn nia, Pawisa lam chu buaina a awmlo a nia, ka duhtak neitur ka nia, reitak ka inkhawl ve tawh a, i tan vek a nia aw'

Thu ho te te eng eng emaw kan sawi dun a, min tih lungawi dan a thiam in a bula awm erawh a hreawm lutuk dawnlo tih chu hrilh nawn hranpa ka ngai lem lo.

Karkhat zet a liam ta, inneih kawr leh mamawh eng eng emaw ngaihven kan duh avangin dawr chu ka khar a, Manuni nen Umakima kan sawm phei a, kan Pathum chuan David's Bride (wedding gown an zawrhna dawr) ah chuan kan lut a, Nikhat lek hak tur a nih vangin pawisa tamtak seng a lei aichuan manchawi a hawh kan duhzawk a vangin order lo kan nia, manuni chuan Purple rawng a thlang a, ka hak duh chi leh nalh tih bik ka neih loh avangin dawrdangah ka lut kual zel a, a hnu ah chuan ka duhzawng tak ka hmu ve ta a, a dawn hnai a lak a tan kan chhuahsan leh ta. evening gown tur erawh puanthui dawrah rawng inang kan thui tir a, hawdawn hnaih chuan Restaurant ah kan chawl a.

Kan inhnawh puar zawh hnu dawr atanga kan chhuahdawn hnai chuan Pawnlam ah Car dum tle zar mai a rawn inhung a, Car atang chuan Karkhat liamta a manuni te ina ka mipa tawn maktak kha speck dum vuah in a rawn chhuak ta zan zan mai, kawngkhar lehlam chu a va hawng a, nula nalh tak Jeans kekawr dum leh T-shirt chung a coat dum ha in a rawn chhuak zan bawk a, ka chhungril chu a khur leh ta dar dar mai, ka kiangah ka pasal hual awmreng chung chuan chu mipa maktak chuan engtin emaw min khawìh leh tlat, a hmeichhe hruai chu A nupui emaw a bialnu emaw a ni ngei ang, a va vannei em! Chu hmeichhia chu thikna in ka khat a, ka lo en ngun lutuk a ni chek ang chu ka malah manuni chuan min rawn sik a, ka ngaihtuahna atang chuan ka harhchhuak rang kher mai, 'Chhuak ang u, tihtur kan la neih kha' tìh leh thawh a rual nghal a, Umakima pawh chuan 'Nia, Ornaments pawh en inla duh a nilawm ni' a tia, a tho ve nghal a, manager thutna lamah bill peturin a phei a, manuni nen chuan kan chhuak a, dawr kawngka kan kän fel awr tih ah chuan John-a te nen chuan kanin tawk ta,

'Manun, Enge in tih a?'

'Oh, John, hei ka thiani te ka bazar pui a, ila haw nange?'

'La haw lo, engmah ka rawn hrilh leh talo che u a, company lamin hna min rawn pek belh a, kala awm ta reng a nih hi, kan branch hrang hrang ka tlawh kual a, tum loh deuhin thla hnih vel chu ka cham ka ring, in in lamah pawh kala rawnin sawn mai thei, ka awmdan tur hi hriat theih pawh a ni lo'

' Chutianga i cham dawn chuan hmun danga inghah a ngai hleinem, Mama pawh karleh ah a rawn haw dawn a ni awm e, network awmlohna a awm tih takah chanchin kan hre zung zung thei lo a'

'Nih takchu male, ni e, kala awm a nih leh ka rawn pan ang che u, Kha, Lida-i chu i dam maw?'

'Umh dam e, i dam zawk maw?'

'Dam a nih hi, i hmel pawh a that ngai in a la thareng e'

A hmeichhe kalpui chuan a banah rawn vuanin 'John, Lut ila' tih pah chuan duh hmel takin a lo melh a, john-a chuan ' Manun, kan luhsan phawt ang che, kan la inhmu leh ang chu, ka la cham chuan Lan-a(manuni u) pawh a ngaihawm a, ka la rawn tlawh ang che u, tirawh Jane lut ang' a ti a, induhtawn taka inkaiin Restaurant ah chuan an lut ta a,

Umakima chu kan bulah a lo ding reng tawh ni in kalo hre reng reng lo, Car ah lut in keini pawh kan tlanliam ta a, mahse kan chhuah hma a ziah fel loh ka neih avang leh Bank lama tlaiah kal ka la duh a vang in dawr chu ka hawng leh a, Manuni leh Umakima pawh chu reilo te an thu a, min hawsan ta.

Dawhkana thil ka ziah mawlh mawlh lai chuan pawnlamah motor inhung ri dat thawm ka hri a, mahse customer ka ngah ve thin a vangin customer niturah ka ngai a, ka hawichhuak lem lo, mahse reilote hnu ah chuan mipa ruangam lian tak hi ka hma ah rawn ding in ' kha i va ziak nasa mawlh mawlh ve?' a rawn ti a.

'k.. K..ka.. Nia, nang maw?'

' Huh... Oh, keimah, tinge mak i va tih hmel ve a?'

kan mit leh mit intawng chu meilinga deh ang mai in ka sa chhuak leh ta pup pup a..

' Mak tih maw? Enge i duh?'

' Nangmah.. Ka duh chu nangmah mawle'

' Maw? Kei mah hi maw? I tawngsual em ni?'

' I hre sual zawk em ni? Lo ngaithla rawh aw.. Lida's Bloom neitu nula hmeltha tak hi ka duh a ni'

' Enge i sawi awmzia? Ka hrethiam pha hauhlo,i duhzawng ka neih em han enkual la..

Ka laichhe zo takngial dawn a ka hriat a vangin Jug a tui ka thli a, ka lem khawlh khawlh a, mahse awmzia a nei hran lo..

'Ka duhzawng chu nei meuh e, tuna ka biak mek nula hi ka duh chu a ni, mahse thu turin pawhin minla sawm hauh lo lehnghal, Lalpa leh, he nula Polite lo lutuk hi..'

ka lai lutukin thurawh tih nachang ka lo hre hauh lo a lo nia, rang zetin chair chu alamah ka nawr phei a, 'Thu ta che, chuan engtin nge ka dawr i hriat a?'ka ti a.

'Engtinnge ka hriat maw? Ka lu ah hian i thluak aia tam thluak a awm a, a bak chu i hriathiam tawh ka ring'

A hahthlak a ni, customer dang lo kalse tiin pawnlam chu ka melh chhen a, mahse a reh tlawk tlawk mai si, ka rilru hria ni awm takin ' tlanchhiatna tur i zawng em ni? Nge min hlau zawk? Tlan pawh nila i aiin ka tlanchak mai thei a nia' a ti ta deuh deuh a.

Ka huaisenna zawng zawng sawmkhawmin a mita enchung chuan ' Enge i duh le? Hei ka buai a, tihtur tamtak ka nei a, i sawi duh chu sawi la, min chhuahsan rawh' ka ti ta a.. Mahse a mitmeng de sar chu nuihzatna mitmeng in a thlak a, ka kut rawn vuanin ' i ti tak tak lo, min bum theilo ang' a ti a.

' Bum che maw? Bum che a ngaihna ka hre hauhlo, min chhuahsan rawh'

' i mitmengah khan i thusawi chu i ti tak tak lo tih ka hria a nia'

' A nih leh tunge i nula hruai kha?'

chu thu chu zawt tur ka nilo. Mahse hriat chakna in ka khat a, ka insum hman lo a ni.

A nui huk a..' kha maw ka tihreng kha.. Hmeichhia hi zawng inlo in ang vek a nih hi.. Kha hmeichhe nalh tak kha ka bialnu a nih kha..'

chemtea vih ang maiin ka thinlung chu a na in ka hria, mahse zawhloh tur ka zawh avanga a mi hmuhsitna mitmeng leh min nuihzat tih hriat ngawih ngawi a hmel pa hram mai chu ka en reng ringawt a.eng ka ti zo ta nge ka inhre hek lo.

' Pasal nei suh'

' engvangin? Pasal neilo tura thu mipe turin tunge i nih a?'

'Tunge ka nih maw? I hre duh tak tak maw? Nula hmeltha tak, pasak nei mai turin a thinlung a a vei em em tlangval satliah ve mai ka ni. Chiang em?'

' Min chhuahsan rawh, ka hua che'

' Huh,... Ka ring reng a, mahse dawt ka sawi lo tiraw.. Kha i ngaihtuahna ah khan ka awm a nilawm ni?'

' A tawk e, kawngka awmna lam kawhhmuh kher i ngaih ka ringlo, min tibuai tawk tawh e'

' Nangmah kha inbum suh, ila neilo a, inneihna chu i la thulh thei a nia, Pasal nei suh.'

chu tih laitak chuan ka 'phone a rawn ri ral ral a, ka lawm ngei mai,ka nu a lo ni a, nepnawi leitur min rawn hrilh a lo ni. Mihringa chu ala chhuak duh chuang reng reng lo.

Phone ka dah hnu chuan ngawireng in ka thu a, ' Hei hi ka card' tih leh dawhkana lehkha tereuhte dah chu a rual a, lehkha chu ka la a, bawlhlawh bawmah ka thlak ta daih a,

' A nihchuan ka kal ang nge, mahse fiamthu ka rawn thawh hauhlo a nia, a ti a, a chhuak ta.

A chhuahnu chuan ka inngaihtuah nasa ngei mai, khapa tehhrep khan engtin nge a hriat theih? Mahse a sawidik a ni.. Umakima zawng ka hmangaih lo miau a ni. Engvanga neih kha lo duhta kher kher nge ka nih le? Mahse chu ngaihtuahna chu dahbo thuai ka duh a, Umakima hian min hmangaih a lawm, engvanga mi nupui hual ni chung a mipa dang ngaihtuah fo nge ka nih? Pasal ka nei ang a, ka la hlim dawn a lawm..

Ziahfel tur chu ka ziak leh ta mawlh mawlh a, ka ziah zawh meuh chuan Ka sana dar zat kawktu chuan Darhnih a kawk ta va mai, customer ka neilemlo bawk a, dawr chu ka khar thuai a, taxi ka la a, Bank lam ka pan ta a..

Manager room ka va luh chuan.. Karei leh! Khapa bawk kha...

Kawngka ka pelin inchhunglam chhuat ka rap hman tawh si, chhuahleh a mawi chiahin ka hre silo a, ka lut ta nge nge a,

Mahse Mihringa chuan nuamlo ka tih a hlau a ni ngei ang, a tho hluai a, manager nen chuan engemaw an sawi su su a, a chhuak ta, a chhuahdawn a kan insulpel laitak chuan a mitmeng tihbai awm tak chuan hmuhsitna leh elsenna nen tel ngeiin min rawn melh a, mahse ka pawisa lo lui ve tlat, ka kal a, a thutna hnu ah chuan kava thu a, awm erawh ka awmrei lo, ka tihtur ka tihfel hnu chuan lungawi zel in chu room chu ka chhuahsan a..

Ka chhuak a, coridor atanga kawngpui lam ka hawithak chuan kawngsir a car dum nghenga lo ding reng chu Amah bawk a ni tih ka hre vat a, nghah nei niawm taka ding a nih avangin tunge a nghah ang aw? Tiin ka ngaihtuah neuh neuh a, kawngpui chu ka thlengthla thuai a, hmulo ang taka kal liam tumin ka kaltumna lam hawiin ka inher vat a, mahse ka hlawhchham chiang khawp mai, ka banah kut liantakin rawn manin a car kawngkhar chu a hawng a, car chhungah chuan min nawr lut a, a ni pawh a rawn thulut ve nghal a..

A ngaihna ka hrelo hle, ka hamhaihin tawng nachang pawh ka hre heklo, engmah sawilo in car chu a start a, kan tlan chu a ni ta der mai, he tih lai hi chuan mi tuemaw in min hmu se chuan mak ti in mi ä ah min ngai ngei ang.

' khawnge min hruai i tum a?'

' Hla takah..'

' Engvanga hetianga min ti nge i nih?'

' kei hian ka duh che a vangin'

' Enteh, thianpa, nula pangngai ka nilo a, zankhat min thlah avang mai khan i duh duh a pawh her theihah min ngai a nimaw?, car hi tiding rawh,'

' Ringlo e, mahse ka duhna ka tihlawhtling mai a ni'

' Mi nupui hual ka ni tih i hria a, i thiltih pawi zia hi i hria em?'

' Hria. Mahse engkim ka ngaihtuah fel vek tawh, ka thil duh chu ka nei ngei ngei thin tih erawh i hriat ve a ngai'

' chuan inkhualtelemna nautelem ah min ngai a ni maw?'

ka thinrimna chu a sosang tawh lutuk, hepa hian engvanga hlimthla anga maia min zui tlat nge a nih? Mipa, pahrak leh inringtawk tak, ngaihdan tlangtaka kalpui mi, midang pawisakna tlachham tak, a thinrim a ramsa anga che thin, ka huatna chuan a lamah min hipbet tlat niin ka hria,

ka ngawihreng takah chuan a rawn hawi a, lungawi hmel tak hian min rawn melh a..a mitmengah chuan engmah hmuhtur a awmlo, mihringin Sava no a man a, lungawi taka a thlir hi angber in ka hria..

' I phone Off rawh,'

' Engvang chuan maw'

' I bula ka awmlaia midang i biak ka remti lo'

mahse ka of duhchuanglo a, a thu ka zawm a tulna ka hre hek lo,

kan tlan zel a, khawiah tak min kalpui dawn chu nimaw tia ka ngaihtuah lai chuan Forest Rest House kawtah car chu a ding a, kawngkhar a hawng a, ka banah nghet taka chelh in min luhpui ta a,

A room chu a lian lemlo na a, mahse a faiin a nuam ang reng hle, tukverh puanzar chu a a zartha a, thutna chang pawh ka hrelo, mahse ka banah bawk chuan min kai a, single chair pakhatah chuan min nemthu ta hnawk a..

' Ngun takin ka thusawi hi ngai thla ang che.. Ka chetdan hi a mawilo tih ka hria, mahse ka tih a ngai tlat si a, nangpawhin min duh tih ka hriat avangin i lakah hian ka ngampa a ni.'

' Duh che maw, nuihzatthlak in...'

' i nuih zatloh tawp kha..min duh tih i mitmengah hmu lo ila chuan hetiang hian i lakah ka huangtau hauhlo ang, khami zan Manuni te ina ka hmuh atang che khan min duh tih ka hrechiang a ni. Mahse Pasal hual neilai ini a, tihbuai che ka tum hauhlo, i mit a it taka min thlir khan ka ngaihtuahna erawh i tibuai a, hmeichhe rilru lian tak i nih a vangin langsar takin min duhna i tilang lo mai a ni. Mi nupui hual ilo ni lehzel bawk si a'

'Tichuan chumi ngaithla tur chuan hetah min hruai a maw?' ka kal tawh ang e, i sawi zo tawh bawk a..

' hetah hian i rilru thlaktir tur che in ka hruai che a nih hi., chuan kala sawi zolo bawk..'

' Thianpa.. I hresual a niang, ka rilru chu i thlak theih ka ringlo.. Mi nupui tur ka ni tlat..'

' Ngawiteh, Thianpa chu ka hming a nilo, John tiin min ko thei ang'

' A nihchuan John, i sawi duh chu ka hrethiam e, i chetdan mawilo tak hi engtin nge ka ngaih i hre duh em? Hmeichhe tello a khawsa theilo, hmeichhe mamawhna a khat mipa... Ka..'

' A tawk a tawk.. Ka hria, i ngaìhdan tur chu ka hria, mahse vawikhatmah 'ka duhlo che' tih tawngkam ila chhakchhuak lo hi engtia phatmar nge i tum ve le? Chuchuan min duh tih chu a nemnghet a a ni lawm ni?'

'Umh' tlangtakin ka hrilh ang che, mahse i duhang chu a thleng dawnlo tih chu hria la, mipa pa tak mai, luhlul leh rilru khawng tak i ni, ka mipa duhzawng tak chu i ni alawm, mahse chuchuan ka pasal neihtur a tidanglam theilo'

Chu mi ka sawilai lai chuan ka mitah ngun takin min en a, ka kawchhung nenlam hmuh tlang vek tum niawm a mawi a ni.

Keimah ngeiin ka duh thu ka'n sawi chu lawmhmel put a hnekin min nuihzat dawn dawn emaw ni ka tihial a.. A mitmeng desar thin chuan hla tak a melh a..

' I pasal hual chuan hria se engtin tak ngai ang che maw? Huh.. Hmeichhe maktak chu i ni..'

Chu thu chuan min tizak ngei mai.. Mahse...

A mi nuihzat hmel leh a thusawi chuan min tina takzet a, mahse nuihzat tawklek turin ka duhna ka tilang hman tawh si.. Ni e, a tan chuan nuizat leh hmuhsit tawklek ka ni ngei ang, Pasal nei mai turin Hmelhriatloh mipa ka han duh em em chu eng ang hmeichhia nge maw ka lo nih reng reng le?

Ngawirengin tukverh lam chu a thlir a, a ngaihtuahna chu hlataka awm ang mai ni in ka hria, ' ka kaltawh ang e' ti in ka bag ka la a, chhuah ka tum ta a. Mahse ka banah nghet taka min chelhin min kuaiher lawp a, ka inrin hma hauh in ka hmuiah min rawn fawp ta.(hahai, ka zak)

Talchhuah mai ka tum a, mahse ka chhia leh tha hriatna chu ka thinlungin a phat si, a mi fawh danah chuan hremna min pe in phuba la ang mai in na tak leh duhthawh takin min fawp a, mahse ka hnar thei silo, ngawi renga awmreng thei ka nilo, ka ti tur a nilo ti a mahni inhrilh mawlh mawlh chung chuan duhthawh takin ka a fawhna chu kalo chhang let a..

Reitak lo inup tawh, hmangaihna a tuihal em em leh keimah a duhna nasa tak chu upbo theih a ni tawhlo, chutia ka fawhlet takah chuan thinrim leh huatna nena min fawp tawh loin duat tak leh insum hauhlo in min fawp mawlh mawlh a, a tu a mah chu kan inthlah thei dawn tawhlo emaw ka ti hman hial, mahse ka bag a ka phöne chu a lo ri val val a. Chu phone ri chuan hmangaihna tuipui thuktak atang chuan min kaiharh chiang kher mai.. Umakima a lo ni a..

'Bawihi, khawnge i awm?

' Oh, kalo haw mek'

' Dawr i khar tawh sia, Bank ah chuan i kalta em?'

' Umh, kal e, hei thiante ka tlawh kawi lawk a,enge nita?'

' Eng nilo e, ka chhuak a, dawr i khar tawh sia, ka msg i chhang silo a, nih aw.. Lo haw thuai la.. Bye..'

Buaina, buaina. Duhthlan tur ka neilo, ka hma a ngwirenga min entu mipa nalh leh pa hraih mai chuan zawhna nei niawm takin min en a, a mitmu hring nghalh leh a awmpharh hlaitak te, a samdum tle sar, a biang leh khabe a hmul tlem tlem awm te chu a nalh in hmuh a nuam takzet.. Mahse duhthlang thei ka nitawh si lo.

'Tichuan i kal mai ang maw? A ni kalsana kei kei min thlang turin duhthlanna i nei a nia.'

' Mahse a tlai tawh'

' A theih tawh lo'

' A nih nichin a min fawhlai kha chuan khatiang rilru i put loh kha, i thinlungah keimah chauh ka awm a ni lawm ni?'

' John, i hrethiamlo a ni, Umakima hi ka kalsan theilo, a theihloh a ni, mangtha.'

ka chhuak a, khapa kha i hmu leh tawh tur a nilo, mi hlauhawm a ni, zuahthen awmhauhlo in i ngaihtuahna tenen lam a eizo thei che, i hlat tur a ni tiin keimah chu ka inhrilh ru mawlh mawlh a, ni e, a mah hlat thei angber a awm chu ka tihtur a ni. Mualpho ka hlau lo a nih loh chuan..

Darkar kha em pawh ala ral lo, ka hnunga Motor tlan chu hawilet in ka en a, Amah bawk alo ni, ka bul a lo thlen chuan Car kawngkhar chu hawngin'lo lut rawh, ka thlah ang che' a ti a, duhlo mahila mi pawtlut dawn tih ka hriat avangin ka thu lut ta nge nge a,

Duh aiin kan inhnaih mahmah a ni.. A after shave rim chu a tui kher mai, kamis ha tawhlo in T-shirt dum nalh zet a ha a, a Jeans kekawr hak chu a inhmehin a bawp sei tak chu a tilangsar zual a, speck dum a vuah bawk a.. A hma a ka awm ang chiahkhan keimaha feel nasa tak chu alo thawk leh tan ta.. Ka lam lo hawiin 'khatia min enreng chuan i duhloh thil a ka thlentir palh ang e, kawngah mi kal an awmloh a, a fianrial viau a nia' a rawn ti a, ni e, ka en nasa a ni. Ka mit chu la sawn thuaiin hmalam chu ka thlir a, hepa zet hizawng a kiang hnaiha awm pawhin ka tuiral thei takngial dawn ni in ka hria..

Kan in peng thleng min thlah a, Car atanga ka chhuah chuan 'ka lawm e' tipah in car kawngkhar chu ka khar thuai a, ' inhmu tawhlo ang, ka tizui bawk a, mahse engmah sawilo in a nuisuk ringawt a, a tlan liam ta.

Zanah chuan ka room ah Ulbum hlui ka en mai mai a, mahse ka thil en ah chuan rilru ka pe thei lo, kha pa bawk kha alo lang leh thin a, ka duh tih chu ka pha hauhlo, mahse ka hmangaih em ni ang? Hmangaih tur chuan a la hma mah mah a ni, mahse tinge a nikhan ka vei tlat si, a tunhma hun leh nundan engmah hriat ka nei lo a, hmeichhe engzat tak nge khatianga a lo fawh tawh ang? Jane-i, Nula piannalh leh hmeltha tak kha.. A bialnu a nia, chu ngaihtuahna chuan chemtea vih angmai in min tina a ni.. Kha hmeichhia khan a khum a tawmpui tawh hial maithei a sin, induh tawn taka Restaurant kawt a anin kai tekha ka mitthla ah chuan a rawn lang uar uar a.. Mahse engvanga bialnu nei si in khatianga min fawp nge a nih, thil engkim ka ngaihtuah let chuan duh aiin thil a kalthui mah mah a ni. Fawp let tur ka nilo tih hrerengin ka fawp a, min nuihzat hle ang chu.. Mahse a thleng miau si..

Ni chu a chhuak a, a liam leh a, ka nitin nundan pangngai in dawr nghah chu ka chhunzawm a, thawhlehni a ni a, mi reh lai takin dawr chhungchu ka tifai a, bawlhhlawh paih tum a dustbin ka la chu Johna card min pek kha alo let bal a, chu lehkha chu ka la a, ka bag ah ka khung ta daih a, Oh! Hepa tak hi chu, Makima nilo in hepa hi ka pasal tur nita zawk se...

Chu ngaihtuahna ringawt pawh chu a thianghlimlo tih ka hria, engpawh ngaihtuah ila John michimawma ah chuan a tawp vek a, engthilin nge kha mi hringa kha ka ngaihtuahna atanga labo thei ang le?

Makima nen pawh chuan duh anga tam kan inhmu thei meuhlo, dawrah a buaiin account chinfel ngai a tam a, keilah chuti bawk, kan inneihni thlenhma ngei a tihtur tulzual tih fel a, honey moon hmanga zinchhuah kan duhna chuan hna tul a titam a.. Mahse chenai a ka nau lehkhazir pawh inneih hmang turin alo thleng a, Mafela chuan dawr min nghah chhawk thin a.. A thawven thlak viau na in in lamah kala buai tho mai..

Ngaihtuahloh hram hram ka duh em em a, ka thiltihlai chuan ka rilru a luahthei lo, keimah chauhin ka awm a, Book shelf a lehkhabu ka remthat lai chuan pawnah Motor a rawnin hung ri dawt a, Door bell ri in a zui nghak bawk a, 'lo lut rawh' tia ka chhawn chuan kawngkhar hawnga lo ding chuan min tiphu kher mai, Nalh taka incheiin John-a chu a rawn penlut a, a kamis hak leh a vun, hanglam sen uk khak chu a va inchawih tehlul em! A sam dum tle sar chu uluk taka enkawl tih a hriat hle a, a hmulmeh fai hlim tih hriat tak chuan a hmel chu a ti tharlam sawt bawk a, kalo en reng ringawt a nih chu.

' Thu turin min sawm dawn nange? Polite lo leh lutuk' a ti sup a.

' Engvanga heta rawn kal nge i nih? Ka hmu duh tawhlo che ka tih kha'

' ka hria, sawi dun tur kan nei'

Nangnen hian engmah sawitur kan nei lo'

' A tawk, min zui dawn nge ka pawtchhuak dawn che'

' A enga mah mah, vawikhat mi fawh kha duhtawk....

Ka sawitum ka sawi zawh hma chuan dawhtheilo zetin ka lam a rawn pan a, min chawi nawlh a, pawnah min chhuahpui ta.. A ke in kawngkhar a tlawh khar a, Car ah chuan min chawilut daih a, a ngaihna hrelo chuan ka hawi ha ringawt mai, ka tlanchhuah hlau niawm takin ka kut chu a vuan tlat a, a kut lehlam chuan motor chu a khalh a, hepa dawhtheihna neihloh zia leh hmasialna a khat a nih zia chu.. Nu leh pa eng ang tak nei ang maw? Chhungte a nei a ngem? Khawi hmuna seilian nge a nih ang? Tinge hetiang em em a a hma a sial le?

Khawiah tak min kalpui dawn chu nimaw tia ka ngaìhtuah reng lai chuan khawpawn kanlo thleng der tawh, motor kawngpui atanga penna YMA view kan tih mai khawthlirna an siam lam chu min pan pui a, motor a kalthlen theihloh a vangin foot path thui vak lo kal a ngai a, he hmun te hi engtia hre zel nge a nih ka hre pha lo.

Ngawi rengin chawlhbukah chuan kan thu a, a hmel chu lungawilohna a khat, A saseh an laksak avanga sakeibaknei riltam thinur pawh a ang hial ta ve ang..chu tia ngawirenga awm ta chu dawhtheih loh zetin ' Engtia awm nge i tum le?' a rawn ti a..

' John, i hrethiamlo der nge? I mawl vang zawk? Pasal ka nei dawn tih i hria a ni lawm ni?'

' I hmangaihloh chu i nei ang maw? Engvanga mahni in phat tlat nge i nih? Engvanga neihduh tlat nge i nih a?'

tawng lo in thlanglam ka thlir san a, engpawh sawi ila hepa hi a beidawng dawnlo tih ka hria, hnial buai emaw a sawt dawn lo, ngawih ka chuh ta zawk a,

mahse ram deuh hmak leh vawt ruihin ' eng vangin nge neih i duh kher? Min chhang rawh' a rawn ti leh a,

' A chhan chu maw.. Mi rintlak leh tlangval fel a ni a, Pasal a tana rintlak a ni, chuan Sum a ngah a, ka rethei dawn hek lo' ka'n ti ve salh a.

' Sum a? A neihlet aia tam nei ta ila i kalsan thei ang chu tiraw'

' Eng vangin nge ka kalsan ang? Ka hmangaih a lawm, ka hmangaih avangin ka nei dawn a ni.. I hnena ka thu sawi tawh kha thudik engmh a awmlo'

ka thusawi chu engtin nge a lo dawnsawn hriat tumin a hmel chu ka en reng a. Mahse engmah hmuh tur a awmlo,

' A tha e.. Hmeichhe dangdai tak ilo ni, sawitur a awm tawh lo' tih leh motor lam pana kal chu a rual a, a chet dan thut thut chuan awmdan tur pawh min hriat tir lo, kei pawh chuan muangchuangin ka zui hnak hnak a..

Car ah chuan kan thulut ve ve a, kan tlan mai dawn emaw ka ti a, mahse milim che theilo ang mai in a hmalam chu a thlir a, engmah sawilo a nghah chu ka tihtheih awmchhun a ni si.. Chu tia kan thu reng chu ka lamah rawnawn phei in a ban tha chaktak chuan min kuai her lawp a. Ka mitah phuba lakna niawm taka mi melh run chung chuan min fawp ta..

A kut a mi deh ringawt pawhin ka mur chuai chuai a ni a, duhthawh taka min fawh phei chuan ka keler atanga ka chhip thleng in ka za mer mer a, tangtur ka awm tawh lo, inlak hran a hnekin ka tisa phurna chuan a mah hnaih chakna min pe a, a nghawngah kuahin a duh tawka a fawh atan ka lo dawh rem a, keipawh chuan duhthawh takin ka lo fawp let bawk a..

Chu tah zet zawng ka zak hnuai lam atang chuan ka kawr chhanah ka pang leh hnung vel chu a dag diar diar a, ka rei leh! Ka tuiral zo takngial dawn.. Engmah ngaihtuah ka duh lo, chu induhtawnna, kan pahniha kan neih chu engmahin a dang zo lo.. A kut chuan ka kawrawm kilhna chu phelh tumin a khawih pah niap niap a, a duhdan ang anga awm tur chuan ka inpe ta...

Chutia duhthawh taka chet a lak lai chuan kawngah chuan khualzin motor a lo tlan a, motor tlan thawm chuan ngaihtuahna thuktak atang chuan min tihar chiang hle mai.. Ka inla hrang thuai a, a nipawh chu thil hrechhuak thut ang hrimin a tawp chawt a, ka thu tha a, ka sam hnawk niai chu ka tuai mam mawlh mawlh a, dawhtheihloh hmel zet a rum nghutin 'hrep tak chuan leh' a ti ram hmuk a.. Ka lam rawn hawiin ' nula, pasal hual neilai in mipa dang bula khatiang a a chet khan a pasal hualin hria se engtin nge a ngaih ang le?, tuna ka thil hmuh, i duhna leh min mamawh na nasa tak kha engnge ni ngai? Motor kha rawn tlan lose engthil pawh i chungah ka tithei a sin' a ti leh a, a sawi dik a ni. Tun maiah kha chuan hmeichhe diktak niin ka duhna nasa tak chu thupbo a hnekin ka lantir a, amah hlat tur ka nih laiin ka mamawhna nasa lutuk chu ka hnehthei silo.

Motor chu a tinung a, engmah sawichhunzawm tawhlo in kan tlan ta par par a..

Kan inneihna chu nihnih chauhin a dangta, gown leh thil tul dang lam tura manuni nen ka chhuak chu kan hlim ang reng hle a, mahse chutia thawveng taka kan kal lai chuan John-a car ngei mai chuan min rawn pel phei a, kan hmalama concreate building chhawng sang zet tualah chuan dingin a kawngkhar lehlam chu a hawng a, gown kan thuitir ni a a nula rawn hruai jane-i ngei mai kha nalh mangkheng a incheiin a rawn chhuak ta, john-a chuan a kutah a rawn chelh vata, jane-i chu a nalhin ka tluklo hle in ka hria, a sam coffee rawng, sen uk khak ngil siau chuan a tilang naupangin a duhawm ngei mai, kut invuan chunga chu inlian zel lam pana an kal chu ka thlirzui vawng vawng a..

Manuni chuan ka thinlung ngaihtuahna min hriatpui hauhlo in ' ka thian, nangzawng i vannei e, makima hi a fel sia, in innei mah anga, ila hlim ngawt ang, sum lah harsatna a awm dawn silo' alo ti charh charh a, ka rilru diktak hria se engtin tak ngai ang maw? Mahse hrilh ka tum hauh lo.. Chu a chhapah johna'n bialnu a nei a, chu tih laia lo hmangaihtu nih chu tlawm thlak riau in ka hria a ni.

Ni chu a ral a, kan inneih dawn ni chuan kan buai nak nak hle mai.. Zan lamah man inhlan te a ngaih dawn avangin manuni pawh chu zing atangin a rawnin sawn phei a, ka room ah chuan ka lut a, diktak chuan a hun a hnai tial tial a Makima ka thlakhlelh lohna pawh a nasa tulh tulh ni in ka hria, Engvanga pasal neih lo duh ta kher nge ka nih le? Natuk atang chuan ka zalenna chu laksakin ka awm a, mi inchhungah mo niin Makima tan nupui thatak nih ka zir a ngai a, ka ti hlim zo angem? Ka thinlung a midang ngaihtuah reng chunga ka pasal tih hlim chu a har ngawt ta ve ang le.

Engpawh nise thil nitawh chu siamthat theih leh tih danglam theih a nilo, mahse Makima ka neihma in Johna chu hmuh leh ka duh takzet.. Chumi tih hlawhtlin erawh a harsa khawp ang, a thlenna Rest house lah kan veng atanga hlatak a ni si, mahse ka hun tha neih chu bawhpelh ka tum hauhlo,

Zan chu a lo thleng a, Manuni chu chhuahpuiah ka sawm a, engmah chu ka hrilh duh lemlo.. Enge kan tih dawna? Tia min zawh chuan 'ka nulatna vuiliam turin kan chhuak a nih hi, kan reilo ang' ka ti ringawt a, mak a tih hmel hle in ka hria, thui fe kan kal hnu chuan Taxi ruak a lo tlan a, kalo phar ding vat a, Taxi chuan Rest house lam kan pan ta..

Rest house kawt kan thlen chuan Manuni chu Taxi a minlo nghak tur leh hmun danga lo kalsawn miahlo turin ka hril a, mak ti viau mahse engmah min zawt buai hran lo.

Rest house lam chu ka pan a, mahse a lo inkalh thap a, a reh tlawk tlawk bawk a, chu House enkawk tute chenna hmun chu ahla lo bawk a, ka va kal chuan Tv enin anlo la meng a, kawngka ka kik a, ka luh chuan chutiang zai tlai tawh angreng taka hmeichhia mahni chauh a ka kal chu mak an tih hmel hle in ka hria, engdang sawilo chuan 'Room number 3 luahtu tlangval kha a la awm em?' tiin ka zawt ta phawng mai..

Enkawl tunu chuan 'Johna maw i tih? Vawiin tlai khan Aizawl lam panin a chhuak daih a lawm, enge pawimawh viau em ni?' a ti a, ka bing chuk chukin ka hria, ' pawimawh a ni mai ang chu, a nih leh Nula pakhat, sam senuk lampang kha a hetah arawn hruai thin em?' ti in ka zawt zui a, enkawl tunu chuan 'Chutianga hmeichhia a rawn hruaiawm reng reng ka lo hre lo a, mahse kan hnungkar hmasa kha nita in ka hria, Nula pakhat bag dumpawl lam ak arawn hruai e' an tia, keimah phei chuan ka hmulo a, a nula pawh chu lungawilo in a tlanchhuak daih a niawm e a, naupang ho sawi a nia, Hmeichhia hi a ngaihsak hranlo pawh a niang, kan mikhual dangte nen an inanglo emai' a ti charh charh a, 'A nihchuan kapi, ka lawm e, ka rawn tibuai che a, min hrethiam dawn nia' ka ti a, kawngka chu ka khar a, ka chhuahsan ta.

Beidawn hmel zet a Taxi lam ka pan chu Manuni chuan kawngkhar min rawn hawn sak vat a, 'enge i tih reng reng a? Tunge hmuh i tum a? Tunang zan pawimawha min chhuahpui reng reng?' ti in zawhna a lo siam zung zung a, 'Manun, John-a' tih ringawtin ka chhang a, diktak chuan hetiang tehthut a a kal hi ka ring lo, a nula hruai thin kha a khum hial tawmpui turah ka lo ngai a.

Kha hmeichhe hmeltha zet kha a a thlenna ah pawh alo la hruai miahlo a ni a, Bag dumpawl aka tlanchhuak ta a tih erawh kha chu keimah ka ni tih ka hria, khami ni Bank a ka kalni a a room a min fawh ni kha a ni a.

Manuni chuan 'John-a maw? Enge awmzia? Vawiin tlai khan Aizawl lam panin a chhuak daih tawh a lawm, Eh! Taka.. I lehkha tur a dah a sin.' a ti a, phur zetin, 'ka lehkha maw? I hawng em? Enge inziak' ka lo ti var a. ' Hrelo, ka chhiar lo a, enge thil awmzia? Johna nen in inkarah enge awm? a tih chuan 'A ni kha ka duh a ni, ka hrelo, ka hmangaih pawh a ni maithei, a rang teh thut em a' ka lo ti a.

Engkar lo ah in chu kan thleng thuai a, mahse chu lehkha hmuh ka chakna chuan min tur ut ut a, ka muhil thei dawn chuanglo tih a hriat chuan manuni chuan an inlamah min kalpui leh a, Almirah atanga lehkha thawn bawm mawizet a rawn phawrh chuan kalo pawt thla vat a, chhiar ta lemlo chuan ka hum a, kan phei leh a, manuni chuan mak ti zetin 'eng tik atanga intan nge?' A man a hria em? A ti a, thil awmdan tlangpui chu ka hrilh a, a ni pawh chuan 'Di Tawn a tlai' a ni maw? A pawi hle mai, John kha mi fel tak a nia sin le' a ti chuai raih a..

In kan thleng chu meng la awm mahse thawm ri nuai nuai a reh tawh a, ka room ah chuan Manuni nen ka lut tlanga, lehkha thawn chu ka chhiar ta..

'' Nang ka hmuh tirh che khan kha leh chen hmeichhia kalo suangtuah thin leh ka duhthusam chu hmu ta ah ka in ngai a, mahse Manunin pasal nei mai tur i ni tih min hrilh khan ka tlai lutuk tih ka hre nghal a, chu tichung chuan ka hmasialna leh ka duhna che chuan i lamah min pawt hnai reng si a, mahse engmah thlak danglam theih a nilo 'Makima i hmangaih thu i sawi khan ka harh chhuak ta a ni. Tlem talin min lo hmangaih ve nila chuan ka hreawm tawrh a nep tur a nia, Hlim takin awm rawh, mangtha'

Lehkha thawn ka chhiar zo chu ka mit sulh in ka hria, engvanga a ni hi tawng tlai em em nge ka nih? A ni ka duhna leh Makima ka duhna chu a buk a in rih hleih ngawt mai, mahse ka hma a mawhphurhna awm chu tlanchhiat san theih a ni tawh lo, John-a ka thlan chuan Makima a na anga, engkim ruahmanna kalpui a ni tawh a, ka chhungte an zak em em dawn bawk si a, ka duhna leh hlimna um thei ka ni si lo.

Kan inneih ni chu alo thleng ta, Car nalh zeta cheiah Biakin lam pana kan tlan laite chuan Makima nilo in John michimawma ngei kha moneitu niturin lo ding sela tiin kalo ngaihtuah leh veng veng a, Manuni chuan 'Ka thian, hreawm i ti ang tih chu ka hria, mahse Makima hian a tihlim em em ang che' a lo ti a, mahse ka chhang lo, ka duh chu Makima nilo in John michimawma, luhlul leh thunei tak, rilru khawng tak kha a ni si a, ka hlim zel thei angem le?

Kum thum zet a liam ta, ka pasal Makima chu dawr lamah a kal tawh em em lo a, thawktu dang lak belin in lamah a tal tam zawk a, ka dawr kha Ka nau siamtein a enkawl a, keipawh ka fanu kumkhat leh thla li mi enkawlin ka buai thei viau mai, Makima chhungte chu an tha in min duat hle a, ka pasal Makima phei chuan ka khawhar hlau in ka thian kawm leh khawlai len ai chuan ka kiangah a tap chawt a,A fanu(kan fanu) kalthiam ve terh terh tawh chu a hlimpui in a duat thin khawp mai.

Pawn a thlifim dawnna tuna kan siam chawlhbuk ah chuan ka thu a, Ni chu a sa tha vawl vawl kher mai, mahni chauha thu ta na na chu rilru kawmin tunhma thil hlui te ka ngaihtuah mai mai a, Johna kha Nupui te a nei tawh a ngem? A hmelthat ngai khan la hmeltha reng tak maw? Oh ! Khapa tak kha chu.. Min hrechhuak ve thin a ngem le? A nupui chu a vannei ngawt ta ve ang..

Chutia ngaihtuahna ka kawm melh melh lai chuan ka hnunglam atangin ka mit a rawn hup a, a kut ka laksawn chuan ka hnungah ka Pasal chuan nui var var chungin min lo en a, ka biangah min fawp zauh a, ' Duhtak, engthil nge ilo ngaihtuah a? Ka koh che pawh min chhanglo in, Hei, theitui ka lo ken che, a lum sia' a lo ti thuai thuai a, Ka pasal Makima chu ka en a, kum thum zet kan innei ta, vawikhat mah thinur a mi biak leh aw ka vina min chhan ala nei ngailo, englai pawhin ka tan a awm a, ka mamawh laia min hlat lah kala hre hek lo, ka chhungte pawh a ngaihsak in an tan ui a nei ngai hek lo, chung zawng zawng ka ngaihtuah chuan eng vanga John-a la ngaihtuah fo nge ka nih le? Ka pasal hi thinlung zawng zawnga hmangaih tur ka ni a sin.

' Duhtak, ka hmangaih che'

Mak tih hmel taka min enin ' Duhtak, kumthum chhung khan chu thu i sawi hun chu kalo nghak a sin, ka va hlim em! Kei pawn ka hmangaih takzet che' a ti a, ni e, atan ka theih tawka nupui tha nih ka tum a, a chhungte lakah pawh that ka chhuah a, Mo fel nih pawh ka phur ngei a lawm, mahse midang ka thinlunga awmreng chung chuan ka hmangaih che tih kha ka thei silo, alo nghak a, dawhthei taka a nghah chu tun atang chuan englai pawhin a hmu in a dawng reng tawh ang.

ka biangah chuan mittui alo luang ngiai ngiai a, Boihi, i tap elo? Ti nge? Keichu ka hlim a sin' ti pah in a dar a ka lu nghatin min kuah a...

'Duhtak, ka hlim a lawm, ka tana i inpek zawh ziate, ka hlim loh i hlauh zia ka ngaih tuah hian ka lo hmangaih theilo che kha pawi ka ti, tunah chuan nang chauh ka hmangaih tawh ang che'

Ka bianga mittui luang chu a hru hul a,'ka lawm e, kan inneih hlimah kha chuan i tana hreawm dan tur ka ngaihtuah a, mahse engtikah emaw chuan i hmangaihna hi ka dawn ve ka ring thin, kumhnìh meuh ka nghah hnu che chuan ka beidawng ve lek lek a sin,tunah erawh chuan hlim takin ka awm kumkhua tawh ang' ti in min fawp vawng vawng a,

Chutih lai chuan kanu chuan varandah atangin 'Lida, matei a harh a nia, hei ka tilungawi thei tlat lo' a rawn ti a, Makima nen chuan inchhung lam kan pan dun a, chhuat a Bawihtei lungawilo leh tum bar a lo thu chu ka chawi a, Makima chuan a chalah duat hmel zetin a lo fawp zauh a.

Kan chhungkua chu hlimna hlirin a khat a ni ber e, A tira ka huphurh leh ka lungngaih ka hlauh tehreng nen, ka pasal hmangaihna leh dawhtheihna chuan hlimna min pe in ka khawharna zawng zawng atangin min hnem a, fanu duhawm tak, kan hlimna min belhchhah saktu tur kan nei bawk nen, johna kiangah pawh awm ila hei baka ka lungawi ka ring chuang lo.

Mumbai zintur a inbuaisaih a ngai a, ka huphurh takzet a nia, Makima Ni cancer vei, in check up tir tur chu kan nupa a zui a ngiat tlat pek a, Bawihtei pawh a leikangin a fel tawh a, a ni te ho kiangah a tlei em em a, a kum thumna piancham kan lawm fel chauh a ni a,kumthum mi lek mah nise puitlin hlir in ka chhawnchhaih a, a kum phulo in a fel reuh a, ngaihngam taka kalsan theih chu a ni, mahse Nau thlanga mi ka pai a, tichunga mumbai kal erawh ka zuam hlawl lo, mahse Makima'n kal turin min duh miau si a, kan kal ta nge nge a.

Kan zin chu natna vanga kal mah ni ila nuam ka phian a, a lumin boruak a sa hulh hulh erawh tawrh a har khawp mai, kan dawr bungraw lakna thin kan Agent te nen inbe turin makima chu a chhuah a ngai a, Ka ni damlo chu kan thlenna hotel atanga chemo khai tura hospital lam ka panpui a ngai thung a, chu mi chuan a ni ka thinlung nghawt dawt thil ka tawn tak ni.

Damdawiin atanga boruak thawveng dawng tura ka chhuak chu damdawiin tualah chuan Car sen nalh zet hi a rawn in hung a, a chhung atang chuan Nula leh tlangval chhelo tak an rawn chhuak a, ka mit chu kala sawn thei ta hauh lo mai, chu tlangval chu John-a kha a ni tlat, khawvel hi vawisawm hrutchhuak pawh ni ila Johna zawng ka hai lullo ang.

Insi rialin an rawn phei dun a, chu hmeichhia chuan John-a chu a hmangaih hmel hle in ka hria, johna pawh chuan haw lo tih hriat tak maiin a melh zauh a, a rawn hawi leh chu kan mit a intawng ta siah mai, chutah zet chuan current chaktaka kal ang mai hian ka thau ah min man a, ka enreng ringawt mai a nih chu. Mahse engmah sawilo in an lut tlang ta daih a, min hre tawhlo em ni ang le?

Damlo enkawl tute tana thutna an siam, corridor zau pui ah chuan ka thu a, ka ni chemo khai chhung nghah a ngaih avangin chutia nghak chu ka ni a, ka bulah chuan John-a chu a lo ding reng a, ka hawichhuak chu kan mit a in tawng leh ta..'He tah enge i rawn tih?' a ti thawp sut a. ' Dam e, kan pa ni cancer enkawlin kan rawn zin a, ilo dam zawk em? Ka ti let a

'Dam e, a rei ta hle mai, i hmel pawh ala tha reng a nih kha le'

' ka lawm e, John, kan inhmuh pawh ka ring tawhlo a'

' Ni e, khatia i pasal neilai thlir che kha ka thei nganglo a ni, ka duh apiang neih ka tum thin, mahse ka hlawhchhamna kha ka la na teh a sin'

' John, a tawpnan i kal zan khan Rest house lam kha ka rawn pan a, mase ilo awm tawh silo a.. I lehkha kha Manuni'n min pe a'

' ka rilru chu i hrechiang khawp ang chu

'Tun thleng hian ka ngaihtuah thin a, eng ang chiahin nge ka lakah rilru ilo put ka hre hauhlo'

' i hrelo maw? Ka hmangaih hmasak ber leh awmchhun i ni, mahse ka tawng tlai lutuk che a ni'

' John, a mak ngawt mai, ka pasal hian min duatin min hmangaih hle a, mahse kala ngaihtuah fo che a sin, ka hmangaih che a, mahse tunah chuan a danglam tawh'

' Ka lawm e, min lo hmangaih ve tih hriat chu a nuam khawp mai, chuan hlim takin i awm ring,.

' Ni e, ka hlim a lawm, nangpawh engtin nge i awm takzel?'

' kei chu min hmuh ang hi a ni mai,Nupui pawh kala nei ta lo'

' Nichina i hmeichhe hruai kha i nupui a nih kalo ring ve tawp a,

' Nih pawh ala ni mai thei, A pa hi mizo a nia, A nu Naga a nia, he damdawiinah hian a thawk a. mahse thutlukna siam harsa ka tih chu hmangaih loh neih hi a harsa em a ni.'

' John, ila hlim em em ang, keimah ang hian'

' Ni e, hunin ala hril ang chu, chuan inpa a rawnkal ve ngei anga tiraw.., a pakhatna tur em ni? Tih pahin ka pum chu a melh zauh a.

'Oh kal e, A ma hnatul buaipui a ngai a, pakhatna nilo e, fanu kumthum mi kan rawn kalsan a lawm'

' A nih tak chu a nu a chhun chuan a hmeltha ngawt ta ve ang, mipa tamtak rilru a la chawkbuai dawn a nih chu, Chutia eng eng emaw kan sawi lai chuan a thiannu chuan a rawn ko a, kan inthen ta..

Thla khat deuh thaw kan cham hnu chuan Mumbai chu kan chhuahsan a, mahni ram ngei thlen chu a nuam ngei mai.

- Mamie Jinhlong