ISUA'N A ṬAWNGṬAISAK CHE

_Ruahmanna Siam Hun_

-- Rick Warren

-- November 2, 2026

“Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin; nimahsela, i rin a bo loh nân ka ṭawngṭaisak che a ni; i hawi kîr leh hunah nangin i unaute tinghet ang che,” a ti a.” Luka 22:31-32‬ ‭

I hringnun eng ang pawhin lo hnawk tawh mahse, siamthat lehna hi tawngtaina nen a la neih theih reng a ni. Chu chauh pawh a ni lo, i hlawhchham tawhna chu midang  tangpuina turin Pathianin a hmang thei.

Bible-ah chuan, Petera hi mahni nun ti hnawk tawhte tan zirlai tha tak a ni. A ni hian mimal leh khawlai nunah pawh hlawhchhamna tam tak a nei a, mahse a in siamtha leh vek a ni. Mahse a thawnthuah chuan, ama tawngtaina emaw midangin an tawngtai sakna emaw vang a ni lo, Isua tawngtaina vang a ni.

Zanriah hnuhnung an ei lai khan, Isua khan a zirtirte hnenah an zinga miin a phatsan dawn a ni tih a hrilh a. Petera khan amah chu a ni dawn lo tih a chiang phawt a. Isua hnenah khan a tan chuan tanin a luh leh thih hial a huam tih a sawi hial a ni.

Mahse Isua khan Petera hnenah, “Peter, ka hrilh a che, vawi thum mi phat hma loh zawng vawiinah hian âr a khuang lo vang,” a ti a. (Luka 22:34)

Isua khan Petera tlukna kha a sawi lawk a ni mai lo, a thawh leh hun tur leh a tlukna kha midang tanpuina turin a hmang dawn tih pawh a sawi tho a ni. Isua chuan Luka buah chuan, “Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin; nimahsela, i rin a bo loh nân ka ṭawngṭaisak che a ni; i hawi kîr leh hunah nangin i unaute tinghet ang che,” a ti a. (Luka 22:31-32). Chu chu Vanramah Isuan a tih mek chu a ni. Rom 8:34 ah chuan, “tuin nge thiam loh chantîr ang? Thia kha Krista Isua chu a ni si a; a ni, tho leh ta zâwka, Pathian ding lama awma min sawisaktu bawka kha a ni” (Rom 8:34) a ti a.

I tan a tawngtai a, a chhan chu Setanan tihchhiat che a duh tih a hriat vang a ni. Tawngtai aia pawimawh thildang hi awm se chuan chu tak chu Isuan a ti ngei ang. Chu tak chu siamthatna atan leh tirhchhuahna atana a pawimawh na chu a ni. Isua khan Petera kha tawngtai sakin, "I hawikir leh hunah nangin i unaute tinghet ang che" tiin a tirchhuak nghal a ni.

Midang pui tura tirhchhuah a ni.

I nunah eng ang taka tlu chhe tawh pawh nila, mangang suh. I sualna a hnenah puangin, Pathian ngaihdamna chu Isua i rinna hmangin nei ngei ang che. I tihsual leh hnungtawlhna zawng zawng a hre lawk vek. Pathian hi siamtharna Pathian a ni a, i nuna thleng engkim kha chumi tur chuan a hmang tangkai ang.

Eng ang pawhin hnungtawlh hla tawh mahla, Pathian khawngaihna leh a duhna chuan a chhanchhuak thei zel che a ni.

Ngaihtuah zui atan

* I nunah i tihsual nasat tawhna te ngaihtuah la. Petera thawnthu khan i tan tangkaina engtin nge a neih?

* Isuain a tawngtai sak mek che tih i hriat khan engtin nge i awm? Chu chuan a ti huaisen che em? Hahdamna i neih phah em?

* I tihsual tawhte Pathianin a hman tangkai theih dan han ngaihtuah teh.

*Pathianin hun remchang a pe che*

Eng thil pawh i lo tih tawh emaw, khawiah pawh i lo kal tawh emaw, Pathian chuan hun remchang vawi hnihna a pe che. I thil tih sual tawh zawng zawng, i tlâkchhiatna leh i hmachhawn tawh zawng zawngte chu a hre vek a; chuti chung chuan a la hmangaih che a, i ngaihsak reng bawk che.

Pathianin amah duhsakna i chan theih nân thil ṭha i tih tam a ngai tih a phût lo. A Fapa Isua Kristaah rinna kan nghah chuan, Pathian khawngaihna thilthlâwnpêk avângin chhandam kan ni. Isua zârah Pathian khawngaihna pawm i inpeih tawh a nih chuan, ṭawngṭaina tawi te hian ṭawngṭai rawh:

“Ka Pathian, mi sual ka ni tih ka hria a, ka sualte ngaidam tûrin ka dîl che a ni. Isua Krista chu i Fapa a ni tih ka ring. Ka sualte avângin a thi a, nangin nunnaah i kaitho leh tih ka ring. Tun aṭang chuan ka Chhandamtu atân amah ringin, Lalpa atân amah zui ka duh a ni. Ka nun hi hruai la, i duh zâwng tih theihna tûrin min ṭanpui rawh. Isua hmingin ka dîl a che. Amen.”

Isua Krista pawm tûrin tûn ṭawngṭaina hi i lo ṭawngṭai ta a nih chuan, Rick@PastorRick.com-ah email min thawn a, min hrilh rawh. Isua nêna i nunna kawng thar bul ṭannaah a ṭangkai theih nân thil ziak eng emaw thilthlâwnpêk ka rawn thawn duh che a ni.

*[Lettu: Sangpuia]*