Mizo Film Award dawng tawh mi pariat thawhhona 'Snakes and Ladders' Nov 6 zanah, tawng thumin en theih a ni dawn!

Aizawl | Nov 2, 2026: Nexgen Production film hmasa ber tur, 'Snakes and Ladders' chu November 6, 2026 (Zirtawpni) zan hian Vanapa Hall-ah tlangzarh a ni dawn. He film-ah hian Mizo Film Award lo dawng tawh mi pariat zet an thawkho a, mipuiin an nghakhlel hle.

He film hi Oct 31, zan khan sawm bik mi tlemte leh a changtute'n an enho a, hun hlimawm leh hlawkthlak tak an hmang a, a en hmasatute hian, "Ka la kham lo, tlangzarh / premiere zanah ka kal leh tho ang," ti an awm nuk a, hei hian a film hmuhnawm zia a tilang chiang hle.

'Snakes and Ladders' hi tlangzarh a nih rualin FIARA Application-ah en theihin chawpchhuah a ni dawn a, he film-a danglamna kan hmuh tur zinga mi chu - an tawng hrilhfiahna sap tawnga dah a ni bakah hian, Sap tawng leh vai tawngin leh a ni a, hna dangin an en theih turin chhawp a ni nghal dawn a, a lehlin leh aw thun pawh tih vek a ni tawh. Film an thlir lawk zanah pawh hian sap tawng leh vai tawnga an lehlin te hi tawite ve ve enho nghal a ni.

Darkar hnih chuang hreta rei, 'Snakes and Ladders' hi a ninawm hman lova, a chhunga thawnthu inbilh a ngaihnawmin, a hmuhnawm a, chan loh khana min hruai ta daih a awm nual a, mi a barakhaih a, a tihmuhnawm zual a, chutih rualin, lo rin lawk dan ang chiaha rawn inher a awm tho bawk.

Sawi tawh angin, 'Snakes and Ladders' ah hian Mizo Film Award dawng tawh mi pasarih ngawt mai an inlan a, a phenah lang lo lamah award dawng tawh bawkin thla a la a, hei hian ngaihven a hlawh sa tawh hrim hrim a, chutah, sual thiam leh rorum tak maia chang thiama hriat hlawh,Vairengte tlangval, Mizo Film Award 2025 Best Actor dawngtu Gilbert Colney chu a changtupa ber a nih bakah Director a ni a, mi ngaihven a hlawh phah hle.

Mipui hmuh chak ber tur erawh Mizo Film Award 2025-a Best Actress atana thlan Rosy Lalramthlengi a inlan bawk a, Best Actor leh Best Actress ni lai an ni miau a! Film pakhata he tianga an chang dun thei hi Mizo film ngainatute tan chuan chanchin lawmawm tak a ni.

Gilbert-a leh Rosy-i bakah hian Mizo Film Award lo dawng tawh - Lalduhawma, Laraw Colney, RC Khiangte (Darchhingpuii), Makima Chawngthu leh K Vanlalawmpuia (Zabilha) te an la awm cheu bawk. Lalduhawma hi 'Darchhingpuii' film-ah khan mi ngei rawn hlawh khawpin a chang thiam a, Best Supporting Actor award a dawng a nih kha. Laraw Colney leh RC Khiangte te hi nikum khan Best New Actor In A Leading leh Best New Actress In A Leading atan thlan an ni a, anni pahnih chang dun tur pawh hi en chhan tlak a ni.

Makima Chawngthu hi kum 2024 khan Best Supporting Actor atan thlan a lo ni tawh a, 'Dengi I Love' film atanga Zoram mipuiin hriat K Vanlalawmpuia (Zabilha) sawi hmaih a thiang lo bawk. K Vanlalawmpuia hi kum 2021 khan Best Supporting Actor atan thlan a ni a, he chawimawina dawng hmasa ber a ni nghe nghe.

Anni bâkah sawi hmaih phal chi miah loh Actor ṭha em em leh Experience ṭha tak nei, Sangtea Chhangte in role pawimawh tak a la play dawn bawk a, Actor ṭha rual Film pakhata kan hmu thei tur hi a film enti chakawm lehzual tu a ni ngei mai.

Changtute mai bakah hian Mizo Film Award 2025-a Best Cinematographer latu Isaac Lalchhanpuia chu Director of Photography (DOP) a ni bawk a. Heng Award winner hrang hrangte hi 'Snakes and Ladders' film-ah hian an thawkho a ni a, hei tak hi en tichakawm zualtu chu a ni a - November 6, 2026 zanah, he film chungchanga mipuiin thutlukna an siam theih turin chhawpchhuah a ni dawn e.

A thawnthu chu le:

Dingzela chuan a ramhmul damdawi zawrh dahna thingremte hi awrhin, nitin bazarah a ding ve ṭhin a. A pa hi Pu Lalliana, National Institute of Ayurveda a Gold Medalist ngat, ramhmul damdawi lam thiam bîk a ni a, nimahsela itsiktuten tura an hrai avang taksa pum zeng, ṭawng thei tawh lo a ni. An pafa nun chu a harsa ṭhîn ngei mai

Kum tam tak liamtaa an Research pum theih loh chu a Partner ṭhin Pu Hnuna pawhin a la pum thei bik lova. Nimahsela, a ni zawng, tihhreh nei lo tihtakah, hlawhtlinna a chang tawh a. Mahse, thil hmuhchhuah ropui tak ni thei tura an beisei chu a la Complete thei bîk lo a, a la atchilh a ni.

Hetih mek lai hian Dingzela bialnu, Judy chuan Pu Hnuna Company, LifeSpring a han zawm ve leh bawk nen. Dingzela tan nun a harsa hle.

Ṭum khat chu Dingzela chuan a Pa Journal a hmu chhuak ta tlat mai. Chutah chuan khawchhak lam ramhnuaiah khian damdawi lam thiam bik, Bawlpu antih mai a awm thu leh chumi chuan an Research a tihhlawhtlin pui theih a inbeisei thute, a zawn a a hmuh loh hnuah Bawlpu ngei hnen aṭanga lehkhathawn, a chenna hmun Clue inziahna a hmuchhuak ta tlat mai.

Beiseina sang tak a neih laiin, chu Journal leh Bawlpu lehkhathawn chu rukbovin a awm leh ta si.

Dingzela chuan engtin nge Journal a thu inziak te a bawhzui tak zel ang? A pa thil tum a tih hlawhtlin sak thei ang em? November Ni 6 zanah hriat a ni ang chu. . . .

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]