HLAWHTLING TURA RUAHMANNA ṬHA ZAWK SIAM DAN KAWNG SARIH (Thawh 3-na)

_Hma Hun Eng Zawk Nei Turin_

- Rick Warren 

* November 09, 2026

"Lalpan rem a tih chuan kan dam ang a, kan ruahman angin kan ti ang" (Jakoba 4:15, GW)

Pathian duhzawng anga ruahmanna siam dan Nehemiaa nun aṭangin kan en a. Kawng nga kan zir tawh a:

*Kawng 1-na: I nun atan Pathian duhsakna dil rawh*

*Kawng 2-na: Hun remchang ngaihven la, chumi tur chuan nghak rawh*.

*Kawng 3-na: Hlauhna lo thleng turin ring rawh, mahse chu chuan chawlhtir che suh se.*

*Kawng 4-na: Bitum chiang tak nei rawh*

*Kawng 5-na: Hun bi ruat rawh*

Damchhung hun hman dan turah hengte hi Nehemia'n a ruahmanna kawng hnuhnung pahnihte an ni.

*Kawng 6-na: Harsatna thleng theite thlir lawk rawh*

Nun hman dan ruahmanna zinga pawimawh em em mai chu harsatna thlir lawk thiamna hi a ni. Thufingte 27:12-ah chuan hei hi kan hmu, _"Mifing chuan harsatna lo thleng tur a hmuhin a lo inbuatsaih lawk ṭhin" (TLB).

Nehemia khan harsatna a tawh theih hrang hrangte a ngaihtuah a. Tichuan lal hnenah chuan heti hian a sawi a, _"Lal remtihzâwng a nih chuan, lui rala rorêltute hmuh atân Judai ram ka thlen thlenga mi kaltir zel phalna tûrin lehkhate mi pe la; tin, lal ngaw hak vengtu Asapha hmuh tûrin in venna kulhbing kawngkhâr rel atân te, khawpui kulh atân te, ka va luah tûr in atân te thing mi pêk theihhna tûrin lehkha mi pe bawk rawh," tiin (Nehemia 2:7-8).

A hmasa berah chuan Nehemia khan lal hnenahn Jerusalema kal phalna a dil a. Chumi hnuah venhimna leh a mamawhte pe turin a dil bawk a. Nehemia kha lal no kengtu a ni a, in sa thiam a ni hauh lo, mahse thla li chhung ṭawngṭaiin ruahmanna a lo siam tawh a, chuvang chuan harsatna lo thleng theite a thlir lawk a, a mamawhte a ngaihtuah tawh a, a man zawng zawng a chhut tawh bawk.

*Kawng 7-na: I mamawh zawng zawng Pathianin a pek che ring rawh.*

I beisei anga thil a thlen loh pawhin Pathianah rinna i la nghat thei. Thlarau nuna puitlinna lantirna chu i ruahmante anga thil a kal leh i ruahmanna anga thil a kal loh lai pawha Pathian hnathawh a ni tih i rin tlatna hi a ni. Pathian ruahmannaah chuan, _“Lalpan rem a tih chuan kan dam ang a, chu mi kha mi kan ti ang,”_ tih a ni ṭhin (Jakoba 4:15).

Tichuan lal chuan a dil ang apiang Nehemia hnenah chuan a pe ta a - Nehemia chuan engkimah Pathian hnathawh a nih thu heti hian a sawi a: _"Tin, ka Pathianin mi duhsak avangin lal hnena ka dil ang zelin mi pe a"_ (Nehemia 2:8).

I hma thla ruk lo awm turah emaw, nakumah emaw, kum nga lo la awm turah emaw hian Pathianin engtinnge hnathawk se i duh? Ruahmanna ṭha tak chu heng Nehemia'n rahbi pasarih a ruahmante hian bul ṭan a ni. Hengte hi zawm ve tum la engtinnge i nunah Pathianin hna a thawh thlir rawh.

Ngaihtuah zui atan.

* I tum thlenna daltu harsatna tlanglawnte engnge?  Chung harsatnate hmachhawn tur chuan engtinnge i inbuatsaih ang?

* Eng kawngahte nge Pathianin hlawhtinna a chantur che? I hlawhtlinnaahte Pathian hnathawh a ni tih leh "a khawngaihna kut" a ni tih lantir rawh, i ruahmanna anga thil a thlen loh hun pawhin.

* I ruahmanna kawnga finna i neih theih nan engtinnge rinawm zawka Isua hnung i zui theih ang? Vawiin hian chumi ti tur chuan eng kawng khatin nge ke i pen theih ang?

*[Lettu: Sangpuia]*