YMA rorelin, "Mizoram-a raltlante awm dan leh Foreigner mi, dan lova rawn sumdawngte khuahkhirhna mumal zawk a awm theih nan hmalak ni rawh se," an ti.

Aizawl | Oct 23, YMA rorelin, "Mizoram-a raltlante awm dan leh Foreigner mi, dan lova rawn sumdawngte khuahkhirhna mumal zawk a awm theih nan hmalak ni rawh se," an ti.

Nimin khan YMA rorel inkhawm vawi -5-na chu LPS Arena Falkland ah neih a ni a, inkhawm hi chawhma dar 10:30 ah tan niin Pu R.Lalngheta President Central YMA chuan kaihruaiin Pu Vanlalsawma CEC chuan hunserh a hmang a Pu Lalhmuchuaka CEC kaihhruaina in nikum YMA inkhawmpui lian vawi 74-na leh tun rorel inkawm inkhar a YMA member boral, mipa 1254 leh hmeichhiah 322 avaiin 1576 te sunna hun a hman a ni a, sun zingah hian Central YMA hruaitu lo ni tawh te:

Rev. Lal Rinmawia Khatla,  Pu V Thangzama Dawrpui Vengthar,   Pu Robert Rosanglura, Zarkawt, Pu C Vulluaia, Dawrpui Vengthar te bakah YMA hruaitu nilai eng emaw zat an tel a ni, hemi hun hian Pu Lalbiakkunga CEC kaihhruaina in YMA thuthlung sawi rualna hun hman a ni bawk.

SF David Ngursangzuala, Asst. Secretary Central YMA hnen atangin, nikum YMA inkhawmpui lian leh vawiin Rorel inkhawm inkhar a Central YMA hmalakna hrang hrang ngaihthlak a niin tundinhmun ah hian Central YMA hnuaiah hian Sub.Hqrs 9, Group 49 leh Branch YMA 831 te awm mekin YMA member 523808 an awm mek a ni, Pu M.S Ralte Finance Secretary Central YMA hnen atangin Finance report ngaihthlak a ni bawk.

Vawiin rorel inkhawm chuan hengte hi lungrual takin a passed a ni.

YMA KHAWIH

1. Mizoram pawn atanga Company, Mizoram chhunga hna rawn thawktu ten hnathawktu atan ram leilung fa tam zawk an chhawr theih nan Central YMA-in hma la chhunzawm zel rawh se.   

2. Central YMA-in aia upa zah inzirtirna kawngah tun aia chak zawkin hma la rawh se.  

3. Environment humhalh chungchangah chak zawkin hmalak ni rawh se.

4. Mizo Lengkhawm (khawhar) hlate a ral mai loh nan khawhar in leh mitthi inah a tam thei ang ber sak a nih theih nan CYMA-in hma la rawh se.

5. YMA hlate (YMA Hla Bu a mi) uar zawka sak a nih theih nan leh thiam kan lo tam zawk theih nan Central YMA-in hma la rawh se. 

SAWRKHAR KHAWIH 

1. Bairabi atanga Sairang inkar Rel Station/Sub-Station-ah te hian uluk zawkin ILP check a nih theih nan Central YMA-in hma la rawh se

2. Mizoram leilung fate kan him nan Trading Regulation felfai tak kan neih theih nan sawrkar-in chak zawkin hma la rawh se. 

3. Mizoram-a raltlante awm dan leh Foreigner mi, dan lova rawn sumdawngte khuahkhirhna mumal zawk a awm theih nan hmalak ni rawh se.  

Heng bakah hian YMA dan bu hmanlai hi kum 2027 inkhawmpuiah ennawn turin ruahman ani.

Rorel inkhawm ah hian Group leh Branch YMA ten inelna hrang hrang (i) Ramngaw leh nungcha humhalh tha, (ii) Tuihna humhalh tha, (iii) Luidung humhalh tha, (iv) Kumpuan bawhzui tha, (v) Chanchinbu tha leh (vi) YMA Chanchinbu la tha te hnenah lawman sem a niin YMA hruaitu hlun chawimawina mi 90 hnenah hlan a ni bawk.

Er. H. Duhkima Treasurer Central YMA in kum 2026-2027 chhung a Central YMA sum hmuh leh hman tur a ruahman Rs 2,35,37,850.00 a phar chu lungrual takin pawm a ni bawk.

Vawiin rorel inkhawm ah hian Mizoram chhung leh pawn atangin rorel palai 1241 an kal a, Prof.Lalnuntluanga Vice President Central YMA in lawmthusawiin hun hnung a chang a, tlai ah rorel palai te hian zanriah an kil ho a ni.