Rev Dr Zaichhawna Hlawndo lehkhabu ziah 'The True Identity of Zofate' leh hla phuah 'that theih miah lohna bawm' tlangzarh

Aizawl | Oct 15, 2026: Zoram Thar Zawlbuk, Aizawl-ah vawiin chhun dar 12 khan Zoram Thar hruaitu Rev Dr Zaichhawna Hlawndo lehkhabu ziah “The True Identity of Zofate” tih chu Mordekai V Vunglianan thlirlawkna a neih hnuin Dr. Zoramdintharan mipuite chhiar theih turin a tlangzarh.

He lehkhabu hi Zofate ṭobul chhuina te, Zofate nihna chungchanga mi thiam rualte zir bingna lo neih tawhte bihchianna te, Zofate hi Israel hnambo kan nih leh nih loh zir chianna te, Zo hnahthlak peng hrang hrang te chanchin ziahna leh Mizoram political party hrang hrang history ziahna bu a ni. Ama hriatna leh thiamna bakah mi thiamte lehkhabu 100 lai rawna ziah a ni a, Zofate tana lehkhabu pawimawh - University, College leh High School naupangte tan pawh lehkhabu rawn tlak tak tur a ni a. Mizoram University kawl tur copy engngemaw zat an lei tur tu tlangzarhtu in a sawi bawk. Lehkhabu hi Zoram Thar Zawlbukah lei theih a ni bawk ang.

Lehkhabu tlangzarh zawh ah Rev Dr Zaichhawna Hlawndo hlaphuah “ṬHATTHEIHMIAHLOHNA BAWM” tih hla chu a thluk siamtu leh satu Pu Rosangliana (Zo-Rock) an a tlangzarh a. He hla hi hla dangdai, ruahṭhamloh hla a ni. Party politics leh party sawrkar ṭhatlohna te, Kristianna leh Zonunzemawi ṭhiattu a nihna puanchhuahna hla a ni a. Zofate party sawrkar siam tawh lova Pathian Lalram Sawrkar din tura chona leh hla a ni.

He lehkhabu leh hla tlangzarh hi Lalruatfeli Hlawndovin a kaihruai a, Dr Lalbiakmawia Ngente in hunserh a hmang. Nl. Rinhlui Tlumang in Rev Dr Zaichhawna Hlawndo hla phuah ‘Tudang Kan Nilo Zosefa Tu leh Fate kan lo ni’ tih hla thiam takin a sa.

Rev Dr Zaichhawna Hlawndo chuan thu sawiin - Vawiin “Ka nun leh Rochun” programme ah hian thil pawimawh tak pathum piancham lawmna, lehkhabu tlangzarh leh hla tlangzarh hun kan hmang a. Khawvela ka lo pian chhan leh min siamtu Lalpa hnena lawmthu sawina leh min siam chhan tih hlawhtlinna tura hun hlu tak a ni a ti. Pathianin kan kristianna, hnam nun leh ram rorelna dintharna atana chhiahhlawh hna thawk turin min rawn tir hawng a. He hna hi ka dam chhunga missionary hna tura min pek a nih avangin rinawm leh taima taka ka thawh chhun zawm zel a ngai a. In mi ṭawngṭaipuina leh ṭawimawmna ka mamawh tak zet a ni a ti bawk.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]