PRO FIGHT: Mi mal chawimawina chi nga sem chhuak dawn; title fight-ah boxer tha 10 inlan dawn!

Aizawl | Oct 15, 2026: Mizoram Labour Link LPS Pro Fight 2026 hmawrbawk a hnai ta a, Haier Best Boxer ni tur hriatthiam a har hle.

D3 Business Enterprise chuan Haier Home Appliances hmingchawiin mi mal chawimawina a tum vek a. Best Boxer, Best Challenger, Promising Boxer, Best Referee leh Best Judge chawimawina sem chhuah a ni ang.

2022 atanga 2024, kum thum a zawnin Laldinsanga kutah Best Boxer chawimawina hlan a ni a. Ramthar Lunglei boxer hi vawi thum Pro Fight champion a nih zawn hnuah a tel zui lo va, a kalsan bantamweight champion kawnghren inchuhin zirtawpni zan title fight-ah L Joseph Buihringpachha leh Lalrambuatsaiha an inhnek dawn.

2024 khan kum 18 mi niin Pro Fight-a a tel vawi khatnaah Lalkhawngaiha'n lightweight title a hnek chhuak nghal a, Promising Boxer-a thlan a ni. Venghlui tlangval Khawngaiha hian champion kawnghren kawl zui tumin Chhiahtlang diese engine Lalruatmawia a hmachhawn dawn a, tun ṭumah hian lightweight-in boruak an nei lian.

Hetih lai hian tun ṭumah Best Challenger lawmman dawng hnuhnung ber Omega Lalramdina'n a tel lo a. Kum hnih kal ta khan bantam title fight-ah Dinsanga nen inhnehtawk takin round li an inhnek a, a chak zo lo a ni.

Mi mal chawimawina dawng turin title fight-a inlan tur boxer 10-in hun ṭha an nei vek a. An zingah Siaha rawlthar, kum 17 mi Joseph-a a naupang ber a, weight hrang pathuma champion hmasa ber nih tuma hruihrual chhunga lut tur, kum 31 mi HC Lalramfela a upa ber ve thung.

Championship hnuhnung ber 2024 khan Referee ṭha berah Malsawmtluanga (Ramhlun North) thlan a nih laiin, Lalmalsawma (Hnahthial) chuan Best Judge chawimawina a dawng zawn a, ani hi tunah hian referee leh judge 12 koh zingah a tel lo ve thung.

MI MAL CHAWIMAWINA :

Haier Best Boxer : Trophy + Haier Washing Machine kg 7

Haier Best Challenger : Trophy + Rs 10,000

Haier Promising Boxer : Trophy + Rs 10,000

Haier Best Referee : Trophy + Rs 7,500

Haier Best Judge : Trophy + Rs 7,500