PATHIANIN NANGMAH CHAUHVA NUN HMACHHAWN A PHAL LO VANG

 _Hun Harsa Atana Ruahmanna_

- Rick Warren

- October 6, 2026

Ama lawm zawng atana tih tum tur leh bei tura nangmahnia thawktu chu Pathian a ni si a.” Philippi 2:13

Vawiinah emaw tunkarah emaw nakumah emaw eng harsatna pawh lo tawk la, nangmah chauhin i hmachhawn lo vang. Pathian chu i kiangah a awm, nangmah a awm a, i tan a awm a ni.

Philippi 2:13 ah chuan, “Ama lawm zawng atana tih tum tur leh bei tura nangmahnia thawktu chu Pathian a ni si a.” 

*Pathian chu nangmahah a thawk mek a ni.* Thawk mek “working” hi Greek thumal _energeo_ aṭanga lak a ni a. Chumi aṭang chuan chakna kan tih mai “energy” hi a lo chhuak ta a ni. I nunah hian Pathian chu chakna (energy) siamtu a ni a. I duhna ringawt chuan i kal lo a ni. I chakna ringawtin i kal chuang lova. Pathian chuan eng harsatna pawh lo hmachhawn la, chakna i mamawh apiang ka pe ang che a ti a ni.

*Pathian chu nangmah nen a thawk mek.* I hnenah a awm a ni ringawt lova, i hnenah a awm zel a ni. Bible chuan, “Fahrahin ka kalsan lovang che u; in hnenah ka lokal leh ang … chumi ni chuan kei ka Paa ka awm te, nangni keimaha in awmte, kei nangmahnia ka awmte in hria ang.” (Johana 14:18, 20) Chu chu thutiam a ni tawp mai a ni! Bible chuan Krista chu nangmahah a awm a, i chenna a ni a, Thlarau Thianghlima char tlat a ni. Chumi awmzia chu, Setanan luhchilh tur chuan, Pathiana minung pathum awm a paltlang a ngai tihna a nih chu. Chu chu inhumhimna ṭha tak leh hlauhawm lak ata pawh inhnemna ṭha tak a ni.

*Pathian chu i tan a ni.* Pathian chu nangmah nen a thawk leh nangmaha thawk ringawt a ni lo, Pathian chu nangma tan a ni. Rom 8:31 ah chuan, “Pathian kan lama a tan chuan tuin nge min do thei ang?” a ti. 

Berampuin a beramte a thlah chuan, vengtu uisathiam te chu an hnungah an awm ṭhina, beram rualte kalna chu a dik em tiin an thlithlai reng ṭhin a ni. 

Pathian chu i kianga awm leh i hnena awm a ni ringawt lova. Sam 23:6 chuan, “Matheilovin ṭhatna leh ngilneihnain ka damchhung zawng hian mi zui zel ang a; Tichuan, Lalpa inah kumkhuain ka awm reng ang”

Pathian ṭhatna leh ngilneihna chu engtik lai pawhin i nunah a thawk reng a ni. Pathian chuan i phu miah loh pek a nei che a – chu chu a ṭhatna hi a ni. I sualna avanga i phu reng hremna chu a lekkawh lova, chu chu a ngilneihna a ni.

Pathian chuan i nun che vel hi a thlir reng che a ni! Zingtin thovin inring tawk takin hei hi sawi ṭhin ang che, “Lalpa, vawiinah hian keimahah leh ka kiangah leh ka tan i awm dawn avangin lawmthu ka hrilh a che”

Ngaihtuah zui atan

* I hnena awm i thiltihtheihna aṭanga Pathian thiltihtheihnaa innghah zawkna chu engnge nia i hriat? 

* Pathian awmpuina chu engtik hunah te nge i rinhlelh ṭhin? Pathian hnenah i nunah hna a thawk lai i hmuh theihna turin rinna dil la?

* Harsatna i tawh laiin Pathian i hnenah a awm a ni tih i hriat hnuin i thil thlir dan engtin nge a inthlak? 

*[Lettu: Sangpuia]*