OFFICE AṬANGA VAWI HNIH INCHHUAH TIR THU

~ Mahmuaka Chhakchhuak

July 29, 2026

Patling leh patling chhan mumal tak pawh sawi loa office aṭanga vawi hnih ngawt inchhuah tir hi a mak ngawt mai!

Aizawl veng hmawr lamah hian ram ruak a awm avangin kum 2024 aṭang tawh khan in hmun atan tiin ka buaipui a, vawi engemaw zat Revenue Minister leh Officer te pawh ka hmu tawh nain ka la hlawhtling thei chuang lo a. Revenue Department hi ‘Department ṭawp’ taka sawi a ni ṭhin a, chutiang taka a ṭawpna erawh ka la hriat ve ngai loh avangin chu lam chu sawi tur ka hre lo viau a, tunah erawh chuan hei a ṭawpna lam ni chiah lo deuhin Officer dawr harsa ang reng tak mai a takin ka han tawng ve ta a, ram awl ka dil chungchangah ngei pawh hian thawnthu thui tak sawi tur a awm tawhin ka dilna hi a hlawhtling emaw hlawhtling ta chiah lo pawh nisela kan rahbi rah chhoh dante hi ka la chhinchhiah zel a, ziah hrim hrim pawh ka tum bawk a.

In hmun dil hi keini tan chuan a vawi khatna a ni bawkin engkim inzir chawpa buaipui kan ni a, hetia kum hnih vel lai buaipui ngai tur a nih pawh hi a chhan kan hrethiam chuang lo nain a tawpna kan la thlen miau loh avangin buaipui chhunzawm zel chu ṭulin ka hria a. Chumi buaipui bawk chuan July 1, 2026 (Nilaini) ah Lunglei aṭangin Aizawl ka pan a, Pathian zarah tluang taka thlengin July 3, 2026 (Zirtawpni) chhun dar 12:10-ah Pu B. Lalchhanzova, Revenue Minister hmuin April 30, 2024-nia ka dilna chu hmuh lehin vawiin thlenga kan la hlawhtlin loh thu pawh ṭawngkamin ka sawi nghal bawk a.

Revenue Minister chuan kan ram dilna lama Revenue officer hnenah chuan ‘Dear Pu xyz, hei hi lo enpui teh aw’ tia min ziah sakin seal a chhu a, hming a sign hnan bawk a. Chu ka dilna lehkha, a hming sign-na ngei chu a phone chuan a thla lain WA lamah a thawn nghal bawk a. Tikhan han kal la, a lo buaipui mai ang che a tih angin min kawhhmuh Office-ah chuan ka tlan chho leh ta a, Revenue offices ka thlen chuan Officer room-ah chuan luh nghal a theih leh theih loh ka han zawtin tiffin a ei mek a, lo nghak lawk ta che an tih avangin Personal Assistant kiangah chuan ka ṭhu a. Minute nga vel ka ṭhut hnuah chuan pawn lam aṭangin pa pakhat hi a rawn kalin ‘Pu hi a hmuh theih em’ a rawn ti a, tiffin a ei mek thu an hrilh chung pawh chuan a lut lui ta tho a, a rawn chhuah leh hnuah chuan Personal Assistant chuan ‘Ka pu, nang pawh va lut ve tawh mai rawh’ min tih takah chuan ka lut a. Nimahsela ka beisei loh tak maiin ‘Ka pu, ka la hman lo a, min lo va chhuahsan leh phawt mai rawh’ a tih vang chuan ka chhuak leh ta mai a. Ka hma chiaha lut kha engvanga minute nga vel lai a awm a keiin minute khat lek pawh ka hmuh hmaa min chhuah tir leh mai si tih chu ka hrethiam chiah lo deuh a.

Office room aṭanga inchhuah tir chhan hi chi hrang hrang a awm thei a, nimahsela engmah a chhan min hrilh si loin min chhuah tir tlat bawk si! Ka hmelchhiat vang nge, ka incheina a mawi loh vang ni ang tihte thlengin ka ngaihtuah a. Kameez inbilh zaih a, smart shoe bun bawk hi chuan chhiahhlawh chei ang zaihin kan nalh ve ṭhin a, kum sawm vel lai liam tawhah khan chutiang chuan ka lo inchei ve ṭhinin Office ṭhenkhatahte phei chuan min hai vang hian ṭum thum lai salute ka dawng nghe nghe a. Tun ṭumah erawh kameez ban bul hain jeans kekawr ka ha bawkin chapal dum, (en thuak chuan pheikhawk pum ang deuh hi) hi ka bun bawk a, mawi lo tak chu a ni hran loin nalh lutuk tia han sawi tur pawh chu a ni hran lem lo. Kum 2016-a kekawr bul (ka ha lui ve kher a) nena office pakhata ka kal pawh khan ṭha takin min lo dawngsawng tho kha a ni a, min melh hrek hrek kha min lawm lohna ka hmuh chhun a ni a, tuna min chhuah tir chhan tur hi keimah lamah chuan ka hrethiam hauh lo mai.

Minute reilote hnuah chuan PA chu lutin a rawn chhuah leh pah chuan ‘Ka pu, va lut rawh le’ a tih leh takah chuan keipawh chuan rang taka thoin ka lut zui nghal mai a, nimahsela Officer chuan ‘Ka pu, ka la hman lo a, min lo va chhuahsan leh rawh aw’ a tih leh ta thut mai si a, hrilhhai tak chuan ka chhuak leh ta hnu hnu a! He mi ṭumah hi chuan ka zak ta hle mai a, la hman lo turin amah lah chuan engmah khawih leh buaipui lai a neih ka hmu bawk si lo a. Min dawngsawng duh lo hrim hrim em ni zawk ang tiin ka ngaihtuah a, ni ta sela eng nge a chhan ni ang? A chhan tur ka hre lo a, ṭum hnih lai min chhuah tir chhan kha vawiin thlengin ka la hre thiam thei lo a, ka rilru takah chuan min tham lo hle a nih dawn hi ka ti hial.

Revenue office hi a ṭawp an lo tih ṭhin hi hetiang hi em ni ang, an officer te hi biak thiam an ngai riau bik em ni tihte ka ngaihtuah nghal a. He officer hi kumin January thla khan ka dawr tawhin chutah pawh chuan ṭumkhat chu ‘ka la hman lo’ tiin a room aṭang hian min chhuah tir tawh bawk a. WA lamah pawh he kan in hmun dil chungchangah kan inbe nualin kan inbiakna thu leh hla pawh hi kei chuan ka la kawl ṭha vek a, a ni pawhin a duh chuan a phone screen aṭang khan minute nga chhung vel han thai chho sela a hmuh mai ka ring. Mi sual a ni chu ka ti hauh lo nain hetianga room aṭanga amah dawr turte ṭum thum lai keimah bik min han chhuah tir ang hian midang a chhuah tir ve ṭhin tho ang em tih chu ka thil hriat chak tak a ni a.

Room aṭanga inchhuah tir hi amah bak midangah ka la tawng ngai lo a, ka tawn leh pawh ka ring lem lo. Chief Minister leh Minister hrang hrangte pawh an room-ah kan lo hmu tawhin amah aia buai tak takte pawh kan lo dawr ve zauh zauh tawh ṭhin. Chutianga officer buai tak takte pawh chuan min la chhuah tir ngai hauh lo a, min lo nghak lawk rawh aw an tih loh pawhin an kutin lo ṭhu turin min hrilh mai ṭhin a ni ngai a, he officer hi chuan midang tumah pawh an awm lo chungin ṭawngkam fiah pangngai takin amah chhuahsan rih turin ṭum thum lai min hnar ta bik a nih chu. A intih zahawmna nge ni ang a, min dah pawimawh loh vang zawk ni ang tihte pawh ngaihtuahnaah a awm a, kan thil dil, amah kan hmuh duhna chhan ber hlawhtlin leh hlawhtlin loh chu thuhran a ni a, chutia a hnena thu kan thlen hma hauha min han chhuah tir mai chu a chhan hriatthiam a har hle mai.

Kum 57 chhung vel min lo awp tawhtu Sap ze ṭha lo kan la chhawm zel – Min mamawhtute laka intihzahawm der hi vawiina kan officer te hian an la ching zel a nih ngai chuan kan ram hi ram nuam a ni har ngawtin a rinawm a, kan Kristianna ngei pawh hian nuihzat ala hlawh ngei hian ka ring tlat a, midang tana malsawmna nih chu vana rah ang hial a ni telh telh ngei ang. He officer ngei pawh hi a awmna kohhranah chuan mi fel tak leh ṭangkai tak a ni mai thei a, a hnathawhna hmuna amah mamawha pantute laka a awmdanah erawh Krista rawngbawltu anga ngainatna ngah tak chu a nih hmel loh khawp mai.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]