MPL 13 semi final atangin MPL 13 League winner Aizawl FC inhnukdâwk, Semifinal-ah 5-na Ramthar Veng FC kan hmu dawn!

Aizawl | Oct 19, 2026: Mizoram-a Football league sang ber, Mizoram Premier League season 13-na, (MPL 13) league winner Aizawl FC chu semi final atangin an inhnukdâwk a, Semifinal-ah 5-na Ramthar Veng FC kan hmu dawn!

MPL 13 league winner Aizawl FC chu MPL 13 semifinal aṭangin an inhnukdâwk a, Aizawl FC aia semifinal khel tur hian MPL 13 season kal meka 5-na Ramthar Veng FC chu ruat an ni a, fixture pawh siam rem nghal a ni.

AFC hian MFA lamah fixture mila ruahmanna siamin semifinal hi khelh theih ngei an tum laiin, MFA-in fixture a tihdanglam avang leh, semifinal an khelh ngei theih nan tidanglam leh tura an ngen hnu ah tihdanglam awm lova kaltlangpui a nih tak avangin an tan chuan khelh ngaihna a awm tawh lo tih sawiin, lo hrethiam tura ngenna MFA ah an thlen a ni.

October 16, Zirtawpni zan khan Ramthar Veng FC chuan Mizoram Police 3 - 2 a hnehin panganaah an awm chiah a, relegate thei dinhmuna ding hman MPL kai thar hian semi final an khel dawn. Ramthar Veng tan chanchin lawmawm a ni a, Aizawl FC erawh hrem theih dinhmunah an ding. MPL Board thuchhuahah, “Aizawl FC chung thu zel tur hi MFA Executive Committee hmasa berin a rel zui ang,” tih a ziak a. Vawiin hian MFA Executive Committee an thukhawm dawn a ni.