HPC (D) te kut tuarin Sakawrdai tlangval a thi, "Kan member rawng taka sawisak hlum a ni hi kan hre thiam lo hle a, a in aṭanga hruai chhuaktu RC Lalropuia, HPC (D) hi a inrawlh ngei niin kan hria,"

Aizawl | Oct 19, 2026: HPC (D) te kut tuarin Tlangval Ngursangzuol Sanate a thi, hemi chungchangah hian, Joint YMA Sakawrdai chuan thuchhuah siamin, "Kan member rawng taka sawisak hlum a ni hi kan hre thiam lo hle a, a in aṭanga hruai chhuaktu RC Lalropuia, HPC (D) hi a inrawlh ngei niin kan hria," an ti a.

"A hruai chhuaktu hian a hruai chhuah chhan dik tak (pawm tlak ngei) sawifiah turin kan phut tlat a, a sawifiah theilo a nih chuan Sakawrdai khaw chhungah a luh kan rem ti tawh lo," an ti bawk.

Joint Young Mizo Association (YMA) Sakawrdai thuchhuah tarlan danin, Tlangval Ngursangzuol Sanate s/o Thanghlira Sanate (L), Hmarveng Branch YMA Sakawrdai, ‘Z’ Section Information Secretary ni lai chu October ni 16, 2026 (Zirtawpni) zan khan HPC (D) te kut tuarin a thi a. He thil thleng hi pawi an tiin an dem takzet tih an puang.

He thil thleng duhawm lo tak hi ruihhlo tawlh (smuggling) nena inzawm ni ngeiin Jt. YMA, Sakawrdai chuan a hria a, chuvangin, YMA chu a ngawi mai mai dawn lova, a chhu zui zel dawn a ni," an ti a.

Joint YMA Sakawrdai chuan, "HPC(D) mi leh sa ṭhenkhat - ruihhlo zawrh kawnga inhnamhnawih an awm tih hriat a nih thu thuchhuahah hian an tarlang bawk a. Heng mite hi Sakawrdai khawchhunga luh kan remti lova. Tilui an awm a, man an nih chuan action na taka lak a ni ang.

Sakawrdai mi ruihhlo tawlhruk kawnga inhnamhnawih an awm tih hriat a nih thunkeh, heng mite hi an thil ṭha lo tih sim tur leh a tilui an awm a, man an nih chuan Jt. YMA, Sakawrdai chuan a ṭul ang zela hma la in, a na thei ang berin an chungchang relsak a ni ang," tiin thuchhuah siamin an tarlang bawk.