Mizo Inchai Title Fight 2026 - Zan hnihna | Remruatpuia leh Lalvenhimi te'n an title an humhim!

Zaninah Mizo Inchai Title Fight 2026 (Palian) Lalsangliana (title holder) vs Lalremtluanga Chhangte

MBOCWWB Rahbi Chhertu Mizo Inchai Title Fight 2026

Zan 2-na : October 29, 2026 (Ningani) - 8:00 PM @ LPS Arena, Falkland

RESULT & REPORT

MIZO INCHAI TITLE FIGHT (PALAIHAWL)

Remruatpuia (Bethlehem Vengthlang, title holder) def Ramropuia (Mamit)

= 73-1

* Kum 26 mi Puipuia'n a vawi hnih na chiang takin Palaihawl title a humhim a, thawh 10 an inchaiah vawi 10 chhiar thlengin tum nga Ropuia a bawhbet a, 73-1-in a hneh. Tawn hriat nei tha zawk a nih piah lamah tharum leh thiamna nei zawk a ni tih lantirin fiahna tling harsatna a tawk lo a, a bawhbeh bakah pawm kangin a pu kang fo bawk.

Title a chuh hmasak berah el thamin kum 33 mi Ropuia a inlan phak lo a, a tawp lamah mualpho lutuk tur tihziaawm nan point khat a sual chhuak hram a, Rs 30,000 a dawng. Mamit tlangval hian theihtawp chhuah mah se lehlam tiderthawng tur khawpin theihna a nei lo a, thawh kuanaah erawh a inveng tluan thei a, thawh dang zawngah Puipuia'n point a hmu vek a ni.

Thawh khatnaah Bethlehem Vengthlang inchai chak Puipuia'n vawi hnih chhiar thleng a bawhbeh hnuah Ropui a tal chhuak a, a hnuah a bawkkhup zawngin vawi 10 chhiar thlengin a bawhbet zui tho. Thawh hnihnaah Puipuia'n vawi thum chhiar thleng a pu kang a; thawh thumnaah vawi hnih chhiar thleng dar betin a bawhbet bawk.

Thawh linaah Puipuia'n la fuhin vawi 10 chhiar thleng a bawhbet a; thawh nganaah pawm kangin referee Lalrempuia'n vawi khat a chhiar hman tihin Ropuia tal chhuak mah se a bawkkhup zawngin vawi 10 chhiar thleng a bawhbet zui leh. Thawh ruknaah Puipuia'n point 14 hmuin thawh 10 an inbeih chhunga a hmuh tam ber a ni a, vawi li chhiar thleng a put kan hnuah dar betin vawi 10 chhiar thleng a bawhbet.

Thawh sarihnaah vawi thum chhiar thleng a chawi kang leh a, thawh riatnaah point riat hmuin a chawi kang a, a tal chhuah hnuah Ropuia'n nawr chhuak ve thungin an inbeih chhunga a point hmuh awm chhun a ni. Inthlahdulin point awm lovin thawh kuana an hmang zo a, thawh hnuhnung berah Puipuia'n nam chhuakin a zangthalin vawi 10 chhiar thleng a bawhbet zui leh a, ropui takin inchai a titawp.

2022 khan Lalmalsawma (Kolasib) hnehin a vawi khat nan Palaihawlah Puipuia a champion a, 2024 khan a vawi khat nan champion kawnghren humhim Ngursangzuala (Saitual) lakah 49-3-in a chak a, tun tumah chiang leh zuala hnehna a chan rualin Rs 50,000 a dawng.

MIZO INCHAI TITLE FIGHT (NUTE)

Lalvenhimi (Bethlehem, title holder) def C Lalrinfeli (Electric Veng, Lunglei)

= 41-8

* A tirah tawn hriat nei tha, kum 30 mi Venhimi a che sual thui teuh hle na a, tha takin a kir leh a, amah chotu Electric Veng Lunglei tleirawl Rinfeli nen thawh nga an inchai chhungin vawi 10 chhiar thlengin tum li a bawhbet a, 41-8-in Nute title a humhim.

2014 atanga champion, Bethlehem Veng nula Venhimi'n hnehtu a tawng lo tluang zel. A tir lamah Nulian champion a ni a, kg 70 chinin Nulian title an chuh thei ang tih dan an siam hnuah Nute-ah hneh theih lohin a vawklallen zui leh a ni.

Title a chuh vawi khatnaah kum 18 mi Rinfeli'n Venhimi a barakhaih a, rei an inchai hmain a bawhbet. Mahse, vawi 10 chhiar a nih hmain kg 6-a rit zawk Venhimi a tal chhuak a, bei letin a bawkkhup zawngin vawi 10 chhiar thleng a bawhbet ve leh.

Che sual nawn lovin Venhimi'n inchai a thunun zui a, thawh hnihnaah dar betin vawi 10 chhiar thleng a bawhbeh. Thawh thumnaah Rinfeli a inveng tluan thei a, point awm lova a tawp hnuah Venhimi'n tharum leh thahrui a veng zui thei lo a, thawh lina leh nganaah Bethlehem Veng nulain vawi 10 chhiar thleng a bawhbet zawn a ni.

Champion lai a nih avangin Venhimi'n Rs 50,000 a dawng a, kum 12 chhung a champion theihna kawnga mi pawimawh a nu leh pa a ko chhuak. Lunglei tleirawlin Rs 30,000 la ve thungin hnehna chang zo lo mah se a hma lam hunah beiseina nei thei turin a inlan.

FREESTYLE WRESTLING (EXHIBITION)

Kg -50 : Vanlalchhuanga (Aizawl) def Lalduhsaka (Kolasib)

= 14-13

Kg -40 : Vanlalhriatpuii (Maite) def Mary Lalduhawmi (Mamit)

= 6-6 (point hmu hnuhnung zawk a nih avangin Vanlalhriatpuii a chak)

Kg -85 : R Vanlalmuana (Aizawl) def Zorammawia (Kolasib)

= Technical Superiority (chungnung takin a chak)

Kg -60 : Lalbiakkima (East Lungdar) def Lalhruaitluanga (Kolasib)

= 7-2

* Environment & Forest Minister Pu Lalthansanga chuan a telpui a, tun hma chuan Mizote thinlungah inchai chak an hlu ber thin a; tun hnuah pawh thuk takin hmun a la luah reng a ni tih sawiin zan hnihna a khuh hawng a ni.

===============

MBOCWWB Rahbi Chhertu Mizo Inchai Title Fight 2026

Zan 3-na : October 30, 2026 (Zirtawpni) - 8:00 PM @ LPS Arena, Falkland

FIXTURE

FREESTYLE WRESTLING (EXHIBITION)

Kg -50 : Lalngaihsangi (Kolasib) v Maria VL Malsawmtluangi (Mamit)

Kg -70 : Zothankima (Serchhip) v J Lalrinkima (Aizawl)

MIZO INCHAI TITLE FIGHT (NULIAN)

Lalhmangaihsangi (Saichal/Zemabawk West, title holder) v Zodinpuii (Ramthar Lunglei)

FREESTYLE WRESTLING (EXHIBITION)

Kg +85 : Lalthlengliana (Aizawl) v R Lalrinchhana (Serchhip)

Kg -75 : Zothansanga (Serchhip) v C Lalawmpuia (Aizawl)